Ku akwa Jihebelewu

5 Mukonda o mukunji woso wabetakota amusola mwaxaxi ka athu, a muxinda phala kubhanga o kikalakalu kya Nzambi, n’a tene kubhana maujitu ni jisata mukonda dya ituxi yâ. 2 Mwene utena kukwatela henda kwa yó kala ni kwijiya ene mutondala,* kuma mwene watokala kudibhana ni itondalu yê. 3 Mukonda dya kiki, mwene watokala kubhakula o jisata mukonda dya ituxi yê ni ituxi ya mundu.

4 Séku muthu utambula o kijingu kiki mukonda dyê mwene, maji u kitambula ngó se a mubhana-kyu kwa Nzambi kala kyabhitile ni Alá. 5 Kyene we kimoxi, o Kidistu ka dijingisa mudyê mwene mu kudibhanga mukunji wabetakota, maji wa mujingisa Nzambi Yó wa mwambelele, wixi: “Eye u mon’ami, lelu eme ngakituka ngi tat’é.” 6 Kala kyambe mwene mu mbandu ya mukwa mu Mikanda Ikôla: “Eye wala u mukunji katé ku hádya ni hádya kala kyexile Melekizedeke.”

7 Ku mwenyu wê woso mu ixi, Kidistu wabhingile, wadyondele ni kukema ni masoxi kwa Yó weji tena ku mubhulula mu kufwa, o mwene anga a mwivu mukonda dya kuxila Nzambi. 8 Sumbala mwene mon’â Nzambi, maji wadilongo kutumaka bhukaxi ka hadi yatale. 9 Mwene watumaka mu ima yoso. Kyenyiki yó woso u mutumaka, utena kubhuluka ni kutambula o mwenyu wakalelaku bhukaxi ka mwene. 10 Mukonda amusolo kwa Nzambi phala kukala mukunji wabetakota kala kyexile Melekizedeke.

11 Twala ni ima yavulu ya kuzwela yalungu ni mwene, maji kwabhonzo ku mi jimbulwila mukonda enu mwa kokoloka mu kwívwa. 12 Sumbala mu kithangana kiki mweji tena kyá kukala mu alongexi, maji enu mwa bhindamena hanji muthu u milonga o ima i mwa dyangele kudilonga ku mak’â Nzambi. Enu mwa bhindamena dingi lete kana o kudya kwa nguzu. 13 Mukonda woso ukolokota kunwa lete, kejiya o mak’â Nzambi a tulonga o ima yoso yayuka, mukonda mwene wala hanji mona ndenge. 14 Maji o kudya kwa nguzu kwatokala ku athu akulu kyá. Mukonda dya kudilonga ene asungu kyá kilunji kya kutungula kyoso kyawabha mu kiki kyayibha.