Mukanda wa Kayadi ku Akwa Kolindu
13 Yiyi yene o veji ya katatu i nganda kwiza ku mikunda. “Phala kwijiya se o maka a muzwela o muthu a kidi mba kana, kubhinga jimbangi jiyadi mba jitatu.” 2 Sumbala, kingala mwaxaxi kenu, maji kindala ngi divwa kala ngala dingi ni enu. Nga mudyangela kutangela yó atele ituxi, ni enu enyoso kwila, se ngi misanga kwenyóko, nganda bazela oso atele ituxi. 3 Mu kubhanga kiki nganda milondekesa kwila Kidistu uzwela bhukaxi kami, ni kwila mwene kene mu bhwila, maji ulondekesa kutena kwa dikota mwaxaxi kenu. 4 Mukonda mwene a mujibhila ku taka,* mu ukexilu wê wa xitu, maji wala ku mwenyu mukonda dya kutena kwa Nzambi. Etu we twa zoza mu ukexilu wa xitu kala mwene, maji twanda kala ku mwenyu kumoxi ni mwene mukonda dya kutena kwa Nzambi.
5 Kolokotenu mu ku di tonginina mudyenu phala mu mone se mwala mu kixikanu. Inga ki mwa kijiya kwila Jezú Kidistu wala kumoxi ni enu? Se muzwela kwila mwene kalé kumoxi ni enu, mwa mu londekesa kwila Nzambi ka mi xikina. 6 Maji nga mesena mwijiya kwila Nzambi wa tuxikina.
7 Twa mu samba kwa Nzambi phala ki mu bhange kima kyayibha. Ki twa mu bhanga kiki phala ku tuximana ku athu. Né mwene se athu ka mi ximana, kolokotenu mu kubhanga o ima yambote. 8 Mukonda etu ki tutena kubhanga kima phala kufidisa o kidi, kikale ngó tu kijidisa. 9 Tu sanguluka kyavulu kyoso ki tumona kwila etu twa bhwila, maji enu mwala ni nguzu. Twene mu bhinga mu misambu phala mu lungulule o ixinganeku yenu. 10 Kuma ngala dikanga, nga mu mi sonekena o ima yiyi phala kyoso ki nganda kala ni enu, ki ngi mi bazele ni njinda, mukonda Ngana wa ngibhana o ungana phala ku mi swinisa, ki phala ku mi zozesa.
11 Mu kusuka-ku phange jami, kolokotenu mu kusanguluka, ni kulungulula o ixinganeku yenu, ni kudikonda o malamba, ni kukala ni kibanzelu kimoxi, ni kutunga ni kutululuka. O Nzambi ya henda, ni paze, wanda kala ni enu. 12 Dimenekenyenu mudyenu ni jinzobole.* 13 O jiphange joso* a mi menekena.
14 O ngalasa ya Ngana Jezú Kidistu, ni henda ya Nzambi, ni kikwatekesu kya nzumbi ikôla kikale ni enu.