Ku akwa Jihebelewu
4 Kyenyiki, kuma kwakambe hanji o kikanenu kya kubokona mu dinyohenu dya Nzambi, tu dilange* phala kibhukale muthu mudyenu a mumona kwila kafwama kubokona-mu. 2 Mukonda kala ene, etu a tu tudila we o njimbu yambote, maji o maka evwile ene ka abhekela mbote mukonda o kixikanu kyâ ki kyasokele kala kya yó evwile o maka ni muxima woso. 3 Kuma etu twala ni kixikanu kyakolo twabokona mu dinyohenu dya Nzambi, kala kyambe mwene: “Anga ngiloka kya ngikwata o njinda, ngixi: ‘Enyá kanda bokona mu dinyohenu dyami.’” Sumbala o ikalakalu yâ a izubha kyá tundé kudimatekenu dya ngongo. 4 Kuma mu Mikanda Ikôla Nzambi wambele yalungu ni kizuwa kya kasambwadi, wixi: “Nzambi anga unyoha mu kizuwa kya kasambwadi mu ikalakalu yê yoso yabhange,” 5 wambele dingi: “Ene kanda bokona mu dinyohenu dyami.”
6 Kwala hanji athu akambe kubokona-mu, ni yó adyangele kwabokela o njimbu yambote, akambele kubokona-mu mukonda dya kubhukumuka kwâ. 7 Mukonda dya kiki kyoso kyabhiti thembu yavulu, Nzambi wambe mu Sálamu ya Davidi kala ki twa itumbula kyá mu mukanda yú, wixi: “Lelu se mwivwa o dízwi dyami, kanenu kukolesa o mixima yenu, kyenyiki mwene wasolo kizuwa akixana lelu.” 8 Mukonda se Jozuwé wa ambatele mu kididi kya dinyohenu, kupholo Nzambi keji zwela dingi yalungu ni kizuwa kyengi. 9 Kyenyiki kwaxala hanji kizuwa kimoxi kya kunyoha phala o mundu wa Nzambi, kala o dinyohenu dya kizuwa kya kasambwadi. 10 Mukonda o muthu wabokona mu dinyohenu dya Nzambi, wa nyoha we mu ikalakalu yê kala Nzambi kya nyoha ku ikalakalu yê.
11 Kyenyiki tubhange nguzu yavulu phala kubokona mu dinyohenu didi, phala kibhukale muthu ubwa ku mubhetu yú wa kubhukumuka. 12 Mukonda o mak’â Nzambi ala ni mwenyu ni kutena, abeta dingi kutwa o xibhata yatu mu mbandu jiyadi ndenge, ene abokona ku muthu yá atungula o mwenyu ni nzumbi, ni masokwelu ni wongo wa ifuba. Ene ala ni kutena kwa kutungula o ixinganeku ni jivondadi jala kumuxima wa muthu. 13 Kanaku kima kyobhange kikamba kumoneka ku mesu ma Nzambi, maji ima yoso yobhange yene yoso ya tukuluka yedi kala yazula ku mesu mê. Etu enyoso twanda bhakula jikonda kwa mwene.
14 Kuma o mukunji wetu wabetakota, wonene, wabokona mu dyulu Jezú, o Mon’a Nzambi, tusuluke mu kubokela o athu yalungu ni kixikanu kitwala nakyu kwa mwene. 15 Mukonda etu twala ni mukunji wabetakota wejiya o malamba metu, mwene a mu polovala mu maukexilu oso kala etu, maji mwene katele kituxi. 16 Kyenyiki, tubhixile ku kyandu kya ngalasa ya Nzambi, ni kuzwela ni kidi kyoso, phala tutene kutambula o henda ni ngalasa yê phala i tu kwatekese mu kithangana kyatokala.