Jobe
23 Jobe watambwijila, wixi:
2 “Kate lelu, nga mu dikalanganza hanji.
Nguzu ya ngibhu mukonda dya kukema kwami.
3 Se ngejidile kwebhi ku ngitena kusanga Nzambi,
Ngejiya bhu kididi bhwa tungu mwene,
4 Ngeji mutudila o mulonga wami,
Bhukaxi ka izwelu yami, ngeji mwijidisa kwila kingala ni kikuma.
5 Ngeji kwividila mwene kyambote yeji zwela Nzambi,
Ngeji bhana mátwi mu yoso yeji ngitangela.
6 Mwene wala ni kutena kwadikota. O kwila wejizoka n’eme?
Kana! Mukidi, weji ngivwa.
7 Kyenyiki, o muthu wayuka weji batula o dimanda ni mwene,
O mufundixi wami weji ngilungisa, kingeji kala ni kikuma kate ku hádya.
8 Maji kyoso ki ngiya ku mbandu kufwila o dikumbi, mwene kala-ku.
Ki ngivutuka, ki ngi musange.
9 Kyoso ki ngiditela ku kyasu bhwa mukalakalela, kingitena ku mumona,
Kyoso mwene kya bhambuka ku kadilu, ngilembwa we ku mumona.
10 Maji mwene wejiya o ima i ngabhange,
Kyoso kyanda zubha ku ngilola, nganda kala mukwa ni ulu yambote.
11 Mu jinjila jê, mwéne mwene mu ngendela,
Ki ngabhambuka ku kyasu mba ku kadilu.
12 Ki ngabhukumukina o itumu yê,
Nga ibhake mwene ku muxima wami, o kya ngitendelesa ndenge.
13 Kyoso kyasola kubhanga kima, nanyi utena ku mufidisa?
Kyaxinganeka kubhanga kima, ukibhanga mwene.
14 Mwene wala ni ima yavulu phala ku ngibhangela-yu,
Wanda kumbidila mwene o ima ya ngikanena.
15 Kiki kyene kya ngibhangesa ku mukwatela wôma.
Kyoso ki ngibanza kwa mwene, o wôma wami udibandekesa dingi.
16 Nzambi wa ngiluwalesa.
Kyene, o Muteni wa Yoso, wa ngikwatesa wôma.
17 Ki ngamutena kumona mukonda kwavundu kyavulu,
Maji né kiki, kinganda dixibha.