Suliamut uteqqittussaanngitsumut peqataagit
1 Inuiaat oqaluttuarisaaneranni piffissani assigiinngitsuni Jehovamut pisariaqalertarsimavoq akeqqaminut eqqartuussutiminik naammassinninnissaanut. Naakkinninnermigut inuit naapertuilluartut annannissaannut periarfissittarsimavai. (Tuss. 103:13) Qisuariarnissaat inuunissaannut aalajangiisuusarsimavoq.
2 Assersuutigalugu Noa ulersuaq ukiumi 2370-imi u.n.s. pisimasoq sioqqullugu, ’iluarnermik oqaluussivoq’. Piuneerussaasut mianersoqqussut Guutimeersoq tusaaniarsimanngilaat. (2 Pît. 2:5; Epr. 11:7) Jerusalemip ukiumi 70-imi u.n.k. piuneerussaanissaa sioqqullugu Jesusip qanoq ililluni illoqarfiup aserugaanissaanut aniguisoqarsinnaasoq erseqqissumik oqaatigisimavaa. Mianersoqqussutaanut mitallersut tamarmik pillarneqaatigissavaat. (Luk. 21:20-24) Ukiut ingerlaneranni Guutimit pisunik amerlasuunik mianersoqqussuteqartarsimavoq eqqartuussuteqartarsimallunilu.
3 Ullumikkut mianersoqqussummik oqaluussisoqarpoq: Jehovap qangali nalunaarutigisimavaa pissutsit aaqqissuussaanerat ajortoq manna kamannerminik eqqorneqartikkumaarlugu makitajuitsullu kisimik aniguimaartut. (Sef. 2:2, 3; 3:8) Mianersoqqussummik tusarliussap oqaluussissutiginissaanut piffissaq sivikippoq, ingerlapallallunilu. ’Annikilliornartoq angisooq’ qanittuararsuuvoq inuillu makitajuitsut katersorneqaleruttorput. Aap, ’narsat’ maanna ’katersugassaqalereermata qaqortipput’. Suliassamik allamik taama pingaarnerutigisumik nukinginnartigisumillu peqanngilaq. — Mat. 24:14, 21, 22; Juá. 4:35.
4 Maannakkut mianersoqqussut allanut ingerlateqqinnissaanut peqataasariaqarpugut, ’naalassappata naalassanngippataluunniit assigiimmik’. Tamanna Guutip suliassiissutigaa sumiginnagassarinngisarput. (Hes. 2:4, 5; 3:17, 18) Suliamut tamatumunnga tamakkiisumik peqataagutta takutissinnaassavarput Guutimik itisuumik asannittuusugut, inoqatitsinnullu piviusumik isumassuisuusugut annaassisitsinnullu, Jesus Kristusimut, kipititassaanngitsumik uppertuusugut.
5 Iliuuseqarnissamut maanna piffissanngorpoq: Siornagut Jehovap eqqartuussutini naammassigaangagit, tamatigut ajussuseq nutaamik aallarteqqittarpoq Satan inngilipiluilu suli sunniisinnaammata. Maannali allaanerussaaq. Satanip sunniisinnaanera peerneqassaaq. Qaquguluunniit annikilliornartumik angisuumik mianersoqqussut tusarliuteqqissallugu pisariaarutissaaq. (sar. 7:14; Rûm. 16:20) Taamaattumik immikkut pisinnaatitaaffeqarpugut suliamut uteqqittussaanngitsumut peqataanissamut. Periarfissatsinnik tamakkiisumik atuinissatsinnut maanna piffissanngorsimavoq.
6 Oqaluussinermut suliamut atatillugu Paulus qularani oqarsimavoq ’tamarmik aavinut pinngitsuulluni’. (ap. sul. 20:26) Mianersoqqussut tusarliutissallugu sumiginnarsimannginnamiuk allat aavinut pinngitsuulluni misigivoq. Soormi taamaappa? Kiffartornini pillugu ima oqarsinnaagami: ’Tamannami suliariniarpara . . . assoruullunga.’ (Kul. 1:29) Nalerisimaarneq taamaaqataa misiginiartigu suliamut uteqqittussaanngitsumut sapinngisamik annerpaamik peqataanitsigut. — 2 Tim. 2:15.