„Ukiut tusindillit nutaat — Siunissaq ilinnut qanoq ittuussava?“
1 Apeqqut taanna nunarsuarmi tamarmi inuppassuit eqqarsaatigisarsimavaat. Ukiuni hundredelikkaani inuiaat angusaqarsimaqaat, saniatigulli ukiuni tusindelinni arlalinni ajornartorsiutit inuiannut erloqissutaasimasut aaqqinneqarsimannginneri inuit pakatsissutigisimavaat. (Job 14:1; Tus. 90:10) Sumi iluaallaatissarsisinnaappat?
2 Qaammatini oktobarimi novembarimilu inoqatitsinnut apeqqutip tamatuma akinissaanut immikkut periarfissaqarpugut, tassa Naalagaaffiup Nutaarsiassaatai nr. 36-p, „Ukiut tusindillit nutaat — Siunissaq ilinnut qanoq ittuussava?“-mik qulequtallip, agguaanneratigut. Oktobarip affaani siullerni atuagassiat Napasuliaq Alapernaarsuiffik Iteritsi!-lu neqeroorutigissavavut. Taava ataasinngornermit 16. oktobarimit sapaammut 19. novembarimut Naalagaaffiup Nutaarsiassaatai nr. 36 inunnut tamanut agguaanneqassaaq. Ajornanngippat Naalagaaffiup Nutaarsiassaatai nr. 36 atuagassianut ilanngullugu neqeroorutigissavarput.
3 Tamakkiisumik peqataasinnaavit? Pisarnertut utoqqaanertat, ilaagiinni kiffartortut pioneerillu siuttuussapput. Qularnanngitsumik oqaluussisartorpassuit qaammatini suliniuteqarfiusuni taakkunani imaluunniit taakkua arlaanni ikiorti-pioneeriusinnaajumallutik atukkatik allangortinniassavaat. Allat pisarnerminnit kiffartornerunissartik aaqqissuutissavaat. Illit qanoq iliorumavit?
4 Atuakkamik atuaqqissaaqatigiinnermi aqutsisut gruppeqatini tamaasa Naalagaaffiup Nutaarsiassaatai nr. 36-p agguaanneqarnissaanut tamakkiisumik peqataanissaannik kajumissaarillutik iliuuseqarsinnaaqaat. Oqaluussisartut ilaat immaqa unittooqqapput. Utoqqaanertat pulaartariaqarpaat ikiorniarlugillu qanoq iliortoqarsinnaanera misissorlugu. Immaqa unittooqqasut qaammatini taakkunani oqaluussisartunik pikkorissunik suleqatigitillugit aaqqissuisoqarsinnaavoq. Naalagaaffiup Nutaarsiassaatai nr. 36-p neqeroorutigineqarnissaanut periaaseq piuminartoq immaqa oqaluussisartut taakkununnga sulilluaqqilernissaannut amigaataaginnarpoq.
5 Kuisimanngitsutut oqaluussisartunngornissamik piukkunnaatilimmik atuakkamik ’Ilisarsineq’-mik atuaqqissaaqateqarutta oqaluussisartunngornissamut aallartiffigissallugu pitsaassaaq. Taamaattoqarpat utoqqaanertat tamanna pillugu oqaloqatigikkit. Allaat inuusuttuaranngorlaat suliamik tamatuminnga pissanganartumik peqataasinnaalluarput.
6 Naqitaaqqap neqeroorutiginissaanut saqqummiussineq piuminartoq naammappoq. Ima oqarsinnaavutit:
◼ [Illoqarfik imaluunniit nuna] maani ilaqutariinnut tamanut tusarliussassamik pingaarutilimmik agguaasseqataavunga. Illit aana pissat. Neriuppunga atuarumaarit.“ Naalagaaffiup Nutaarsiassaatai nr. 36 agguaatsillugu pooqattaqarnani pitsaanerussagunarpoq.
7 Oqaluussilernermi katersuunnerit piareersarluakkat: Piffissani naleqquttuni katersuunnissat utoqqaanertat isumagisariaqarpaat. Kiffartornermut nakkutilliisup illumiit-illumut niuertarfiillu eqqaanni oqaluussiffissanik naammattunik peqarnissani qulakkeertariaqarpaa, tamarmik oqaluussillutik peqataasinnaaqqullugit. Pisinnaasoqartillugu ulluinnarni tamani katersuuttoqartariaqarpoq, aamma sapaatip-akunnerisa naaneranni unnukkullu. Taamatuttaaq ualilluarnerani atuartut sulisullu soraareeraangata katersuuttoqartarnissaq pisariaqarpoq.
8 Angerlarsimanngitsut qanoq iliussavavut? Sapinngisamik amerlasuut oqaloqatigiumavavut, naammattuungitsoorutsigilli Naalagaaffiup Nutaarsiassaatai nr. 36-nik qimatsivigiinnartariaqassavavut. Tassa angalaarfigisat ataasiaannarlugit naqitaaqqamik agguaassiffigineqassapput.
9 Suliuarit: Suliniuteqarnerup novembarip 19-ani naggaserneqannginnerani sapinngisatsinnik angalaarfigisat amerlanerpaat anguniarsarissavavut. Tamanna angujumallugu ajornanngippat isumannaatsuuppallu oqaluussisartut kisimiillutik angalaarnissat siunnersuutigiumavarput. Taamatut sapinngisamik amerlasuut ajornannginnerusumik anguneqarsinnaapput, pisassaminnillu pisariaqartut nanineqarsinnaallutik. Soqutiginninnermik ersersitsisut allattoqqissaarsigit. Danmarkimi nakkutilliisut angalasartut aqqutigalugit aaqqissuisoqarpoq novembarip 19-iaatinnagu angalaartarfimminnik naammassinnissimasut ilagiit allat naammassisimanngitsut ikiorsinnaassallugit. Suleqatigiinnikkut angalaarfigineqarsinnaasut tamarmik angunissaat ajornassanngilaq, illoqarfissuarnut allaat. Utoqqaanertat ilagiinni arlalikkuutaani aaqqissuisoq suleqatigineqartussatut toqqarneqarsimasoq attavigissavaat paasiniarlugu kikkut ikiorneqartariaqarnersut qanorlu ikiuisinnaanerlutik. Aammattaaq Kalaallit Nunaanni angalaarfigisat sapinngisamik anguneqarsinnaasut angujumallugit iliuuseqarumavugut.
10 Naalagaaffiup Nutaarsiassaatai nr. 36 inniminnerneqassanngilaq; ilagiinnut tamanut oqaluussiffigisani pulaagassat amerlassusii naapertorlugit nassiussisoqassaaq. Tamatumani immikkut ittumik suliniuteqarnermi peqataalluarnissannut piareersimallutillu piumassuseqarpit? Siunissaq qanittoq pillugu Guutip neriorsuutai inoqatitsinnut tusarliutissallugit pisinnaatitaaffissuuvoq, taamaattumik tamatta immikkut periarfissaqartilluta peqataalluartariaqarpugut.