Kala Kyasoneka Nzwá
14 “Kanenu ku tandanganya. Kalenu ni kixikanu kwa Nzambi, kalenu we ni kixikanu kokwami. 2 Mu inzo ya Tata yami mwala ididi yavulu. Se kikyene, hinu nga mi tangela, mukonda nga muya phala ku mi yudikila kididi. 3 Kyoso ki ngandaya phala ku mi yudikila kididi, nganda vutuka, ni ngi mi ambate. Phala kwoso ku nganda kala, kwene we ku mwanda kala. 4 O ku ngamuya, enu mwejiya o njila.”
5 Tomé wa mwibhwidisa: “Ngana, kitwejiya kwoso ku wamuya. Kyebhi ki twanda kwijiya o njila?”
6 Jezú wa muvutwila, wixi: “Éme ngi njila, ngi kidi, ni mwenyu. Sé-ku muthu uya kwa Tata, se ukamba kwiza kokwami. 7 Se mwa ng’ijidile, mweji kwijiya we Tata yami. Tundé mu kithangana kiki, enu mwa mwijiya. Mu kidi, enu mwa mumono kyá.”
8 Filipe wa mwambela, wixi: “Ngana, tu londekese o Tata, kiki kya tu soko.”
9 Jezú wa mu tambwijila, wixi: “Filipe, eme ngala kyá thembu yavulu n’enu, eye ki wa ng’ijiya luwa? Woso u ngi mona, umona we o Tata. Kyebhi-phe, ki wa muzwela kwila, ‘tu londekese o Tata’? 10 Eye ki uxikina kwila, eme ngala kumoxi ni Tata, o Tata wala kumoxi n’eme? O ima i nga mu mi tangela, ki yatundu kokwami, maji o Tata wala kumoxi n’eme, wa mubhanga o ikalakalu yê. 11 Ngi xikanyenu kyoso ki ngizwela kwila, ngala kumoxi ni Tata, ni kwila o Tata wala kumoxi n’eme. Se kana, ngi xikanyenu mukonda dya ikalakalu i nga mubhanga. 12 Ngi myambela ni kidi kyoso kwila, woso u ngi xikana, wanda bhanga we o ikalakalu i nga mubhanga. Mwene wanda bhanga ikalakalu ya betakota o yiyi ndenge, mukonda nga muya-mi kwa Tata. 13 Ima yoso i mubhinga mu dijina dyami, eme nganda ibhanga, phala o Tata a mu jingise bhukaxi ka Mona. 14 Ima yoso i mubhinga mu dijina dyami, nganda ibhanga.
15 “Se mu ngizola, mwanda belesela o itumu yami. 16 Nganda bhinga kwa Tata, mwene wanda mi bhana mukwatekexi wengi phala kukala ni enu katé ku hádya, 17 o nzumbi ya kidi, katena ku itambula ku athu mu ngongo mukonda ka imono, ka ijiya we. Maji enu mwa ijiya mukonda yala ni enu, yala we momwenu. 18 Eme ki nganda mixisa ubheka,* kana. Nganda vutuka kokwenu. 19 Kwakambe ngó bhofele, o mundu ki wanda ngi mona dingi, maji enu mwanda ngi mona, mukonda eme ngala ku mwenyu, enu wenu mwanda kala ku mwenyu. 20 Mu kizuwa kyenyókyo, enu mwanda kwijiya kwila, eme ngala kumoxi ni Tata yami, ni kwila, enu mwala kumoxi n’eme, eme ngala kumoxi ni enu. 21 Woso uxikina o itumu yami ni ku ikumbidila, mwéne o muthu wangizolo. Kyenyiki, woso wangizolo, anda muzola kwa Tata yami, eme wami nganda muzola, nganda dilondekesa kyambote kwa mwene.
22 Juda (kana o Juda dya Kadyota), wa mu ibhwidisa, wixi: “Ngana, mukonda dyahi wamesena kudilondekesa kyambote kokwetu, kana ku athu mu ngongo?”
23 Jezú wa mu tambwijila: “Se muthu ungizola, wanda belesela o maka mami, o Tata yami wanda muzola we, etu twanda kwiza kwa mwene ni kutunga n’ê kumoxi. 24 Woso ka ngizolo, kabelesela o maka mami. O maka u mwa mu kwívwa ka ngi tokala, maji atokala kwa Tata wa ngi tumikisa.
25 “Nga myambela o ima yiyi, kyoso ki ngala hanji ni enu. 26 Maji o mukwatekexi, o nzumbi ikôla, yanda tumikisa o Tata mu dijina dyami, yanda mi longa ni ku mi lembalesa o ima yoso i nga mi tangela. 27 Ngi mi xila o kutululuka, ngi mi bhana o kutululuka kwami. Eme ki ngi mi bhana naku kala kibhana o mundu. Ki mu tandanganye, kimukale ni wôma! 28 Mwevu i nga mi tangela: ‘Eme ngandaya, maji nganda vutuka kokwenu.’ Se mwa ngizolele mweji sanguluka kyavulu mukonda ngandaya kwa Tata. Kuma o Tata wala kota, eme ndenge. 29 Nga mi tangela o ima yiyi ande dya kubhita, phala kyoso ki yanda bhita, muxikane. 30 Ki nganda zwela dingi kyavulu ni enu, mukonda o nguvulu ya ngongo yiyi, yu wiza, mwene kale ni kutena kwa ku ngi funyisa. 31 Maji phala o mundu wijiye kwila, eme ngazolo o Tata ni kwila, ngibhanga yoso kála kya ngitumu o Tata. Mu kiki, balumukenu, twende.