Jehovap iluarisaanik pilliuteqartaritsi
’Soraarata Jesus Kristusikkut pilliutinik qujaniutinik Guuti aatsivigisigu, tamassa qarlut taassuma aqqanik nassuerutiginnittut anitaannik.’ — EPRÎARIT 13:15.
1. Israelikkut ajortiliusut qanoq iliornissaannik Jehovap kajumissaarsimavai?
JEHOVAP iluarisaminik imminut pilliuteqartut ikiortarpai. Taamaattumik Israelikkut, uumasunik pilliuteqartartut, qanga iluarisimavai. Qanorli pisoqarpa arlaleriaqalutik ajortuliortareersullu? Pruffiiti Hoseas aqqutigalugu imatut kajumissaarneqarput: ’Jehovamut Guutinnut saanniarit, Israel-iaa; ajortuliat naakkiussutigigakku. Oqaasissanik nassarlusi saanniaritsi Jehovamut oqarfigalugu: „Ajortuliavut tamaasa isumakkeerigit, naammaginiaraluartigut, qarlutsinnik taarteqartikkatsigik ussigit tunissutissaagaluit.“’ — Húsia 14:2, 3.
2. ’Qarlut ussigi’ suuppat, qanorlu ililluni Hoseasip siulittuutaa Paulusip taatsiarpaa?
2 Tassa Guutip itsaq innuttai ’qarluminnik’, imaluunniit ’qarlumik ussiginik’ (NV), Jehova Guutimut pilliuteqarnissaminnut kajumissaarneqarsimapput. Taakku suuppat? Tassaapput ilumoorluni pilliutit qujaniutaasut, imaluunniit unnersiutiginnissutaasut. Apustili Paulusip siulittuut tamanna tikkuaatigalugu kristumiut hebræeriusut kajumissaarpai ’pilliutinik qujaniutinik [unnersiutiginnissutinik] Guuti aatsivigeqqullugu [tunissuteqarfigeqqullugu], tamassa qarlut taassuma aqqanik nassuerutiginnittut anitaannik’. (Eprîarit 13:15) Ullumikkut taamatut pilliuteqarnissaminnut Jehovap Nalunaajaasuisa suna ikiortigisinnaavaat?
’Uppersusiatigut malissigik’
3. Paulusip Eprîarinut agdlagkat 13:7-imi allakkamini suna isumagaa, tamatumalu apeqqut suna pilersippaa?
3 Paulusip hebræerinut unnersuussutaa tamanna maleruarutsigu ikiorterput angisooq, Jehova Guuti, iluarisaanik pilliuteqarfigisinnaassavarput. Assersuutigalugu, apustili ima allappoq: ’Siulersortisi Guutip oqaasianik oqaluttut eqqaaniarsigik; inuuneratalu naggataa [ileqquatalu kingunera] misissorlugu uppersusiatigut malissigik.’ (Eprîarit 13:7) Paulusip ima oqarami kikkut eqqarsaatigai: ’Siulersortisi,’ imaluunniit ’siunnersortisi’, ’eqqaaniarsigik’?
4. (a) Grækerisuua naapertussagaanni ’siulersortaasut’ qanoq iliortarpat? (b) Jehovap Nalunaajaasuisa akornanni kikkut ’siulersortaappat’?
4 Ilagiinni ’siulersortaasut’ imaluunniit siuttuusut versini 7-imi, 17-imi 24-milu Paulusip eqqartorpai. Kristumiut utoqqaanertat ’misissuisinnaassusertik’, imaluunniit ’siulersuisinnaassutsitik’, (grækerisut: kybernēsʹeisa) ilagiit iluanni unnersuussigaangamik aammalu siulersortaagaangamik atortarpaat. (1 Korintumiut 12:28) Apustililli Jerusalemimilu utoqqaanertat allat isumalioqatigiittut ilagiinnut tamanut unnersuussisartuusutut sulisimapput. (apustilit suliait 15:1, 2, 27-29) Ullumikkuttaaq siulersuisoqatigeeqarpoq utoqqaanertanik ilaasortalimmik Jehovap Nalunaajaasuinik silarsuarmi tamarmiittunik anersaakkut nakkutilliisuusunik.
5. Ilagiinni utoqqaanertat Siulersuisoqatigiinnullu ilaasortaasut sooq qanorlu qinnuttariaqarpavut?
5 Tassa imaappoq ilagiinni ataasiakkaani utoqqaanertat aammalu Siulersuisoqatigiit tassaapput akunnitsinni siulersortaasut. Taamaattumik taakku ataqqisariaqarpavut ilagiinnillu siulersuinissaminnut ilisimassummik pisariaqagaannik tuneqqullugit Guutimut qinnuttariaqarlugit. (Takuuk Evfisumiunut agdlagkat 1:15-17.) ’Guutip oqaasianik uagutsinnut oqaluttunik’ eqqaamanninnissarput naleqqulluinnartuuvoq! Timoteus anaanaminit aanaminillu, kingornalu Paulusimit allanillu, ajoqersorneqarsimavoq. (2 Timûtiuse 1:5, 6; 3:14) Taamaattumik taakkua ileqquata kingunerat qimerloorsinnaasimavaa uppersusiatigullu malissinnaasimallugit.
6. Kikkut uppersusiat ilaassavarput, kinali malissavarput?
6 Nalunnginnatsigu allat eqqaassanngikkaanni Abel, Noa, Abraham, Sara, Rahab, aammalu Moses toqunissartik tikillugu Guutimut aalajaattuarsimasut, nangaanata uppersusiatigut malissinnaavavut. (Eprîarit 11:1-40) Aammattaaq angutit ilumoortut maannakkut akunnitsinni siulersortaasut uppersusiatigut malissinnaavavut. Soorunami inuit naammalluinnanngitsut malinngilavut, Kristusimmi maligassiaa pingaarnerutittuarparput. Soorlu Bibelimik nutserisoq Edgar J. Goodspeed oqarsimasoq: „Uppertup maligassai tassaanngillat itsaq sapiitsut, tassami ajunnginnerusumik Kristusimi maligassaqarpoq. . . . Kristumiutut arpattartup Jesus siunnersimaffigisariaqarpaa.“ Aap, ’Kristus anniarsimavoq uagut pilluta maligassaqartilluta, tumini atuaqqullugit’. — 1 Pîtruse 2:21; Eprîarit 12:1-3.
7. Jesus Kristus pissutigalugu atugarliortinneqarnermut isumaqarfiginninnerput Eprîarinut agdlagkat 13:8-mi allassimasunit qanoq sunnerneqartariaqarpa?
7 Guutip ernera Paulusip maanna eqqartulerpaa: ’Jesus Kristus ippassarlu ullumilu naassaanngitsumillu taannaavoq.’ (Eprîarit 13:8) Nalunaajaasut aalajaatsut, soorlu Stefanus aamma Jakob, assuarnaalluinnarnerminnik ersersitsisimapput, taamaalillutillu Jesusip maligassiaa allanngujuitsoq malissimallugu. (apustilit suliait 7:1-60; 12:1, 2) Kristusip ajoqersugaasut toqunissaminnut piumassuseqarsimagamik uppersusiat uagutsinnut maligassaalluarpoq. Inuit Guutimik-mianerinnittut nalunaajaasutut toqunissaminnut tunuarsimaartuunngillat, Jesusip ajoqersugarimmatik. Itsaq taamaassimapput, ullumikkut taamaapput, siunissamilu taamaakkumaarlutik.
Ajoqersuinerluutit ingalassimasigik
8. Eprîarinut agdlagkat 13:9-mi Paulusip oqaasii ataatsimut eqikkarlugit qanoq oqaatigerusuppigit?
8 Jesusip kinaassusiata ajoqersuutaasalu allanngujuissusiat killinneqaatigisariaqarparput taassuma apustiliisalu ajoqersuutaannik aalajangiusimannittuarnissatsinnut. Paulus hebræerinut ima allappoq: ’Ajoqersuutinut nalinginnarnut allanartunut tammartinnaveeritsi, iluanaarnaqimmat uummatikkut aalajaallilluni saammaannikkut, nerisassatigut pinnani; taakku tamakkuninnga isumaliortunut iluaqutaanngillat.’ — Eprîarit 13:9.
9. Kristumiunut hebræeriusunut allakkamini suut mianernarnerusut Paulusip innersuussutigai?
9 Pisimasut maluginiarnartut, soorlu Sinajip Qaqqaani Mosesip inatsisaasa tunniunneqarnerat aammalu Davidip kunngiunera soraajanngitsoq, juutinit taaqqajaaneqartarput. Paulusilli kristumiut hebræeriusut eqqaasippai naak angeruseq tunngavigalugu inatsisit pilersinneqarnerat tupinnangaaraluaqisoq taamaattoq angerusisaap pilersinneqarnerani nalunaaqutit, tupinnartuliat, killinnartuliarpassuit anersaamillu iluartumik agguaassinerit atorlugit Guuti suli tupinnarnerusumik nalunaajaasimasoq. (apustilit suliait 2:1-4; Eprîarit 2:2-4) Davidip kinguaavisa nunami kunngiussusiata ukiumi 607-imi u.n.a.s. uppitinneqarsimaneratut Kristusip qilammi naalagaaffia uppitinneqarsinnaanngilaq. (Eprîarit 1:8, 9; 12:28) Aammattaaq Sinajip Qaqqaani pisimasunit tupinnangaartunit mianernarnerungaartup saavanut Jehovap tanitat katersussavai, tassa Zionip qaqqaanut qilammiittumut pissapput. — Eprîarit 12:18-27.
10. Eprîarinut agdlagkat 13:9 naapertussagaanni uummat sumit nakussatsinneqartarpa?
10 Taamaattumik juutiussutsimik pingaartitsivallaartut ’ajoqersuutaannut nalinginnarnut allanartunut tammartinneqarumanatik’ hebræerit mianersortariaqartussaasimapput. (Galâsiamiut 5:1-6) Sallusuissummi aalajaattuaannassagaanni ajoqersuutinit taamaattunik pinnatik kisiannili ’Guutip saammaanneragut uummat nakussatsittariaqarpoq’. Nerisassat pilliutissallu qanoq pingaaruteqartiginerat qularnanngitsumik isumaqatigiinngissutigineqarsimavoq, Paulusimi allammat uummat nakussatsittartoq ’nerisassatigut pinnani; taakku tamakkuninnga isumaliortunut iluaqutaanngimmata’. Guutimut-tunniusimaneq utertitsissutissamillu pingaartitsineq inunnut ataasiakkaanut anersaakkut iluaqutaavoq, nerisassanulli immikkut ittunut imaluunniit immikkut ittumik nalliuttorsiornernut soqutiginnippallaarneq taamatut iluaqutaanngilaq. (Rûmamiut 14:5-9) Kristusillu pilliutaatigut kinguaariit Levikkut pilliutaat atortussaajunnaarsinneqarput. — Eprîarit 9:9-14; 10:5-10.
Pilliutit Jehovap iluarisai
11. (a) Eprîarinut agdlagkat 13:10, 11-mi Paulusip oqaasiisa suna isumagaat? (b) Kristumiut sumik assersuutaasumik tunisiveqarpat?
11 Palasit Levikkuusut nersutit pilliutaasut neqaannik nerisarsimapput, Paulusili ima allappoq: ’Tunisivik tupermi [illernartuutiliami] kiffartortut neriffigisinnaanngisaat pigaarput. Nersutimmi aavi ajortit pillugit palasiunerup illernartuummut eqquttaraangagit nersutit taakkua timaat tammaarfiup avataani ikikkarneqararaat’ ullormi saammaannartitsivimmi. (Eprîarit 13:10, 11; 3 Môrsase 16:27; 1 Korintumiut 9:13) Jesusip pilliutaa ajortinik isumakkeerissutaasoq Jehovallu, isumakkeerfiginninneranik inuunermullu naassaanngitsumut annassummik kinguneqartoq, tunngavigalugu Guutimut qanillisinnaalernermut assersuutaasumik kristumiut tunisiveqarput.
12. Eprîarinut agdlagkat 13:12-14-imi kristumiut tanitaasut qanoq iliornissaminnik kajumissaarneqarpat?
12 Ullormik saammaannartitsivimmik naleqqiussineq Paulusip malersunngilaa, imali ilanngussilluni: ’Tamanna pillugu Jesusissaaq [Jerusalemip isaaffiata] avataani anniartitaavoq, inuit nammineq aammigut iluarsisissagamigit.’ Taakani, illoqarfiup avataani, Kristus toqusimavoq taamaalillunilu saammaannartitsissutissaq naammalluinnartoq pilliutigalugu. (Eprîarit 13:12; Juánase 19:17; 1 Juánase 2:1, 2) Kristumiut tanitaasut allat apustilip Paulusip ima kajumissaarpai: ’Taamaattumik tammaarfiup avataanut Kristus annivigisigu mitanneqarneranik ersoqatigalugu, tamaani nunguttussaanngitsumik illoqarfeqannginnatta; kisianni illoqarfik piumaartussaq tikinniarparput.’ (Eprîarit 13:13, 14; 3 Môrsase 16:10) Naak Jesusitut asissorneqartaraluarluta Jehovap Nalunaajaasuisut qasusuittuarpugut. Silarsuaq nutaassaq qilanaaralugu utaqqitilluta ’guutiitsussutsimut naaggaarluta silamiut kajungerisaat atorunnaarlugit silami matumani inuuvugut piitaajuilluta iluartumillu ileqqoqarluta Guutilu mianeralugu’. (Títuse 2:11-14; 2 Pîtruse 3:13; 1 Juánase 2:15-17) Tanitallu akunnitsinniittut ’illoqarfik’, naalagaaffik qilammiittoq, ilungersorlutik salliutippaat. — Eprîarit 12:22.
13. Pilliutit Guutip iluarisai suuginnanngillat?
13 Taava pilliutit Guutip iluarisai Paulusip eqqartorpai ima allalluni: ’Taamaattumik soraarata taassumuuna [Jesusikkut] pilliutinik qujaniutinik Guuti aatsivigisigu, tamassa qarlut taassuma aqqanik nassuerutiginnittut anitaannik. Puioqinasili avaaginnittassagassi tukkorlusilu, pilliutit taamaattut Guutip iluarimmagit.’ (Eprîarit 13:15, 16) Kristumiut pilliutaat tassaaginnanngillat inuttut timikkut ikiuiniarneq. Pisariaqaraangat inuit ikiuiumatusarnerat nalinginnaasuuvoq — assersuutigalugu, tamanna takuneqarsinnaavoq 1988-imi Armeniami nunap sajunneranik eqqorneqarsimasut inunnit nunani assigiinngitsuneersunit ikiuutinik nassinneqarmata.
14. Guutip iluarisaanik pilliutigisinnaasatta ilaat pingaaruteqartoq taajuk.
14 „Guutimik-mianerinnilluta ataqqinnillutalu“ Jehovamut kiffartornerput iluartoq Jesusip imminut tunulliulluni asanninneranik tunngaveqarpoq. (Eprîarit 12:28, NV; Juánase 13:34; 15:13) Kiffartornitta tamatuma oqaluussissutiginninnerput ilagaa pingaartoq, tassami Kristus palasiunertut aqqutigalugu ’pilliutinik qujaniutinik Guuti aatsivigisarparput, tassa qarlut taassuma aqqanik nassuerutiginnittut anitaat’. (Húsia 14:3; Rûmamiut 10:10-15; Eprîarit 7:26) Soorunami ’tamanut’, aammattaaq uppeqatiginngisatsinnut, ’ajunngitsuliornissarput tukkortuunissarpullu’ puiunngilarput. (Galâsiamiut 6:10) Ingammik uppeqativut ajortumeeraangata imaluunniit ajornartorsiuleraangata, atortussatigut anersaakkullu asannittumik ikiorumasarpavut. Sooq taamaaliortarpugut? Asaqatigiikkatta. Aammattaaq kissaatigaarput qatanngutitta patajaallutik uppernerminnik nassuerutiginninnerminnik aalajangiusimannittuarnissaat, ’pilliutit taamaattut Guutip iluarimmagit’. — Eprîarit 10:23-25; Jâko 1:27.
Maleruutiasuugitsi
15. (a) Eprîarinut agdlagkat 13:17-imi unnersuussutigineqartoq ataatsimut eqikkarlugu qanoq oqaatigisinnaaviuk? (b) Sooq siulersortivut ataqqinninnermik ersersitsivigisariaqarpavut?
15 Iluarisaanik Guuti pilliuteqarfigisinnaajumagutsigu peqatigiissortai tamatigut suleqatigisariaqarpavut. ’Oqartussaaneq’ qasunartumik uteqattaartuaannanngikkaluarlugu Paulus ima allappoq: ’Siulersortisi naalassigik tusartarlugillu [maleruutiasuugitsilu, NV], tarnisi piggammatigik aperineqarunik akisussaallutik; tipaatsullutik taamaaliorsinnaaqqullugit anersaameqqunagillu, tamanna iluaqutigissannginnassiuk.’ (Eprîarit 13:17) Utoqqaanertat toqqakkat ilagiinni siulersortaasut ataqqinninnermik ersersitsivigisariaqarpavut, suleqatiginnikkumanngissutsitsinnik anersaaruluuteqaqqunagit. Maleruutiasuunngikkutta nakkutilliisunut nammakkersuutaassaagut uagutsinnullu anersaakkut ajoqusissalluta. Suleqataajumaguttali utoqqaanertat ikiuinissaat ajornannginnerussaaq, aammalu ataasiussutsimut ilasaataassalluni Naalagaaffimmillu oqaluussissutiginninnermut siuarsaataassalluni. — Tussiaat 133:1-3.
16. Siulersortitsinnut maleruuttuunissarput sooq eqqortumik iliornerua?
16 Siulersortitsinnut maleruuttuunissarput naleqqutiinnarpoq! Taakkua ataatsimiinnerni ajoqersuisarput oqaluussinitsinnilu ikiortarluta. Paarsisutut uagutsinnik isumassuisuupput. (1 Pîtruse 5:2, 3) Guutimut ilagiinnullu attaveqarluartuaannarnissatsinnik ikiortarpaatigut. (apustilit suliait 20:28-30) Nakkutilliinermut silatuumut asannittumullu maleruunnitsigut Nakkutilliisumut qutsinnerpaamut, Jehova Guutimut, aammalu taassuma nakkutilliisuutitaanut, Jesus Kristusimut, ataqqinninnermik ersersitsivugut. — 1 Pîtruse 2:25; sarĸúmersitat 1:1; 2:1–3:22.
Qinujuaritsi
17. Paulusip hebræerit sumik qinnuigai, aammalu taamaaliornera sooq tunngavissaqarluarpa?
17 Malersugaaneq peqqutiginnguatsiarlugu Paulus suleqatinilu hebræerinit avissaarsimagamik ima allappoq: ’Qinnuttartigut. Isumalluarpugummi sumik ilerasuutigisaqarnata, tamatigut assuarnaatsutut iliorniaratta, annerusumillu oqaaqqissaarpassi taamaalioqqullusi, qilamik ilissinnut utersarneqaqqullunga.’ (Eprîarit 13:18, 19) Paulus peqqusersiortuusimagaluaruni aammalu ilerasuutigisaqaraluaruni hebræerit uternissaminik qinnuteqqulluni kajumissaarnissaannut tunngavissaqassagaluarnerpa? (ússatit 3:32; 1 Timûtiuse 4:1, 2) Soorunami oqaatsimik kiffartuuteqartuusimavoq unneqqarissoq, ilerasuuteqarani juutiussutsimik pingaartitsivallaartunut akuersaaginnanngitsoq. (apustilit suliait 20:17-27) Aammattaaq Paulus isumalluarpoq hebræerinit qinnunneqaruni taakkununnga utiaarnerussalluni.
18. Allanit qinnunneqarnissarput kissaatigigutsigu imminut qanoq aperisariaqarpugut?
18 Hebræerinit qinnunneqarnissaminik Paulusip qinnuteqarnerata ersersippaa kristumiut imminnut qinnunnissaat — ajornanngippat atermik taasilluni — eqqortuusoq. (Takuuk Evfisumiunut agdlagkat 6:17-20.) Kisianni allanit qinnunneqarnissarput naatsorsuutigissagutsigu apustilitulli ’ilerasuuteqanngitsuullutalu tamatigut assuarnaatsumik iliortuusariaqannginnerpugut’? Qanoq iliuutsinni tamani assuarnaatsuuit, imaluunniit unneqqarissuuit? Aammalu qinnutip pissaaneqarneranik Paulusitulli tatiginnitsigaat? — 1 Juánase 5:14, 15.
Naggasiut kajumissaarutillu
19. (a) Paulusip hebræerit sumik kissaappai? (b) Sooq angerusisaaq tassaava angeruseq naassaanngitsoq?
19 Hebræerinit qinnunneqarnissani qinnutigereerlugulu Paulusip kissaatini sakkortooq oqaatigaa: ’Guutip eqqissisaasup savat paarsisuunerat Naalagarput Jesus aakkut angerutsip naassaanngitsup piagut toqusunit anisikkamiuk, taassuma tamanik ajunngitsuliorsinnaanngorsarlisi peqqusani naammasseqqullugu, taassumalu iluarisassani ilissinni pinngortilliuk Jesus Kristusikkut; taanna naalannarsili naassaanngilluinnartumik. Amen.’ (Eprîarit 13:20, 21) Nunarsuaq eqqissineqarfiusoq eqqarsaatigiitigalugu ’Guutip eqqissisaasup’ Kristus inuunermut toqusuitsumut qilammi makitippaa, tassanilu Jesusip aammi kuisap nalinga angerusisaamik atortuulersitsisoq sassaappaa. (Isaia 9:6, 7; Lúkarse 22:20) Tamanna angerusiuvoq naassaanngitsoq, tassa Guutip ernerisa anersaajusut 144.000-iusut, qilammi Jesus ilagalugu naalakkersuisut angerusisaamullu ilaasut, kiffartornerat tunngavigalugu nunamiittut naassaanngitsumik pilluaqqussutisiassaqartinneqarmata. (sarĸúmersitat 14:1-4; 20:4-6) Tassa Kristusikkut Guutip ataqqisatta ’tamanik ajunngitsuliorsinnaanngorsarpaatigut peqqusani naammasseqqullugu iluarisassanilu uagutsinni pinngortillugu’.
20. Paulusip naggasiutaasumik kristumiunut hebræeriusunut kajumissaarutaa qanoq oqaluttuaralugulu nassuiarusuppiuk?
20 Allakkaminut hebræerit qanoq qisuariarnissaat ilisimalluinnannginnamiuk Paulus ima allappoq: ’Oqaaqqissaarpassili, qatanngutikka, oqaatsit oqaaqqissaarutaasut makku [juutiussutsimik pingaartitsivallaartut pinnagit Guutip erneranut tusarnaarnissamik] naammagiinnarniarsigik, naatsunnguamik allaffigigassi [allakkat imarisaasa kimittussusiat eqqarsaatigalugu]. Nalujunnaaritsi qatanngupput Timoteus parnaarussaajunnaarsimammat; tikiutiaaraluarpat aapparalugu takujumaarpassi.’ Qularnanngitsumik apustili Romaminngaanniit allassimavoq, neriuutigalugulu hebræerit Jerusalemimiittut Timoteus ilagalugu tikeraarumaarlugit. Imalu ilanngussivoq: ’Siulersortisi [utoqqaanertatut suleruloortutut] tamaasa iluartullu [qilammi inuunissamik neriugisaqartut] tamaasa inuulluaqqusigik. Italiamiut inuulluaqquaasi. Saammaannerup [Guutimeersup] tamassi najorlisi.’ — Eprîarit 13:22-25.
Allakkat soraajuitsumik nalillit
21. Suut pingaaruteqarnerusut paasinissaannut Eprîarinut agdlagkat ikiorpaatigut?
21 Mosesip inatsisaasa atuunnerisa nalaanni pilliutigineqartarsimasut pingaaruteqassusiannik paasinninnissatsinnut hebræerinut allakkat immaqa Bibelip atuagartaanit allanit tamanit annermik ikiorpaatigut. Allakkani tamakkunani ersarissumik takutinneqarpoq Jesus Kristusip pilliutaa tassaasoq inuiannut ajortiliusunut utertitsissutitut akiliisinnaasutuaq pisariaqartoq. Allakkanilu tamakkunani sakkortuumik erseqqissarneqartoq tassaavoq Guutip erneranut tusarnaartariaqarnerput.
22. Eprîarinut agdlagkat-nik qujamasuutiginninnissatsinnut pissutissanik taasaqarit.
22 Soorlu ilanngutassiani matuma siuliini paasereersimagipput hebræerinut allakkanut Guutimit isumassarsiarititaasunut qujamasuutiginninnissatsinnut aammattaaq allanik pissutissaqarpugut. Kiffartornitsinni qasulinnginnissatsinnut ikiorpaatigut, paasitikkamisigullu Jehova ikiortigigipput nutaamik sapiissuseqalersippaatigut. Aammattaaq ullukkut unnuakkullu iluartumik kiffartornitsigut Guutillu asannittup unnersiutigisassaasup, Jehovap, iluarisaanik uummatitsigut iluunngarluta pilliuteqartarnitsigut qarlutsinnik piginnaanitsinnillu tamanik namminissarsiunngitsumik atuinissatsinnut kajumissaarpaatigut. (wD 15/12 89)
[Quppernerup ataani ilanngussaq]
a Oqaluut kybernaʹō isumaqarpoq „(umiarsuarmik) aqutsineq“, „siulersuineq“, „unnersuussineq“. Taaguut qallunaatooq „guvernør“ (naalagarsuaq) oqaatsinik taakkuninnga naggueqarpoq. „Siulersuisoqatigiit“ tuluttut taaguuteqarput „governing body“, tassanilu oqaluut „govern“ atorneqarpoq.
Qanoq akissavit?
□ Kukkusumik ajoqersuutinik hebræerit malinninnginnissaannut qanoq ilillutik Paulusip allagaanit ikiorneqarpat?
□ Suliaq pingaartoq suna pilliutinut Guutip iluarisaanut ilaava?
□ ’Siulersortit’ kikkuuppat, aammalu sooq taakkununnga maleruuttuusariaqarpugut?
□ Qinunerup pingaaruteqassusia qanoq ililluni Eprîarinut agdlagkat-ni erseqqissarneqarpa?
□ Sooq oqartoqarsinnaava Eprîarinut agdlagkat soraajuitsumik naleqartuusut?
[Qupp. 22-mi assiliartaq]
Tamanut oqaluussinermut peqataaneq uppeqatinillu unnersuussineq pilliutinut Guutip iluarisaanut ilaapput