Jobe
31 “Ngate kikutu ni mesu mami,
Kyenyiki, kinganda tonginina muzeletete ni jihanji jayibha.
2 Se ngabhangele kiki, ihi yeji ngibhana Nzambi wala ku dyulu?
Undundu webhi weji ngibhana o Muteni wa Yoso wala ku dyulu?
3 O mukwa phulu u dibhana ni mavuwa,
O mukwa kubhanga o ima yayibha, wíndwa u mutula.
4 O kwila Nzambi kene mutala o ibhangelu yami?
Mwene kene mutala yoso i ngibhanga?
5 O kwila ngatangele kya makutu?
O kwila nga ngadingile kya muthu?
6 Se Nzambi utonginina kyambote o ibhangelu yami,
Mwene wanda mona kwila ngi muthu wakidi.
7 Se mu wendelu wami ngabhambuka o njila ya kuyuka,
Mba ngixinganeka ima yayibha mukonda dya ima i ngamono,*
Mba o maku mami abhanga kima kyayibha,
8 Kwabhu-phe! Eme ngikune, muthu wengi adye,
Yoso i ngikuna a ivuze.*
9 Se ngabatamena bhu mwelu wa mukwetu,
Phala kuzeka ni muhat’wê,
10 Kwabhu-phe! Muhatwami azuke tiliku phala diyala dyengi,
Muhatwami azeke we ni mayala engi.
11 Se kyene ki ngabhangele, kyeji kala kima kikwatesa jisonyi,
O mulonga weji bhangesa o afundixi ku ngibelesa.
12 Kyeji kala mukwa ni túbhya tujikinisa yoso,
Tweji jikinisa o idima yami kate mwene ku jindanji.
13 Se ngaditunu kubhana kima kyatokala ku mubhika wami wa diyala mba wa muhatu,
Kyoso kyeza mu dikalanganza kokwami,
14 Ihi i nganda bhanga kyoso Nzambi kyanda ngifundisa?
Kyebhi ki ngeji mutambwijila kyoso kyeji kwibhula o ima i ngabhange?
15 O wa ngibhange mu vumu dya mam’etu ki mwene we wa abhange?
Ki mwene wa tu umbu etwenyoso mu vumu dya mam’etu ande dya ku tuvwala?
16 Se ngexile mudituna kubhana ku jingadyama o ima yabhindamene,
Mba ngexile muluwalesa o mutudi,
17 Se o kudya kwami ngakudi ubheka wami,
O mona kitungu ki nga mubhana-ku kima.
18 Mukonda tunde mu unzangala wami, o mona kitungu ngene mu musasa kala mon’ami,
Ngene mukwatekesa we o mutudi tunde mu undenge wami.
19 Se ngamono muthu wa mufwa ni mbambi mukonda dya kukamba kizwatu,
Mba ngadyama kexile ni kima kya kudivunga,
20 Se mwene ka ngisakidila,
Kyoso kyexile mudifuta ni divunga dyobhange ni ndemba ya jimbudi jami,
21 Se ngakusu o ana a itungu abhindamene o kikwatekesu kyami,
Bhu mwelu wa mbanza,*
22 Kwabhu-phe, o lukwaku lwami a lubukule tunde bhu kisuxi,
A lubukule we bhu phuna ya lukwaku.
23 Mukonda ngexile ni wôma wavulu wa ku ngikastikala kwa Nzambi.
Ngadiwana mu kumona o fuma ni unene wê.
24 Se ngadyelela ku ulu,
Mba ngambela o ulu yambote, ngixi: ‘Éye mwene nga kudyelela!’
25 Se ngadizangeleka mukonda dya kukala ni umvwama wavulu,
Mba mukonda dya jimbote javulu jingexile-naju,
26 Se ngatale o dikumbi kyoso ki dyexile mubhenya,
Mba ku mbeji yazele kyambote kyoso ki yayi ni kwenda,
27 Muxima wami anga a ubhomba mu kaswekele,
Eme ngajibheza,*
28 Se ngabhangele o ima yiyi, ngeji dituna o Nzambi yakidi,
Kyeji bhangesa o afundixi ku ngikastikala.
29 O kwila sayi kizuwa ngasangulukile kya mu kumona o jinguma jami kutala hadi,
Mba ngasangulukile mu ku amona kubhita ni ibhidi?
30 Kingate kituxi ni dikanu dyami,
Mu ku abhubhidila ni kumesena kwila afwa.
31 Akwa dibhata dyami ebhula:
‘Nanyi wakambe kwikuta ni kudya* kwa mubhana Jobe?
32 O muthu watundu dikanga, ki ngamwehela kuzekela bhukanga,
O mukwa kwenda o njila nga muzalela ku dibhata dyami.
33 O kwila ngamesenene kya kusweka o ikuma yami kala kyene mubhanga athu engi,
Mu kusweka o kituxi mu jibela* ja kizwatu kyami?
34 O kwila ngexile ni wôma wa mundu?
O kwila ngexile ni jisonyi ja miji yengi ku ngikwatesa jisonyi,
O wôma yú anga u ngifidisa kutunda bhukanga?
35 Tamanu kwexile muthu u ngivwa!
Ngeji soneka o dijina mu mukanda wami wa kudizokela, phala kulondekesa kwila kidi mwene ki nga muzwela.
O Muteni wa Yoso a ngitambwijile!
Tamanu o yó wa mu ngitatela wasonekene mu mukanda o ima ya mu ngitatela!
36 Ngeji ututila bhu isuxi,
Ngeji ukutila ku mútwe wami kala kitundu.
37 Ngeji mubhakwila jikonda mu yoso i ngabhange,
Ngeji zwela-nê ni kidyelelu kyoso mukwa ni kilamba.
38 Se o mavu u nga mudima nga atambula ku athu engi, ene anga akwata kudikola-kola,
Se o yó adimi o díbhya, adibhongolola anga adidila kumoxi mukonda dyami eme,
39 Se ngadi o ibundu, éme ngakambe ku ifuta,
Mba nga tandanganyesa o jingana ja díbhya,
40 Mu díbhya dyami-phe, mu kididi kya tiliku, mwime minya,
Bhu kididi kya sevada bhusabhuke yangu.”
O izwelu ya Jobe yasuku bhenyabha.