DISÁ 06
Kyebhi Kyamateka o Mwenyu?
“Mukonda kokwé [Nzambi] kwene kwala o kitho mba fixi ya mwenyu.” (Jisálamu 36:9) Eye uxikina mu kidi kiki? Sayi athu axikina kwila o mwenyu wa moneka ngó, ki Nzambi wa ubhange. Se kiki kidi, o mwenyu wetu wa moneka ngó. Maji se Jihova mwene wa bhange o mwenyu, mwene wejiya se mukonda dyahi wa ubhange.a Tumone ihi izwela o Bibidya ya lungu ni kyebhi kya mateka o mwenyu, twandamona we se mukonda dyahi tutena kuxikina mu kidi kiki.
1. Kyebhi kya moneka o ngongo?
O Bibidya yamba: “Mu dimatekenu Nzambi wa bhanga dyulu ni ixi.” (Dimatekenu 1:1) Jingijiye javulu jaxikina kwila o ngongo yala ni dimatekenu. Maji kyebhi Nzambi kya ibhange? Nzambi wa kalakala ni “nguzu” yê—mba o nzumbi yê ikôla—phala kubhanga o ngongo yoso, kikale o jigalaxia, o jithethembwa ni jiplaneta.—Dimatekenu 1:2.
2. Mukonda dyahi Nzambi wa bhange o ixi?
Jihova ‘kabhange o ixi phala kima kyengi, maji wa ibhange phala athu kutungamu.’ (Izaya 45:18) Nzambi kabhange o ixi phala kukala ngó ya hatu, maji mwene wa mesenene kwila, o ixi ikala dibhata dya fwama dya athu ni kutungamu katé kuhádya ni hádya. (Tanga Izaya 40:28; 42:5.) O jingijiye ejiya kwila seku kididi kyengi kya difu ni ixi. O ixi yene ngó o kididi mwala ima itena kudikila o myenyu ya athu.
3. Ihi itubhangesa ku ditungula ku yama?
Kyoso kya zubha kubhanga o ixi, Jihova wa bhange o myenyu. Kya dyanga mwene wezalesa o ixi ni ithulu, yama ni mixi. Mu kusuluka, “Nzambi wa bhange o muthu mu kidifwanganu kyê.” (Tanga Dimatekenu 1:27.) Ihi ibhangesa o athu kuditungula? Kuma atubhange mu kidifwanganu kya Nzambi, etu tutena kulondekesa o idifwa yê, kala o henda, ni kuyuka. Mwene wa tubhange ni uhete wa kudilonga madimi, kuwabhela kumona ima yambote, ni ku wabhela mimbu. Etu tutena kubheza o Mubhangi wetu, maji o yama ki itena kubhanga kiki.
DILONGE DINGI
Tala ima ilondekesa kwila o mwenyu a ubhange, ni kwila o misoso ya Bibidya ya lungu ni ibhangelu, ya kidi. Ijiya ihi itulonga o idifwa ya athu ya lungu ni Nzambi.
4. O mwenyu a ubhange
O athu ene mwaximana kyoso kyabhanga ima ya difwangana ni ibhangelu ya Nzambi. Uxikina kwila o muthu wa bhange o ibhangelu, mwéne atokala ku muximana dingi? Tala OVIDYU, mukusuluka bhanga o kibhwidisu kya kayela.
Ima yebhi ya bhange o athu, mu kufikisa o ibhangelu ya Nzambi?
Dibhata dyoso dibhinga muthu uditunga. Maji nanyi phe wabhange o ima yoso? Tanga Jihebelewu 3:4, mukusuluka bhanga o ibhwidisu ya kayela:
Ima yebhi iwawabhela dingi mu ibhangelu?
O kwila kima kyambote kuxikina kwila, o ngongo ni ima yoso ya lamu a ibhange? Mukonda dyahi?
Eye wakijidile?
Eye utena kusanga milongi yengi ni jividyu jalungu ni maka enyá mu sayite jw.org, mumbandu “Teve um Projeto?” ni “A Origem da Vida: Teorias e Fatos.”
“Kuma dibhata dyoso dibhinga muthu uditunga, wa tunguphe o ima yoso, Nzambi”
5. O misoso ya Bibidya ya lungu ni ibhangelu, misoso ya kidi
Mu divulu dya Dimatekenu kibatulu 1, o Bibidya ijimbulula kyebhi kya mateka o ixi ni myenyu. O kwila uxikina mu kidi kiki inga uxikina kwila misoso ya makutu ngó? Tala OVIDYU, mukusuluka bhanga o ibhwidisu ya kayela.
O nkwila o Bibidya ilonga kwila o ixi ni myenyu ya lamu a ibhange mu izuwa isamanu ya 24-kya ji ola?
Mudyé, o kwila o ima izwela o Bibidya ya lungu ni ibhangelu ima ya kidi? Mukonda dyahi?
Tanga Dimatekenu 1:1, mukusuluka bhanga o kibhwidisu kya kayela:
O jingijiye amba kwila o ngongo yala ni dimatekenu. Kyebhi o kidi kiki kya lungu ni milongi iwatange mu Bibidya?
Sayi athu abanza kwila, Nzambi wabhange o myenyu bhukaxi ka ima ya moneka ngó. Phala ene, Nzambi wa bhange selula imoxi, o selula yiyi ya kituka myenyu yavulu ki idifu. Tanga Dimatekenu 1:21, 25, 27, mukusuluka bhanga o ibhwidisu ya kayela:
O kwila o Bibidya ilonga kuma Nzambi wabhange ngó kidifwa kimoxi kya mwenyu, o kidifwa kiki kikyayi ni kukituka mbiji, yama ni athu? Inga mwene wa bhange o ima yoso “mu idifwa-idifwa”?b
6. O athu éne o ibhangelu ya katunda ya Nzambi
Etu kitwadifu ni yama ya bhange Jihova. Tanga Dimatekenu 1:26, mukusuluka bhanga o kibhwidisu kya kayela:
O athu atena kuzola ni kukwatela henda ku akwâ. Mukonda dyahi? Mukonda atubhange mu kidifwanganu kya Nzambi. Kiki kitulonga ihi ya lungu ni idifwa ya Jihova?
ATHU AVULU AMBA: “O misoso ya Bibidya ya lungu ni ibhangelu, misoso ya makutu.”
Kyene we ki ubanza? Mukonda dyahi?
IHI IWADILONGO
Jihova wabhange o ngongo ni myenyu yoso.
Kubhitulula
Ihi ilonga o Bibidya ya lungu ni dimatekenu dya ngongo?
O kwila Nzambi wabhange ngó kidifwa kimoxi kya mwenyu, o kidifwa kiki kikyayi ni kukituka idifwa ya mukwa ya mwenyu inga mwene wa bhange o ima yoso?
Ihi ibhangesa o athu kuditungula ku ibhangelu ya mukwa?
TOKWESA DINGI
Tala ibhangelu ilondekesa kwila kwene Mubhangi.
“Ihi Itulonga o Ibhangelu?” (Despertai!, Setembro de 2006, mu Phutu)
Tala kyebhi ojitata kya tena kujimbulula o ima izwela o Bibidya ya lungu ni ibhangelu kutwana twâ twofele.
Xinganeka setutena kuxikina kwila o ima ya moneka ngó ni kuxikina mu ibhangelu mu kithangana kimoxi.
“O Kwila Nzambi Wabhange o Idifwa Yoso ya Mwenyu mu Kidifwa Kimoxi Ngó?” (Milongi ya jw.org)
Sayi athu amba kwila o ifuba ya athu ni ya yama ene mu isanga koxi amavu ni ima yene mufikisa o jingijiye, ikwatekesa o kibanzelu kya kwila o ima ya moneka ngó, maji o kwila kiki kidi?
Dimatekenu Dya Mwenyu—Ibhwidisu Itanu Yabhingi Kuitambwijila (Kadivulu, mu Phutu)
a Mu disá dya 25 twandadilongamu ya lungu ni vondadi ya Nzambi phala o athu.
b Mu Bibidya, o kizwelu “idifwa-idifwa” kilombolola kibuka kya dikota kya ima yala ni mwenyu maji ki idifu.