“Qallikkut ittut tunngavigalugit eqqartuusseqinasi”

1. Jiisusi pil­lugu Esaja qanoq siulit­tuiva, aam­ma sooq qiim­maal­lan­nar­pa?

ESAJAP Jiisusi Kristusi pil­lugu siulit­tuutaa qiim­maal­laatigalugulu neriuuteqalis­sutigaar­put. Esaja siulit­tuivoq Jiisusi eq­qar­tuus­sis­san­ngitsoq “isimi isigisaat najoq­qutariin­narlugu, aalajangiis­sananilu siutimi tusagaat maliin­narlugu. Nikanar­tut eq­qar­tuutis­savai eq­qor­tumik pineqar­til­lugit.” (Es 11:3, 4) Sooq taman­na qiim­maal­lan­nar­pa? Silarsuarmi inuit siumut isum­mius­sereer­tar­nerat, takusatik tun­ngavigalugit im­min­nut eq­qar­tuut­tar­nerat, nalingin­naam­mat. Eq­qar­tuus­sisoq naam­mal­luin­nar­toq, Jiisusi, uagut qal­lik­kut qanoq it­tuuner­put tun­ngavigalugu eq­qar­tuus­sin­ngisaan­nar­toq pisariaqar­til­luin­nar­par­put.

2. Jiisusip qanoq peq­quaatigut, al­laaserisamilu matumani suut eq­qar­tus­savavut?

² Ul­lut tamaasa al­lat pil­lugit isum­mer­tar­pugut. Uagul­li Jiisusitut naam­mal­luin­nar­tuun­ngin­nat­ta isum­mavut naam­mal­luin­nar­tuun­ngil­lat. Takusatsin­nit sun­ner­tiasar­pugut. Jiisusil­li ima peq­quaatigut: “Qal­lik­kut it­tut tun­ngavigalugit eq­qar­tuus­seqinasi, naaper­tuil­luar­tumil­li eq­qar­tuus­sigitsi.” (Joh 7:24) Jiisusip kis­saatigaa qal­lik­kut it­tut tun­ngavigalugit eq­qar­tuus­sisan­ngin­nik­kut ilaas­sagitsin­ni. Al­laaserisami matumani isum­matsin­nut sun­niuteqarsin­naasut pingasut eq­qar­tus­savavut: Inuup sumiuunera, qanoq aningaasaateqar­tiginera qas­sinil­lu ukioqar­nera. Taak­kunun­nga tun­ngatil­lugu Jiisusi naalal­lugu qanoq qal­lik­kut it­tut tun­ngavigalugit eq­qar­tuus­sinaveersaarsin­naasugut paasinias­savar­put.

SUMIUUNEQ TUNNGAVIGALUGU EQQARTUUSSEQINASI

3, 4. (a) Sooq Petrusip Guutimik nalusunut isigin­nit­taatsini al­lan­ngor­tip­paa? (Al­laaserisap aal­laq­qaataani as­siliaq takuuk). (b) Sal­lusuis­sut nutaaq suna Jehovap Petrusimut ilin­niar­titsis­sutigaa?

³ Takorlooruk apustili Petrusi Cæsareami Guutimik nalusup Cor­neliusip angerlarsimaf­fianukaq­quneqarami qanoq misigisimas­sasoq. (ApS 10:17-29) Guutimik nalusut mingut­tuutut isigalugit peroriar­tor­poq. Al­latul­li eq­qarsalis­sutigisaanik pisoqar­poq. As­sersuutigalugu Guutimit takorruuisin­neqar­poq. (ApS 10:9-16) Takorruuk­kami Petrusip takuaa an­noraaminersuar­tut it­toq uumasunik mingut­tuunik ulik­kaar­toq qilam­mit nunamut ningin­neqar­toq. Taava nipi taas­sumun­nga tutsiup­poq: “Petrusi, nikuigit, toqutseriarlutil­lu neriniarit!” Petrusi aalajangersimar­pasil­luni itigar­titsivoq. Nipilu ima akivoq: “Guutip minguitsuuneragai nalingin­naatis­san­ngilatit.” Petrusip takorruuisitaanermi kingor­na nipip suna pineraa paasin­ngilaa. Taava Cor­neliusip aal­lar­titai tikiup­put. Anersaap il­ler­nar­tup Cor­neliusip il­luanukaq­qum­mani Petrusip aal­lar­titat uteqatigai.

⁴ Petrusi “qal­lik­kut it­tut tun­ngavigalugit” eq­qar­tuus­sisimasuuguni Cor­neliusip angerlarsimaf­fianukar­navian­ngik­kaluar­poq. Juutit Guutimik nalusut inaan­nut isin­ngisaan­nar­put. Taava sooq Petrusi taamaalior­pa? Guutimik nalusut pil­lugit siumut isum­mius­sereeraluarluni takorruuisin­neqarami anersaamil­lu il­ler­nar­tumit siulersor­neqarami eq­qarsar­taatsini al­lan­ngor­tip­paa. Cor­neliusi tusar­naareerlugu Petrusi ima oqar­poq: “Ilumut paasiler­para Guuti kinaas­susersior­tuun­ngitsoq, tas­saasorli inuiaqatigiin­ni kik­kuusuniluun­niit im­minik mianerin­nit­tumik iluar­tulior­tumil­lu ilas­sin­nit­tar­toq.” (ApS 10:34, 35) Paasin­nit­taaseq nutaaq taan­na kristumiunut tamanut sun­niuteqas­sam­mat Petrusip pis­sanganar­tip­paa. Qanoq sun­niuteqas­sagami?

5. (a) Jehovap kristumiut tamarmik sumik paasitik­kusup­pai? (b) Sal­lusuis­sut nalun­ngik­kaluarlugu qanoq misigeq­qajaasarsin­naavugut?

⁵ Jehovap Petrusi aq­qutigalugu kinaas­susersior­tuun­ngin­nerminik kristumiut tamaasa paasitip­pai. Jehovap sumiuunersugut sumiutul­lu oqaaseqar­nersugut apeq­qutaatin­ngilai. Mianerigutsin­ni eq­qor­tulior­tuarut­talu iluariuas­savaatigut. (Gal 3:26-28; Saqq 7:9, 10) Taman­na nalun­ngereerunar­pat. Taavami nunami ilaqutariin­niluun­niit siumut isum­mius­sereer­nermik ileq­qoqarfiusumi peroriar­torsimaguit? Im­maqa eq­qarsaraluarlutit kinaas­susersior­tuunak imaas­sin­naava siumut isum­mius­seq­qajaasar­tutit? Guutip kinaas­susersior­tuun­ngin­neranik paasin­nin­nis­samut Petrusip inuit al­lat ikioreeraluarlugit suli siumut isum­mius­sereer­tar­poq. (Gal 2:11-14) Taamaat­tumik qanoq Jiisusi naalas­sin­naavar­put al­lal­lu isik­kuat tun­ngavigalugu eq­qar­tuut­tarun­naarlugit?

6. (a) Siumut isum­mius­sereer­nermik ileq­qoqarun­naar­nis­samut suna iluaqutigisin­naavar­put? (b) Qatan­ngutip angutip akisus­saasup nalunaarusiaa sumik ersersitsiva?

⁶ Siumut isum­mius­sereeq­qajaasar­nerluta paasiumal­lugu im­minut misis­sor­tariaqar­pugut. Isigin­nit­taaser­put Guutip oqaasiani ilik­kak­katsin­nut sanil­liut­tariaqar­par­put. (Tuss 119:105) Ikin­nguter­put aperisin­naavar­put arlaatigut nam­mineq nalusatsin­nik siumut isum­mius­sereeq­qajaasar­nersugut maluginiarsimaneraa. (Gal 2:11, 14) Misigis­sutsit taamaat­tut sungius­simangaaratsigit im­maqa al­laat siumut isum­mius­sereeq­qajaasarluta malugineq ajor­par­put. Qatan­ngum­mut angum­mut akisus­saasumut taama pisoqar­poq. Aap­pariit pif­fis­saq tamaat kif­far­tor­tut pil­lugit nalunaarusior­poq. Uiusoq naggueqatigiin­nit inup­pas­suar­nit nikagineqar­tuneersuuvoq. Qatan­ngutip angutip akisus­saasup uiusoq arlalitsigut nersualaar­paa, imali al­lal­luni: “[Nunamit] tas­san­ngaan­neeraluarluni pis­susilersoriaasiatigut inooriaasiatigul­lu al­lat paasivaat [naggueqatigiit ilaaf­figisaanut] ilaaneq pis­sutigiin­narlugu mingut­tuumik nikanar­tumil­lu inooriaaseqar­toqar­tariaqan­ngitsoq, tas­sami [taak­kunan­nga] kingoq­qisut amerlasuut taamatut pis­suseqar­tarma.” Taman­na qanoq ilin­niutigis­savar­put? Jehovap peqatigiis­sor­taani qanorluun­niit akisus­saaf­feqar­tigigaluarut­ta im­minut misis­sor­tariaqar­pugut sutigul­lu siumut isum­mius­sereeq­qajaasar­nerluta paasinias­sagatsigu ikior­neqar­nis­sar­put akuerisariaqarlugu. Aam­ma qanoq iliorsin­naavugut?

7. ‘Uum­mater­put am­marsimal­lugu’ qanoq ersersis­sin­naavar­put?

⁷ ‘Uum­mater­put am­marutsigu’ siumut isum­mius­sereer­tar­neq asan­nin­nermik taarsis­savar­put. (2 Kor 6:11-13) Nunaq­qatitit ilit­tul­lu oqaasil­lit kisiisa ilagerusun­nerusar­pigit? Taamaap­pat al­lat ilaginiar­tak­kit. Qatan­ngutit as­sigiin­ngitsunik tunuliaqutal­lit oqaluus­seqatiserisin­naavatit. Aam­ma neriar­toq­qul­lugil­luun­niit qaaq­qusin­naavatit. (ApS 16:14, 15) Pif­fis­sap ingerlanerani uum­matit asan­nin­nermik ulik­kaaruk­ku siumut isum­mius­sereer­tar­neq inis­saarus­saaq. “Qal­lik­kut it­tut tun­ngavigalugit” eq­qar­tuus­sinermut pis­sutaasin­naasoq al­la eq­qar­toriar­tigu.

PISUUJUNEQ PIITSUUNERLUUNNIIT TUNNGAVIGALUGU EQQARTUUSSEQINASI

8. Mosesimik al­lak­kat pingajui 19:15 naaper­torlugu al­lat pisuujunerat piitsuuneral­luun­niit tun­ngavigalugu qanoq isigin­nit­taaseqarfigilersoorsin­naavavut?

⁸ Pigisatigut pisuus­sutit isigin­nit­taatsitsin­nut sun­niuteqarsin­naap­put. Mosesimik al­lak­kat pingajui 19:15-imi al­las­simavoq: “Piitsumut ililiutis­san­ngilatit pisoorluun­niit ikiorser­nias­sanagu. Nunaq­qatisi naaper­tuil­luar­tumik eq­qar­tuut­tas­savasi.” Al­lat pisuujunerat piitsuuneral­luun­niit qanoq isigin­nit­taatsitsin­nut sun­niuteqarsin­naagami?

9. Salomop ajoraluar­tumik ilumoor­toq suna al­lap­paa, tas­san­ngalu suna ilik­kar­par­put?

⁹ Salomop isumas­sarsisitaal­luni ajoraluar­tumik ilumoor­toq una al­lap­paa: “Piitsoq tul­liminit al­laat uumis­sor­neqar­tar­poq, pisooq amerlasuunik ikin­nguteqar­tar­poq.” (Uss 14:20) Us­sam­mit suna ilik­kar­par­put? Mianersun­ngik­kut­ta qatan­ngutit piitsut pin­nagit pisuut ikin­ngutigerusulersin­naavavut. Al­lat pigisaat pigin­ngisaal­luun­niit tun­ngavigalugit eq­qar­tuus­sinis­saq sooq taama navianaateqar­tigaa?

10. Ajor­nar­torsiut suna pil­lugu Jaakup kristumiut mianersoq­quai?

¹⁰ Qatan­ngutit pisuujunerat piitsuuneral­luun­niit apeq­qutaatil­lugu eq­qar­tuut­tarutsigit ilagiin­ni avis­saar­tuutsitsilersin­naavugut. Kristumiut siul­liit ilagiivisa ilaan­ni taama pisoqarmat Jaakup taak­ku taman­na pil­lugu mianersoq­quai. (Jaaku 2:1-4 atuakkit). Ilagiin­ni avis­saar­tuut­toqar­nis­saa akuersaan­ngisaan­nas­savar­put. Taavami qanoq ilil­luta al­lat pigisaat tun­ngavigalugit eq­qar­tuun­naveersaarsin­naavavut?

11. Pigisat inuup Jehovamut at­taveqar­neranut sun­niuteqar­tar­pat? Nas­suiaruk.

¹¹ Qatan­ngutivut Jehovatut isigin­nit­taaseqarfigisariaqar­pavut. Pisuujuneq piitsuunerluun­niit Jehovamit erlin­nar­tutut isigineqar­nermut aalajangiisuun­ngilaq. Qanoq aningaasaateqar­tiginer­put imaluun­niit qanoq pigisaqar­tiginer­put Jehovamut at­taveqar­nitsin­nut apeq­qutaan­ngilaq. Jiisusi oqar­poq ‘pisuumut Qilaap naalagaaf­fianut iser­nis­saq ajor­nakusooqisoq’, kisian­ni oqan­ngilaq ajor­narluin­nar­toq. (Matt 19:23) Jiisusi aam­ma oqar­poq: “Pil­luar­pusi piitsuususi, Guutim­mi naalagaaf­fia ilis­si pigaarsi.” (Luk 6:20) Isumaqan­ngilarli piitsut tamarmik Jiisusimut tusar­naas­sasut im­mik­kul­lu it­tumik pil­luaq­quneqas­sasut. Piitsor­pas­suit Jiisusimik malin­nin­ngil­lat. Tas­sa inuup qanoq pigisaqar­tiginera tun­ngavigalugu Jehovamut at­taveqar­nera nalilersorsin­naan­ngilar­put.

12. Al­lak­kani Il­ler­nar­tuni pisuut piitsul­lu qanoq ilitsersor­neqar­pat?

¹² Nalitsin­ni Jehovap in­nut­taasa ilaat pisuujup­put al­lal­lu piitsuul­lutik. Tamarmil­li Jehova asavaat uum­matik­kul­lu iluun­ngarlutik kif­far­torfigerusul­lugu. Al­lak­kani Il­ler­nar­tuni pisuut kajumis­saar­neqar­put “pisuus­sutitil­luun­niit al­lan­ngujasut isumal­luutigeq­qunagit, isumal­luutigeq­qul­luguli Guuti”. (1 Timotheusi 6:17-19 atuakkit). Guutip oqaasiani Jehovap kif­fai tamarmik, pisuut piitsul­lu, aningaaserituujuneq pil­lugu mianersoq­quneqar­put. (1 Tim 6:9, 10) Qatan­ngutivut Jehovatut isigin­nit­taaseqarfigigutsigit sunik pigisaqar­nerat sunil­luun­niit pigisaqan­ngin­nerat tun­ngavigalugu eq­qar­tuutis­san­ngilavut. Taavami inuup ukiui? Taman­na eq­qar­tuus­sinis­samut tun­ngavis­saava?

ALLAT UKIUI TUNNGAVIGALUGIT EQQARTUUSSEQINASI

13. Utoq­qar­nik ataq­qin­nin­neq pil­lugu Biibilimi qanoq ilin­niar­tin­neqar­pugut?

¹³ Biibilimi al­las­simavoq utoq­qaat ataq­qis­sagivut. Mosesimik al­lak­kat pingajui 19:32-mi al­laq­qavoq: “Qeersuut nikuif­figis­savatit utoq­qaal­lu ataq­qil­lugit. Guutit mianeris­savat.” Us­satini paasitin­neqar­pugut ‘nutsat qeersuusut niaqorutaasar­tut kusanangaar­tut naaper­tuil­luar­nerup aq­qutaaniik­kaangata’. (Uss 16:31, NW) Paulusip Timotheusi peq­quaa utoq­qaat sukan­nersumik oqaluun­nagit ataatagisutut pisaq­qul­lugit. (1 Tim 5:1, 2) Timotheusi qatan­ngutinut angutinut utoq­qar­nut oqar­tus­saas­suseqar­tunut ilaagaluarluni misigin­neqatigin­nit­tumik ataq­qin­nit­tumil­lu pis­suseqar­tuar­tariaqar­poq.

14. Uagutsin­nit utoq­qaanerusumik qaquguk­kut naq­qiisariaqarsin­naavugut?

¹⁴ Taavami utoq­qaq piaaraluni ajor­tulior­pat Jehoval­luun­niit iluarin­ngisaanik siam­mar­terip­pat? Jehovap piaaraluni ajor­tulior­toq, utoq­qaagaluar­pat ataq­qisaagaluar­pal­lu, soqutigin­ngitsuusaar­navian­ngilaa. Najoq­qutas­siaq Esajap al­lataa maluginiaruk: ‘Ajor­tulior­toq, 100-nik ukioqaraluaruniluun­niit, perloq­quneqas­saaq.’ (Es 65:20, NW) Najoq­qutas­siaq tamatumun­nga as­singusoq Ezekielip takorruugaani atuar­neqarsin­naavoq. (Ez 9:5-7) Taamaat­tumik Jehovap, it­tuin­nar­tup, ataq­qinis­saa pingaar­ner­paavoq. (Dan 7:9, 10, 13, 14) Jehovamik ataq­qin­nin­neq ikior­tariaqar­tumik, qanorluun­niit utoq­qaatigigaluar­tumik, naq­qiinis­samut sapiis­suseqalis­sutigis­savar­put. – Gal 6:1.

15. Qatan­ngutinik angutinik inuusut­tunik ataq­qin­nin­nermut tun­ngatil­lugu apustili Paulusi qanoq ilin­niarfigaar­put?

¹⁵ Qatan­ngum­mi angut inuusup­pat? Taava ataq­qineqar­tariaqan­ngila? Naamik, Paulusi Timotheusimut al­lap­poq: “Inuusut­tuunerit pis­sutigalugu ilin­nik nikas­saasoqan­ngik­kili, up­per­tunul­li maligas­saatin­niarit oqalun­nik­kut, inuuserisak­kut, asan­nin­nik­kut, ilumoorsutsik­kut minguis­sutsik­kul­lu.” (1 Tim 4:12) Paulusi taama al­lam­mat Timotheusi 30-t mis­saan­nik ukioqar­poq. Taamaat­toq Paulusimit pingaarutilerujus­suarmik akisus­saaf­filer­neqar­poq. Taman­na qanoq ilin­niarfigis­savar­put? Qatan­ngutit angutit inuusut­tut ukiui tun­ngavigalugit eq­qar­tuutis­san­ngilavut. Jiisusip 33-in­nar­nik ukioqarluni angusar­pas­sui eq­qarsaatigik­kit!

16, 17. (a) Qatan­ngut angut ilagiin­ni kif­far­tor­tun­ngus­sanersoq utoq­qaaner­tan­ngus­sanersorluun­niit utoq­qaaner­tat qanoq aalajanger­tar­paat? (b) Nam­mineq isum­mat najuk­kamiluun­niit ileq­qut Al­lak­kanut Il­ler­nar­tunut qanoq akerliusin­naap­pat?

¹⁶ Kulturit ilaan­ni angutit inuusut­tut ataq­qineqar­piar­neq ajor­put. Taman­na pis­sutigalugu utoq­qaaner­tat im­maqa angutip inuusut­tup piumasaqaatinik eq­qor­titsisup al­laat ilagiin­ni kif­far­tor­tun­ngor­nis­saa utoq­qaaner­tan­ngor­nis­saaluun­niit inas­sutigineq ajor­paat. Biibilimili al­las­siman­ngil­luin­nar­poq qatan­ngut angut ilagiin­ni kif­far­tor­tutut utoq­qaaner­tatul­luun­niit toq­qar­neqas­saguni aalajangersimasumik ukioq­qor­tus­suseqar­tariaqar­toq. (1 Tim 3:1-10, 12, 13; Tit 1:5-9) Utoq­qaaner­taq kulturini pis­sutigalugu taamatut malit­tarisas­sior­toq Guutip oqaasianik maleruaan­ngilaq. Utoq­qaaner­tat nam­min­neq isum­matik najuk­kamin­niluun­niit ileq­qut tun­ngaviginagit Guutil­li oqaasia tun­ngavigalugu angutit inuusut­tut nalilersor­tas­savaat. – 2 Tim 3:16, 17.

¹⁷ Ilagiin­ni kif­far­tor­tunik utoq­qaaner­tanil­luun­niit toq­qaanermut najoq­qutas­siat Biibilimeersut utoq­qaaner­tat maleruan­ngip­patigit qatan­ngutit angutit piumasaqaatinik eq­qor­titsisut toq­qar­neqar­nis­saat akor­nusersin­naavaat. Nunat ilaan­ni ilagiin­ni kif­far­tor­tup akisus­saaf­fiit pingaarutil­lit ajun­ngitsumik isumagisarmagit utoq­qaaner­tan­ngor­nis­samut Biibilimi piumasaqaatinik eq­qor­titsinera utoq­qaaner­tat isumaqatigiis­sutigaat. Utoq­qaaner­tal­li ukioq­qor­tunerusut ilaat oqar­put utoq­qaaner­tan­ngor­nis­samut inuusup­pasip­pal­laar­toq, taamaat­tumik utoq­qaaner­tan­ngor­nis­saa inas­sutigin­ngilaat. Ajoraluar­tumik qatan­ngut taan­na isik­kuni pis­sutigiin­narlugu utoq­qaaner­tan­ngor­tin­neqan­ngilaq. Nunar­pas­suar­ni taamatut eq­qarsar­tar­neq nalingin­naar­pasip­poq. Nam­mineq isum­mavut najuk­katsin­niluun­niit ileq­qut pin­nagit Biibilimik tutsuigin­nin­nis­sar­put pingaaruteqarluin­nar­poq. Taamaaliorut­ta Jiisusi naalal­lugu qal­lik­kut it­tut tun­ngavigalugit al­lat eq­qar­tuut­tas­san­ngilavut.

NAAPERTUILLUARTUMIK EQQARTUUSSIGITSI

18, 19. Jehovatut qatan­ngutitsin­nut isigin­nit­taaseqar­nis­samut suna iluaqutigis­savar­put?

¹⁸ Naam­mal­luin­nan­ngitsuuvugut, al­lanul­li siumut isum­mius­sereer­nata Jehovatut isigin­nit­taaseqar­nis­saq ilin­niarsin­naavar­put. (ApS 10:34, 35) Taamaat­tumik Guutip oqaasiani eq­qaasitsis­sutit eq­qumaf­figiuar­tariaqar­pavut. Maleruarutsigit Jiisusip ‘qal­lik­kut it­tut tun­ngavigalugit eq­qar­tuus­sisan­ngin­nis­samik’ peq­qus­sutaa naalas­savar­put. – Joh 7:24.

¹⁹ Qanit­tuk­kut Kun­ngit­ta, Jiisusip Kristusip, inuit tamaasa eq­qar­tuutis­savai. Takusani tusak­kaniluun­niit tun­ngaviginagit Guutip najoq­qutas­siai naaper­tuil­luar­tut tun­ngavigalugit eq­qar­tuus­sis­saaq. (Es 11:3, 4) Taman­na qilanaar­nangaarami!