’Erinitsajuigitsi’
1 Aaqqissuussaanerup ajortup Satanimut atasup naggatissaa qanilliartortillugu ullormut Jehovap aniguisitsiffissaanut erinitsajuilluta utaqqinissarput pingaartorujussuuvoq. Ingammik piffissap imaalilluinnarnerani matumani pissaanillit ajortut Jehovap kisimi oqartussaanera pillugu apeqqummit allamut saasarnissarput aalajangiusimavaat. Ilaatigut taamaaliortarput inuttut soqutigisarpassuatsinnik ulapputiginninnissamut ussernartorsiortinniarsaraluta. Satanip kissaatigaa taamaaliornermigut nakkaannartissalluta oqaluussinermilluunniit aallussivallaarunnaartissalluta. (Jâk. 5:7, 8; Mat. 24:13, 14) Qanoq ililluta ersersissinnaavarput erinitsajuilluta?
2 Kamagittarnitsigut: Oqaluussinitsinni soqutigisaqanngissuseq akerlilersuinerluunniit naammattoortarutsigik kamagittarneq nikallujuilluta oqaluussiuaannarnissatsinnut iluaqutigissavarput. Kamagittarutta ajattuisunik inussiarniitsunilluunniit naapitsigaangatta qunulernavianngilagut ajuallannataluunniit. (1 Pît. 2:23) Ilukkut nukittussutsip tamatuma oqaluussiffigisartakkatsinni inuit suliatsinnut soqutigittaatsut akeqqersimaarfiginnittulluunniit ajortumik eqqartunnginnissaannut ikiussavaatigut. Ajortumimmi eqqartortaraluarutsigik imminut nikallortiinnassaagut oqaluussiartoqatigisartakkavulluunniit nikallortiinnassallugit.
3 Naammagittarluni suliuarnikkut: Inuk oqaloqatigilluarsimasarput angerlarsimanngitsoorteqattaaleraangatsigu naammagittassuserput annikillisinnaasarpoq. Taamatuttaaq pisoqarsinnaasarpoq atuaqqissaaqatigisartakkavut siumukarpallaanngikkaangata sallusuissummilluunniit aalajangiussiumaataaleraangata. Naammagittarlunili suliuarneq kinguneqarluarajuppoq. (Gal. 6:9) Qatanngutip arnap arnaq inuusuttoq arlaleriarlugu pulaaqqittareerlugu kiisami Biibilimik atuaqqissaaqatigisalersimavaa. Pulaarnerini siullerni tallimani arnaq allanik pisassaqarsimavoq. Arfinilissaannik aggernerani kallerluni sialussuartorsuummat qatanngut masattuinnaavoq, apuummalli angerlarsimasoqanngilaq. Arnalli periarfisseqqinnissaa qatanngutip arnap aalajangiusimavaa, tullianilu aggeqqimmat arnaq atuaqqissaartalernissaminut piareersimavoq. Taava tamatuma kingorna siumukarasuarpoq sivitsunngitsorlu Jehovamut tunniulluinnarluni.
4 Nalunngilarput Jehovap ullussaa kingusinaarnavianngitsoq. Ungasinngitsukkut siunertaminik tamakkiisumik naammassinninnissaa utaqqitillugu nalunngilarput taassuma erinitsajuinnera kinguneqarluarumaartoq. (Hab. 2:3; 2 Pît. 3:9-15) Taamaattumik Jehovatut erinitsajuittariaqarpugut kiffartornitsinnilu nakkaannarnata. Jehova eqiasuilluta suliarput pillugu akissarsisitsisussatut ’upperluta erinitsajuillutalu’ isumalluarfigisariaqarparput. — Epr. 6:10-12.