Jobe
6 Bhenyobho Jobe watambwijila, wixi:
2 “Tamanu atenene kuzonga o dilamba dyami!
Tamanu dyabhanene kudita mu kizongelu kumoxi ni divuwa dyami.
3 Kindala, o dilamba dyami dyaneme dingi, o museke mu musanza wa kalunga, ndenge.
Kiki kyene kya ngibhangesa kuzwela sé kuxinganeka.
4 Mukonda o jisosa ja Muteni wa Yoso ja ngikwata,
Nga mudivwa kwila, o mvwenenu ya jisosa jiji, ya mudimwanga mu mukutu wami.
O ima ya Nzambi i kwatesa o wôma, ya ngikondoloka.
5 O kwila o jumendu ya mukáwu idila se yala ni kudya?
Inga o ndumbe ya ngombe idila se yala ni yangu?
6 O kwila o kudya kwa usáwu* kuwabha?
Inga o menya a diyaki atowala?
7 Eme ngaditunu kukwata o ima yiyi,
Yedi kala kudya kwabolo.
8 Tamanu Nzambi wa ngibhele yoso i ngabhingi,
Yoso mwene i ngamesenene.
9 Tamanu Nzambi waxikinine ku ngisasujula,
Ni ku ngijibha ni maku mê!
10 Kiki kyeji ngisangulukisa;
Ngeji tuka-tuka ni kisangu-sangu, sumbala ni misusu,
Mukonda o izwelu ya Yó ukôla, kingaditunu-yu.
11 O kwila ngala hanji ni nguzu ya kukolokota ni kukingila?
Kingala dingi ni nguzu ya kukolokota. Kingifwila-hi kya?
12 O kwila ngi ditadi?
Inga mukutu wami wa felu?*
13 O kwila ngitena kudikwatekesa amwenyami,
Se kingala dingi bhwa kuxamenena?
15 Makamba mami ngalembwa ku adyelela, adibhange mukwa ni kangiji, lelu kezala ni menya, mungu kakukuta,
Kala menya a jingiji jene mu kukuta mu kixibhu.
16 O menya mé avunzuluka mukonda dya jelu,
O neve ikituka menya.
17 Mu kubhita kithangana, o jingiji jiji kijikala dingi ni menya,
Jikukuta mukonda dya mwanya.
18 A jijikwila milombo,
Jibhixila mu kikangalakata anga ji jikinina.
19 O jingenji ja mbanza ya Tema ajisota,
Akwa kwenda o jinjila atundu ku Sabá, exile we musota o jingiji jiji.
20 Jisonyi ja akwata mukonda exile ni kidyelelu kya kusanga menya,
Kyoso kyabhixila-ku, aluwala.
21 Enu mwadibhange mukwa ni jingiji jiji,
Ki nga midyelela dingi.
22 O kwila ngambe, ngixi: ‘Ngibhanyenu kima?’
Inga nga mibhingi kima ku jimbote jenu?
23 O kwila ngabhingi phala ku ngikula bhu maku a jinguma?
Inga ngabhingi phala ku ngibhulula bhu maku a akwa kutatesa?
24 Ngitangelyenu i ngabhange ni ngimívwe,
Ngi kwatekesenu kwijiya o kitondalu kyami.
25 Kwivwa o kidi, kikuluwalesa muthu.
Maji mu ima yoso i mwa muzwela, o kidi kyala kwebhi?
26 O kwila mwa mufunya ndunge ya ku ngibazela mukonda dya izwelu yami,
O izwelu ya hatu ya diyala dyatate?
27 Se kyene ki mwa mubhang’iki, o mona kitungu mwasoko-bhu mwene ku mutela jisolote,
Ni kusumbisa kamba dyenu.
28 Ngitalyenu mwene kyambote mu mesu,
Mumone se nganda mitangela makutu.
29 Ngamidyondo, xinganekenu kyambote, kanenu ku ngitatela makutu.
Kyene! Xinganekenu mwene kyambote, mukonda ngadikwatenena hanji mu kuyuka kwami.
30 O kwila ngazwela kima kyayibha?
O kwila o kima kyayibha ngilembwa kukijiya?