Mukanda wa Dyanga ku Akwa Kolindu
10 Jiphange jami, ngamesena ku mi lembalesa kwila, o jikuku jetu a endesa bhoxi dya dituta. Enyoso abhitile mu Kalunga Kakusuka, 2 a abatizala mu kukayela Mozé bhukaxi ka dituta ni kalunga, 3 ene adile o kúdya kwa abhele Nzambi, 4 anwine o menya a abhanene kwa Nzambi. Mukonda ene akexile mu nwa mu ndanji mu nzumbi yakexile mwa kayela. O ndanji yiyi yakexile mulombolola Kidistu. 5 Nzambi kasangulukile ni athu avulu mudyâ, mukonda dya kiki, afu mu kikangalakata.
6 Ima yoso yiyi yabhiti ni ene, phangu phala etu, phala kitukale ni jihânji ja kumesena ima yayibha kala ene. 7 Kimukale mu abhezi a iteka, kala kyakexile amoxi mudyâ, kala kyósoneke, exi: “O mundu waxikama phala kudya ni kunwa. Mu kyenyiki, abalumuka phala kukina.” 8 Ki tubhange we undumbu,* kala amoxi mudyâ kyabhangele o undumbu,* anga kwafu makwinyi ayadi ni kitatu kya jimidi ja athu mu kizuwa kimoxi. 9 Kanenu kuta Jihova mu polova kala amoxi mudyâ kya mutele mu polova, anga a anumata ku jinyoka, ya afu. 10 Kimukale we mu akwa kudikalanganza, kala amoxi mudyâ kyexile mu dikalanganza, anga a ajibha ku anju ya Nzambi. 11 O ima yiyi ya abhiti kala phangu, ya a isoneka phala ku tu dimuna etu. Kuma twala mu kithangana kya kwila o dizubhilu dya mundu dyazukama kyá.
12 Kyenyiki, woso ubanza kwila wemana, adilange phala kadibhale. 13 O jitendasá ji mwene mudibhana naju, jene jimoxi ni jene mudibhana naju akwenu. Maji Nzambi fiyele, mwene kanda myehela kwila a mitendala katé bhwa suku o nguzu yenu. Maji kyoso ki kumoneka o jitendasá, mwene wanda mibhana o ditundilu, phala mutene kukolokota.
14 Kyenyiki phange jami ja kazola, lengenu o ubhezelu wa iteka. 15 Énu mu jinjimu ngi myambela, tongololenu o ima i ngizwela. 16 O kwila o kopho* ya vinyu i tusakidila nayu Nzambi, ki ilombolola o manyinga a Kidistu? O mbolo i tubukula, ki ilombolola o mukutu wa Kidistu? 17 Kwene ngó mbolo imoxi, sumbala etu twavulu, maji twala tu mukutu umoxi ngó, mukonda etu enyoso tudya ku mbolo imoxi yiyi.
18 Xinganekenu yalungu ni akwa Izalayele:* Yó oso adya o ima yosatele, abhanga we mbandu mu ubhezelu wa Nzambi mu kalatódyu. 19 Ihi i ngamesena o kuzwela? O kwila o iteka ni ima yosatele o iteka yala ni valolo? 20 Kana! Maji ngi myambela kwila, o ima yene mu satela akwa jixi jengi, ene mu isatela ku madimonyo, ki kwa Nzambi kana. Ki ngimesena kwila, enu mubhanga mbandu mu ima yalungu ni madimonyo. 21 Enu ki mutena kunwa ku kopho ya Jihova, ni ku kopho ya madimonyo. Ki mutena we kudya ku “meza ya Jihova” ni ku meza ya madimonyo. 22 O kwila ‘twamesena kubhekela njinda* kwa Jihova’? O kwila twala dingi ni kutena, mwene ndenge?
23 Ima yoso yafwama ku ibhanga, maji yoso ki ikwatekesa akwetu. Ima yoso yafwama ku ibhanga, maji yoso ki iswinisa akwetu. 24 Kala muthu ka suluke mu kusota o mbote yê, maji asote o mbote ya akwâ.
25 Dyenu o xitu yoso yene mu sumbisa bhu kididi kya kusumbisa xitu, sé kwibhula kima mukonda dya kitongolwelu kyenu, 26 kuma “o ixi, ni ima yoso yala-mu yatokala kwa Jihova.” 27 Se bhukala muthu kaxikana Ngana u m’ixana phala kudya-n’ê kumoxi, enu anga muya, dyenu o ima yoso ya mitudila nayu, sé kwibhula kima mukonda dya kitongolwelu kyenu. 28 Maji se bhukala muthu u myambela kwila: “Kúdya kuku kwosatele o iteka,” kanenu ku kudya, phala ki mubhangese o muthu wa mitangela o maka enyá kudibhala, ni mukonda we dya kitongolwelu. 29 Ki nga muzwela yalungu ni kitongolwelu kyenu, maji nga muzwela yalungu ni kitongolwelu kya muthu wengi. Mukonda dyahi o ufôlo wami a ufundisa ku kitongolwelu kya muthu wengi? 30 Se ngi sakidila Nzambi mukonda dya kúdya ku ngidya, phala-hi a ngi sebhulula mukonda dya ima i ngi sakidila?
31 Kyenyiki, kikale mu kudya, mba mu kunwa, mba mu kubhanga kima kyoso-kyoso, ima yoso mu ibhanga phala kuximanesa Nzambi. 32 Ki mubhangese o Jijudé ni Jingeleku ni athu mu kilunga kya Nzambi kudibhala. 33 Kala kingene mubhanga eme, mu ima yoso ngisota kusangulukisa o athu oso, kingene musota o mbote yami, maji o mbote ya athu avulu phala ene abhuluke.