Atuagaq Biibilimi ajoqersuutigineqartut atorluartaruk

Biibilimik atuaqqissaaqatigineqartartoq Biibilimi sorpiaat ajoqersuutigineqartut paasilluarnerujartortillugit ilikkakkaminillu maleruaanerujartortillugu ineriartussallunilu anersaakkut inerititaqassaaq. (Tuss 1:1-3) Atuakkami Biibilimi ajoqersuutigineqartut-mi iluaqutissatut ilanngunneqarsimasut atorluarnerisigut atuaqqissaaqatigisartagaq siumukarnissamut ikiorsinnaavarput.

Aallarniutitut apeqqutit. Kapitalit tamarmik apeqqutinik akissutissarsineqartussanik aallarnerneqartarput. Atuaqqissaaqatigineqartoq sammineqartussanik soqutiginnilersinniarlugu apeqqutit atuarsinnaavatit. Imaluunniit kajumissaarsinnaavat apeqqutit tamaasa naatsumik akeqqullugit. Kukkulluni akippat naqqittariaqanngilat. Akissutai suut immikkut sammineqarnissaannik erseqqissarneqarnissaannillu paasinninnissannut iluaqutigissavatit. – Uss 16:23; 18:13.

Tapiliussat. Atuaqqissaaqatigineqartup sammineqartut paasillugillu akuerippagit tapiliussamik innersuussutigineqartumik nammineq misissuinissaanik kajumissaaginnarsinnaavat. Tulliani atuaqqissaalerussi minutsialuit atorlugit atuakkaminik paasinnissimanersoq qulakkeersinnaavat. Iluaqutigissappaguli atuaqqissaaqatigiinnissinni tapiliussaq imaluunniit tamatuma immikkoortui atuarnerisigut piareersarsimasannillu apeqquteqartarnikkut sammisinnaavasi.

Uteqqiineq. Kapitalit naaneranni ungalusat uteqqiinermut iluaqutissat aallarniutitut apeqqutinut akissutilinnik allassimasoqarput. Taakku atuaqqissaaqatigisavit sammineqartunik pingaarnernik paasinnissimaneranik nassuiaasinnaaneranillu qulakkeerinissannut iluaqutigisinnaavatit. Allassimasut allassimaffiillu innersuussutigineqartut tamaasa nipituumik atuarsigit. Tamatumalu kingorna allassimaffik atorlugu (allassimaffiit atorlugit) allassimasut sooq ilumoornerannik nassuiaanissaanik kajumissaarsinnaavat. – ApS 17:2, 3.