Allanik qinnussinissat eqqaamajuk

1. Qanoq nalunngilarput Jehovap qinnutigut pingaartikkai?

QINUSINNAANEQ tunissutaavoq tupinnangaartoq! Uku eqqarsaatigikkit: Jehovap inngilit sorpassuarnik suliassis­simavai. (Tuss 91:11) Aamma ernini pingaarutilimmik akisussaaf­filerpaa. (Mat 28:18) Qinnutinimmi tusarnaarneq aamma allamut suliassiis­sutigaa? Naamik, Jehovap nammineq tamanna isumagisarpaa. Aap, Jehovap nammineerluni qinnutigut tusarnaartarpai. – Tuss 65:3.

2. Allanik qinnussinermut tunngatillugu Paulusi qanoq maligas­saalluarpa?

² Soorunami nammineq ajornar­torsiutigut nalaattak­kagullu Jehovamut qinunikkut oqaluttuarisin­naavagut. Aammali allanik qinnussinissarput eqqaamas­savarput. Apustili Paulusi taamaaliortarpoq. Assersuutigalugu ilagiinnut Efesossimiittunut ima allappoq: “Qinnutinni eqqaajuar­tarpassi.” (Ef 1:16) Paulusip aamma inuit ataasiakkaat qinnuttarpai. Assersuutigalugu Timuutiusimut ima allappoq: “Unnuakkut ullukkullu qamannga pisumik qinusarninni eqqaajuarpakkit.” (Tim 2. 1:3) Paulusi nammineq ajornar­torsiuteqarpoq Jehovamut oqaluttuarisar­takkaminik. (Kor 2. 11:23; 12:7, 8) Tamatumalu saniatigut aamma inoqatiminik qinnussisarpoq.

3. Sooq allanik qinnussinissarput puiortoorsin­naavarput?

³ Allanik qinnussinissarput puiortoor­tarsinnaavarput. Sooq? Nalunaajaasup Sabrinamik atillipa tamatumunnga pissutaasinnaasoq ima oqaluttuaraa: “Ulapputeqar­tuarpugut. Immaqa nammineq ajornar­torsiutigut eqqarsaatigingaaratsigit taakku kisiisa qinnutigisoorsin­naavagut.” Illit aamma taamaaq­qajaasarpit? Taamaappat allaaserisaq una iluaqutigissavat. Nassuiar­neqassapput (1) sooq allanik qinnussinissaq pingaaruteqartoq aamma (2) qanoq taamaaliorsin­naasugut.

SOOQ ALLAT QINNUTTAS­SAVAGUT?

4-5. Allanik qinnussinerput qanoq ‘sunniuteqangaarsinnaava’? (Jaaku 5:16)

⁴ Allanik qinnussineq “sunniuteqangaartarpoq”. (Jaaku 5:16 atuaruk). Qinnutigut ilumut qinnussatta inuunerminni atugaannik allannguisitsisin­naappat? Aap, Jiisusip nalunnginnamiuk apustilip Petrusip naluneras­sagaani ima oqarfigaa: “[Qamannga] pisumik qinnuppakkit upperun­naaqqunak.” (Luk 22:32) Paulusip aamma nalunngilaa qinnussineq qanoq pingaaruteqar­tigisoq. Romami parnaarus­saaqqatilluni Fiilimuumut ima allappoq: ‘Qinnussisarnisi pissutaallutik iperagaanissara ilissinnullu tikeraar­nissara neriuutigaara.’ (Flm 22; studienote “for jeg håber at jeg på grund af jeres bønner” qallunaatuuaniittoq takuuk). Tamatumalu kinguninngua Paulusi iperagaavoq oqaluus­seqqissin­naalerlunilu.

⁵ Soorunami imaanngilaq qinusar­nitsigut Jehova pinngitsaalillugu iliuuseqar­tissinnaagipput. Jehovalli kiffami isumakuluutaat maluginiartarpai ilaannikkullu aalajanger­tarluni qinnutaat malillugit iliuuseqar­niarluni. Taamaattumik tatigin­nilluta ajornar­torsiutit pillugit Jehovamut qinusin­naavugut upperalugu taassuma pitsaanerpaamik iliuuseqarfigissagai. – Tuss 37:5; Korintimiunut 2. 1:11 aamma studienotit qallunaatuuaniittut takukkit.

6. Qinnussagut qanoq misigis­suseqarfigiler­tarpagut? (Petrusimit 1. 3:8)

⁶ Allat qinnukkaangatsigit ‘qamannga pisumik misigin­neqatiginerusarpagut’. (Petrusimit 1. 3:8 atuaruk). Inoqaterput misigin­neqatigigaangatsigu taassuma ajornar­torsiutai maluginiar­tarpagut ikiorusut­tarlugulu. (Mak 1:40, 41) Utoqqaanertaq Michaelimik atilik ima oqarpoq: “Allat pisariaqartitaat pillugit qinugaangama qinnussama atugai maluginiar­nerusarpakka, asaneruler­tarparalu. Qinnussama nalugaluaraat qanillinerullugit misigisarpunga.” Richardip utoqqaanertaasup qinnussinerup iluaqutissartaa alla ima oqaatigaa: “Inoqaterput qinnukkaangatsigu ikiorniarlugu iliuuseqarusun­nerusarpugut.” Taava ima nangippoq: “Qinnussarput ikioraangatsigu soorlulusooq qinnutitta akineqar­nissaanut iliuuseqaqataasugut.”

7. Nammineq ajornar­torsiutitsinnik eqqarsaatigin­nippallaan­nginnissamut allanik qinnussineq qanoq iluaqutigisarparput? (Filippimiut 2:3, 4) (Aamma assit takukkit).

⁷ Allanik qinnussigaangatta nammineq ajornar­torsiutitta eqqortumik isiginnit­taaseqarfiginis­saannut iluaqutigisarparput. (Filippimiut 2:3, 4 atuakkit). Nunarsuaq Saatanimit aqunneqarmat tamatta arlaatigut ajornar­torsiuteqar­tarpugut. (Joh 1. 5:19; Saqq 12:12) Allanik qinnussineq ileqquliuk­kutsigu ‘nunani tamalaani qatanngutitta tamarmik’ uagutsitulli naalliuuteqar­tarnerisa eqqaamanis­saannut iluaqutigis­savarput. (Pet 1. 5:9) Katherine pioneriusoq ima oqarpoq: “Allat qinnukkaangakkit taakkua aamma ajornar­torsiuteqar­tarnerat eqqaasarpara. Taamaattumik nammineq ajornar­torsiutima eqqarsaatigival­laanngin­nissaannut iluaqutigisarpara.”

KIKKUT QINNUSSIN­NAAVAGUT?

8. Qinnussin­naasatta ilaannik eqqaasaqarit.

⁸ Kikkut qinnussin­naavagut? Inuit eqimattak­kuutaartut – soorlu peqqiil­liortut, utoqqalinertik pissutigalugu ajornar­torsiortut imaluunniit meeqqat inuusuttullu atuarfimmi qinngasaar­neqartartut ajortumillu sunnerniar­neqartartut – qinnussin­naavagut. Uppeqaterpassuagut akerlilersor­neqartarput, immaqa ilaquttaminnit naalakkersuisunil­luunniit. (Mat 10:18, 36; ApS 12:5) Politik­kikkullu eqqissiviil­liortoqarnera pissutigalugu qatanngutitta ilaasa angerlarsimaffitsik qimattariaqarsimavaat. Allat pinngortitami ajunaar­nersuarmit eqqugaasimapput. Immaqa uppeqatigut taakku ilisarisiman­ngilagut. Qinnukkaangatsigilli Jiisusip ‘asaqatigiin­nissamik’ peqqussutaa maleruar­tarlugu ersersit­tarparput. – Joh 13:34.

9. Jehovap peqatigiis­sortaani siuttuusut nuliaallu sooq qinnuttas­savagut?

⁹ Aamma Jehovap peqatigiis­sortaani siuttuusut qinnussin­naasarpagut. Taakku tassaasin­naapput Siulersuisoqatigiit ikiortaallu, immikkoor­tortaqarfiup ataatsimiititaliaanut ilaasortat, Betelimi nakkutilliisut, nakkutilliisut angalasartut ilagiinnilu utoqqaanertat kiffartortullu. Qatanngutit taakku imminut tunngasunik isumakuluuteqaraluarlutik uagut pilluta iliuuseqangaartarput. (Kor 2. 12:15) Assersuutigalugu nakkutilliisoq angalasartoq Markimik atilik ima oqarpoq: “Isumakuluutiginerpaasama ilaat tassaavoq angajoq­qaannit ungasissumi najugaqarnera. Angajoqqaakka utoqqaal­lutillu peqqiil­liorput. Aleqannit uianillu isumagineqaraluartut anniaatigisarpara nammineq iliuuseqar­nerusin­naannginnera.” Qatanngutitta eqiasuitsut taakkua isumakuluutaat tamaasa ilisiman­ngikkaluarlugit qinnuttar­nissaat eqqaamasas­savarput. (Tes 1. 5:12, 13) Qatanngutit angutit aappallit suliassatik naammas­sisinnaan­ngikkaluarpaat nuliaminnit tapersersor­neqanngikkunik, taamaattumik nuliaat aamma qinnuttarsin­naavagut.

10-11. Uppeqatigut eqimattak­kuutaartut qinnukkaangatsigit Jehovap nuannarisarpaa? Nassuiaruk.

¹⁰ Sammeriik­katsitut uppeqatigut eqimattak­kuutaartut qinnussin­naasarpagut. Assersuutigalugu inuk aalajangersimasoq eqqarsaatigin­ngikkaluarlugu Jehova qinnuigisin­naavarput parnaarus­saaqqasut ikioqqullugit asasamin­nilluunniit toqusoorsimasut tuppallersaq­qullugit. Utoqqaanertaq Donaldimik atilik ima oqarpoq: “Uppeqatigut ajornar­torsiortut amerlangaarmata ilaannikkut ataatsikkut qinnuttarpagut naalliuttut tamaasa ilanngullugit.”

¹¹ Qinnussinerit taamaattut Jehovap iluarai? Ilaana! Uppeqatittami ilarpassui qanorpiaq pisariaqar­titsinersut naluarput. Taamaattumik uppeqatitsinnik eqimattak­kuutaartunik qinnussineq naleqquppoq. (Joh 17:20; Ef 6:18) Qinnussinerit taamaattut ‘qatanngutitsinnik tamanik asannin­nitsinnut’ ersiutaapput. – Pet 1. 2:17.

INUIT ATAASIAKKAAT QINNUKKAANGATSIGIT

12. Inuit allat atugaasa maluginiar­tarnissaat qinnutitsinnut qanoq iluaqutaassava?

¹² Allat maluginiartakkit. Uppeqatitsinnik eqimattak­kuutaartunik qinnussinerup saniatigut aamma ataasiakkaanik qinnussineq naleqquppoq. Assersuutigalugu ilagiinni katsorsar­neqarsin­naanngitsumik nappaateqar­toqarpa? Inuusuttut ilaat immaqa atuaqatiminit eqqunngitsulior­nissamut sunnerniar­neqarami nikallungava? Angajoq­qaajusup aappaqan­ngitsup meeqqami ‘Jehovap iluarisaatut perorsarnissaa’ ilungersunartippaa? (Ef 6:4) Inuit allat atugaat maluginiar­tarukkit misigin­neqatiginerulis­savatit taamaalil­lutillu qinnukkusun­nerulerlugit.b – Rom 12:15.

13. Inuit ilisarisiman­ngisagut qanoq qinnussin­naavagut?

¹³ Qinnussavit atii taasakkit. Allaat inuk naapissiman­ngisarput atia taallugu qinnussin­naavarput. Assersuutigalugu uppeqatigut Eritreami, Krimimi, Ruslandimi Singaporemilu parnaarus­saaqqasut qinnussin­naavagut. Atii jw.org-imi takusin­naavagut.c Nakkutilliisoq angalasartoq Brianimik atilik ima oqarpoq: “Uppeqatima parnaarus­saaqqasup atia allallugulu nipituumik taagaangakku qinnunnissaa eqqaamanerusarpara.”

14-15. Qinnunniakkatta pisariaqatitai qanoq paasiniarsin­naavagut?

¹⁴ Aalajangersimasut pillugit qinusarit. Issuariigarput, Michael, ima oqarpoq: “Qatanngutit angutit parnaarus­saaqqasut pillugit jw.org-imi atuaraangama uanga taakkunatut atugaqaraluaruma qanoq misigis­sanerlunga takorloor­niartarpara. Nalunngilarami taamatut atugaqaraluaruma nuliara isumakuluutigis­sallugu kissaatigis­sallugulu pisariaqar­titaanik isumagineqassasoq. Taamaalillunga qatanngutit angutit parnaarus­saaqqasut aappallit qinnukkaangakkit aalajangersimasoq qinnutigisin­naasarpara.” – Hebr 13:3.

¹⁵ Qatanngutigut parnaarus­saaqqasut qanoq atugaqarnersut takorloor­niarsarigaangatsigit aalajangersimasut qinnutiginissaat ajornan­nginnerutis­savarput. Assersuutigalugu parnaarussanik paarsisut inussiar­nersuunissaat aamma uppeqatitta akornusersor­neqarnatik guutisiorsin­naanissaat qinnutigisin­naavagut. (Tim 1. 2:1, 2) Aamma qinnutigisin­naavagut uppeqatitta parnaarus­saaqqasup aalajaatsuunera ilagiivisa qiimmas­saatigissagaat Nalunaajaasuun­ngitsullu taassuma pissuserinnera maluginiarlugulu Jehova pillugu ilinniarusulis­sutigissagaat. (Pet 1. 2:12) Soorunami aamma uppeqatigut artorsaateqartut allat qinnunniaraangatsigit taamatut takorluuiniarsin­naavugut. Qinnunniakkatta atugai maluginiar­tarutsigit, atia taagutsigu aalajangersimasullu qinnutigisarutsigit uppeqatigut asangaarlugit takutis­savarput. – Tes 1. 3:12.

QINNUTITTA MANIGUUTTUMIK ISIGINNIT­TAASEQARFIGINISSAAT

16. Qinnutigut maniguuttumik qanoq isiginnit­taaseqarfigis­savagut? (Matiusi 6:8)

¹⁶ Sammeriik­katsitut inoqaterput qinnukkutsigu taassuma atugaanut sunniuteqarsinnaavoq. Maniguut­tuunissarpulli eqqaamas­savarput. Imaanngilaq qinunitsinni Jehova nalusaanik paasitikkipput imaluunniit qanoq pitsaanerpaamik iliuuseqas­sanersoq siunnersoripput. Jehovap kiffami pisariaqartitaat namminneq suli paasinngik­kaluaraat – uagulluunniit paasinngikkigut – nalunngereerpai. (Matiusi 6:8 atuaruk). Taavami sooq qinnussisassaagut? Pissutaasut allaaserisami matumani sammineqareersut saniatigut asaqatigiinnermut ersiutaavoq. Jehovallu kiffami asaqatigiinnerat nuannaarutigingaartarpaa.

17-18. Sooq qinnussinerput Jehovap nuannaarutigingaarpaa? Assersuuteqarit.

¹⁷ Qinnussinerput sunniuteqarpasin­ngikkaluaraangal­luunniit uppeqatitsinnut asanninnermut ersiutaavoq, Jehovallu tamanna maluginiartarpaa. Assersuutigisin­naavagut ilaqutariit mikisunik marlunnik meerallit – nukappiaqqamik niviarsiaq­qamillu. Nukappiaraq napparsimalluni innangavoq. Niviarsiaqqap ataatani ima kimigiiserfigaa: “Aqqalu ikiulaaruk, napparsimasorujussuuvoq!” Ataataasup ernini asagamiuk sapinngisaminik ikioreerpaa isumassorluar­tuarlugulu. Kisianni soorunami panimmi aqqaluaminik asanningaarnera isumakuluutigin­ninneralu takullugit killitsis­sutigingaarpaa.

¹⁸ Jehova aamma taamaappoq. Kajumis­saartarpaatigut asaqatigiin­nissatsinnut uppeqatitsinnillu qinnussinis­satsinnut. Taamaalioraangatta namminis­sarsiornata allat ilumoorluta asallugit ersersit­tarparput, Jehovallu tamanna maluginiartarpaa. (Tes 2. 1:3; Hebr 6:10) Aamma sammeriik­katsitut uppeqaterput qinnukkaangatsigu ilaannikkut taassuma atugaanut sunniuteqarsinnaavoq. Taamaattumik allanik qinnussinissarput eqqaamajuartigu!