Ikalakalu ya Jipoxolo

9 Maji Sawúlu wakexile hanji mu kwatesa wôma ku maxibulu a Ngana ni kumesena kwajibha. Mwene wayi ku mukunji wadikota, 2 yu wa mubhingi mikanda phala ku ilondekesa mu malombe* mu mbanza ya Damasku, phala atene kukuta ni kwambata mu Jeluzaleme oso atokalele mu Njila ya Nzambi, kikale mayala mba ahatu.

3 Kyoso kyakexile mu kwenda, kyazukamene mu mbanza ya Damasku, mu kithangana kyenyókyo, kwa mu mwikina mukengeji watundu ku dyulu. 4 Mwene wabu bhoxi, anga wívwa dízwi dya mwambela: “Sawúlu, Sawúlu, mukonda dyahi wa mu ngizukutisa?” 5 Mwene webhwidisa: “Éye nanyi Ngana?” Mwene wa mu tambwijila: “Éme Jezú, yó wa mu muzukutisa. 6 Balumuka, bokona mu mbanza. Mwenyomo, anda kutangela se ihi i watokala o kubhanga.” 7 O mayala akexile mu kwenda-nê, emanene katenene kuzwela kima, evu o dízwi, maji kamono muthu. 8 Sawúlu anga ubalumuka bhoxi. Sumbala o mesu mê ajikukile, maji kexile mumona kima. Kyenyiki, a mukwata mu lukwaku a mu xinjikila katé mu Damasku. 9 Mwene wexile kifofo mu izuwa itatu, kadile kima, kanwine we kima.

10 Mu Damasku mwexile dixibulu, dijina dyê Ananiya, o Ngana wa mutangela mu kisumwa, wixi: “Ananiya!” Mwene wa mu tambwijila: “Em’yú, Ngana.” 11 Ngana wa mwambela: “Disokejeke, ndé mu kikoka akixana kikoka kya Yuka. Ki ubhixila mu inzo ya Juda, ibhula diyala amwixana Sawúlu mukwa Tálusu. Kuma mu kithangana kiki, mwene wa musamba, 12 mu kisumwa mwene wamono diyala amwixana Ananiya, kubokona ni ku mutula o maku kuthandu dyê phala mwene atene kumona dingi.” 13 Maji Ananiya wa tambwijila: “Ngana, eme ngevu athu avulu kuzwela yalungu ni diyala didi, ni ima yoso yayibha yabhange mwene ku maxibulu mé* mu Jeluzaleme. 14 Mwene weza bhabha ni kutena kwa mubhana o akunji a makota kwa kukuta* oso a kuxikana.” 15 Maji o Ngana wa mutangela: “Ndé, mukonda o diyala didi nga musolo phala kubhana umbangi walungu n’eme ku akwa jixi jengi, ku jisobha ni ku an’a Izalayele. 16 Mukonda nganda mwijidisa o hadi yanda tala mukonda dya dijina dyami.”

17 Bhenyobho, Ananiya wayi. Wabokona mu inzo, anga uta o maku mê kuthandu dya Sawúlu, yu wa mwambela: “Sawúlu phang’yami, o Ngana Jezú wa kutukulukila mu njila mu wejile, wa ngi tumikisa phala umone dingi ni wizale ni nzumbi ikôla.” 18 Mu kithangana kyenyókyo, mu mesu mê mu lawuka ima yadifu ni ikalakaka, anga umateka o kumona. Mwene wabalumuka, a mu batizala, 19 wadi anga ukala dingi ni nguzu.

Sawúlu waxala tu izuwa ni maxibulu mu mbanza ya Damasku. 20 Mu kithangana kyenyókyo wamateka kuboka mu malombe* yalungu ni Jezú, kwila mwéne o Mon’a Nzambi. 21 Athu oso akexile ku mwívwa akexile mu diwana, ni kuzwela: “Yú kimwéne o diyala wakexile mu zukutisa mu Jeluzaleme, o athu axikana mu dijina dya Jezú?* Mwene keza bhabha phala kwakuta ni kwa ambata* ku akunji a makota?” 22 Maji Sawúlu wakexile mu swina dingi, mwene wakexile mu bhangesa o Jijudé atungile mu Damasku kudiwana, mu kwa edikisa ima yavulu ni kwa lombolwela kyambote kwila Jezú, mwéne o Kidistu.

23 Mu kubhita thembu, o Jijudé jakexile musota ndunge phala ku mujibha. 24 Maji Sawúlu wejidile o ndunge yiyi. Ene akexile we mu langidila o mabhitu a mbanza mu usuku ni mu mwanya phala ku mujibha. 25 Kyenyiki, o maxibulu mê a mwambata, mu usuku a mu kulumukisa mu kinda kyonene bhu njanela yexile mu kilumbu.

26 Kyoso kyabhixila mu Jeluzaleme, wasoto kukala kumoxi ni maxibulu maji enyoso akexile ni wôma wa mwene, mukonda kaxikinine kwila wexile dixibulu. 27 Maji Balanabé weza ku mu kwatekesa, yu wa mwambata ku jipoxolo. Anga wa alombolwela kyambote kyebhi o Ngana kya tukulukile Sawúlu mu njila, ni kyazwelele ni mwene, ni kyebhi Sawúlu kyabokele ni kuswina kwoso o maka alungu ni dijina dya Jezú mu Damasku. 28 Kyabhiti o ima yiyi, Sawúlu uxala nawu. Anga ukala mu kwenda* mu Jeluzaleme sé wôma, mu kutanga o maka ma Ngana ni kuswina kwoso. 29 Mwene wakexile muzwela ni kuzoka ni Jijudé akexile muzwela o dízwi dya Ngeleku, maji ene a mesenene ku mujibha. 30 O jiphange kyevu o ima yiyi, a kulumuka-nê ku Sezaleya, ya a mutumikisa ku Tálusu.

31 O ilunga yoso mu Judeya, mu Ngalileya ni mu Samadiya i kala ni kutululuka, iswina dingi. Kuma o athu akexile mu belesela Jihova, ni kwa kwatekesa bhukaxi ka nzumbi ikôla, o ilunga yexile mu dibandekesa.

32 Kuma Phetele wakexile muya mu jimbanza joso, mwene wa kulumuka we mu mbanza ya Lida phala kukunda o maxibulu* atungile mwenyomo. 33 Mwenyomo wasange-mu diyala a mwixana Eneya, mwene wabhitile kyá dinake dya mivu mu hama ni kukata, mukonda katenene kwenda. 34 Phetele wa mwambela: “Eneya, Jezú Kidistu a kusake! Balumuka, yudika o hama yé!” Mu kithangana kyenyókyo mwene wabalumuka. 35 Kyoso athu atungile mu mbanza ya Lida ni mu Salone kya mumono, enyoso axikina Ngana.

36 Mu Jope mwakexile dixibulu dya muhatu dijina dyê Tabita, dilombolola “Doloka.”* Mwene wakexile mubhanga ima yavulu yambote ni kukwatekesa we kyavulu o jingadyama. 37 Mu izuwa yenyóyo mwene wakate, yu wafu. Kyazubha o ku muzowesa amutula mu inzo yathandu. 38 Kuma o mbanza ya Lida ya zukamene ni Jope, kyoso o maxibulu kyevu kwila Phetele wakexile mu mbanza yenyóyo, atumikisa-mu mayala ayadi phala ku mudyondela, exi: “Twa kudyóndo, zá ni lusolo.” 39 Kyenyiki Phetele wadisokejeka, yu wayi kumoxi ni ene. Kyoso kyabhixila a mwambata mu inzo yathandu, o atudi a ahatu a mu kondoloka. Ene akexile mudila ni kulondekesa o mavunga ni izwatu ya mukwá ya bhangele Doloka kyoso kyakexile hanji ku mwenyu. 40 Phetele watumu o athu oso kutunda, wafukama, wasambe. Anga ulunguluka kwakexile o kimbi, yu wambe: “Tabita, balumuka!” Mwene wajikula o mesu, kyoso kyamono Phetele, waxikama. 41 Mwene wa mukwata mu lukwaku, wa mubalumuna, yu wexana o maxibulu* ni atudi, anga u mubhana kwa ene ni mwenyu. 42 Athu oso mu mbanza ya Jope evu yalungu ni madiwanu enyá, kyenyiki athu avulu axikana o Ngana. 43 Mwene ukala izuwa yavulu mu mbanza ya Jope kumoxi ni Ximá, mukwa kukalakala ni ibha.