Jobe
21 Jobe wavutula, wixi:
2 “Se mwivwa kyambote i nganda zwela,
Mwanda ngikwatekesa.
3 Ngikwatelenu mwanyu kyoso ki ngandaya ni kuzwela,
Ki nganda kwila ngazubha o kuzwela, mutena kya ku ngisebhulula.
4 O kwila nga muditenda ku muthu mu xitu?
Se ngexile muditenda ku muthu, o kwila ngeji kala hanji ni mwanyu?
5 Se mu ngitala mwene kyambote, mwanda diwana,
Kimwanda tena kuzwela kima.
6 Kyoso ki ngibanza mu maka yá, mútwe u ngisandanganya,
Mukutu wami woso uteketa.
7 Mukonda dyahi o athu ayibha akola mwenyu,
Akuka mwene, akala jimvwama?
8 An’â atunga-nawu,
Atena kumona o alawul’â.
9 Ene kala ni wôma, mu jinzo jâ mwala kukondama,
Nzambi kene mu akastikala.
10 O jindumbe jâ ja ngombe, kijikambe kuvwalesa.
O jingombe jâ ja akaji jiteta mwene, kijiseluka.
11 O twana twâ twa mala, mukwa ni kibhanga kya jimbudi kya mulengela bhu kanga,
Tu tukatuka ni kusanguluka.
12 Ene asanguluka mu kumona athu a muxika o tungoma ni tumbánza,
Asanguluka mu kwivwa o mwimbu wa mbéndu.
13 Izuwa yoso ya myenyu yâ asanguluka,
Kate mwene kyafwa.
14 Ene ambela o Nzambi yakidi, exi: ‘Kana kututatesa!
Kitwamesena kwijiya o itendelesu yê.
15 O Muteni wa Yoso nanyi mwene ni tu mubheze?
Mbote yebhi i twanda mona mu ku mwijiya?’
16 Maji ngejiya kwila o kuzediwa kwâ, kikwijila mu kutena kwâ,
O ixinganeku yami kiyene imoxi ni ixinganeku ya athu ayibha.
17 O kwila o kandeya ka athu ayibha a kajimine kya?
O kwila kwamwijile kya dilamba?
Nzambi mu njinda yê wa abhekela kya kibwika lukuxi?
18 O kwila adibhanga mukwa ni ibhyate iphephuluka ni lusolo?
O kwila adibhanga mukwa ni musoke a mu wambata ku kitembwe kyanguzu?
19 Enu mwa muzwela: Nzambi wanda kastikala o ana mukonda dya kikuma kya tata yâ,
Maji o tata mwéne-ku atokala ku mu kastikala kwa Nzambi mukonda dya ikuma yê.
20 Kyoso o wíndwa ki wanda mwiza, wanda dimwena-kyu mwene,
Wanda kwijiya kyebhi kikala o njinda ya Muteni wa Yoso.
21 Se o jimbeji jê jobutise kya, mwene n’afu,
O kwila wanda tandanganya dingi ni ima yanda bhita ni mwiji wê?
22 O kwila sayi muthu utena kulonga kima kwa Nzambi,
Yó ufundisa kate mwene o athu ala ni maungana?
23 O muthu ufwa kyoso kyakala ni ima yoso ya bhindamena,
Kyene mwene! Kyoso kyela watululuka, séku kima ki mutandanganyesa,
24 Kyoso kyela o matabela mê akomo,
O ifuba yê yakolo mwene kyambote.
25 Maji o mukwa ufwa ni kutata kwê,
Ku mwenyu wê woso kamono kusanguluka.
26 Kiyadi kyâ anda fwa, anda ku afunda,
Anda ku adya ku mándwi.
27 Eme ngejiya kyambote o ima i mwa mubanza,
O jindunge ji mwa mufunya phala ku ngibhanga kyayibha.*
28 Enu mwa mukwibhula: ‘Kwebhi kwala o inzo ya diyala wexile ni fuma?
Kwebhi kwala o balaka kwatungile?’
29 Enu kimwibhula o athu ene mukwenda njila?
O ima ya mitangela, enu ki mu ixikina,
30 Ya kwila muthu wayibha katale hadi kyoso kiza o divuwa?
A mubhulula mu kizuwa kya njinda ya Nzambi?
31 Nanyi wanda mubazela mukonda dya ima ya mubhanga?
Nanyi wanda muvutula phonzo mu ima yabhange?
32 Kyoso kyanda mwambata ku mbalale,*
O mbila yê anda ilangidila.
33 O mbila yê wanda imona kutowala,
Athu oso a mukayela mu mbila,
Kala kyabhiti ni athu oso adyanga o kufwa.
34 Mukonda dyahi mwa mu ngibhomba?
Yoso i mwa muzwela makutu!”