Ku akwa Jihebelewu
3 Kyenyiki phange jami, enu amisolo* kwa Nzambi, xinganekenu mu phangu ya Jezú, yó u twa muxikina kala poxolo ni mukunji wa betakota. 2 Mwene wexile fiyele kwa Yó wamusolo, kala Mozé kyexile we fiyele mu dibhata dyoso dya Nzambi. 3 Kuma Nzambi wamono Jezú kala wabeta dingi kota mu fuma, Mozé ndenge, mukonda woso utunga dibhata wabeta dingi kota mu fuma, o dibhata dya tungu mwene, ndenge. 4 Mu kidi, dibhata dyoso dibhinga muthu uditunga, maji wabhange o ima yoso Nzambi. 5 Mozé wexile fiyele mu kikalakalu kyê kyabhangele mu dibhata dyoso dya Nzambi. O kikalakalu kyê kyabhana umbangi wa ima eji ku izwela ku hádya. 6 Maji Kidistu wexile fiyele kala mona mu dibhata dya Nzambi. Se tu dikwatenena mu kubhwa wôma wa kuzwela ni ku kidyelelu kyetu ni kisangusangu kyoso katé ku hádya ni hádya, twala tu dibhata dya Nzambi.
7 Mu kyenyiki, kyósoneke bhukaxi ka nzumbi ikôla, exi: “Lelu se mwivwa o dízwi dyê, 8 kanenu kukolesa o mixima yenu kala o kizuwa ki mwa ngi bhekesa njinda kyoso kyangitele mu polova mu kikangalakata, 9 mwenyómo o jikuku jenu angitele mu polova ni kungitendala, sumbala a mwene o ikalakalu yami mu makwinyi awana a mivu. 10 Kyene ki ngaluwala ni mwiji yú, anga ngambe ngixi: ‘Ku mixima yâ, ene abhukumukina o itumu yami, akambe kwijiya o jinjila jami.’ 11 Kya ngikwata o njinda ngaloka, ngixi: ‘Enyá kanda bokona mu dinyohenu dyami.’”
12 Enu akwetu jiphange jami, alukenu phala kimukale ni muxima wayibha wakambe kixikanu u mibhangesa kusondoloka kwa Nzambi ya mwenyu. 13 Maji kolokotenu mu kudiswinisa mudyenu izuwa yoso, kyoso o kizuwa a k’ixana kizuwa kya “Lelu” kiki hanji, phala kana muthu a mubhomba kwala o ituxi n’a kole o muxima. 14 Mukonda etu twanda tambula ngó o kima kyatambula Kidistu se tu dikwatenena ku kidyelelu ki twakexile nakyu kudimatekenu. 15 Kala kyósoneke mu Mikanda Ikôla, exi: “Lelu se mwívwa o dízwi dyê, kanenu kukolesa o mixima yenu kala mu kizuwa ki mwa ngi bhekesa njinda.”
16 Kyenyiki ananyi evu o mak’â Nzambi, maji né kiki a mubhekesa njinda yavulu? Ki yó oso atundile ku Ijitu bhukaxi ka Mozé? 17 Ananyi Nzambi wa akwatele njinda mu makwinyi awana a mivu? Ki yó atele o kituxi o imbi yâ anga ixala mu kikangalakata? 18 Ananyi Nzambi wa alokela kwila kanda bokona mu dinyohenu dyê? Ki yó a mu bhukumukina? 19 Mukonda dya kukamba o kixikanu ene kabokona mu dinyohenu dya Nzambi.