Ku Akwa Loma
8 Kyenyiki, woso wala kumoxi ni Kidistu Jezú, bhu pholo ya Nzambi kalé ni kikuma. 2 O kitumu kya nzumbi ikôla kya bhana mwenyu bhukaxi ka Kidistu Jezú, kyene kya mi bhulula ku kijila kya kituxi ni kya kufwa. 3 O Kijila kya Mozé ki kyatenene ku mibhulula mukonda dya kubhwila kwa athu, ni kwila ene akwa ituxi. Maji Nzambi wa mi bhulula mu kutumikisa Mon’ê mu kidifwanganu kya athu akwa ituxi, phala kubhwisa o kituxi. Kyenyiki mwene wa fundisa o kituxi kya athu, 4 phala o itendelesu ya yuka yala mu Kijila i dikumbidile kokwetu, etu twa mu tumaka o nzumbi ikôla, kana o jihânji jetu jayibha. 5 Woso ubhanga o ima ya xitu, uxinganeka ngó mu ima ya xitu, maji woso utumaka o ima ya nzumbi, uxinganeka mu ima ya nzumbi ikôla. 6 O kuxinganeka mu ima ya xitu kubhekela kufwa, maji o kuxinganeka mu ima ya nzumbi ikôla kubhekela mwenyu, ni kutululuka. 7 Mukonda o kuxinganeka mu ima ya xitu kubhangesa o muthu kukala nguma ya Nzambi. Kuma o muthu ukayela o jihânji ja xitu, katena kutumaka o kijila kya Nzambi. 8 Kyenyiki, oso abhanga o ima ya xitu, katena kusangulukisa Nzambi.
9 Mu kiki, enu ki mwa mu kayela o ima ya xitu. Se mwala ni nzumbi ya Nzambi, mwa mu kayela o nzumbi ikôla. Maji se muthu kalé ni nzumbi ya Kidistu, o muthu yú katokala kwa Kidistu. 10 Se mwala kumoxi ni Kidistu, o nzumbi i mi bhangesa kukala ku mwenyu mukonda dya kuyuka, sumbala mukonda dya kituxi o mikutu yenu yafu. 11 Se o nzumbi ya Yó wa fukununa Jezú Kidistu mw’alunga i kala momwenu, o Nzambi wa fukununa Jezú Kidistu mw’alunga, wanda bhana we mwenyu ku mikutu yenu yafu, bhukaxi ka nzumbi yê yala momwenu.
12 Kyenyiki jiphange jami, etu ki twatokala kutumaka o jihânji ja xitu. 13 Se mu tumaka o jihânji jenu ja xitu, mwanda fwa mwene. Maji se mwehela o kutena kwa nzumbi ikôla ku mi kwatekesa kufwisa o jihânji jayibha, mwanda kala ku mwenyu. 14 Kuma oso a endesa ku nzumbi ya Nzambi, ene an’â Nzambi. 15 Enu ki mwa tambula nzumbi i mi bhangesa kukala mu abhika, ni kukala ni wôma. Maji o nzumbi i mwa tambula, i mi bhangesa kukala mu an’â Nzambi. Bhukaxi ka nzumbi yiyi, tudikola: “Aba,* Tata!” 16 O nzumbi ya Nzambi i tuxikinisa* kwila twala tu an’â Nzambi. 17 Se twala tu an’â Nzambi, kiki kilombolola kwila twanda tambula undundu kwa Nzambi, kumoxi ni Kidistu, o mulundudi ni mukwetu. Maji kya dyanga, twatokala kutala hadi kumoxi ni mwene, phala a tujingise we kumoxi ni mwene.
18 Ngi mona kwila, o hadi i twa mutala kindala ki kimé, mu ku isokesa ni mabesá utwanda tambula ku hádya. 19 Kuma o ibhangelu yoso ya Nzambi, ya mu kingila ni hânji yoso o kutukuluka kwa an’â Nzambi. 20 Mukonda o ibhangelu yoso a ibhakula ku mwenyu wa kambe valolo, kana mu vondadi yâ. Maji Nzambi mwéne wehela kwila kiki kibhita. Kyoso kyabhange kiki, mwene wabhana kidyelelu ku ibhangelu. 21 Mwene we wejiya o ibhangelu yanda bhuluka ku ubhika wa kubola, yanda kala we ni ufolo wafuma ya an’â Nzambi. 22 Twejiya kwila, o ibhangelu yoso ya mukema ni kwívwa jindolo javulu katé kindala. 23 N’etu we twa tambula o kijimbwete* kya ima yanda kwiza ku hádya, twene we mu kema moxi dyetu, kyoso ki tuya ni ku kingila ni hânji yoso ku tubhanga tu an’ê. Mu kithangana kyenyókyo, anda tujituna ku mikutu yetu, bhukaxi ka kukúla. 24 Mukonda kyoso kya tubhulula, twatambula o kidyelelu kiki. Maji se o ima i twa dyelela twa imono kyá, kikwala dingi kidyelelu, mukonda o kima ki wamono kyá, u kidyelela dingi kyebhi? 25 Maji se twa dyelela kima kiluwa tu kimona, tukolokota mu kukingila ni mwanyu woso.
26 Kyoso ki tubhwila, o nzumbi ikôla itena we ku tukwatekesa. Mukonda sayi bhabha ki twejiya ihi itwanda bhinga mu misambu. Kyoso ki twa mu kema, maji ki twejiya itwanda zwela, o nzumbi ikôla i tudyondela bhu kididi kyetu. 27 Nzambi utokwesa o mixima ya athu, mwene wejiya we o ima idyondela o nzumbi ikôla yalungu ni athu o sole,* mukonda o ima yiyi yalungu ni vondadi yê.
28 Twejiya kwila, Nzambi ubhangesa o ibhangelu yê yoso kukalakala kumoxi, phala o mbote ya athu a mu zolo, yó a asolo kwa Nzambi mu vondadi yê. 29 Nzambi wa dyangele kwa suwa ene, waxindile kyá ukulu kwila ene eji difwangana ni Mon’ê. Kyenyiki, o Mon’ê mwéne weji kala o phande-kumbi* bhukaxi ka jiphange javulu. 30 Mwene wexana yó wa asolo, anga wa axikina kala athu ayuka. Mu kusuka-ku, o wa axikina kala athu ayuka, wa ajingisa we.
31 Kyenyiki, ihi i tutena kuzwela yalungu ni maka enyá? Se Nzambi wala ku mbandu yetu, nanyi utena kututolola? 32 Mwene kaditunu kubhakula Mon’ê phala kutufwila bhu kididi kyetu. Kuma mwene wa tubhana Mon’ê, o kwila wanda dituna kutubhana ni henda yoso o ima ya mukwá? 33 Nanyi utena kutatela o athu a asolo kwa Nzambi? Sé-ku muthu, mukonda Nzambi mwéne u amona kala athu ayuka. 34 Nanyi utena kwa fundisa? Sé-ku muthu, mukonda Kidistu Jezú wafu, anga a mu fukununa, yu waxikama ku mbandu ya kadilu ka Nzambi. Mwéne wene mu tudyondela.
35 Ihi itena ku tusondolola mu henda ya Kidistu kokwetu? O kwila jiphaxi, ibhidi, inga izukutisu? Nzala, thuxi, kilwezu kya kufwa inga xibhata? 36 Kala kyosoneke mu Mikanda Ikôla, exi: “Mukonda dya kukala tu mundu wé, kumbi dyoso, twala mu kibhidi kya kufwa. A tumona kala tu jimbudi joxinde o kufwa.” 37 Maji twene mu tolola o ima yoso yiyi, bhukaxi ka kutena kwa yó wa tuzolo. 38 Mukonda ngi xikina kwila, sé-ku kima kitena kufidisa Nzambi ku tuzola. Né kalunga, né mwenyu, né jianju, né jinguvulu, né ima ya kindala, né ima yanda kwiza, né kutena, 39 né ima yéne bhulu, né ima yala bhoxi, kanaku kima kyoso-kyoso kitena ku tufidisa kutambula o henda ya tulondekesa Nzambi bhukaxi ka Ngana yetu Kidistu Jezú.