Jobe
7 Manyi o mwenyu wa muthu mu ngongo kiwahadi wene?
O izuwa yê ki yasoko ni ya mukalakadi abakana ku mufuta?
2 Mukwa ni mubhika, mwene winda* o kilembeketa,
Mukwa ni mukalakadi abakana o ku mufuta, mwene u kingila o futu yê.
3 Kyene kya ngibhana jimbeji ja kutala ngo hadi,
Ni mausuku a kutata.
4 Kyoso ki ngiya muzeka, ngidibhwidisa: ‘Mukonda dyahi kwa mulaleka kukya?’
Maji mu usuku ngiya ni kudibhilujula bhu hama kate kuma kikukya.
5 O mukutu wami wezala ni mándwi, wa mubatumuka jimbamba jedi kala ibumu ya mavu,
O mukutu wami wezala ni jifidila jala ni matedya.*
6 O izuwa ya mwenyu wami, ya mubhita ni lusolo,
Eme ki ngala ni kidyelelu.
7 Ngana Nzambi tata! Lembalala kwila, mwenyu wami mukwa ni kitembwe,
Lembalala we kwila, eme o kuzediwa ki nganda kumona dingi.
8 Woso u ngimona kindala, ku hádya kanda ngimona dingi,
O mesu mê anda ngi kengelela, maji kanda ngisanga.
9 Kala kijimuka o dituta,
O muthu kyaya mu Mbila* kavutuka dingi.
10 Mwene kanda vutuka dingi mu inzo yê,
O athu a mwijidile anda mujimba.
11 Kyenyiki, kinganda dixibha,
Nganda zwela mwene mukonda dya kutata kwami,
Nganda ditenda mukonda dya kuluwala kwami!
12 O kwila ngi musanza wa kalunga mba ngi kimudikixi kya musanza wa kalunga,
N’u ngitela mulangidi u ngilanga?
13 Kyoso ki ngila, ‘hama yami yanda ngikonda o malamba,
Hama yami yanda ngikwatekesa kusosolola o hadi yami,’
14 Eye u ngibhangesa kulota jinzoji jikwatesa wôma,
Ni kumona isumwa isasumukisa.
15 Kota a ngixina bhu xingu ni ngifwami kya,
Kyene mwene! Kota ngafwami, wixi o kukala ni mukutu yú.
16 Mwenyu wa ngikumu kya! Ki ngimesena dingi kukola mwenyu,
Ngeheli’ami kya, mukonda izuwa yami ibhita ni lusolo mukwa ni dixi.
17 O muthu mu xitu kima kyahi n’u musuwe kiki,
Ni ku muta o muxima?
18 Mukonda dyahi, u mutonginina kamene ni kamene?
Mukonda dyahi u mulola ithangana yoso?
19 Kate bhwebhi bhu wanda suluka ni ku ngitala?
Kwanda ngibhana dingi kithangana kya kuminya mate?
20 Eye ngana wene Mutala yene mubhanga athu oso. Se ngate kituxi, o kwila o kituxi kyami ki kuluwalesa?
Mukonda dyahi wa mu ngizukutisa kiki?
O kwila ngadibhange mukwa ni kimbamba kyaneme phala eye?
21 Wa mukambelahi kuloloka o ituxi yami?
Mukonda dyahi ki wa mujimba o kitondalu kyami?
Mukonda kwakambe ngo, nganda fwami kya.
Wanda ngisota, maji ki nganda kala-ku dingi.”