DYALWILU

1 Mu kizuwa kya dyanga kya mbeji ya kayadi ku muvu wa kayadi kyoso akwa Izalayele kyatundu ku ixi ya Ijitu, Jihova wazwela ni Mozé mu kikangalakata kya Sinayi, mu balaka ya kudyongekela. Mwene wambe: 2 “Kondalenu o mundu woso wa Izalayele* muthu ni muthu kala kyadisokejeka mu miji yâ ni atwameni a miji yâ. Musoneka o majina a mayala oso. 3 Eye ni Alá mwatokala kusonekesa mu ibuka-ibuka* oso ala ni makwinyi ayadi a mivu mba abhiti kya mu kitala kiki atena kuya mu ita mu kifuxi kya Izalayele.

4 “Ku mwiji ni mwiji mwambata-ku diyala dimoxi. Kala muthu mudyâ watokala ukala mutwameni wa mwiji wê. 5 Yá ene o mayala anda kala kumoxi n’enu: Kwa Lubene, Elizule mon’a Xedele; 6 kwa Ximinyá, Xelumiyele mon’a Nzudixadayi; 7 kwa Judá, Nasono mon’a Aminadabe; 8 kwa Isakale, Netanayele mon’a Zuwale; 9 kwa Nzebulone, Eliyaba mon’a Helone; 10 ku an’a Zuze: kwa Efalayíme, Elixama mon’a Amihudi; kwa Manasa, Ngamadiyele mon’a Pedazule; 11 kwa Bejamí, Abidani mon’a Ngidiyoni; 12 kwa Dane, Ahiyezele mon’a Amixadayi; 13 kwa Azele, Pajiyele mon’a Okolane; 14 kwa Ngade, Eliyazafu mon’a Dewele; 15 kwa Nafitali, Ahila mon’a Inane. 16 Yá ene a asolo bhukaxi ka mundu, kifwa, o atwameni a miji ya jitata jâ. Yá ene o atwameni a miji* ya akwa Izalayele.”

17 Kyenyiki, Mozé ni Alá ambata o mayala yá osole, a atumbula mu majina. 18 Ene ongeka o mundu woso mu kizuwa kya dyanga mu mbeji ya kayadi, phala o mayala ala ni makwinyi ayadi a mivu mba abhiti kya mu kitala kiki, muthu ni muthu a musonekese mu dijina, kala kyadisokejeka mu mwiji ni mwiji ni atwameni a miji yâ, 19 kala kyatendelesele Jihova kwa Mozé. Kyenyiki, Mozé wa asonekesa mu kikangalakata kya Sinayi.

20 O an’a Lubene, o mbutu ya phande-kumbi ya Izalayele, a asonekesa mu majina, mu mwiji ni mwiji ni mu atwameni a miji yâ. Mayala oso akexile ni makwinyi ayadi a mivu mba abhitile kya mu kitala kiki, atenene kuya mu ita, a akondala muthu ni muthu. 21 O athu a asonekesa ku mwiji wa Lubene, atenesa makwinyi awana ni samanu a midi ni hama jitanu.

22 O mbutu ya Ximinyá, a asonekesa mu majina, mu mwiji ni mwiji ni mu atwameni a miji yâ. Mayala oso akexile ni makwinyi ayadi a mivu mba abhitile kya mu kitala kiki, atenene kuya mu ita, a akondala muthu ni muthu. 23 O athu a asonekesa ku mwiji wa Ximinyá, atenesa makwinyi atanu ni divwa dya midi ni hama jitatu.

24 O mbutu ya Ngade, a asonekesa mu majina, mu mwiji ni mwiji ni mu atwameni a miji yâ. Mayala oso akexile ni makwinyi ayadi a mivu mba abhitile kya mu kitala kiki, atenene kuya mu ita, a akondala muthu ni muthu. 25 O athu a asonekesa ku mwiji wa Ngade, atenesa makwinyi awana ni kitanu kya midi ni hama jisamanu ni makwinyi atanu.

26 O mbutu ya Judá, a asonekesa mu majina, mu mwiji ni mwiji ni mu atwameni a miji yâ. Mayala oso akexile ni makwinyi ayadi a mivu mba abhitile kya mu kitala kiki, atenene kuya mu ita, a akondala muthu ni muthu. 27 O athu a asonekesa ku mwiji wa Judá, atenesa makwinyi asambwadi ni kiwana kya midi ni hama jisamanu.

28 O mbutu ya Isakale, a asonekesa mu majina, mu mwiji ni mwiji ni mu atwameni a miji yâ. Mayala oso akexile ni makwinyi ayadi a mivu mba abhitile kya mu kitala kiki, atenene kuya mu ita, a akondala muthu ni muthu. 29 O athu a asonekesa ku mwiji wa Isakale, atenesa makwinyi atanu ni kiwana kya midi ni hama jiwana.

30 O mbutu ya Nzebulone, a asonekesa mu majina, mu mwiji ni mwiji ni mu atwameni a miji yâ. Mayala oso akexile ni makwinyi ayadi a mivu mba abhitile kya mu kitala kiki, atenene kuya mu ita, a akondala muthu ni muthu. 31 O athu a asonekesa ku mwiji wa Nzebulone, atenesa makwinyi atanu ni sambwadi a midi ni hama jiwana.

32 O mbutu ya Zuze bhukaxi ka Efalayíme, a asonekesa mu majina, mu mwiji ni mwiji ni mu atwameni a miji yâ. Mayala oso akexile ni makwinyi ayadi a mivu mba abhitile kya mu kitala kiki, atenene kuya mu ita, a akondala muthu ni muthu. 33 O athu a asonekesa ku mwiji wa Efalayíme, atenesa makwinyi awana a midi ni hama jitanu.

34 O mbutu ya Manasa, a asonekesa mu majina, mu mwiji ni mwiji ni mu atwameni a miji yâ. Mayala oso akexile ni makwinyi ayadi a mivu mba abhitile kya mu kitala kiki, atenene kuya mu ita, a akondala muthu ni muthu. 35 O athu a asonekesa ku mwiji wa Manasa, atenesa makwinyi atatu ni kiyadi kya midi ni hama jiyadi.

36 O mbutu ya Bejamí, a asonekesa mu majina, mu mwiji ni mwiji ni mu atwameni a miji yâ. Mayala oso akexile ni makwinyi ayadi a mivu mba abhitile kya mu kitala kiki, atenene kuya mu ita, a akondala muthu ni muthu. 37 O athu a asonekesa ku mwiji wa Bejamí, atenesa makwinyi atatu ni kitanu kya midi ni hama jiwana.

38 O mbutu ya Dane, a asonekesa mu majina, mu mwiji ni mwiji ni mu atwameni a miji yâ. Mayala oso akexile ni makwinyi ayadi a mivu mba abhitile kya mu kitala kiki, atenene kuya mu ita, a akondala muthu ni muthu. 39 O athu a asonekesa ku mwiji wa Dane, atenesa makwinyi asamanu ni kiyadi kya midi ni hama sambwadi.

40 O mbutu ya Azele, a asonekesa mu majina, mu mwiji ni mwiji ni mu atwameni a miji yâ. Mayala oso akexile ni makwinyi ayadi a mivu mba abhitile kya mu kitala kiki, atenene kuya mu ita, a akondala muthu ni muthu. 41 O athu a asonekesa ku mwiji wa Azele, atenesa makwinyi awana ni umoxi a midi ni hama jitanu.

42 O mbutu ya Nafitali, a asonekesa mu majina, mu mwiji ni mwiji ni mu atwameni a miji yâ. Mayala oso akexile ni makwinyi ayadi a mivu mba abhitile kya mu kitala kiki, atenene kuya mu ita, a akondala muthu ni muthu. 43 O athu a asonekesa ku mwiji wa Nafitali, atenesa makwinyi atanu ni kitatu kya midi ni hama jiwana.

44 Yá ene o athu a asonekesa kwa Mozé ni Alá ni ku dikwinyi ni kiyadi kya atwameni a miji ya akwa Izalayele. Kala mutwameni wexile ku pholo dya dibhata dya tat’ê. 45 Akwa Izalayele oso exile ni makwinyi ayadi a mivu mba abhitile kya mu kitala kiki, atenene kuya mu ita, a asonekesa mu mabhata a jitata jâ. 46 Athu oso a asonekesa, atenesa hama jisamanu ni kitatu kya midi ni hama jitanu ni makwinyi atanu.

47 Maji o Jilevita ka asonekesa kumoxi ni ene ku mwiji wa jitata jâ. 48 Jihova wambela dingi Mozé, wixi: 49 “Kana kusonekesa o mwiji wa Levi, kana we kwa akondala kumoxi ni athu amukwa akwa Izalayele. 50 O Jilevita, watokala kwa abhana o kikalakalu kya kulanga o balaka ya Umbangi ni ima yê yoso ni yoso yatokala-mu. Ene anda tuta o balaka ni ima yê yoso, mwéne mwanda bhangela o ikalakalu. Mu kwimika o jibalaka jâ, o balaka ya kudyongekela yatokala kukala bhukaxi. 51 Ithangana yoso ibhinga kwambata o balaka mu kididi kyengi, o Jilevita atokala ku isokomona. Se kubhinga ku imika dingi, o Jilevita atokala ku isokeka. Muthu woso-woso katokala ku mwiji wa Levi uzukama ku balaka, atokala ku mujibha.

52 Kala muthu mukwa Izalayele, watokala kwimika o balaka yê mu kididi kya mutokala, kala muthu mu kibuka kyê kya miji itatu, kala kya asokejeka.* 53 O Jilevita, mu kwimika o jibalaka jâ, o balaka ya Umbangi yatokala kukala bhukaxi, phala o njinda yami ki ikale ku thandu a mundu wa Izalayele. O Jilevita éne anda kala ni kikalakalu kya kulanga o balaka ya Umbangi.”

54 O mundu wa Izalayele wabhange yoso yatendelesele Jihova kwa Mozé. Abhange mwene yoso ya atumina.

2 Jihova wambela dingi Mozé ni Alá, wixi: 2 “Akwa Izalayele atokala kwimika o jibalaka jâ mu kididi kyosole phala o kibuka kyâ kya miji itatu. Kala diyala watokala kukala bhwala o kijimbwete kilondekesa o dibhata dya tat’ê. Mu kwimika o jibalaka jâ, jene jatokala kulungila ku balaka ya kudyongekela. O balaka ya kudyongekela ikala bhukaxi.

3 “O kibuka kya miji itatu amukyendesa ku mwiji wa Judá, kyanda kwimika o jibalaka jâ ku mbandu kutundila o dikumbi, mu ibuka-ibuka.* O mutwameni wa mwiji wa an’a Judá, Nasono mon’a Aminadabe. 4 Ku mwiji wa Judá, oso a asonekesa, kifwa, yo atenene kuya mu ita, atenesa makwinyi asambwadi ni kiwana kya midi ni hama jisamanu. 5 O mwiji wa Isakale wanda kwimika o jibalaka jâ bhu mbandu yâ. O mutwameni wa mwiji wa an’a Isakale, Netanayele mon’a Zuwale. 6 Ku mwiji wa Isakale, oso a asonekesa, kifwa, yo atenene kuya mu ita, atenesa makwinyi atanu ni kiwana kya midi ni hama jiwana. 7 Kwakayela o mwiji wa Nzebulone. O mutwameni wa mwiji wa an’a Nzebulone, Eliyaba mon’a Helone. 8 Ku mwiji wa Nzebulone, oso a asonekesa, kifwa, yo atenene kuya mu ita, atenesa makwinyi atanu ni sambwadi dya midi ni hama jiwana.

9 “Ku kibuka kya miji itatu yatokala kwa Judá, oso a asonekesa, kifwa, yo atenene kuya mu ita, atenesa hama ni makwinyi anake ni kisamanu kya midi ni hama jiwana. Mu kukatuka, éne atokala kudyanga.

10 “O kibuka kya miji itatu amukyendesa ku mwiji wa Lubene, kyanda kala ku lwiji mu ibuka-ibuka. O mutwameni wa mwiji wa an’a Lubene, Elizule mon’a Xedele. 11 Ku mwiji wa Lubene, oso a asonekesa, kifwa, yo atenene kuya mu ita, atenesa makwinyi awana ni samanu a midi ni hama jitanu. 12 O mwiji wa Ximinyá wanda kwimika o jibalaka bhu mbandu yâ. O mutwameni wa mwiji wa an’a Ximinyá, Xelumiyele mon’a Nzudixadayi. 13 Ku mwiji wa Ximinyá, oso a asonekesa, kifwa, yo atenene kuya mu ita, atenesa makwinyi atanu ni divwa dya midi ni hama jitatu. 14 Ku kwakayela o mwiji wa Ngade. O mutwameni wa mwiji wa an’a Ngade, Eliyazafu mon’a Luwele. 15 Ku mwiji wa Ngade, oso a asonekesa, kifwa, yo atenene kuya mu ita, atenesa makwinyi awana ni kitanu kya midi ni hama jisamanu ni makwinyi atanu.

16 “Ku kibuka kya miji itatu yatokala kwa Lubene, oso a asonekesa, kifwa, yo atenene kuya mu ita, atenesa hama makwinyi atanu ni umoxi a midi ni hama jiwana ni makwinyi atanu. Éne o kibuka kya kayadi mu kukatuka.

17 “Kyoso o balaka ya kudyongekela kyanda yambata kididi kyengi, o jibalaka ja Jilevita jatokala kukala bhukaxi ka jibalaka jamukwa.

“Mu kukatuka, ene atokala kudikayela kala kyasokejeka o jibalaka jâ, kala muthu mu kididi kyê, kala kya asokejeka mu ibuka ya miji itatu.

18 “O kibuka kya miji itatu amukyendesa ku mwiji wa Efalayíme, kyanda kala ku mbandu kufwila o dikumbi, mu ibuka-ibuka. O mutwameni wa mwiji wa an’a Efalayíme, Elixama mon’a Amihudi. 19 Ku mwiji wa Efalayíme, oso a asonekesa, kifwa, yo atenene kuya mu ita, atenesa makwinyi awana a midi ni hama jitanu. 20 Ku mbandu yâ kwanda kala o mwiji wa Manasa. O mutwameni wa an’a Manasa, Ngamadiyele mon’a Pedazule. 21 Ku mwiji wa Manasa, oso a asonekesa, kifwa, yo atenene kuya mu ita, atenesa makwinyi atatu ni kiyadi kya midi ni hama jiyadi. 22 Kwakayela o mwiji wa Bejamí. O mutwameni wa mwiji wa Bejamí, Abidani mon’a Ngidiyoni. 23 Ku mwiji wa Bejamí, oso a asonekesa, kifwa, yo atenene kuya mu ita, atenesa makwinyi atatu ni kitanu kya midi ni hama jiwana.

24 “Ku kibuka kya miji itatu yatokala kwa Efalayíme, oso a asonekesa, kifwa, yo atenene kuya mu ita, atenesa hama ni dinake dya midi ni hama. Éne o kibuka kya katatu mu kukatuka.

25 “O kibuka kya miji itatu amukyendesa ku mwiji wa Dane, kyanda kala ku mbandu ya thunda, mu ibuka-ibuka. O mutwameni wa mwiji wa an’a Dane, Ahiyezele mon’a Amixadayi. 26 Ku mwiji wa Dane, oso a asonekesa, kifwa, yo atenene kuya mu ita, atenesa makwinyi asamanu ni kiyadi kya midi ni hama sambwadi. 27 O mwiji wa Azele anda kwimika o jibalaka bhu mbandu yâ. O mutwameni wa mwiji wa an’a Azele, Pajiyele mon’a Okolane. 28 Ku mwiji wa Azele, oso a asonekesa, kifwa, yo atenene kuya mu ita, atenesa makwinyi awana ni umoxi a midi ni hama jitanu. 29 Kwakayela o mwiji wa Nafitali. O mutwameni wa mwiji wa an’a Nafitali, Ahila mon’a Inane. 30 Ku mwiji wa Nafitali, oso a asonekesa, kifwa, yo atenene kuya mu ita, atenesa makwinyi atanu ni kitatu kya midi ni hama jiwana.

31 “Ku kibuka kya miji itatu yatokala kwa Dane, oso a asonekesa, kifwa, yo atenene kuya mu ita, atenesa hama ni makwinyi atanu ni sambwadi dya midi ni hama jisamanu. Éne anda sukina mu kukatuka, kala kya asokejeka mu ibuka ya miji itatu.”

32 Yá ene o akwa Izalayele a asonekesa, kala kya asokejeka bhukaxi ka mabhata a jitata jâ. Mu ibuka ya miji yoso, oso a asonekesa, kifwa, yo atenene kuya mu ita, atenesa hama jisamanu ni kitatu kya midi ni hama jitanu ni makwinyi atanu. 33 Maji o Jilevita ka asonekesa kumoxi ni akwa Izalayele oso, kala kyatumine Jihova kwa Mozé. 34 Akwa Izalayele abhange yoso yatumine Jihova kwa Mozé. Ene exile mu kwimika o jibalaka jâ kala kya asokejeka mu ibuka ya miji itatu. Ene exile mu katuka kala kya asokejeka bhukaxi ka miji yâ ni mabhata a jitata jâ.

3 Yiyi yene yexile o miji ya Alá ni Mozé mu kizuwa kyazwela Jihova ni Mozé ku Mulundu wa Sinayi. 2 Yá ene o majina a an’a Alá: Nadabe, o phande-kumbi, Abihú, Eliyazale ni Itamale. 3 Yá ene o majina a an’a Alá, o akunji a undile, a asolele phala kusidivila kala akunji. 4 Maji Nadabe ni Abihú afwila bhu pholo ya Jihova mu kikangalakata kya Sinayi, kyoso kyabheka túbhya katuxikina mu kijila bhu pholo ya Jihova. Ene kexile ni twana. Eliyazale ni Itamale-phe, asuluka mu kusidivila kala akunji kumoxi ni tata yâ Alá.

5 Jihova wambela-phe Mozé, wixi: 6 “Bheka o mwiji wa Levi, phala azukame kwa Alá o mukunji. Ene anda mukwatekesa. 7 Ene anda kumbidila o ikalakalu yâ yalungu ni Alá ni ikalakalu yalungu ni kifuxi kyoso bhwa zukama o balaka ya kudyongekela, mu kubhanga o ikalakalu yalungu ni balaka. 8 Anda langa o ima yoso ya balaka ya kudyongekela, anda kumbidila we o ikalakalu yâ yalungu ni akwa Izalayele, mu kubhanga kyambote o ikalakalu yalungu ni balaka. 9 Watokala kubhana o Jilevita kwa Alá ni ku an’ê. Ene anda tambula o Jilevita kala ujitu bhukaxi ka an’a Izalayele. 10 Watokala kusola Alá ni an’ê, ene anda langa o kikalakalu kyâ kya ukunji. Muthu wengi* uzukama ku balaka atokala ku mujibha.”

11 Jihova wambela dingi Mozé, wixi: 12 “Tala! Bhukaxi ka akwa Izalayele, ngisola-bhu o Jilevita muveji dya an’a oso a phande-kumbi a akwa Izalayele. O Jilevita janda kala jami’eme. 13 Mukonda ana oso a phande-kumbi a ngitokala. Mu kizuwa ki ngabwika o ana oso a phande-kumbi mu ixi ya Ijitu, o ana oso a phande-kumbi a akwa Izalayele, nga asolo kala kima kikôla phala eme, tunde ku athu kate ku ibhaku. Ene anda kala ami’eme. Éme ngi Jihova.”

14 Jihova wambela dingi Mozé mu kikangalakata kya Sinayi, wixi: 15 “Sonekesa o an’a Levi mu mabhata a jitata jâ ni miji yâ. Watokala kusonekesa o twana twoso twa mala atenesa kya mbeji imoxi mba abhiti kya mu kitala kiki.” 16 Kyenyiki, Mozé wa asonekesa kala kya mutumine Jihova. 17 Yá ene o majina a an’a Levi: Ngelexone, Kohate ni Meladi.

18 Yá ene o an’a Ngelexone, kala kya asokejeka mu miji yâ: Libini ni Ximeyi.

19 Yá ene o an’a Kohate, kala kya asokejeka mu miji yâ: Amelame, Izahale, Hebolone ni Uziyele.

20 Yá ene o an’a Meladi, kala kya asokejeka mu miji yâ: Mahali ni Muxi.

Yú wene o mwiji wa Jilevita kala kya asokejeka mu miji ya jitata jâ.

21 Kwa Ngelexone kwene kwatundu o mwiji wa akwa Libini ni mwiji wa akwa Ximeyi. Yiyi yene o miji ya akwa Ngelexone. 22 O ana oso a mala exile ni mbeji imoxi mba abhitile kya mu kitala kiki a asonekesa, atenesa sambwadi dya midi ni hama jitanu. 23 O miji ya akwa Ngelexone yexile mukwimika o jibalaka jâ kudima dya balaka ya kudyongekela, ku mbandu kufwila o dikumbi. 24 O mutwameni wa dibhata dya jitata ja akwa Ngelexone, Eliyazafu mon’a Layele. 25 O an’a Ngelexone exile ni kikalakalu kya kulanga o balaka ya kudyongekela, o ivunginu yê yoso ni kulutina ya mwelu wa balaka ya kudyongekela, 26 ni jikulutina ja kithádi ni kulutina ya mwelu wa kithádi ikondoloka o balaka ni kalatódyu ni mikolo yê ni ikalakalu yoso yalungu ni ima yiyi.

27 Kwa Kohate kwene kwejila o mwiji wa akwa Amelame, o mwiji wa akwa Izahale, o mwiji wa akwa Hebolone ni mwiji wa akwa Uziyele. Yiyi yene o miji ya akwa Kohate. 28 O ana oso a mala exile ni mbeji imoxi mba abhitile kya mu kitala kiki a asonekesa, atenesa dinake dya midi ni hama jisamanu. Éne exile ni kikalakalu kya kulanga o kididi kikôla. 29 O miji ya an’a Kohate exile mukwimika o jibalaka jâ ku mbandu ya lwiji ya balaka ya kudyongekela. 30 O mutwameni wa dibhata dya jitata ja miji ya akwa Kohate, Elizafane mon’a Uziyele. 31 Ene exile ni kikalakalu kya kulanga o Álaka, o meza, o ditudilu dya tundeya, o jikalatódyu, o imbamba ya kubhanga-nayu o ikalakalu mu kididi kikôla, o kulutina ni ikalakalu yoso yalungu ni ima yiyi.

32 O mutwameni wexile ku pholo* ya Jilevita Eliyazale mon’a Alá o mukunji. Mwéne wexile mu kwendesa yó exile mukalakala mu kididi kikôla.

33 Kwa Meladi kwene kwejila o mwiji wa akwa Mahali ni mwiji wa akwa Muxi. Yiyi yene yexile o miji ya akwa Meladi. 34 O ana oso a mala exile ni mbeji imoxi mba abhitile kya mu kitala kiki a asonekesa, atenesa midi jisamanu ni hama jiyadi. 35 O mutwameni wa dibhata dya jitata ja miji ya akwa Meladi, Zudiyele mon’a Abiyale. Ene exile mukwimika o jibalaka jâ ku mbandu ya thunda ya balaka ya kudyongekela. 36 O an’a Meladi exile ni kikalakalu kya kulanga o mabaya a balaka, o mixi yê, o jiphiladi jê, o ibaka yê ni kifikidilu, o imbamba yê yoso ni kikalakalu kyoso kyalungu ni ima yiyi, 37 ni jiphiladi jakondolokele o kithádi ni ibaka yê ni kifikidilu, o jiphapha jê ni mikolo yê ya kufikidila.

38 Mozé ni Alá ni an’ê, exile mukwimika o jibalaka jâ ku pholo ya balaka ya kudyongekela ku mbandu kutundila o dikumbi. Ene exile ni kikalakalu kya kulanga o kididi kikôla kala kima kyatokalele kubhanga phala o mbote ya akwa Izalayele. Muthu wengi* weji zukama ku balaka eji mujibha.

39 Ku Jilevita, o ana oso a mala exile ni mbeji imoxi mba abhitile kya mu kitala kiki, a asonekesa kwa Mozé ni Alá mu miji yâ, kala kyatumine Jihova, atenesa makwinyi ayadi ni kiyadi kya midi.

40 Jihova wambela-phe Mozé, wixi: “Soneka o majina a ana oso a phande-kumbi a akwa Izalayele atenesa kya mbeji imoxi mba abhiti kya mu kitala kiki. Wa akondala we. 41 Sola o Jilevita phala eme, muveji dya ana oso a phande-kumbi a akwa Izalayele. Sola o ibhaku ya Jilevita muveji dya ibhaku yoso adyanga ku ivwala, ya akwa Izalayele. Éme ngi Jihova.” 42 Mozé wasonekesa-phe o ana oso a phande-kumbi a akwa Izalayele kala kya mutendelesele Jihova. 43 O ana oso a mala exile ni mbeji imoxi mba abhitile kya mu kitala kiki a asonekesa, atenesa makwinyi ayadi ni kiyadi kya midi ni hama jiyadi ni makwinyi asambwadi ni kitatu.

44 Jihova wambela dingi Mozé, wixi: 45 “Sola o Jilevita muveji dya ana oso a phande-kumbi a akwa Izalayele. Sola o ibhaku ya Jilevita muveji dya ibhaku ya akwa Izalayele. O Jilevita anda kala ami’eme. Éme ngi Jihova. 46 Phala kukula o hama jiyadi ni makwinyi asambwadi ni kitatu kya an’a phande-kumbi a akwa Izalayele asomboka o Jilevita, 47 Muthu ni muthu watokala kubhana xikulu* jitanu, kala kyasoko o xikulu ya kididi kikôla. Xikulu imoxi yasoko ni makwinyi ayadi a jijela.* 48 Watokala kubhana o kitadi kiki kwa Alá ni an’ê kala futu phala kukula o an’a phande-kumbi a akwa Izalayele, asomboka o Jilevita.” 49 Kyenyiki, Mozé wabhongolola o kitadi kya futu ya kukula o an’a phande-kumbi a akwa Izalayele asomboka o Jilevita. 50 Mwene wabhongolola o kitadi kya an’a phande-kumbi akwa Izalayele: Midi hama jitatu ni makwinyi asamanu ni kitanu kya jixikulu, kala o xikulu ya kididi kikôla. 51 Mozé wabhana-phe o kitadi kya futu ya kukula kwa Alá ni an’ê, kala o kizwelu* kya Jihova, kala kyatumine Jihova kwa Mozé.

4 Jihova wambela-phe Mozé ni Alá, wixi: 2 “Sonekesenu o an’a Kohate bhukaxi ka an’a Levi mu miji yâ ni mabhata a jitata jâ, 3 oso ala ni makwinyi atatu ndu makwinyi atanu a mivu abhanga mbandu ku kibuka kya athu a asolo phala kukalakala mu balaka ya kudyongekela.

4 “Kiki kyene o kikalakalu kya an’a Kohate mu balaka ya kudyongekela. Kima kikôla kinene. 5 Kyoso akwa Izalayele kyatunda kididi anga aya kididi kyengi, Alá ni an’ê anda bokona, anda katula o kulutina ya kibatulu, anda vunga-nayu o Álaka ya Umbangi. 6 Ku thandu dyê anda ta-ku kivunginu kya kibha kya foka,* anda kizala ku thandu a kulutina ya azulu,* anda ta-ku o mikambu phala ku ituta.

7 “Anda zala we kulutina ya azulu ku thandu a meza a jimbolo jikôla, anda ta-ku o malonga, o jikopho, o matijela ni jijala* ja jisata ja kunwa. O jimbolo jene mubhakula ithangana yoso, jatokala kukala jinga ku meza. 8 Ku thandu a ima yiyi mwanda zala-ku kulutina yakusuka. Ku thandu a meza mwanda ta-ku kivunginu kya kibha kya foka, mwanda ta-ku o mikambu phala ku ituta. 9 Mukusuluka ene anda kwata kulutina ya azulu, anda vunga-nayu o ditudilu dya tundeya dya kumwikina, ni tundeya we, o ijiminu, o ididi ya kutula o makala, ni ima yoso muya o máji, phala tuye ni kumwika. 10 Ene anda vunga o ditudilu dya tundeya ni ima yê yoso mu kivunginu kya kibha kya foka, anda itula ku thandu a dibaya phala ku ituta. 11 Ku thandu a kalatódyu ka ulu ene anda zala-ku kulutina ya azulu, anda ta-ku kivunginu kya kibha kya foka, anda ta-ku we o mikambu phala ku ituta. 12 Anda katula-phe o ima yoso ya kukalakala-nayu mu kididi kikôla ithangana yoso, anda itula mu kulutina ya azulu, ku thandu a ima yiyi, anda ta-ku kivunginu kya kibha kya foka, anda itula ku thandu a dibaya phala ku ituta.

13 “Atokala kukatula o uthôkwa* wa kalatódyu ni kuzala-ku kulutina ya jidinya ja pulúpula. 14 Ku thandu dyê anda ta-ku o ima yoso ya kukalakala-nayu bhu mbandu a kalatódyu: O ididi ya kutula o makala, o jingalufu,* o ivotelu ni matijela, ima yoso yatokala ku kalatódyo. Ku thandu dyê anda ta-ku kivunginu kya kibha kya foka ni kuta-ku mikambu phala ku ituta.

15 “Kyoso akwa Izalayele kyanda katuka phala kuya kididi kyengi, Alá ni an’ê anda zubha kuvunga o kididi kikôla ni ima yoso ya kididi kikôla. Kyenyiki, o an’a Kohate anda bokona phala ku ituta, maji katokala kukwata mu ima yala mu kididi kikôla phala kafwe. Kiki kyene o kikalakalu* kya an’a Kohate mu balaka ya kudyongekela.

16 “Eliyazale mon’a Alá o mukunji, mwéne wala ni kikalakalu kya kulanga o máji a kumwikina, o wasu wadizumba unuha kyambote, o sata ya makudya yene mubhakula ithangana yoso ni máji a ku unda. Mwéne ulanga o balaka yoso ni ima yoso yala-mu kumoxi ni kididi kikôla ni ima yê.”

17 Jihova wambela dingi Mozé ni Alá, wixi: 18 “Kimwehele o miji ya akwa Kohate ku ajima o mbutu bhukaxi ka Jilevita, 19 phala n’akale ku mwenyu, kafwe mukonda dya kuzukama mu ima ikôla kinene. Mubhanga kiki: Alá ni an’ê anda bokona, muthu ni muthu anda mubhana o kikalakalu kyê ni ima yanda tuta. 20 Ene katokala kubokona, katokala we kumona o ima ikôla né mu kakithangana kofele ngo, phala kafwe.”

21 Jihova wambela-phe Mozé, wixi: 22 “Mwatokala kusonekesa o an’a Ngelexone mu mabhata a jitata jâ ni miji yâ. 23 Watokala kusonekesa oso ala ni makwinyi atatu ndu makwinyi atanu a mivu, atokala ku kibuka kya athu a asolo phala kukalakala mu balaka ya kudyongekela. 24 O miji ya akwa Ngelexone a asolo phala kulanga ni 25 kututa o jikulutina ja balaka, o balaka ya kudyongekela, o kivunginu kyê, o kivunginu kya kibha kya foka kyala ku thandu dyê, o kulutina ya mwelu wa balaka ya kudyongekela, 26 o jikulutina ja kithádi, o kulutina ya mwelu wa kithádi ikondoloka o balaka ni kalatódyu, o mikolo yê ya kufikidila, ni ima yê yoso, ni yoso ibhanga mbandu mu kikalakalu kiki. Kiki kyene o kikalakalu kyâ. 27 Alá ni an’ê, éne anda kala ku pholo ni kulanga o ikalakalu yoso ya akwa Ngelexone ni ima yoso yanda tuta. O kikalakalu kya kulanga o ima yoso yanda tuta, ene a anda ibhana ku akwa Ngelexone. 28 Kiki kyene o kikalakalu kyatokala kubhanga o miji ya akwa Ngelexone mu balaka ya kudyongekela. O muthu wanda kala ku pholo mu kulanga o ikalakalu yâ, Itamale mon’a Alá, o mukunji.

29 “Yalungu ni an’a Meladi, watokala ku asonekesa mu miji yâ ni mabhata a jitata jâ. 30 Wanda sonekesa oso ala ni makwinyi atatu ndu makwinyi atanu a mivu abhanga mbandu ku kibuka kya athu a asolo phala kukalakala mu balaka ya kudyongekela. 31 O ima yatokala kututa kala kikalakalu kyâ mu balaka ya kudyongekela, yenyiyi: o mabaya a balaka, o mixi yê, o jiphiladi jê, o ibaka yê ni kifikidilu, 32 o jiphiladi jikondoloka o kithádi, o ibaka yê ni kifikidilu, o jiphapha jê ni mikolo yê ya kufikidila, kumoxi ni ima yê yoso ni yoso yalungu ni kikalakalu kiki. Mwatokala ku asola mu majina mâ, kala muthu ni kimbamba kyê kyatokala kututa. 33 Kiki kyene kyatokala kukalakala o miji ya an’a Meladi mu balaka ya kudyongekela. Itamale mon’a Alá o mukunji, mwéne wanda ku akalela ku pholo.

34 Kyenyiki, Mozé ni Alá ni atwameni a mundu asonekesa o an’a akwa Kohate mu miji yâ ni mabhata a jitata jâ, 35 oso exile ni makwinyi atatu ndu makwinyi atanu a mivu atokalele ku kibuka kya athu a asolo phala kukalakala mu balaka ya kudyongekela. 36 Athu oso a asonekesa kala kyadisokejeka mu miji yâ, atenesa midi jiyadi ni hama sambwadi ni makwinyi atanu. 37 Yá ene o athu oso a asonekesa ku miji ya akwa Kohate oso exile mu kalakala mu balaka ya kudyongekela. Mozé ni Alá a asonekesa kala o kitendelesu kyabhanene Jihova bhukaxi ka Mozé.

38 O An’a Ngelexone a asonekesa mu miji yâ ni mabhata a jitata jâ, 39 oso exile ni makwinyi atatu ndu makwinyi atanu a mivu atokalele ku kibuka kya athu a asolo phala kukalakala mu balaka ya kudyongekela. 40 Athu oso a asonekesa kala kyadisokejeka mu miji yâ ni mu mabhata a jitata jâ, atenesa midi jiyadi ni hama jisamanu ni makwinyi atatu. 41 Yá ene a asonekesa ku miji ya an’a Ngelexone, oso exile mu kalakala mu balaka ya kudyongekela. Mozé ni Alá a asonekesa kala o kitendelesu kya Jihova.

42 O an’a Meladi a asonekesa mu miji yâ ni mabhata a jitata jâ, 43 oso exile ni makwinyi atatu ndu makwinyi atanu a mivu atokalele ku kibuka kya athu a asolo phala kukalakala mu balaka ya kudyongekela. 44 Athu oso a asonekesa kala kyadisokejeka mu miji yâ, atenesa midi jitatu ni hama jiyadi. 45 Yá ene a asonekesa kwa Mozé ni Alá ku miji ya an’a Meladi, kala o kitendelesu kyabhanene Jihova kwa Mozé.

46 Mozé ni Alá ni atwameni akwa Izalayele asonekesa o Jilevita joso jiji mu miji yâ ni mabhata a jitata jâ. 47 Ene exile mu kitala kya makwinyi atatu ndu makwinyi atanu a mivu. Oso a asolo phala kukalakala ni kututa o ima yalungu ni balaka ya kudyongekela. 48 Athu oso a asonekesa atenesa dinake dya midi ni hama jitanu ni makwinyi anake. 49 A asonekesa kala o kitendelesu kyabhanene Jihova kwa Mozé. Kala muthu ni kikalakalu kyê kya mubhana, ni ima yatokalele kututa. A asonekesa kala kyatendelesele Jihova kwa Mozé.

5 Jihova wambela dingi Mozé, wixi: 2 “Tendelesa akwa Izalayele, akatule mwaxaxi ka mundu, oso ala ni dibhute, oso ala ni kibhubhe ni oso yó akasana mukonda dya kukwata ku kimbi kya muthu, 3 kikale diyala kikale muhatu, atokala ku mukatula-mu. Atokala ku mukatula mwaxaxi ka mundu phala kakasanese o athu oso, mukonda eme ngala bhukaxi kâ.” 4 Akwa Izalayele anga abhanga mwene kyenyiki. O athu a kasanene a akatula mwaxaxi ka mundu. Kala kyatendelesele Jihova kwa Mozé kyene kyabhange akwa Izalayele.

5 Jihova wambela dingi Mozé, wixi: 6 “Ambela akwa Izalayele: ‘Se kukala diyala mba muhatu uta kituxi kyoso-kyoso kyene muta o athu, anga ukamba kukala fiyele kwa Jihova, muthu yú wanda kala ni kikuma. 7 Watokala* kufisala o kituxi kyate ni kufuta o valolo yasoko ni kikuma kyate ni kubandekesa-ku we mbandu ya katanu. Watokala ku ibhana kwa yó amute o mulonga. 8 Maji se o yó amute o mulonga kala ni ndandu phala kutambula o futu, o futu yiyi atokala ku ibhakula kwa Jihova. Yene yanda kala yangene ya mukunji, kumoxi ni ndumbe ya mbudi, phala o mukunji abhangese kwila o ituxi ya yó wate o mulonga a iloloka.

9 “‘Ujitu woso ukôla ubhana akwa Izalayele ku mukunji, wanda kala wangene wa mukunji. 10 O ima ikôla ibhana muthu ni muthu yanda mutokala.* O kima kibhana o muthu ku mukunji, kyanda kala kya mukunji.’”

11 Jihova wambela dingi Mozé, wixi: 12 “Ambela akwa Izalayele: ‘Kiki kyene kyatokala o kubhanga se muhatu ubhukumuka* anga ukamba kukala fiyele kwa mwadi wê, 13 mwene anga uzeka ni diyala dyengi, maji o mwadi wê kejiya o ima yabhiti, o maka anga akala mu kaswekele, anga ukasana, maji kikwexile jimbangi, o mwene we kamukwata: 14 se diyala dikala ni difuba anga ufika kwila muhat’wê wate phanda, o muhatu anga ukasana mwene, mba se o diyala dikala ni difuba, anga ufika kwila muhat’wê wate phanda, maji o muhatu kakasana, 15 o diyala watokala kwambata muhat’wê ku mukunji, kumoxi ni sata ya muhat’wê. O sata yiyi, mbandu ya kakwinyi ka efa ya sevada. Mwene katokala kulundulula máji né libanu ku thandu dya sata, mukonda sata ya makudya yalungu ni difuba. Sata ya makudya* ibhangesa kulembalala o kikuma.

16 “‘O mukunji wanda bheka o muhatu ku pholo, wanda mwimanesa bhu pholo ya Jihova. 17 O mukunji wanda katula menya akôla mu disanga, wanda katula tumavu bhoxi,* mu balaka, wanda tuta mu menya. 18 O mukunji wanda kwimanesa o muhatu bhu pholo ya Jihova, wanda sangununa o ndemba ya muhatu, wanda ta bhu maku a muhatu o sata ya makudya ya kulembalala, kifwa o sata ya makudya yalungu ni difuba. O mukunji wanda kwata o menya alulu abhekela o kastiku.*

19 “‘O mukunji wanda bhangesa-phe o muhatu kulôka. O mukunji wanda tumbula o izwelu yiyi: “Se k’uzeke ni diyala dyengi kyoso ki wexile hanji mu kilangidilu kya mwadi wé, se k’ubhukumuke, se k’udikasanese we, o menya alulu yá abhekela kastiku, kanda kubhanga kima. 20 Maji se wabhukumuka kyoso ki wexile mu kilangidilu kya mwadi wê, wadikasanesa, éye wazeka ni diyala dyengi o mwadi wé ki mwene . . .” 21 Kyenyiki o mukunji wanda bhangesa o muhatu kulôka mu ukexilu wa kubhubhidila. O mukunji wanda kwambela o muhatu: “Jihova a kubhangese kukala phangu mu maka alungu ni kubhubhidila ni kulôka bhukaxi ka mundu wé, Jihova abhangese o ditabela* dyé kukamba nguzu* ni mala mé kujimba. 22 O menya yá abhekela kastiku anda bokona mu midya yé, ni kubhangesa o mala mé kujimba ni ditabela dyé kukamba nguzu. O muhatu watokala kuzwela: “Kyene! Kyene!”*

23 “‘O mukunji watokala kusoneka o izwelu yiyi ya kubhubhidila mu divulu ni ku ijima mu menya alulu. 24 Mwene wanda tumina o muhatu kunwa o menya abhekela kastiku. Kyanda zubha o kunwa, o menya anda mubhekela ndolo mu mala. 25 O mukunji watokala kukatula o sata ya makudya yalungu ni difuba yala bhu lukwaku lwa muhatu, ni ku ibhitisa ku pholo ni ku dima bhu pholo ya Jihova. O mukunji wanda kwambata o sata ku kalatódyu. 26 O mukunji wanda katula dikanda dya lukwaku ku sata ya makudya ni dikale kilembalesu phala Nzambi, wanda yoha ku kalatódyu. Mukusuluka wanda tumina o muhatu kunwa o menya. 27 Kyoso mwene kyanda bhangesa o muhatu kunwa o menya, se o muhatu wadikasanesa, watele phanda, o menya abhekela kastiku anda bokona mu mala dyê, anda mubhekela jindolo, o mala mê anda jimba, o ditabela dyê kidyanda kala ni nguzu. O muhatu wanda kala phangu mu maka alungu ni kubhubhidila bhukaxi ka mundu wê. 28 Maji se o muhatu kadikasanesa, wazelye, kanda tambula o kastiku kaka. Wanda tena kwimita ni kuvwala twana.

29 “‘Kiki kyene o kijila kyalungu ni difuba, se muhatu wala mu kilangidilu kya mwadi wê, udyanguka anga udikasanesa, 30 mba diyala dikala ni difuba anga ufika kwila o muhat’wê wate phanda. Mwene wanda bhangesa-phe muhat’wê kwimana bhu pholo ya Jihova, o mukunji wanda kumbidila o kijila kiki mu maka alungu ni muhat’wê. 31 O diyala kanda kala ni kikuma, maji muhat’wê anda mukastikala mukonda dya kikuma kyê.’”

6 Jihova wambela dingi Mozé, wixi: 2 “Ambela akwa Izalayele: ‘Se kukala diyala mba muhatu ubhanga kikanenu kyakatunda kya kukala Nazilé* phala Jihova, 3 katokala kunwa vinyu ni mauholwa amukwa. Katokala kunwa vindangele ya vinyu, né vindangele yofunge ni uholwa. Katokala kunwa kima kyobhange ni jiuva né kudya jiuva, kikale jabete mba jakukuta. 4 Katokala kudya kima kyatundu ku muvidi, tunde ku jiuva jawisu kate ku yangu yê, mu izuwa yoso ya kukumbidila o kikanenu kyê kya kukala Nazilé.

5 “‘Mu izuwa yoso ya kukumbidila o kikanenu kyê kya kukala Nazilé, mu mútwe wê kimutokala kubhita phoko. Mwene watokala kuzela mu kwehela o ndemba yê kukula kate kyanda bhwa o izuwa yadibhakula kwa Jihova. 6 Katokala kuzukama ku kimbi kya muthu mu izuwa yoso yadibhakula kwa Jihova. 7 Né mwene se tat’ê, man’yâ mba phang’yê ya diyala mba ya muhatu ufwa, mwene katokala kudikasanesa, mukonda o kijimbwete kyê kya kukala Nazilé bhu pholo ya Nzambi, kyala ku mútwe wê.

8 “‘Mwene wanda kala muthu ukôla bhu pholo ya Jihova, mu izuwa yoso ya kukumbidila o kikanenu kyê kya kukala Nazilé. 9 Maji se mu kithangana ni mbandu kufwa muthu bhu mbandu yê, mwene anga ukasanesa o ndemba yê ilombolola o kudibhakula kwê kwa Nzambi, mwene watokala kubhuta o mútwe mu kizuwa kya kudizelesa kwê. Watokala ku ubhuta mu kizuwa kya kasambwadi. 10 Mu kizuwa kya dinake, watokala kubheka ku mukunji tumembe tuyadi mba tupomba tuyadi bhu mwelu wa balaka ya kudyongekela. 11 O mukunji wanda tubhakula, kamoxi kala sata ya kituxi, kamukwa kala sata ya kwoha. O mukunji wanda bhangesa kwila o muthu a muloloka o ituxi yê mukonda wate kituxi mu kuzukama ku kimbi. O Nazilé wanda zelesa-phe o mútwe wê mu kizuwa kyenyiki. 12 Mwene watokala kudibhakula dingi kwa Jihova n’amateke kukumbidila dingi o izuwa yê ya kukala Nazilé. Wanda bheka kambudi ka muvu umoxi kala sata ya kikuma. Maji o izuwa ya dyanga kanda ikondala, mukonda wadikasanesa, kakumbidila o kikanenu kyê kya kukala Nazilé.

13 “‘Kiki kyene o kijila kyalungu ni Nazilé. Kyoso mwene kyanda tenesa o izuwa yê ya kukala Nazilé, anda mwambata bhu mwelu wa balaka ya kudyongekela. 14 Bhenyobho, bhene bhwanda bhakula o sata yê kwa Jihova: Kambudi ka ndumbe kadisanze ka muvu umoxi kala sata ya kwoha, kambudi ka mukaji kadisanze ka muvu umoxi kala sata ya kituxi, ndumbe ya mbudi yadisanze kala sata ya paze, 15 kinda kya jimbolo jobhange mu ukexilu wa nela, jakambe felemendu, jobhange ni fadinya yafina, jofunge ni máji, jimbolo jatolo o mukomo jakambe felemendu, jowese ni máji ni jisata ja makudya ni ja uholwa. 16 O mukunji wanda jibheka bhu pholo ya Jihova, wanda bhakula o sata ya kituxi ni sata ya kwoha. 17 Wanda bhakula o ndumbe ya mbudi kwa Jihova kala sata ya paze, kumoxi ni kinda kya jimbolo jakambe felemendu. O mukunji wanda bhakula o sata ya makudya ni ya uholwa.

18 “‘Mukyenyiki, o Nazilé wanda bhuta o ndemba ya mútwe wê bhu mwelu wa balaka ya kudyongekela. Wanda kwata o ndemba yakulu mu kithangana kya kukumbidila o kikanenu kya kukala Nazilé, wanda ita mu túbhya twala koxi a sata ya paze. 19 O mukunji wanda katula kinama kimoxi kya mútwe kya ndumbe ya mbudi kyolambe ni mbolo imoxi yobhange mu ukexilu wa nela, yakambe felemendu yokatule mu kinda, mbolo imoxi yatolo o mukomo yakambe felemendu ni ku itula bhu maku a Nazilé kyoso kyanda zubha kubhuta o ndemba, yexile o kijimbwete kyê kya Unazilé. 20 O mukunji watokala ku ibhitisa ku pholo ni ku dima kala sata phala Jihova. Kima kikôla phala o mukunji kumoxi ni phetu yabheka kala sata* ni kinama kyobhane kala ujitu. Mukubhita o ima yiyi, o Nazilé utena kya kunwa vinyu.

21 “‘Kiki kyene o kijila kyalungu ni Nazilé ubhanga kikanenu. Se mwene utena kubhakula sata kwa Jihova yatúndu o kijijidiku kyê kya kukala Nazilé, anga ubhanga kikanenu mu ukexilu yú, watokala kukumbidila o kikanenu kyê mu kuxila o kijila kyalungu ni kukala Nazilé.’”

22 Jihova wambela dingi Mozé: 23 “Ambela Alá ni an’ê: ‘Kiki kyene ki mwatokala kubesowala o mundu wa Izalayele mu kwamba:

24 “Jihova a kubesowale, a kulange.

25 Jihova abhangese o pholo yê kukumwikina, a kukwatekese.

26 Jihova a kukwatele henda,* a kubhane o kutululuka.”’

27 Ene anda tumbula o dijina dyami bhukaxi ka mundu wa Izalayele ni nga abesowale.”

7 Mu kizuwa kyazubha Mozé kwimika o balaka, wa i undu yu wa ikôlesa kumoxi ni ima yê yoso, o kalatódyu ni ima yê yoso. Kyoso kyazubha ku unda ni kukôlesa o ima yiyi, 2 o atwameni a akwa Izalayele ni atwameni a miji ya jitata, abhakula sata. O atwameni yá a miji, exile ku pholo mu kikalakalu kya kusonekesa o athu, 3 abheka o sata yâ bhu pholo ya Jihova. Kifwa makalu asamanu o vunge, dikwinyi ni kiyadi kya jindumbe ja ngombe. Atwameni ayadi dikalu dimoxi, mutwameni umoxi ngombe imoxi, mutwameni wamukwa ngombe imoxi. A ibheka bhu pholo ya balaka. 4 Jihova wambela Mozé, wixi: 5 “Xikina o ima yiyi yabheka ene, mukonda anda ibhindamena mu kikalakalu kya balaka ya kudyongekela. Watokala ku ibhana ku Jilevita. Kala kyabhindamena muthu ni muthu phala kubhanga o ikalakalu yâ.”

6 Kyenyiki, Mozé waxikina o makalu ni jindumbe ja jingombe yu wajibhana ku Jilevita. 7 Wabhana makalu ayadi ni jindumbe jiwana ja jingombe ku an’a Ngelexone kala kyabhindamene phala kubhanga o ikalakalu yâ. 8 Wabhana we makalu awana ni dinake dya jindumbe jangombe ku an’a Meladi, kala kyabhindamene phala kubhanga o ikalakalu yâ. Itamale mon’a Alá o mukunji, mwéne wexile ku pholo mu kulanga o ima yoso yiyi. 9 Maji mwene kabhana kima ku an’a Kohate mukonda exile mubhanga o ikalakalu yâ mu kididi kikôla. O ima ikôla ene exile mu itutila bhu isuxi.

10 O atwameni abhakula o sata yâ, kyoso kyabhakula o kalatódyu mu kizuwa kya ka undu. Kyoso o atwameni kyabheka o sata yâ bhu pholo ya kalatódyu, 11 Jihova wambela Mozé, wixi: “Phala kubhakula o kalatódyu, o atwameni atokala kubheka o jisata jâ, kala muthu mu kizuwa kyê.”

12 O muthu wabhana o sata yê mu kizuwa kya dyanga, Nasono mon’a Aminadabe watokala ku mwiji wa Judá. 13 O sata yê yexile dilonga dimoxi dya phalata dyexile munema hama ni makwinyi atatu a xikulu* ni ditijela dimoxi dya phalata dyexile munema makwinyi asambwadi a xikulu, kala o xikulu ya kididi kikôla, ene ezalele ni fadinya yafina yofunge ni máji phala o sata imoxi ya makudya. 14 Ni ditijela dimoxi dyofele dya ulu dyexile munema dikwinyi dya xikulu, dyezala ni wasu wadizumba unuha kyambote, 15 kangombe kamoxi, ndumbe imoxi ya mbudi, ni kambudi ka muvu umoxi phala sata imoxi ya kwoha, 16 kisutu kimoxi kya hombo phala sata imoxi ya kituxi 17 ni ndumbe jiyadi ja jingombe, ndumbe jitanu ja jimbudi, isutu itanu ya jihombo ni tumbudi tutanu twa muvu umoxi, phala o sata ya paze. Yiyi yene o sata ya Nasono mon’a Aminadabe.

18 Mu kizuwa kya kayadi, o mutwameni wa an’a Isakale, Netanayele, mon’a Zuwale, wabheka o sata yê. 19 O sata yê yabhakula dilonga dimoxi dya phalata dyexile munema hama ni makwinyi atatu a xikulu ni ditijela dimoxi dya phalata dyexile munema makwinyi asambwadi a xikulu kala o xikulu ya kididi kikôla, ene ezalele ni fadinya yafina yofunge ni máji phala o sata imoxi ya makudya. 20 Ni ditijela dimoxi dyofele dya ulu dyexile munema dikwinyi dya xikulu dyezala ni wasu wadizumba unuha kyambote, 21 kangombe kamoxi, ndumbe imoxi ya mbudi, ni kambudi ka muvu umoxi phala sata imoxi ya kwoha, 22 kisutu kimoxi kya hombo phala sata imoxi ya kituxi, 23 ni ndumbe jiyadi ja jingombe, ndumbe jitanu ja jimbudi, isutu itanu ya jihombo ni tumbudi tutanu twa muvu umoxi, phala o sata ya paze. Yiyi yene o sata ya Netanayele mon’a Zuwale.

24 Mu kizuwa kya katatu, o mutwameni wa an’a Nzebulone, Eliyaba, mon’a Helone, 25 wabhana o sata yê: Dilonga dimoxi dya phalata dyexile munema hama ni makwinyi atatu a xikulu ni ditijela dimoxi dya phalata dyexile munema makwinyi asambwadi a xikulu kala o xikulu ya kididi kikôla, ene ezalele ni fadinya yafina yofunge ni máji phala o sata imoxi ya makudya. 26 Ni ditijela dimoxi dyofele dya ulu dyexile munema dikwinyi dya xikulu dyezala ni wasu wadizumba unuha kyambote, 27 kangombe kamoxi, ndumbe imoxi ya mbudi, ni kambudi ka muvu umoxi phala sata imoxi ya kwoha, 28 kisutu kimoxi kya hombo phala sata imoxi ya kituxi, 29 ni ndumbe jiyadi ja jingombe, ndumbe jitanu ja jimbudi, isutu itanu ya jihombo ni tumbudi tutanu twa muvu umoxi, phala o sata ya paze. Yiyi yene o sata ya Eliyaba mon’a Helone.

30 Mu kizuwa kya kawana, o mutwameni wa an’a Lubene, Elizule mon’a Xedele, 31 wabhana o sata yê: Dilonga dimoxi dya phalata dyexile munema hama ni makwinyi atatu a xikulu ni ditijela dimoxi dya phalata dyexile munema makwinyi asambwadi a xikulu kala o xikulu ya kididi kikôla, ene ezalele ni fadinya yafina yofunge ni máji phala sata imoxi ya makudya. 32 Ni ditijela dimoxi dyofele dya ulu dyexile munema dikwinyi dya xikulu dyezala ni wasu wadizumba unuha kyambote, 33 kangombe kamoxi, ndumbe imoxi ya mbudi, ni kambudi ka muvu umoxi phala sata imoxi ya kwoha, 34 kisutu kimoxi kya hombo phala sata imoxi ya kituxi, 35 ni ndumbe jiyadi ja jingombe, ndumbe jitanu ja jimbudi, isutu itanu ya jihombo ni tumbudi tutanu twa muvu umoxi, phala o sata ya paze. Yiyi yene o sata ya Elizule mon’a Xedele.

36 Mu kizuwa kya katanu, o mutwameni wa an’a Ximinyá, Xelumiyele mon’a Nzudixadayi, 37 wabhana o sata yê: Dilonga dimoxi dya phalata dyexile munema hama ni makwinyi atatu a xikulu ni ditijela dimoxi dya phalata dyexile munema makwinyi asambwadi a xikulu kala o xikulu ya kididi kikôla, ene ezalele ni fadinya yafina yofunge ni máji phala o sata imoxi ya makudya. 38 Ni ditijela dimoxi dyofele dya ulu dyexile munema dikwinyi dya xikulu dyezala ni wasu wadizumba unuha kyambote, 39 kangombe kamoxi, ndumbe imoxi ya mbudi, ni kambudi ka muvu umoxi phala sata imoxi ya kwoha, 40 kisutu kimoxi kya hombo phala sata imoxi ya kituxi, 41 ni ndumbe jiyadi ja jingombe, ndumbe jitanu ja jimbudi, isutu itanu ya jihombo ni tumbudi tutanu twa muvu umoxi, phala o sata ya paze. Yiyi yene o sata ya Xelumiyele mon’a Nzudixadayi.

42 Mu kizuwa kya kasamanu, o mutwameni wa an’a Ngade, Eliyazafu, mon’a Dewele, 43 wabhana o sata yê: Dilonga dimoxi dya phalata dyexile munema hama makwinyi atatu a xikulu ni ditijela dimoxi dya phalata dyexile munema makwinyi asambwadi a xikulu kala o xikulu ya kididi kikôla, ene ezalele ni fadinya yafina yofunge ni máji phala o sata imoxi ya makudya. 44 Ni ditijela dimoxi dyofele dya ulu dyexile munema dikwinyi dya xikulu dyezala ni wasu wadizumba unuha kyambote, 45 kangombe kamoxi, ndumbe imoxi ya mbudi, ni kambudi ka muvu umoxi phala sata imoxi ya kwoha, 46 kisutu kimoxi kya hombo phala sata imoxi ya kituxi, 47 ni ndumbe jiyadi ja jingombe, ndumbe jitanu ja jimbudi, isutu itanu ya jihombo ni tumbudi tutanu twa muvu umoxi, phala o sata ya paze. Yiyi yene o sata ya Eliyazafu, mon’a Dewele.

48 Mu kizuwa kya kasambwadi, o mutwameni wa an’a Efalayíme, Elixama mon’a Amihudi, 49 wabhana o sata yê: Dilonga dimoxi dya phalata dyexile munema hama makwinyi atatu a xikulu ni ditijela dimoxi dya phalata dyexile munema makwinyi asambwadi a xikulu, kala o xikulu ya kididi kikôla, ene ezalele ni fadinya yafina yofunge ni máji phala o sata imoxi ya makudya. 50 Ni ditijela dimoxi dyofele dya ulu dyexile munema dikwinyi dya xikulu dyezala ni wasu wadizumba unuha kyambote, 51 kangombe kamoxi, ndumbe imoxi ya mbudi ni kambudi ka muvu umoxi phala sata imoxi ya kwoha, 52 kisutu kimoxi kya hombo phala sata imoxi ya kituxi, 53 ni ndumbe jiyadi ja jingombe, ndumbe jitanu ja jimbudi, isutu itanu ya jihombo ni tumbudi tutanu twa muvu umoxi, phala o sata ya paze. Yiyi yene o sata ya Elixama mon’a Amihudi.

54 Mu kizuwa kya kanake, o mutwameni wa an’a Manasa, Ngamadiyele, mon’a Pedazule, 55 wabhana o sata yê: Dilonga dimoxi dya phalata dyexile munema hama makwinyi atatu a xikulu ni ditijela dimoxi dya phalata dyexile munema makwinyi asambwadi a xikulu kala o xikulu ya kididi kikôla, ene ezalele ni fadinya yafina yofunge ni máji phala o sata imoxi ya makudya. 56 Ni ditijela dimoxi dyofele dya ulu dyexile munema dikwinyi dya xikulu dyezala ni wasu wadizumba unuha kyambote, 57 kangombe kamoxi, ndumbe imoxi ya mbudi ni kambudi ka muvu umoxi phala sata imoxi ya kwoha, 58 kisutu kimoxi kya hombo phala sata imoxi ya kituxi, 59 ni ndumbe jiyadi ja jingombe, ndumbe jitanu ja jimbudi, isutu itanu ya jihombo ni tumbudi tutanu twa muvu umoxi, phala o sata ya paze. Yiyi yene o sata ya Ngamadiyele, mon’a Pedazule.

60 Mu kizuwa kya kavwa, o mutwameni wa an’a Bejamí, Abidani, mon’a Ngidiyoni, 61 wabhana o sata yê: Dilonga dimoxi dya phalata dyexile munema hama makwinyi atatu a xikulu ni ditijela dimoxi dya phalata dyexile munema makwinyi asambwadi a xikulu kala o xikulu ya kididi kikôla, ene ezalele ni fadinya yafina yofunge ni máji phala o sata imoxi ya makudya. 62 Ni ditijela dimoxi dyofele dya ulu dyexile munema dikwinyi dya xikulu dyezala ni wasu wadizumba unuha kyambote, 63 kangombe kamoxi, ndumbe imoxi ya mbudi ni kambudi ka muvu umoxi phala sata imoxi ya kwoha, 64 kisutu kimoxi kya hombo phala sata imoxi ya kituxi, 65 ni ndumbe jiyadi ja jingombe, ndumbe jitanu ja jimbudi, isutu itanu ya jihombo ni tumbudi tutanu twa muvu umoxi, phala o sata ya paze. Yiyi yene o sata ya Abidani, mon’a Ngidiyoni.

66 Mu kizuwa kya kakwinyi, o mutwameni wa an’a Dane, Ahiyezele, mon’a Amixadayi, 67 wabhana o sata yê: Dilonga dimoxi dya phalata dyexile munema hama makwinyi atatu a xikulu ni ditijela dimoxi dya phalata dyexile munema makwinyi asambwadi a xikulu, kala o xikulu ya kididi kikôla, ene ezalele ni fadinya yafina yofunge ni máji phala o sata imoxi ya makudya. 68 Ni ditijela dimoxi dyofele dya ulu dyexile munema dikwinyi dya xikulu dyezala ni wasu wadizumba unuha kyambote, 69 kangombe kamoxi, ndumbe imoxi ya mbudi, ni kambudi ka muvu umoxi phala sata imoxi ya kwoha, 70 kisutu kimoxi kya hombo phala sata imoxi ya kituxi, 71 ni ndumbe jiyadi ja jingombe, ndumbe jitanu ja jimbudi, isutu itanu ya jihombo ni tumbudi tutanu twa muvu umoxi, phala o sata ya paze. Yiyi yene o sata ya Ahiyezele, mon’a Amixadayi.

72 Mu kizuwa kya dikwinyi ni kamoxi, o mutwameni wa an’a Azele, Pajiyele, mon’a Okolane, 73 wabhana o sata yê: Dilonga dimoxi dya phalata dyexile munema hama makwinyi atatu a xikulu ni ditijela dimoxi dya phalata dyexile munema makwinyi asambwadi a xikulu, kala o xikulu ya kididi kikôla, ene ezalele ni fadinya yafina yofunge ni máji phala o sata imoxi ya makudya. 74 Ni ditijela dimoxi dyofele dya ulu dyexile munema dikwinyi dya xikulu dyezala ni wasu wadizumba unuha kyambote, 75 kangombe kamoxi, ndumbe imoxi ya mbudi ni kambudi ka muvu umoxi phala sata imoxi ya kwoha, 76 kisutu kimoxi kya hombo phala sata imoxi ya kituxi, 77 ni ndumbe jiyadi ja jingombe, ndumbe jitanu ja jimbudi, isutu itanu ya jihombo ni tumbudi tutanu twa muvu umoxi, phala o sata ya paze. Yiyi yene o sata ya Pajiyele, mon’a Okolane.

78 Mu kizuwa kya dikwinyi ni kiyadi, o mutwameni wa an’a Nafitali, Ahila, mon’a Inane, 79 wabhana o sata yê: Dilonga dimoxi dya phalata dyexile munema hama ni makwinyi atatu a xikulu ni ditijela dimoxi dya phalata dyexile munema makwinyi asambwadi a xikulu, kala o xikulu ya kididi kikôla, ene ezalele ni fadinya yafina yofunge ni máji phala o sata imoxi ya makudya. 80 Ni ditijela dimoxi dyofele dya ulu dyexile munema dikwinyi dya xikulu dyezala ni wasu wadizumba unuha kyambote, 81 kangombe kamoxi, ndumbe imoxi ya mbudi, ni kambudi ka muvu umoxi phala sata imoxi ya kwoha, 82 kisutu kimoxi kya hombo phala sata imoxi ya kituxi, 83 ni ndumbe jiyadi ja jingombe, ndumbe jitanu ja jimbudi, isutu itanu ya jihombo ni tumbudi tutanu twa muvu umoxi, phala o sata ya paze. Yiyi yene o sata ya Ahila, mon’a Inane.

84 Yiyi yene o sata yabhana o atwameni a Izalayele, kyoso kyabhakula o kalatódyu, ya a ka undu: Dikwinyi ni kiyadi dya malonga a phalata, dikwinyi ni kiyadi dya matijela a phalata ni dikwinyi ni kiyadi dya matijela ofele a ulu. 85 Kala dilonga dya phalata dyexile munema hama ni makwinyi atatu a xikulu, kala ditijela dyexile munema makwinyi asambwadi a xikulu. O kunema kwa ima yoso ya phalata kwatenesa midi jiyadi ni hama jiwana ja xikulu, kala o xikulu ya kididi kikôla. 86 O dikwinyi ni kiyadi dya matijela ofele a ulu ezalele ni wasu wa dizumba unuha kyambote, kala ditijela dyexile munema dikwinyi dya xikulu, kala o xikulu ya kididi kikôla. O kunema kwa ulu yoso ya matijela ofele kwatenesa hama ni makwinyi ayadi a xikulu. 87 O ibhaku yobhane phala o sata yakwoha yatenesa dikwinyi ni kiyadi kya jingombe, dikwinyi ni kiyadi kya jindumbe ja mbudi, dikwinyi ni kiyadi kya tumbudi twa muvu umoxi, kumoxi ni jisata ja makudya ni dikwinyi ni kiyadi kya isutu ya hombo phala sata imoxi ya kituxi. 88 O ibhaku yobhane phala o sata ya paze yatenesa makwinyi ayadi ni kiwana kya jingombe, makwinyi asamanu a jindumbe ja mbudi, makwinyi asamanu a isutu ya hombo ni makwinyi asamanu a tumbudi twa muvu umoxi. Yiyi yene o sata yobhane kyoso kyabhakula o kalatódyu, ya a ka undu.

89 Kyoso Mozé kyexile mu bokona mu balaka ya kudyongekela phala kuzwela ni Nzambi,* wexile mu kwivwa dízwi dyexile muzwela-nê tunde ku thandu a kivunginu kya Álaka ya Umbangi, bhukaxi ka jikelubini jiyadi. Nzambi wexile muzwela-nê.

8 Jihova wambela Mozé, wixi: 2 “Ambela Alá: ‘Kyoso ki wanda wika o tundeya, o sambwadi dya tundeya twatokala kumwikina o kididi bhwala o ditudilu dya tundeya.’” 3 Kiki kyene kyabhange Alá: Wa wika o tundeya phala kumwikina o kididi bhwala o ditudilu dya tundeya kala kyatumine Jihova kwa Mozé. 4 O ditudilu dya tundeya a dibhangele ni ulu yosule, tunde ku lumbungu kate ku ithulu adibhangele ni ulu yosule. O ditudilu dya tundeya adibhange kala kyalondekesele Jihova kwa Mozé mu kisumwa.

5 Jihova wambela dingi Mozé, wixi: 6 “Bhukaxi ka akwa Izalayele usola-bhu o Jilevita, wa azelesa. 7 Kiki kyene ki watokala ku azelesa: Wa asamena* o menya a kuzelesa o ituxi, ene atokala kubhuta o ndemba ku mukutu wâ woso ni phoko, kusukula o izwatu yâ ni kudizelesa. 8 Kyenyiki, ene anda kwata kangombe ni sata ya makudya ya fadinya yafina yofunge ni máji, eye wanda kwata o kangombe kamukwa kala sata ya kituxi. 9 Watokala kubheka o Jilevita bhu pholo ya balaka ya kudyongekela ni kwongeka o mundu woso wa Izalayele. 10 Kyoso ki wanda bheka o Jilevita bhu pholo ya Jihova, akwa Izalayele atokala kuta o maku mâ ku thandu a Jilevita. 11 Alá wanda bhakula* o Jilevita bhu pholo ya Jihova kala sata* ya akwa Izalayele. O Jilevita anda bhanga o kikalakalu kya Jihova.

12 “Kyenyiki, o Jilevita anda tula o maku mâ ku thandu a mítwe ya tungombe. Mukusuluka anda bhakula-ku kangombe kamoxi kala sata ya kituxi, o kamukwa kala sata ya kwoha kwa Jihova, phala kubhangesa kwila o ituxi ya Jilevita a iloloka. 13 Watokala kubhangesa kwila o Jilevita akala bhu pholo ya Alá ni ya twana twê, ni ku abhana* kala sata kwa Jihova. 14 Bhukaxi ka akwa Izalayele watokala kusola-bhu o Jilevita, o Jilevita anda ngitokala. 15 Mukusuluka, o Jilevita anda kwiza phala kusidivila mu balaka ya kudyongekela. Kiki kyene ki watokala ku azelesa ni ku abhana kala sata.* 16 Mukonda ene a ngibhana-wu kala maujitu mwaxaxi ka akwa Izalayele. Nganda ku atambula phala eme, bhu kididi kya ana oso a phande-kumbi akwa Izalayele. 17 Mukonda ana oso a phande-kumbi akwa Izalayele, kikale ku athu kikale ku ibhaku a ngitokala. Nga azelesa phala eme, mu kizuwa ki ngajibha o ana oso a phande-kumbi mu ixi ya Ijitu. 18 Nganda tambula o Jilevita bhu kididi kya ana oso a phande-kumbi akwa Izalayele. 19 Nganda bhana o Jilevita kwa Alá ni ku an’ê kala maujitu mwaxaxi ka akwa Izalayele, phala abhange ikalakalu mu balaka ya kudyongekela phala o mbote ya akwa Izalayele, ni kubhangesa kwila o ituxi yâ a iloloka phala kikubhite dibhebhu bhukaxi ka akwa Izalayele, se o mundu wa Izalayele uzukama bhu kididi kikôla.”

20 Mozé ni Alá ni mundu woso wa Izalayele abhange yoso yatendelesa Jihova kwa Mozé, yalungu ni Jilevita. 21 Kyenyiki, o Jilevita adizelesa ya asukula o izwatu yâ. Mukusuluka, Alá wa abhana* kala sata bhu pholo ya Jihova. Alá wabhangesa-phe kwila o ituxi yâ a iloloka phala ku azelesa. 22 O Jilevita anda bokona phala kubhanga o kikalakalu kyâ mu balaka ya kudyongekela, bhu pholo ya Alá ni ya an’ê. Mukiki, Alá ni an’ê abhange yoso yatendelesele Jihova kwa Mozé yalungu ni Jilevita, kyene mwene kya abhange.

23 Jihova wambela dingi Mozé, wixi: 24 “O kyalungu ni Jilevita, kyenyiki: O diyala wala ni makwinyi ayadi ni kitanu kya mivu mba wabhiti kya mukitala kiki, wanda dibunda mu kibuka kya musidivila mu balaka ya kudyongekela. 25 Maji kyoso kyanda tenesa makwinyi atanu a mivu, mwene wanda xisa o kibuka mwexile mukalakala, kanda bhanga dingi kikalakalu kyoso-kyoso. 26 Mwene utena kusidivila o jiphange jê ja mulanga o kikalakalu mu balaka ya kudyongekela, maji katokala kubhanga-mu kikalakalu kyoso-kyoso. Kiki kyene ki watokala kubhanga ni Jilevita ni ikalakalu yâ.”

9 Jihova wazwela ni Mozé mu kikangalakata kya Sinayi, mu mbeji ya dyanga ya muvu wa kayadi kyoso ene kyatundu ku ixi ya Ijitu. Mwene wambe: 2 “Akwa Izalayele atokala kusokejeka* o sata ya Phasu mu kithangana kyoxinde. 3 Atokala ku isokejeka mu kithangana kyoxinde, mu kizuwa kya dikwinyi ni kiwana kya mbeji yiyi, mu kithangana kifwa o dikumbi ni mu dimatekenu dya usuku.* Mwatokala ku isokejeka mu kukayela o ijila yoso ni itendelesu yoso yalungu ni Phasu.”

4 Kyenyiki, Mozé watendelesa akwa Izalayele kusokejeka o sata ya Phasu. 5 Ene asokejeka o sata ya Phasu mu kizuwa kya dikwinyi ni kiwana kya mbeji ya dyanga mu kithangana kifwa o dikumbi ni mu dimatekenu dya usuku, mu kikangalakata kya Sinayi. Akwa Izalayele abhange yoso yatendelesele Jihova kwa Mozé.

6 Maji kwexile mayala akasanene mukonda dya kukwata ku kimbi kya muthu. Kyenyiki, katenene kusokejeka o sata ya Phasu mu kizuwa kyenyokyo. Mukiki, o mayala yâ adilondekesa bhu pholo ya Mozé ni Alá mu kizuwa kyenyokyo, 7 ya ambela Mozé: “Twakasana mukonda dya kukwata ku kimbi kya muthu. Mukonda dyahi eji tufidisa kubhakula kwa Jihova sata mu kithangana kyoxinde, kumoxi ni athu amukwa akwa Izalayele?” 8 Mukyenyiki, Mozé wa ambela, wixi: “Kingilenu hanji ni ngivwe yoso yanda zwela Jihova yalungu n’enu.”

9 Jihova wambela dingi Mozé: 10 “Ambela akwa Izalayele: ‘Né mwene se bhukaxi kenu mba bhukaxi ka miji yenu yakeza-ku, kukala muthu ukasana mukonda dya kukwata ku kimbi kya muthu, mba wenda njila ya dikanga, né kiki watokala kusokejeka o sata ya Phasu phala Jihova. 11 Atokala ku isokejeka mu mbeji ya kayadi mu kizuwa kya dikwinyi ni kiwana, mu kithangana kifwa o dikumbi ni mu dimatekenu dya usuku. Atokala ku idya ni jimbolo jakambe o felemendu ni mafwe alulu. 12 Katokala kubhaka-ku xitu phala o kizuwa kya kayela, katokala we ku ibukula né ngo kifuba kimoxi. Atokala ku isokejeka mu kukayela o kijila kyoso kyalungu ni Phasu. 13 Maji se kukala muthu wazelele mba kexile mu kwenda njila ukamba kusokejeka o sata ya Phasu, o muthu yú anda mujibha bhukaxi ka mundu wê, mukonda kabhakula o sata ya Jihova mu kithangana kyatokala. O diyala didi anda mu kastikala mukonda dya kituxi kyê.

14 “‘Se bhukaxi kenu bhukala mukwa ixi yengi, mwene watokala we kusokejeka o sata ya Phasu phala Jihova. Watokala ku isokejeka mu kukayela o kijila ni itendelesu yalungu ni Phasu. Kwatokala kukala ngo kijila kimoxi, kikale phala o mukwa ixi yengi, kikale phala o mukwa Izalayele.’”

15 Mu kizuwa kyemika o balaka, o dituta dyavungina o balaka, o balaka ya Umbangi. Maji mu usuku o kima kyedile kala túbhya kyexile ku thandu a balaka, kate mu kamene. 16 O ima yexile mubhita kiki: Mu mwanya o dituta dyexile muvungina o balaka, o mu usuku, o kima kyedile kala túbhya. 17 Kyoso o dituta ki dyexile muzanguka, akwa Izalayele akexile mukatuka mu kithangana kyenyokyo, maji mu ididi mwexile mu kwimana o dituta, akwa Izalayele kakexile mukatuka. 18 Akwa Izalayele exile mukatuka mu kukayela o kitendelesu kya Jihova, exile we mu kwimana mu kukayela o kitendelesu kya Jihova. Kyoso dituta ki dyexile mukala ku thandu a balaka, ene kakexile mukatuka. 19 Kyoso o dituta ki dyexile mukala ku thandu a balaka mu izuwa yavulu, akwa Izalayele exile mubelesela Jihova, kakexile mukatuka. 20 Sayi ithangana o dituta kidyexile mukala izuwa yavulu ku thandu a balaka. Ene kakexile mukatuka sé o kitendelesu kya Jihova. Phala kukatuka exile mukayela o kitendelesu kya Jihova. 21 Sayi ithangana o dituta dyexile mu kwimana ngo tunde kudimatekenu dya usuku kate mu kamene. Kyoso o dituta kidyexile muzanguka mu kamene ene exile mukatuka. Kikale se o dituta dyazangukile mu mwanya mba mu usuku ene exile mukatuka mwene. 22 Kyoso o dituta ki dyexile mu kala ku thandu a balaka kikale mu izuwa iyadi, mu mbeji imoxi mba mu thembu yavulu, akwa Izalayele kakexile mukatuka. Maji kyoso ki dyexile muzanguka ene exile mukatuka. 23 Ene kakexile mukatuka sé o kitendelesu kya Jihova. Phala kukatuka, akexile mu kayela o kitendelesu kya Jihova. Exile mubelesela o kitumu kya Jihova, kala o kitendelesu kyabhanene Jihova bhukaxi ka Mozé.

10 Jihova wambela Mozé: 2 “Bhanga jikoloneta jiyadi, u jibhanga ni phalata yosule, jene ji uxika phala kwixana o mundu ni kubhana kijimbwete kya kukatuka. 3 Kyoso kyanda xika o jikoloneta jiyadi, mundu woso wanda kubhongolokela mu balaka ya kudyongekela. 4 Se axika-ku ngo imoxi, o adyakime ni atwameni a jimidi ja Izalayele éne ngo anda kubhongolokela.

5 “Se o jikoloneta a jixika ni dízwi dyaswina, o ibuka ya miji yala ku mbandu kutundila o dikumbi yatokala kukatuka. 6 Maji se o jikoloneta a jixika ni dízwi dyaswina mu luyadi, o ibuka ya miji yala ku mbandu ya lwiji, yatokala kukatuka. O jikoloneta atokala kujixika jinga mu ukexilu yú, kyoso ki kukala ibuka ya miji ibhinga kukatuka.

7 “Phala kwixana o mundu atokala kuxika o jikoloneta, maji katokala kujixika ni dizwí dyaswina. 8 O an’a Alá o akunji, atokala kuxika o jikoloneta. Yiyi yanda kala ngonge inangenena phala enu ku miji yenu yoso.

9 “Mu ixi yenu se kubhinga kuya mu ita phala kubhânga ni jinguma jenu ja mu mitatesa, mwatokala kuta nzongo ya kulwa ita mu kuxika o jikoloneta ni dízwi dyaswina. Jihova Nzambi yenu wanda milembalala, wanda mibhulula bhu maku a jinguma jenu.

10 “Mu ithangana yenu we ya kusanguluka, mu jifesa jenu ni ku dimatekenu dya jimbeji, mwatokala kuxika o jikoloneta bhu pholo ya jisata jenu jakwoha ni bhu pholo ya jisata jenu ja paze. Jene janda kala dilembalelu bhu pholo ya Nzambi yenu, phala o mbote yenu. Éme ngi Jihova Nzambi yenu.”

11 Mu muvu wa kayadi, mu kizuwa kya makwinyi ayadi mu mbeji ya kayadi, o dituta ku thandu a balaka ya Umbangi dyazanguka. 12 Kyenyiki, akwa Izalayele amateka kutunda mu kikangalakata kya Sinayi kala o itendelesu ya abhanene phala kukatuka. O dituta anga dimana mu kikangalakata kya Palane. 13 Yiyi yene o veji ya dyanga yakatuka ene mu kukayela o kitendelesu kyabhanene Jihova kwa Mozé.

14 Kyenyiki, o kibuka kya miji itatu amukyendesa ku mwiji wa an’a Judá, kyene kyadyanga o kukatuka mu ibuka-ibuka.* Nasono mon’a Aminadabe mwéne wexile ku pholo dya ibuka yiyi. 15 Netanayele mon’a Zuwale wexile ku pholo dya kibuka kya mwiji wa an’a Isakale. 16 Eliyaba mon’a Helone, wexile ku pholo dya kibuka kya mwiji wa an’a Nzebulone.

17 Kyoso kyasokomona o balaka, o an’a Ngelexone ni an’a Meladi exile mututa o balaka, akatuka.

18 Kyenyiki, o kibuka kya miji itatu amukyendesa ku mwiji wa Lubene kyakatuka mu ibuka-ibuka. Elizule mon’a Xedele, mwéne wexile ku pholo ya ibuka yiyi. 19 Xelumiyele mon’a Nzudixadayi, wexile ku pholo dya kibuka kya mwiji wa an’a Ximinyá. 20 Eliyazafu mon’a Dewele, wexile ku pholo dya kibuka kya mwiji wa an’a Ngade.

21 Mukusuluka, akwa Kohate exile mututa o imbamba ya kididi kikôla, akatuka. Ande dya ene kubhixila, o balaka atokalele kya ku imika.

22 Mukusuluka, kwakatuka o kibuka kya miji itatu amukyendesa ku mwiji wa an’a Efalayíme mu ibuka-ibuka. Elixama mon’a Amihudi, mwéne wexile ku pholo dya ibuka yiyi. 23 Ngamadiyele mon’a Pedazule, mwéne wexile ku pholo dya kibuka kya mwiji wa an’a Manasa. 24 Abidani mon’a Ngidiyoni, mwéne wexile ku pholo dya kibuka kya mwiji wa an’a Bejamí.

25 Kyenyiki, o kibuka kya miji itatu amukyendesa ku mwiji wa an’a Dane, kyakatuka mu ibuka-ibuka. Éne asukina o kukatuka phala kulanga o ibuka yoso. Ahiyezele mon’a Amixadayi, mwéne wexile ku pholo ya ibuka yiyi. 26 Pajiyele mon’a Okolane, mwéne wexile ku pholo dya kibuka kya mwiji wa an’a Azele. 27 Ahila mon’a Inane, mwéne wexile ku pholo dya kibuka kya mwiji wa an’a Nafitali. 28 Kiki kyene o kitendelesu kyalungu ni kukatuka kyakayela akwa Izalayele ni ibuka yâ, kyoso kyatundu.

29 Mozé wambela-phe Hobabe mon’a Luwele* mukwa midiyana ukow’a Mozé: “Twamukatuka phala kuya mu kididi mwambe Jihova, wixi: ‘Nganda mibhana-nakyu.’ Tuye kumoxi, twanda kutalatala kyambote! Mukonda Jihova wakanena ima yambote phala akwa Izalayele.” 30 Mwene watambwijila: “Kingandaya. Nganda vutuka ku ixi yami ni ku jindandu jami.” 31 Kyenyiki, Mozé wambe: “Ngakudyondo, kana kutuxisa mukonda eye wejiya o ididi mu twatokala kwimika o jibalaka mu kikangalakata, wanda tena kutulondekesa o njila.* 32 Se wiza kumoxi n’etu, mabesá oso anda tubhana Jihova, anda kubhekela we mbote.”

33 Kyenyiki, atundu ku mulundu wa Jihova, abhange njila ya izuwa itatu. O Álaka ya Kikutu kya Jihova ya atwamenena mu njila ya izuwa itatu. Ene exile musota kididi kya kunyoha. 34 Mu mwanya, o dituta dya Jihova dyexile ku thandu dyâ, kyoso ene kya tundu bhu kididi bhwemikine o jibalaka.

35 Ithangana yoso yexile muzangula o álaka bhu kididi kyê, Mozé wexile muzwela: “Balumuka Eye u Jihova, o jinguma jê ajimwange. O yó a kuzembe, a kulenge.” 36 Kyoso kyexile mu itula, Mozé wexile muzwela: “Vutuka Eye u Jihova, ku jimidi* ja Izalayele.”

11 Mukyenyiki o mundu wamateka kudikalanganza kyavulu bhu pholo ya Jihova. Kyoso Jihova kyakivu, o njinda yamukwata. Kwamateka kuxongota túbhya twatundu kwa Jihova ku thandu dyâ, tu twamateka kujibha amoxi bhwasuku o jibalaka. 2 Kyoso o mundu ki wadikola kwa Mozé, mwene wadyondela kwa Jihova, o túbhya anga tujima. 3 Mukonda dya kiki, o kididi kyokyo a kiluku o dijina dya Tabelahe,* mukonda dya túbhya twatundile kwa Jihova, twawamene ku thandu dyâ.

4 Akwa jixi jengi* exile bhukaxi kâ, alondekesa hânji yayibha yalungu ni kudya, akwa Izalayele amateka dingi kudila ni kwamba: “Nanyi wanda tubhana xitu phala kudya? 5 Twala ni ngunzu ya jimbiji jitwexile mudya mu kingoho ku Ijitu, ni maxoka, ni jimelá, ni jayu poló, ni jisabhola ni jayu! 6 Maji kindala twamubhela. Kikwala dingi kima kyengi, kikale kya ngo o maná yiyi, kwabhu.”

7 Kifwa, o maná yedile kala mbutu ya jikwendulu, ku mesu yedile kala wasu wa bidélyu. 8 O mundu wexile mu dimwanga yu wexile mu ibonga ni ku izuka mu matadi akuhuhila mba ku izuka mu kinu. Mukusuluka exile mu ilamba mu jimbya mba kubhanga-nayu jimbolo mu ukexilu wa nela, o kutowala kwê kwedile kala kwa bolo yobhange ni máji. 9 Mu usuku, kyoso o dimume ki dyexile mumoneka bhwemikine o jibalaka, o maná yexile musonoka we.

10 Mozé wevu o mundu woso kudila, ku mwiji ni mwiji , kala diyala bhu mwelu wa balaka yê. Jihova njinda ya mukwata, o Mozé we waluwala kyavulu. 11 Kyenyiki, Mozé wambela Jihova: “Mukonda dyahi selevende yé wa mu mutalesa o hadi yiyi? Mukonda dyahi kingisange ngalasa ku mesu mé, éye wa ngitwika o kimbamba kiki, kya kulanga o mundu woso yú? 12 Eye wa mungituma wixi: ‘Ondeleka o mundu yú kala o kiledi kyondeleka o kabwetele, ni nga ambate’ kate mu ixi i wakanena kubhana ku jikuku jâ. O kwila éme ngemita o mundu woso yú? Éme nga avwala? 13 Kwebhi ku nganda sanga xitu phala kubhana o mundu woso yú? Mukonda amudidila bhu pholo yami, exi: ‘Tubhane xitu phala kudya!’ 14 Kinganda tena kulanga o mundu woso yú ubheka wami. Kiki kikalakalu kyadikota phal’eme. 15 Se kiki kyene ki wanda suluka mu ku ngitalatala, ngakudyondo, ngijibhe kindala mwene. Se ngasange ngalasa ku mesu mé, kana dingi ku ngitatesa kiki.”

16 Jihova wambela Mozé: “Ambata makwinyi asambwadi a mayala ku tufunga twa Izalayele, mayala u wejiya kala tufunga ni jikabhitangu ja mundu, ambata-wu mu balaka ya kudyongekela. Kala-nawu mwenyomo. 17 Nganda tuluka, nganda zwela n’eye bhenyobho. Nganda katula ku nzumbi yami ikôla yala ku thandu dyé, ni ngi itula ku thandu dyâ. Ene anda kukwatekesa kulanga o mundu, phala ku ulange ubheka wé. 18 Watokala kwambela o mundu: ‘Dizelesyenu phala o kizuwa kya mungu, mukonda sé phata mwanda dya xitu, kuma mwadidila kwa Jihova, mwixi: “Nanyi wanda tubhana xitu phala kudya? Twakexilyetu kyambote ku Ijitu!” Jihova wanda mibhana mwene xitu, enu mwanda idya. 19 Kimwanda idya ngo mu kizuwa kimoxi, mba mu izuwa iyadi, mba mu izuwa itanu, mba mu dikwinyi dya izuwa mba mu makwinyi ayadi a izuwa, 20 maji mwanda idya mu mbeji yamuvimba, kate ki imitundila mu mazulu, anga ikituka kima kyabolo phal’enu, mukonda mwaditunu Jihova wala bhukaxi kenu, énu mwadidila kwa mwene, mwixi: “Mukonda dyahi twatundu ku Ijitu?”’”

21 Kyenyiki Mozé wambe: “O mundu yú wala bhukaxi kami, atenesa hama jisamanu ja midi a mayala a mukwendela bhoxi, né kiki eye wambe wixi: ‘Nganda kwa abhana xitu yasoko phala ku idya mu mbeji yamuvimba!’ 22 Né mwene se ajibhile ibhanga ya jingombe ni ya jihombo, o kwila yeji kwa asoka? Né mwene se akwatele o jimbiji joso mu musanza wa kalunga, o kwila jeji kwa asoka?”

23 Jihova wambela Mozé: “O kwila o lukwaku lwa Jihova lwabutu? Kindala wanda mona se o kizwelu kyami kyanda dikumbidila mba kana.”

24 Kyenyiki Mozé watundu yu watudila o izwelu ya Jihova ku mundu. Wongeka o makwinyi asambwadi a mayala ku tufunga twa mundu, yu wa emanesa bhu mbandu a balaka. 25 Jihova watuluka-phe bhukaxi ka dituta, wazwela-nê, yu wakatula ku nzumbi yê ikôla yexile ku thandu a Mozé, wa itula ku thandu a makwinyi asambwadi a tufunga. Kyoso o nzumbi ikôla ki ya atulukila, amateka kuzwela kala jipolofeta. Maji akibhange ngo lumoxi.

26 Mukaxi ka mundu mwaxalele hanji mayala ayadi. O majina mâ Eledade ni Medade. O nzumbi ikôla ya atulukila, ene exile bhukaxi ka tufunga a asonekesene mu majina, maji ka ile mu balaka. Ya amateka kuzwela kala jipolofeta bhukaxi ka mundu. 27 Sayi munzangala wa diyala wayi ni kulenga yu wambela Mozé, wixi: “Eledade ni Medade amuzwela kala jipolofeta bhukaxi ka mundu!” 28 Kyenyiki, Jozuwé mon’a Nune, wexile mukwatekexi wa Mozé tunde mu unzangala wê, wambe: “Mozé ngana yami, tuma-wu kudixibha!” 29 Maji Mozé wa mwambela wixi: “Eme kingala ni difuba, éye kya wanda kala ni difuba? Ngeji ki wabhela se mundu woso wa Jihova wexile jipolofeta, Jihova anga utula o nzumbi yê ikôla ku thandu dyâ!” 30 Mozé anga uvutuka bhukaxi ka mundu kumoxi ni tufunga twa akwa Izalayele.

31 Kyenyiki Jihova wabhangesa kubhuka kitembwe kyatundu ku musanza wa kalunga. O kitembwe kyabheka tungumbe, twene twamateka kubwila bhu kididi bhwexile o jibalaka. Twene twakondoloka o kididi kyoso. Phala kusomboka o kididi bhwexile o tungumbe, o muthu weji kwenda kizuwa kyamuvimba. 32 Kyenyiki o mundu ki uzeka, wabhongolola o tungumbe mu kizuwa kyoso kyenyokyo, usuku woso wenyo ni kizuwa kyoso kyakayela-ku. Mukubhongolola, séku muthu wakambe kutenesa dikwinyi dya homele.* Mu kwaneka o tungumbe, ene exile mukondoloka o jibalakala joso. 33 Maji kyoso o xitu ki yexile hanji mu mazu mâ, ka ixakutile luwa, Jihova wakwatela njinda ya mundu wê, Jihova wa akastikala ni kibwika kyadikota.

34 Mu kyenyiki, kididi kyenyokyo a kiluku o dijina dya Kibolote-batava,* mukonda kwene kwa fundila yó alondekesa hânji yayibha yalungu ni kudya. 35 O mundu watundu ku Kibolote-batava yu wayi ku Hazelote, anga akala bhu Hazelote.

12 Mozé wakazalele ni muhatu mukwa Kuxi. Mukonda dya kiki, Midiyana ni Alá exile mu mulongolola. 2 Ene exile muzwela: “O kwila Jihova wazwela ngo bhukaxi ka Mozé? Kazwela we bhukaxi k’etu? Jihova wexile mukwivwa. 3 Mozé mwéne o muthu wabetelekota mu kulenduka,* athu oso mu ngongo ndenge.

4 Mu kithangana kyenyokyo Jihova wambela Mozé, Alá ni Midiyana: “Tundenu! Kitatu kyenu ndenu mu balaka ya kudyongekela.” Mukyenyiki, kitatu kyâ ayi. 5 Jihova anga utuluka bhukaxi ka philadi ya dituta, wemana bhu mwelu wa balaka yu wexana Alá ni Midiyana. Kiyadi kyâ anga azukama. 6 Kyenyiki mwene wambe: “Ngamidyondo, ivwenu o izwelu yami. Se kwexile polofeta ya Jihova bhukaxi kenu, ngeji dijidisa kwa mwene mu kisumwa, ngeji zwela-nê mu nzoji. 7 Maji kikyene kibhita ni selevende yami Mozé! Nga mubhana o kikalakalu kya kulanga o mundu wami wa Izalayele.* 8 Ngizwela-nê pholo ni pholo,* ki mujimbulukila mwene, kingimutela ifika. Mwene umona o pholo ya Jihova. Mukonda dyahi-phe kimwexile ni wôma wa kuzwela kyayibha kwa Mozé, selevende yami?”

9 Mukyenyiki, Jihova wa akwatela njinda, anga wa axisa. 10 O dituta dyazanguka ku thandu a balaka. Mu kithangana kyenyokyo Midiyana wakwata dibhute dyazele kala kizela o neve. Kyoso Alá kyatale Midiyana, wamono kwila mwene wexile ni dibhute. 11 Mu kithangana kyenyokyo Alá wambela Mozé: “Ngakudyondo ngana yami! Ngakudyondo! Kana kutukastikala mukonda dya kituxi kiki! Kima kya wowa ki twabhange. 12 Ngakudyondo, k’umwehele kukala wila muthu amuvwala wafwe kya, wedi o xitu yê yamateka kya o kubola. 13 Mozé wamateka kudyondela Jihova, wixi: “Nzambi tata! Ngakudyondo! Musake, ngakudyondo!”

14 Jihova wambela Mozé wixi: “Se tat’ê wa muphamene mathe mu mesu keji mukwatesa jisonyi mu sambwadi dya izuwa? A mukatule mwaxaxi ka mundu, n’a dikexidile mu sambwadi dya izuwa. O kyanda bhwa o izuwa, a mubheke dingi.” 15 Kyenyiki Midiyana a mukatula mwaxaxi ka mundu, yu wadikexidila mu sambwadi dya izuwa. O mundu wakatuka ngo kyoso Midiyana kya mubheka dingi mwaxaxi kâ. 16 Kyenyiki, o mundu watundu ku Hazelote yu wayi mu kikangalakata kya Palane.

13 Jihova wambela-phe Mozé, wixi: 2 “Tumikisa mayala phala kulonda o ixi ya Kanana, i nganda bhana ku akwa Izalayele. Kala mwiji wa jitata mwatokala kutumikisa-ku diyala dimoxi, kala muthu watokala ukala mwadyakime bhukaxi kâ.”

3 Mukyenyiki, Mozé wa atumikisa tunde mu kikangalakata kya Palane, kala kya mutumine Jihova. Mayala oso yâ exile atwameni a miji ya akwa Izalayele. 4 Yá ene o majina mâ: Ku mwiji wa Lubene, Xamuwa mon’a Zakule, 5 ku mwiji wa Ximinyá, Safate mon’a Hodidi, 6 ku mwiji wa Judá, Kalebe mon’a Jefune, 7 ku mwiji wa Isakale, Ingale mon’a Zuze, 8 ku mwiji wa Efalayíme, Ozeya mon’a Nune, 9 ku mwiji wa Bejamí, Palati mon’a Lafu, 10 ku mwiji wa Nzebulone, Ngadiyele mon’a Sodi, 11 ku mwiji wa Zuze, bhukaxi ka mwiji wa Manasa, Ngadi mon’a Susi, 12 ku mwiji wa Dane, Amiyele mon’a Ngemali, 13 ku mwiji wa Azele, Setulu mon’a Mingyedi, 14 ku mwiji wa Nafitali, Nahibi mon’a Vofosi, 15 ku mwiji wa Ngade, Jewele mon’a Maki. 16 Yá ene o majina a mayala atumikisa Mozé phala kulonda o ixi. Ozeya mon’a Nune, Mozé wa muluku o dijina dya Jozuwé.*

17 Mu ku atumikisa phala kulonda o ixi ya Kanana, Mozé wa ambela wixi: “Ndenu ku Nengebe, mukusuluka mubanda ku mbandu ya milundu. 18 Mutala kyebhi kyala o ixi se o athu atungu mwenyomo ala ni nguzu mba abhwila, se atolo mba avulu, 19 se o ixi yawabha mba yayibha, se o jimbanza mwatungu jala mu kanga dyahatu mba jala ni ilumbu. 20 Talenu we se o ixi ibhana kyambote o idima mba kana, se mwala mixi mba kana. Swinenu, kanzenu-ku ibundu.” Kyexile-phe o kithangana kya kubhongolola o jiuva ja dyanga kukusuka.

21 Kyenyiki, ene atundu, ayi mulonda o ixi, tunde mu kikangalakata kya Zini kate ku Lehobo, ndu ku Lebo-Hamati.* 22 Kyoso kyabande ku Nengebe abhixila ku Hebolone, kwatungile Ahimane, Xexayi ni Talamayi akwa Anake. Kifwa, Hebolone a itungile sambwadi dya mivu ande dya kutunga o mbanza ya Zowane, ku Ijitu. 23 Kyoso kyabhixila mu honga ya Exikole, abatula-mu luthangu lwala ngo ni kisaka kimoxi kya jiuva, abhingile ku kyambata ku mayala ayadi bhukaxi ka mukambu, abheka we jilomá ni jifiku. 24 Kididi kyenyokyo, a kiluku honga ya Exikole,* mukonda dya kisaka kya jiuva kyabatula akwa Izalayele kwenyoko.

25 Mukubhita makwinyi awana a izuwa ni kulonda o ixi, ene avutuka. 26 Ayi-phe kwa Mozé, kwa Alá ni ku mundu woso wa Izalayele mu kikangalakata kya Palane ku Kadexi. Atudila o njimbu ku mundu woso, ya alondekesa o ibundu ya ixi. 27 Ene ambela Mozé: “Twabokona mu ixi mu watutumikisa, yene ikunguluka mwene lete ni wiki. Yiyi yene o ibundu ya ixi. 28 Maji o mundu watungu mu ixi yenyoyo wala ni nguzu, o jimbanza jamakota, jala ni ilumbu. Twamono-mu we akwa Anake. 29 Akwa Amaleke atungu mu ixi ya Nengebe. Akwa Hiti ni Jizebuze ni akwa Mamodi atungu ku mbandu ya milundu, o akwa Kanana atungu ku mbandu ya musanza wa kalunga ni mu honga ya Njolodá.”

30 Kalebe-phe wasoto kutululukisa o mundu ku pholo ya Mozé yu wambe wixi: “Tubandyenu mwene kindala. Sé phata, o ixi twanda itambula mwene, mukonda tutena ku itolola.” 31 Maji o mayala ayile-nawu kumoxi ambe: “Kitutena kubanda phala kubhânga ni mundu yó, mukonda ene ala dingi ni nguzu etu ndenge.” 32 Ya asuluka ni kutudila njimbu yayibha ku akwa Izalayele yalungu ni ixi yalondele, mukwamba: “O ixi itwendele mulonda, ixi ibwikisa o athu atungu-mu. O mayala oso utwamono-mu mazonda. 33 Twamono-mu o Jinefelime, o an’a Anake o mbutu ya Jinefelime. Mu kudisokesa ni ene, twedile kala tu mahoho kikale ku mesu metu kikale ku mesu mâ.”

14 Mundu woso-phe wamateka kudila, wasuluka ni kudila ni dízwi dyaswina mu usuku woso wenyo. 2 Akwa Izalayele oso amateka kulongolola Mozé ni Alá. Mundu woso wexile mu alongolola, mu kwamba: “Tamanu twafwilyetu mu ixi ya Ijitu mba twafwilyetu mu kikangalakata kiki! 3 Mukonda dyahi Jihova watubheka mu ixi yiyi ni tufwila ku xibhata? O jinguma janda kwambata o ahatw’etu ni twana twetu. Kikota twavutuketu ku ixi ya Ijitu?” 4 Kate mwene exile mudizwelesa mudyâ: “Tusole mutwameni ni tuvutuke ku Ijitu!”

5 Mukyenyiki, Mozé ni Alá afukama ni jipholo bhoxi bhu pholo ya mundu woso wa akwa Izalayele adyongekele. 6 Jozuwé mon’a Nune ni Kalebe mon’a Jefune exile bhukaxi ka yó ayile mulonda o ixi, atandula o izwatu yâ, 7 ya ambela o mundu woso wa Izalayele, exi: “O ixi itwabhiti ni kulonda, ixi yawabha mwene kyavulu. 8 Se tubelesela Jihova, mwene wanda sanguluka, wanda tubhangesa kubokona mu ixi yakanena kutubhana, ixi ikunguluka lete ni wiki. 9 Maji kanenu kubhukumukina Jihova, kimukale ni wôma wa mundu wa ixi, mukonda kikwanda tubhonza ku atolola.* O kilangidilu kyâ a kikatula, Jihova wala n’etu. Kimukale ni wôma wâ.”

10 O mundu woso-phe wa Izalayele wexile muxinganeka ku abuba ni matadi. Maji o kubhenya kwa Jihova kwamoneka ku thandu a balaka ya kudyongekela. O mundu woso wa Izalayele wamono o kubhenya kuku.

11 Kyenyiki, Jihova wambela Mozé: “Kate bhebhi o mundu yú wanda kamba ku ngixila? Kate bhebhi anda kamba ku ngixikana, sumbala ni madiwanu oso u ngabhange bhukaxi kâ? 12 Nganda ku akastikala ni dibhebhu, nganda ku abwika. Eye nganda kubhanga u kifuxi kyadikota, kyabetakota mu nguzu ene ndenge.”

13 Maji Mozé wambela Jihova wixi: “Eye Ngana wakatula o mundu yu ku Ijitu ni kutena kwé. Kyoso akwa Ijitu kyanda kwivwa o ima iwabhange, 14 anda tangela o maka yá ku kwa ixi yiyi. Ene evu we kwila, eye u Jihova wala bhukaxi ka mundu yú, wene we mu amonekena pholo ni pholo. Evu kwila éye u Jihova, o dituta dyé dyala ku thandu dyâ, mu mwanya u atwamenena bhukaxi ka philadi ya dituta, mu usuku bhukaxi ka philadi ya túbhya. 15 Se ujibha o mundu yú mu lumoxi,* o ifuxi yevu o fuma yé yeji zwela kiki: 16 ‘Jihova walembwa kwambata o mundu yú mu ixi yalokela ku abhana, kyene kya ujibhila mu kikangalakata.’ 17 Kindala, ngakudyondo Jihova, londekesa o unene wa kutena kwé kala ki wakanena kyoso ki wambe: 18 ‘Jihova mukwa mwanyu,* wezala ni henda yakalelaku, uloloka o itondalu ni kubhukumuka, maji kakambe kukastikala yó wala ni kikuma, mukonda wanda bheka kastiku ku twana ni ku alawula, ku mwiji wa katatu ni ku mwiji wa kawana mukonda dya ituxi ya jitata.’ 19 Ngakudyondo, loloka o kikuma kya mundu yú mukonda dya henda yé yakalelaku, kala ki wa aloloka tunde ku Ijitu kate kindala.”

20 Jihova wambe-phe: “Eme nga aloloka, kala ki wambe.” 21 Maji kala ki ngene ku mwenyu, mu ididi yoso ene anda kwijiya kyebhi kikala o kutena kwa Jihova. 22 Maji kana-ku diyala kwa yó amono o kubhenya kwami ni madiwanu u ngabhange ku Ijitu ni mu kikangalakata, anga usuluka ni ku ngibhukumukina mu lukwinyi hé ukamba kwivwa o dízwi dyami, 23 wanda mona o ixi i ngalokela ku jitata jâ. Oso akambe ku ngixila, kanda imona. 24 Maji, kuma selevende yami Kalebe wexile ni ixinganeku yengi, yu wasuluka ni ku ngibelesela ni muxima woso, sé phata, nganda mwehela kubokona mu ixi mwayile, o mbutu yê yanda lundula o ixi. 25 Kuma akwa Amaleke ni akwa Kanana atungu mu honga, mungu enu mwanda lunguluka* ni mukatuka phala kuya mu kikangalakata mu njila ya Kalunga ka Kusuka.”

26 Jihova wambela dingi Mozé ni Alá, wixi: 27 “Kate bhebhi o mundu yú wayibha wanda suluka ni ku ngilongolola? Ngevu kyoso akwa Izalayele kya ngilongolola. 28 Wa ambela kiki: ‘Kiki kyene kyambe Jihova: “Kala ki ngene ku mwenyu, o ima i nga mivu kuzwela, yene mwene i nganda mibhanga! 29 Enu mwanda fwa, o imbi yenu yanda xala mu kikangalakata kiki. Kyene, oso ala ni makwinyi ayadi a mivu mba abhiti kya mu kitala kiki a asonekesa, enwenoso mwa ngilongolola. 30 Kana-ku muthu mudyenu wanda bokona mu ixi i ngalokela* kumibhana phala kutunga-mu, kikale ngo Kalebe mon’a Jefune ni Jozuwé mon’a Nune.

31 “‘“O an’enu u mwambe kwila eji ku ambata ku jinguma, nganda kwa ehela kubokona mu ixi i mwaditunu enu. Ene anda ijiya. 32 Maji enu mwanda fwila mu kikangalakata kiki. 33 O an’enu anda kala abhidi mu kikangalakata mu makwinyi awana a mivu, anda dibhana ni ibhidi, mukonda enu mwate kituxi kokwami,* kate enwenoso ki mwanda fwila mu kikangalakata. 34 Mwanda dibhana ni ibhidi mu makwinyi awana a mivu mukonda dya itondalu yenu. O izuwa ya jiphaxi jenu yanda soka ni izuwa i mwalondo o ixi, makwinyi awana a izuwa. Kizuwa kimoxi muvu, kizuwa kimoxi muvu. Phala mwijiye ihi ilombolola ku ngibhukumukina.*

35 “‘“Éme Jihova ngakitange. Kiki kyene ki nganda bhanga ni mundu woso yú wayibha wadibundu mu ku ngibhukumukina. Anda jikinina mu kikangalakata kiki, mwene mwanda fwila. 36 O mayala atumikisa Mozé phala kulonda o ixi, abhangesa o mundu woso kulongolola Mozé kyoso kyavutuka ni njimbu yayibha yalungu ni ixi, 37 kyene, o mayala abheka o njimbu yayibha yalungu ni ixi, anda ku akastikala, anda fwa bhu pholo ya Jihova. 38 Maji Jozuwé mon’a Nune ni Kalebe mon’a Jefune, exile bhukaxi ka yó ayile mulonda o ixi, sé phata anda kala ku mwenyu.”’”

39 Kyoso Mozé kyatangela o maka ya ku akwa Izalayele oso, o mundu waluwala kyavulu. 40 Kikyene ngo, abalumuka mu kamene-mene ni kibanzelu kya kuya ku mbandu yadileka dingi ya milundu, ya ambe exi: “Kindala twala polondo phala kubanda mu kididi kyambe Jihova, mukonda twate kituxi.” 41 Maji Mozé wambe wixi: “Mukonda dyahi mwa mubhukumukina o kitendelesu kya Jihova? Kimwanda ditunda kyambote. 42 Kanenu kubanda-ku, mukonda Jihova kala n’enu. Anda mitolola ku jinguma jenu. 43 Mukonda akwa Amaleke ni akwa Kanana kwene kwala phala kulwa ita n’enu, anda mijibha ni xibhata mukonda kimwabelesela Jihova. Jihova kanda kala dingi n’enu.”

44 Maji ene mu kubhukumuka kwâ, abande mwene ku mbandu yadileka dingi ya milundu. Maji Mozé bhu kididi bhwemikine o jibalaka katundu-bhu, o álaka ya kikutu kya Jihova ka ikatula-bhu we. 45 Kyenyiki, o akwa Amaleke ni akwa Kanana atungile mu mbandu yenyoyo ya milundu, atuluka, a atolola, ya a amwange kate ku Holoma.

15 Jihova wambela dingi Mozé, wixi: 2 “Ambela akwa Izalayele: ‘Kyoso-phe ki mwanda bokona mu ixi i nganda mibhana phala kukala-mu, 3 anga ku jingombe mba jimbudi mba jihombo mubhakula-ku kwa Jihova sata yobhitise mu túbhya, phala kubandesa dizumba dyambote kwa Jihova, sata imoxi ya kwoha mba sata phala kukumbidila kikanenu kyakatunda, mba sata yabhana mu vondadi yâ, mba sata imoxi mu ithangana ya jifesa jamitumina kubhanga, 4 o yó ubhakula o sata yê, watokala kubhakula we kwa Jihova sata imoxi ya makudya ya fadinya yafina, ya mbandu ya kakwinyi ya efa* imoxi yofunge ni mbandu ya kawana ya hine* ya máji. 5 Watokala kubhakula we mbandu ya kawana ya hine imoxi ya vinyu kala sata ya uholwa, kumoxi ni sata ya kwoha mba sata ya kambudi ka ndumbe. 6 Se o sata ikala kambudi ka ndumbe, watokala kubhakula sata ya makudya ya mbandu ya kayadi ya efa imoxi ya fadinya yafina, yofunge ni mbandu ya katatu ya hine imoxi ya máji. 7 Watokala kubhakula mbandu ya katatu ya hine imoxi ya vinyu kala sata ya uholwa ni ikale dizumba dyambote phala Jihova.

8 “‘Maji se ubhakula kangombe ka ndumbe kala sata ya kwoha mba kala sata phala kukumbidila kikanenu kyakatunda, mba kala sata ya paze kwa Jihova, 9 kumoxi ni kangombe ka ndumbe, watokala we kubhakula sata imoxi ya makudya, ya mbandu jitatu ja kakwinyi, ya efa imoxi ya fadinya yafina yofunge ni kaxaxi ka hine ya máji. 10 O sata ya uholwa imwatokala we kubhakula, ikala kaxaxi ka hine ya vinyu, sata yobhitise mu túbhya phala kubandesa dizumba dyambote kwa Jihova. 11 Kiki kyene kyatokala o kubhanga se o sata ikala ya ngombe, ya ndumbe ya mbudi, ya kambudi ka ndumbe ni ya kisutu kya hombo. 12 Kala kyasoko o konda ya ibhaku, kala kibhaku atokala mwene kukibhakula mu ukexilu yú. 13 Kiki kyene kyatokala kubhanga oso a avwalela mu Izalayele, kyoso kyabhakula sata yobhitise mu túbhya kala dizumba dyambote phala Jihova.

14 “‘Se kukala mukwa ixi yengi watungu n’enu, mba muthu wala kya bhukaxi kenu mu thembu yavulu, ubhakula we sata yobhitise mu túbhya kala dizumba dyambote phala Jihova, mwene watokala ku ibhakula we kala ki mwene mubhanga. 15 Enu mu akwa Izalayele* ni akwa jixi jengi atungu bhukaxi kenu, mwanda kala ngo ni ngonge imoxi. Yene yanda nangenena ku miji yenu yoso. Bhu pholo ya Jihova, o mukwa ixi yengi watokala kusokela n’enu. 16 Kwatokala kukala ngo kijila kimoxi. O ukexilu wanda mifundisa-nawu, wene we wanda fundisa-nawu o mukwa ixi yengi watungu bhukaxi kenu.’”

17 Jihova wambela Mozé: 18 “Ambela akwa Izalayele: ‘Kyoso ki mwanda bokona mu ixi mu nga mu myambata, 19 anga mudya o mbolo ya* ixi, mwatokala kubhana ujitu kwa Jihova. 20 Ku fadinya yenu ya dyanga mwatokala kubhanga-ku jimbolo mu ukexilu wa nela ni mujibhakule kala ujitu. Mwatokala kubhana o maujitu yá, kala ki mwene mubhana o ujitu utunda mu kididi kya kubhyatela. 21 Ku fadinya yenu ya dyanga, mwatokala kukatula-ku mbandu ni mu ibhane kala ujitu kwa Jihova, kutunda mwiji kwiza mwiji.

22 “‘Se mutondala anga mukamba ku kumbidila o itumu yoso yiyi yazwela Jihova kwa Mozé, 23 yoso ya mitendelesa Jihova bhukaxi ka Mozé, tunde o kizuwa kyatendelesa Jihova ku miji yenu yoso, 24 se ki mwakibhange mulwelu, o mundu anga ukamba ku kijiya, o mundu woso-phe wanda bhakula ka ngombe ka ndumbe kala sata ya kwoha ya dizumba dyambote phala Jihova ni sata ya makudya ni ya uholwa, kala kyene mubhanga kya, ni kisutu kya hombo kala sata ya kituxi. 25 O mukunji wanda bhangesa kwila, o ituxi ya mundu woso wa Izalayele, a iloloka, ene anda ku aloloka, mukonda kitondalu ngo. Kyenyiki, anda bheka o sata yâ: Sata imoxi yobhitise mu túbhya yobhakule kwa Jihova ni sata imoxi ya kituxi bhu pholo ya Jihova mukonda dya kitondalu kyâ. 26 O mundu woso wa Izalayele ni akwa ixi yengi atungu bhukaxi kâ, anda ku aloloka mukonda kyexile kitondalu kya mundu woso.

27 “‘Se kukala muthu uta kituxi sé kukimesena, watokala kubhakula hombo ya mukaji ya muvu umoxi kala sata ya kituxi. 28 O mukunji wanda bhangesa kwila, o muthu watondala sé kukimesena bhu pholo ya Jihova, a muloloka, mwene wanda bhangesa kwila o kitondalu kya muthu a kiloloka, o muthu anga a muloloka. 29 Kwatokala kukala ngo kijila kimoxi phala o muthu uta kituxi sé kukimesena, kikale a muvwalela mu Izalayele, kikale mukwa ixi yengi watungu bhukaxi kâ.

30 “‘Maji o muthu uta kituxi mulwelu, kikale a muvwalela mu Izalayele, kikale mukwa ixi yengi, waxongwena Jihova. Atokala ku mujibha. 31 Kuma mwene kabhana valolo mu kizwelu kya Jihova, wabhukumukina we o kitumu kyê, o muthu yú, sé phata atokala ku mujibha. Anda mukastikala mukonda dya kituxi kyê.’”

32 Kyoso akwa Izalayele kyexile hanji mu kikangalakata, asange diyala dyexile muxanga jihwínyi mu kizuwa kya sábhalu. 33 O athu a musange muxanga o jihwínyi, a mwambata kwa Mozé ni kwa Alá ni ku mundu woso. 34 Kyenyiki o diyala a mukwika* hanji, mukonda kejidile luwa ihi yeji mubhanga.

35 Jihova wambela Mozé: “Diyala didi atokala ku mujibha mwene. Mundu woso wa Izalayele watokala ku mububa ni matadi dikanga dya kididi bhwala o jibalaka.” 36 Kyenyiki, mundu woso wa Izalayele wa mwambata dikanga dya kididi bhwala o jibalaka, a mububa ni matadi yu wafu, kala kyatendelesele Jihova kwa Mozé.

37 Jihova wambela dingi Mozé, wixi: 38 “Ambela akwa Izalayele kwila, atokala kusangununa o mihuhu ya izwatu yâ ni kuta mukolo wa azulu ku thandu a mihuhu bhwanda sangununa, akibhange jinga kutunda mwiji kwiza mwiji. 39 ‘O izwatu yenu mwatokala ku isangununa mu ukexilu yú, phala mu ku imona mutene kulembalala o itumu yoso ya Jihova ni ku ikumbidila. Kimutokala kukayela o mixima yenu ni mesu enu, a mu mibhangesa kuta undumbu mu nzumbi. 40 Kiki kyanda mikwatekesa kulembalala o itumu yami yoso ni ku ikumbidila. Mu kubhanga kiki mwanda kala mu athu akôla ku mesu a Nzambi yenu. 41 Éme ngi Jihova Nzambi yenu, wa mikatula ku ixi ya Ijitu phala ngikale ngi Nzambi yenu. Éme ngi Jihova Nzambi yenu.’”

16 Kyenyiki, Kolá mon’a Izahale, mon’a Kohate, mon’a Levi, wadibundu ni Datane ni Abilamu an’a Eliyaba ni One mon’a Phelete, atokala ku an’a Lubene. 2 Ene adibundu phala kuzoka ni Mozé kumoxi ni hama jiyadi ni makwinyi atanu a adyakime a akwa Izalayele a asolo mwaxaxi ka mundu. Mayala exile ni maujitu. 3 Adibhongolola, ayi kwa Mozé ni Alá ya a ambela, exi: “Mwatukumu kya! O mundu woso watokala kwa Nzambi, oso mwene, Jihova wala bhukaxi kâ. Mukonda dyahi-phe mwa mudizangeleka bhukaxi ka mundu wa Jihova?”

4 Kyoso Mozé kyevu o izwelu yiyi, mu kithangana kyenyokyo wafukama ni pholo bhoxi. 5 Mukusuluka mwene wambela Kolá ni oso exile mu mukwatekesa: “Mungu mu kamene, Jihova wanda londekesa woso wa mutokala ni yó wazele, woso watokala kuzukama kwa mwene. O yó a musola kwa mwene wanda muzukama. 6 Kolá, eye ni akayed’yé mubhanga kiki: Kwatenu o yenga* ya kwohela o wasu wadizumba, 7 mungu muta-mu makala awama ni wasu wadizumba bhu pholo ya Jihova. O muthu anda musola kwa Jihova mwene wazele. Lumisuke kya, enu mu an’a Levi!”

8 Mozé anga wambela Kolá, wixi: “Ngamidyondo, ivwenu an’a Levi. 9 Manyi mwa mukimona kutola o Nzambi ya Izalayele kumisola bhukaxi ka mundu wa Izalayele ni kumyehela kuzukama kwa mwene phala kubhanga o kikalakalu mu balaka ya Jihova ni kukala bhu pholo ya mundu phala ku asidivila? 10 Nzambi wa kubhangesa kuzukama kwa mwene kumoxi ni jiphange jé joso, o an’a Levi. Kindala mwa musota we kutambula o kikalakalu kya ukunji? 11 Mukonda dya kiki, eye ni oso a mu kukwatekesa mwadibhongolola phala kuzoka ni Jihova. O yalungu ni Alá, mwene nanyi phala ku mulongolola?”

12 Ku pholo dya kwenda, Mozé watumu kwixana Datane ni Abilamu an’a Eliyaba, maji ene ambe: “Etu koko kitwandaya-ku! 13 Wa mukimona kutola kutukatula mu ixi i kunguluka lete ni wiki phala kutujibhila mu kikangalakata? Kindala wamesena we kya kukala u ngana yetu?* 14 Kwebhi kwala o ixi i kunguluka lete ni wiki i wambe kwila weji tubheka-ku ni kwila weji tubhana undundu wa mikáwu ni mividi? Wamesena kwila o mayala yá a kukayela kala ifofo?* Kitwandaya-ku!”

15 Kyenyiki, Mozé njinda yamukwata kyavulu yu wambela Jihova, wixi: “Kana kuxikina o sata yâ ya makudya.* Eme, né ngo jumendu yâ imoxi ki nga itambula, séku muthu mudyâ nga mubhange kima kyayibha.”

16 Mozé anga wambela Kolá, wixi: “Mungu wiza bhu pholo ya Jihova kumoxi ni oso ene mukukwatekesa. Éye, ene ni Alá mwatokala kwiza. 17 Kala muthu watokala kukwata o kyenga kyê kya kwohela o wasu wadizumba ni kutula-mu wasu wadizumba, kala muthu abheke o kyenga kyê kya kwohela o wasu wadizumba, hama jiyadi ni makwinyi atanu a yenga ya kwohela o wasu wadizumba bhu pholo ya Jihova, kumoxi n’eye ni Alá kala muthu ni kyenga kyê kya kwohela o wasu wadizumba.” 18 Kyenyiki, kala muthu wakwata o kyenga kyê kya kwohela o wasu wadizumba, wate-mu makala awama ni wasu wadizumba, ya emana bhu mwelu wa balaka ya kudyongekela kumoxi ni Mozé ni Alá. 19 Kolá anga wongeka oso exile mu mukwatekesa, bhu mwelu wa balaka ya kudyongekela phala kuzokana-wu. Bhenyobho, o kubhenya kwa Jihova anga kutukulukila o mundu woso.

20 Kyenyiki Jihova wambela Mozé ni Alá, wixi: 21 “Tundenu bhukaxi ka kibuka kiki ni nga abwikise mu kithangana ni mbandu.”* 22 Mukyenyiki, ene afukama ni pholo bhoxi ya ambe exi: “Wá Nzambi tata! Eye wabhana mwenyu ku athu oso, wanda bwikisa o mundu woso mukonda dya kituxi kya muthu umoxi?”

23 Kyenyiki, Jihova wambela Mozé, wixi: 24 “Ambela o mundu: ‘Sondolokenu ku jibalaka ja Kolá, Datane ni Abilamu!’”

25 Mozé wabalumuka, wayi kwexile Datane ni Abilamu, o tufunga twa Izalayele ayi-nê kumoxi. 26 Mozé wambela o mundu: “Ngamidyondo, sondolokenu ku jibalaka ja mayala yá ayibha. Kimukwate kima kya atokala phala kamibwikise mukonda dya kituxi kyâ.” 27 Mu kithangana kyenyokyo, ene asondoloka ku jibalaka ja Kolá, Datane ni Abilamu. Datane ni Abilamu atundu mu jibalaka jâ ya emana bhu mwelu kumoxi ni ahat’wâ ni twana twâ.

28 Mozé wambe-phe: “Bhukaxi ka ima yanda bhita kindala, mwanda kwijiya kwila, Jihova mwéne wa ngitumikisa phala kubhanga o ima yiyi ni kwila, ki nga mu ibhanga mu vondadi yami. 29 Se o athu yá afwa kala kyene mufwa athu oso, se a akastikala kala kyene mukastikala o athu oso, Jihova kimwene wa ngitumikisa. 30 Maji se Jihova ubhanga kima kya kudiwana, o mavu ajikuka* anga a aminya kumoxi ni yoso ya atokala, ene anga atuluka ni mwenyu mu Mbila,* enu sé phata, mwanda kwijiya kwila, o mayala yá kaxila Jihova.”

31 Kyoso kyazubha kuzwela o ima yoso yiyi, bhu kididi bhwakexile ene bhwa jikuka. 32 O mavu ajikuka, a aminya kumoxi ni yó atokalele mu mabhata mâ, kifwa oso atokalele kwa Kolá ni jimbote jâ joso. 33 Kyenyiki, ene ni yó oso a mutokalele atuluka ni mwenyu mu Mbila. O mavu anga a abhita ku thandu, ya ajikinina.* 34 Akwa Izalayele oso a akondolokele alenge mukonda dya kudikola kwâ, ya ambe: “Twala ni wôma wa kwila, o mavu atuminya we!” 35 Kwatundu-phe túbhya kwa Jihova twajibha o hama jiyadi ni makwinyi atanu a mayala exile mubhakula wasu wadizumba.

36 Kyenyiki, Jihova wambela Mozé, wixi: 37 “Tangela Eliyazale mon’a Alá o mukunji, akatule o yenga ya kwohela o wasu wadizumba mu túbhya mukonda ima ikôla. Mutangele we phala o uthôkwa a utakule dikanga. 38 O yenga ya kwohela o wasu wadizumba ya mala atele o kituxi ya afutu ni myenyu yá, atokala ku ikitula izalelu phala ku ita mu jimbandu ja kalatódyu, mukonda a ibhakula ku pholo ya Jihova, i yadibhange ima ikôla. Yatokala kukala kijimbwete phala akwa Izalayele.” 39 Kyenyiki, o mukunji Eliyazale wakatula o yenga ya ngondo ya kwohela o wasu wadizumba ya bhakwile yó a oha, yu wa ikitula izalelu phala ku ita mu jimbandu ja kalatódyu, 40 kala kya mutumine Jihova bhukaxi ka Mozé. Kiki kyeji kala kilembalesu phala akwa Izalayele kya kwila, muthu wengi katokalele ku mbutu ya Alá katokalele kuzukama phala kwoha wasu wadizumba bhu pholo ya Jihova. Ni kwila, kikukale muthu ukayela o phangu ya Kolá ni ya yó exile mu mukwatekesa.

41 Mu kizuwa kya kayela, mundu woso wa Izalayele wamateka kuzoka ni Mozé ni Alá mu kuzwela: “Kiyadi kyenu, énu mwajibha o mundu wa Jihova.” 42 Kyoso o mundu ki wadibhongolola phala kuzoka ni Mozé ni Alá, atale ku balaka ya kudyongekela ya amono kwila, a ivungine ku dituta. O kubhenya kwa Jihova kwamateka kumoneka.

43 Mozé ni Alá ayi ku pholo ya balaka ya kudyongekela, 44 Jihova anga wambela Mozé, wixi: 45 “Tundenu bhukaxi ka mundu yú phala nga abwike mu kithangana ni mbandu.” Mu kwivwa o izwelu yiyi, ene afukama ni jipholo bhoxi. 46 Mozé wambela-phe Alá, wixi: “Katula o kyenga kya kwohela o wasu wadizumba, ukita makala awama atundu mu kalatódyu ni wasu wadizumba, nde ni lusolo bhwala o mundu, ubhangese kwila o ituxi yâ a iloloka, mukonda Jihova waluwala kyavulu. O dibhebhu dyamateka kya!” 47 Mu kithangana kyenyokyo, Alá wakatula o kyenga kya kwohela o wasu wadizumba, kala kya mutangele Mozé, wayi ni kulenga bhukaxi ka akwa Izalayele, maji o dibhebhu dyamatekene kya bhukaxi ka mundu. Watula o wasu wadizumba mu kyenga kya kwohela o wasu wadizumba, yu wamateka kubhangesa kwila o ituxi ya mundu a iloloka. 48 Mwene wemana bhukaxi ka imbi ni yó exile hanji ku mwenyu, o dibhebhu anga dibhita. 49 O athu afu mukonda dya dibhebhu atenesa dikwinyi ni kiwana kya midi ni hama sambwadi, o yó afu mukonda dya Kolá engi. 50 Kudisukilu, kyoso Alá kyavutuka kwa Mozé bhu mwelu wa balaka ya kudyongekela, o dibhebhu dyabhitile kya.

17 Jihova wambela-phe Mozé, wixi: 2 “Ambela akwa Izalayele, kala mutwameni wa mwiji wa dibhata dya jitata, abheke mbangala imoxi. Jimbangala joso jitenesa dikwinyi ni kiyadi. Kala muthu o dijina dyê udisoneka ku mbangala yê. 3 Watokala kusoneka o dijina dya Alá ku mbangala ya Levi, mukonda kala mutwameni ku mabhata a jitata jâ, wala ni mbangala yê. 4 Tula o jimbangala mu balaka ya kudyongekela bhu pholo dya Umbangi, bhu ngene mudilondekesa ithangana yoso kokwenu. 5 O diyala di nganda sola, o mbangala yê yanda bhana ithulu. Kyenyiki, nganda zubha o kulongolola kwa akwa Izalayele, kwa mu ngilongolola eme ni enu.”

6 Mozé watangela akwa Izalayele, kyenyiki, atwameni oso a mubhana o jimbangala. Kala mutwameni wa dibhata dya jitata mbangala imoxi, kifwa, dikwinyi ni kiyadi kya jimbangala. O mbangala ya Alá yexile bhukaxi ka jimbangala jiji. 7 Mozé watula-phe o jimbangala mu balaka ya Umbangi, bhu pholo ya Jihova.

8 Mu kizuwa kyakayela, Mozé wabokona mu balaka ya Umbangi, yu wamono kwila o mbangala ya Alá, yexile mulombolola o mwiji wa Levi, ya thulukile, yabhanene jimbotá, ithulu ni ibundu ya amendowa yakusuka. 9 Kyenyiki, Mozé wakatula o jimbangala joso jexile bhu pholo ya Jihova, yu wa jibheka bhu kanga bhwexile o ana oso a Izalayele. Ene atonginina o jimbangala, kala muthu wakwata-ku o mbangala yê.

10 Kyenyiki, Jihova wambela Mozé: “O mbangala ya Alá tula-yu dingi bhu pholo ya Umbangi phala ku ibhaka kala kijimbwete, phala o an’a bhukumuka. Mu kubhanga kiki, kanda ngilongolola dingi phala kafwe.” 11 Mukithangana kyenyokyo, Mozé wabhange ya mutendelesa Jihova. Kyene mwene kyabhange.

12 Kyenyiki, akwa Izalayele ambela Mozé, exi: “Kindala twanda fwa, sé phata twanda fwa mwene, etwenyoso twanda fwa! 13 Muthu woso-woso né mwene se uzukame ngo ku balaka ya Jihova, wanda fwa! O kwila etwenyoso twanda fwa?”

18 Jihova anga wambela Alá, wixi: “Kikuma kyoso-kyoso kyalungu ni kididi kikôla, kyanda kala ku thandu dyé ni dya an’é, ni ku thandu dya dibhata dya jitata jé. Se mubhukumukina o kijila kyalungu ni kikalakalu kyenu kya akunji, o kikuma kyanda kala ku thandu dyé ni dya an’é. 2 Exana we o jiphange jé atokala ku mwiji wa Levi, o mwiji wa jikuku jé, adibunde kokwé n’a kukwatekese kikale eye kikale an’é bhu pholo ya balaka ya Umbangi. 3 Ene atokala kubhanga o kikalakalu kyâ, kya kukukwatekesa mu ikalakalu yoso ya balaka. Maji katokala kuzukama ku ima ya kididi kikôla ni ya kalatódyu phala ene kafwe, enu we kimufwe. 4 Ene anda dibunda kokwé, anda bhanga o ikalakalu yâ yalungu ni balaka ya kudyongekela ni ikalakalu yoso ya balaka. Séku muthu wengi* utena ku mizukama. 5 Mwanda bhanga o ikalakalu yenu yalungu ni kididi kikôla ni kalatódyu phala kingiluwale kyavulu ni mundu wa Izalayele. 6 Éme mwene ngasolo o jiphange jenu, o Jilevita, bhukaxi ka akwa Izalayele kala ujitu phal’enu. Ene anda tokala kwa Jihova phala kubhanga o ikalakalu mu balaka ya kudyongekela. 7 Eye ni an’é mwanda bhanga o kikalakalu kya ukunji kyalungu ni kalatódyu ni ima yala kudima dya kulutina. Mwatokala kubhanga o kikalakalu kiki. Eme nga mibhana o kikalakalu kya ukunji kala ujitu. Muthu wengi* uzukama-ku, atokala ku mujibha.”

8 Jihova wambela we Alá, wixi: “Éme mwene nga kubhana o kikalakalu kya kutambula o maujitu a ngibhakwila. O maujitu yá nga kubhana-wu éye ni an’é kala mbandu inangenena, ku ima yoso ikôla yanda bhakula akwa Izalayele. 9 O ku jisata jikôla kinene jobhitise mu túbhya, jiji jene janda kutokala: O jisata joso janda bhakula ene, kumoxi ni jisata ja makudya,* o jisata ja kituxi ni jisata ja kikuma janda ngibhekela. Kima kikôla kinene phal’eye ni twana twé. 10 Watokala ku idila mu kididi kikôla kinene. Mayala oso atena kudya-ku. Yanda kala kima kikôla phal’eye. 11 O jisata jamukwa we jakutokala jenyiji: O maujitu anda bhana akwa Izalayele kumoxi ni jisata joso jobhitise ku pholo ni ku dima. O maujitu yá ngakubhana-wu éye ni twana twé twa mala ni twa ahatu, kala mbandu inangenena. Woso wazele kubhata dyé, utena kudya-ku.

12 “Ku máji oso ambote ni ku vinyu ya ubhe ni ku makudya ni ku ibundu yâ idyanga o kukusuka,* yanda bhana kwa Jihova, ngi kubhana-yu eye. 13 O ibundu ya dyanga o kukusuka mu ima yoso ya ixi yâ, yanda bheka kwa Jihova, yanda kutokala. Woso wazele kubhata dyé, utena kudya-ku.

14 “Ima yoso yobhakule kwa Nzambi mu Izalayele, yanda kutokala.

15 “Ana oso a phande-kumbi, anda bhakula ene kwa Jihova, kikale a athu kikale a ibhaku, anda kutokala. Maji, watokala kukula o an’a phande-kumbi a athu ni an’a phande-kumbi a ibhaku yakasana. 16 Oso-phe mudyâ abhingi ku akula, watokala ku akula tunde kyatenesa mbeji imoxi, mu valolo yoxinde ya xikulu jitanu ja phalata, kala o xikulu* ya kididi kikôla ya makwinyi ayadi a jijela.* 17 Maji k’utokala kukula o phande-kumbi ya ngombe, ya kambudi ni ya kisutu kya hombo. Mukonda ima ikôla. Watokala kusamena o manyinga mâ ku thandu a kalatódyu ni kwoha o banya yâ kala sata yobhitise mu túbhya, ya dizumba dyambote phala Jihova. 18 O xitu ya ibhaku yiyi, yanda kala phal’eye. Yene yanda kutokala, kala o phetu yobhakule kala sata* ni kinama kya kadilu. 19 O ima yoso ikôla yasangela akwa Izalayele phala Jihova, ngi kubhana-yu éye ni an’é a mala ni an’é a ahatu, kala mbandu inangenena. Kiki kikutu kya môngwa* kinangenena kyabhange Jihova phal’eye ni mbutu yé.”

20 Jihova wambela Alá: “Mu ixi yâ kiwanda tambula-mu undundu, o bhukaxi kâ, séku mbandu ya ixi yanda kutokala. Éme ngi undundu wé bhukaxi ka akwa Izalayele.

21 “Tala, o an’a Levi, nga abhana o jimbandu joso ja kakwinyi kala undundu mu Izalayele, mukonda dya kikalakalu kyene mubhanga, o kikalakalu kya balaka ya kudyongekela. 22 Séku muthu ku mundu wa Izalayele utena kuzukama dingi ku balaka ya kudyongekela. Se ukibhanga, wanda kala ni kikuma kya kituxi, wanda fwa. 23 O Jilevita éne mwene atokala kubhanga o ikalakalu mu balaka ya kudyongekela. Se o mundu uta kituxi kyalungu ni kididi kikôla, éne we anda kala ni kikuma. Yiyi ngonge inangenena phala enu kutunda mwiji kwiza mwiji. Ene katokala kutambula undundu bhukaxi ka akwa Izalayele. 24 Mukonda ngabhana ku Jilevita kala undundu, o jimbandu ja kakwinyi, ku yoso ibhana o mundu wa Izalayele kwa Jihova kala ujitu. Kiki kyene kya ngibhangesa kwa ambela: ‘Ene katokala kutambula undundu bhukaxi ka akwa Izalayele.’”

25 Jihova wambela-phe Mozé, wixi: 26 “O Jilevita watokala kwa ambela kiki: ‘Enu mwanda tambula kwa akwa Izalayele o jimbandu ja kakwinyi ji ngi mibhana kala undundu. Mwatokala kubhana o mbandu ya kakwinyi ya jimbandu jiji ja kakwinyi, kala ujitu phala Jihova. 27 Wene wanda kala o ujitu wenu, kala kudya kwa tundu bhu kididi kyenu kya kubhyatela, mba o ima yavulu yatundu bhu kididi* kyenu kya kubhanga o vinyu ni máji. 28 Mu kubhanga kiki, enu we mwanda bhana ujitu kwa Jihova, ku jimbandu joso ja kakwinyi ji mutambula kwa akwa Izalayele. Ku jimbandu jiji ja kakwinyi, mwatokala kubhana kwa Alá o mukunji, o ujitu watokala kwa Jihova. 29 Mwanda bhana kwa Jihova o maujitu moso kala kima kikôla, o mbandu yabetakota mu maujitu oso anda mibhana.’

30 “Wa atangela we kwila, ‘kyoso ki mwanda bhana o ujitu musola-bhu mwene o ima yabetakota. O yanda subhuka, yanda kala ujitu wenu enu mu Jilevita, kala idima ya kididi kya kubhyatela, kala ima yatundu mu kididi kya kubhanga vinyu ni máji. 31 Enu ni oso atungu mu mabhata menu, mwanda tena ku idya mu kididi kyoso-kyoso, mukonda yene o futu ya kikalakalu kyenu mu balaka ya kudyongekela. 32 Ku ima yiyi se mubhana-ku yoyo yabetakota, kimwanda kala ni kikuma kya kituxi kyalungu ni maka yá. Kimukasanese o ima ikôla ya akwa Izalayele, phala kimufwe.’”

19 Jihova wambela dingi Mozé ni Alá, wixi: 2 “Kiki kyene o kijila kyatumu Jihova: ‘Ambela akwa Izalayele phala a kubhekele ngombe ya mukaji yadisanze, yakusuka, yakambe o unema, ka itele luwa jungu ku thandu dyê. 3 Mwatokala ku ibhana kwa Eliyazale o mukunji phala ayambate dikanga dya kididi bhwala o jibalaka, anga a ijibhila bhu pholo yê. 4 Eliyazale-phe o mukunji, wanda bonda o mulembu wê mu manyinga a ngombe ni ku asamena* lusambwadi bhu mbandu a mwelu wa balaka ya kudyongekela. 5 O ngombe ya mukaji anda yohela bhu pholo yê, kumoxi ni kibha kyê ni xitu yê ni manyinga mê ni ditobe. 6 O mukunji wanda kwata dibaya dya muxi wa musedulu, isasa ya hisopo ni kizwatu kyakusuka, wanda itakula mu túbhya mwa mukwohela o ngombe. 7 O mukunji wanda sukula o izwatu yê ni kuzowa. Kyene ngo kyanda tena kuya bhwala o jibalaka. Maji wanda kasana hanji kate ku dimatekenu dya usuku.

8 “‘O yó woha o ngombe, wanda sukula o izwatu yê mu menya ni kuzowa. Wanda kasana hanji kate ku dimatekenu dya usuku.

9 “‘O uthôkwa wa ngombe ya mukaji anda ubhongolola ku diyala dyazele, wanda uta mu kididi kyazele dikanga dya jibalaka. O mundu wa Izalayele watokala kubhaka o uthôkwa yú, phala kusokejeka* o menya a kuzelesa. Yiyi sata ya kituxi. 10 Woso u phopheka o uthôkwa wa ngombe ya mukaji, watokala kusukula o izwatu yê. Wanda kasana kate ku dimatekenu dya usuku.

“‘Yiyi yanda kala ngonge inangenena phala akwa Izalayele ni mukwa ixi yengi watungu bhukaxi kâ. 11 Woso ukwata ku kimbi kya muthu, wanda kasana mu sambwadi dya izuwa. 12 Mwene watokala kudizelesa ni menya a kuzelesa mu kizuwa kya katatu, mu kizuwa kya kasambwadi wanda zela. Se ukamba kudizelesa mu kizuwa kya katatu, mu kizuwa kya kasambwadi kanda zela. 13 Woso ukwata ku kimbi kya muthu anga ukamba kudizelesa, wanda kasana hanji mukonda kamusamena* o menya a kuzelesa, mwene wa mukasanesa o balaka ya Jihova. O muthu yu, mu Izalayele anda mubwika-mu.*

14 “‘Kiki kyene o kijila kyalungu ni muthu ufwila mu balaka: Woso ubokona mu balaka ni yó ukala kya mu balaka, kiyadi kyâ anda kasana mu sambwadi dya izuwa. 15 Disanga dyoso-dyoso dya jikuka o dikanu anga akamba kukutila-ku kivunginu, dyanda kasana. 16 Muthu woso-woso wala mu mukáwu se ukwata ku muthu a mujibha ni xibhata mba wafu mukonda dya kima kyengi mba ukwata ku kifuba kya muthu mba ku mbila, wanda kasana mu sambwadi dya izuwa. 17 O yó wakasana a mukatwila-phe tu uthôkwa twa sata ya kituxi yoha kya, atuta mu disanga, alundulula-mu menya o teke mu fixi. 18 Kyenyiki, o diyala dyazele, wanda kwata isasa ya hisopo wanda ibonda mu menya, wanda isamena ku balaka, ku imbamba yoso, ku athu exile mu balaka ni kwa yó wa kwata ku kifuba, wa kwata ku muthu a mujibha mba wafu mukonda dya kima kyengi, mba ku mbila. 19 O muthu wazele wanda samena o menya kwa yó wakasana mu kizuwa kya katatu ni kya kasambwadi. Mu kizuwa kya kasambwadi-phe anda muzelesa mukonda dya kituxi. Kyenyiki, o muthu wakasana watokala kusukula o izwatu yê ni kuzowa, wanda zela ku dimatekenu dya usuku.

20 “‘Maji o diyala dikasana anga dikamba kudizelesa, wanda kasana hanji mukonda kamusamena o menya a kuzelesa. O diyala didi bhukaxi ka mundu anda mubwika-bhu* mukonda wakasanesa o kididi kikôla kya Jihova.

21 “‘Yiyi yanda kala ngonge inangenena phala ene: O yó usamena o menya a kuzelesa, watokala kusukula o izwatu yê. O yó ukwata mu menya a kuzelesa, wanda kasana kate ku dimatekenu dya usuku. 22 Kima kyoso-kyoso kikwata o muthu wakasana kyanda kasana, o muthu ukwata ku kima kiki, wanda kasana we kate ku dimatekenu dya usuku.’”

20 Mu mbeji ya dyanga, o mundu woso wabhixila mu kikangalakata kya Zini, anga atunga ku Kadexi. Bhene bhwa fwila Midiyana ya a mufundu.

2 Kikwexile menya phala o mundu. Kyenyiki adibhongolola ya amateka kulongolola Mozé ni Alá. 3 O mundu wexile muzoka ni Mozé, mu kuzwela: “Tamanu twafwilyetu kyoso kyafu o jiphange jetu bhu pholo ya Jihova! 4 Mukonda dyahi mwabheka o mundu wa Jihova mu kikangalakata kiki phala tufwile bhenyabha ni ibhaku yetu? 5 Mukonda dyahi mwatukatula ku ixi ya Ijitu, énu mwatubheka mu kididi kyayibha kiki? Ki kididi kya kukuna, ki kididi kya jifiku, ki kididi kya mividi, ki kididi kya jilomá, kimwala we menya a kunwa.” 6 Mozé ni Alá atundu-phe bhwexile o mundu, ayi bhu mwelu wa balaka ya kudyongekela, afukama ni jipholo bhoxi, o kubhenya kwa Jihova kwamateka kwa amonekena.

7 Jihova wambela-phe Mozé, wixi: 8 “Kwata o mbangala, bhongolola o mundu. Eye ni phang’yê Alá muzwelela o ndanji* bhu pholo yâ, ku ndanji ni kutunde menya. Enu mwanda katula menya ku ndanji ni munwisa o mundu ni ibhaku yâ.”

9 Kyenyiki, Mozé wakwata o mbangala yexile bhu pholo ya Jihova kala kya mutendelesele mwene. 10 Mozé ni Alá exana-phe o mundu, phala kubhongolokela bhu mbandu a ndanji, yu wa ambela, wixi: “Kindala ivwenu, énu mwabhukumuka! Mwamesena kwila ku ndanji yiyi tutundisa-ku menya phala enu?” 11 Mukiki, Mozé wabeta luyadi ku ndanji ni mbangala yê, ku ndanji kwamateka kutunda menya avulu, o mundu ni ibhaku yâ amateka kunwa.

12 Ku pholo dya kwenda, Jihova wambela Mozé ni Alá, wixi: “Kuma kimwangilondekesa kixikanu, kimwangijingisa we bhu pholo dya mundu wa Izalayele, kimwanda kwambata o mundu yú mu ixi i nganda kwa abhana.” 13 Yá ene o menya a Mediba* bhwazokela akwa Izalayele ni Jihova. Kiki kyabhangesa ku mujingisa bhukaxi kâ.

14 Mozé anga utumikisa akunji kwa sobha ya Idomo, tunde bhu Kadexi phala ku mutangela kiki: “Jiphange jê akwa Izalayele ambe kiki: ‘Eye ngana wejiya kyambote o ibhidi yoso itwadibhana-nayu. 15 O jikuku jetu a ile ku Ijitu, etu we twatungile ku Ijitu mu mivu* yavulu. O akwa Ijitu atutalatala kyayibha, kikale etu kikale o jikuku jetu. 16 Kudisukilu twadyondela kwa Jihova. Mwene watwivu, yu watumikisa anju yatukatula ku Ijitu. Kindala twala bhabha mu Kadexi, mbanza yala bhu mbambe bhwasuku o ixi yé. 17 Twakudyondo, twehele kubhitila mu ixi yé. Kitwanda bhitila mu mabhya mba mu mividi, kitwanda nwa we menya a ixima yenu. Twanda bhitila mu kikoka, kitwanda bhambuka ku kadilu mba ku kyasu kate kitwanda zubha kubhita mu ixi yé.’”

18 Maji sobha ya Idomo wa atambwijila: “Kanenu kubhitila mu ixi yetu. Se mukibhanga, ngandaya mubhânga n’enu ni xibhata.” 19 Akwa Izalayele-phe a mutangela: “Twanda bhitila mu kikoka. Se etu mba o ibhaku yetu tunwa o menya enu, twanda kwa afuta. Twamesena ngo kwendela bhoxi.” 20 Maji mwene wambe: “Kimwanda bhita.” Kyenyiki sobha ya Idomo wayi ni kifuxi kyadikota,* kyala ni nguzu yavulu mudisanga-nawu. 21 Mukyenyiki, sobha ya Idomo kehela akwa Izalayele kubhita mu ixi yé. Akwa Izalayele-phe abhingile kubhambuka.

22 O mundu woso wa Izalayele watundu ku Kadexi yu wabhixila ku mulundu wa Hole. 23 Jihova wambela-phe Mozé ni Alá ku mulundu wa Hole bhu mbambe bhwasuku o ixi ya Idomo: 24 “Alá wanda fwa, anda mufunda kala kya fundu o jikuku jê.* Kanda bokona mu ixi i nganda bhana akwa Izalayele, mukonda enu mwabhukumukina o kitendelesu kyami kyalungu ni menya a Mediba. 25 Ambata Alá ni mon’ê Eliyazale ku thandu a mulundu wa Hole. 26 Katula o izwatu ya Alá, u izwika mon’ê Eliyazale. Alá wanda fwila kwenyoko.”

27 Kyenyiki, Mozé wabhange mwene kala kyamutendelesele Jihova. O mundu woso wa amono kyoso kyabande ku mulundu wa Hole. 28 Mozé wakatula-phe o izwatu ya Alá yu wa izwika Eliyazale, mon’ê. Alá anga ufwila bhenyobho, ku thandu a mulundu. Mozé ni Eliyazale anga atuluka ku mulundu. 29 Kyoso mundu woso kyevu kwila Alá wafu, dibhata dyoso dya Izalayele dya didi Alá mu makwinyi atatu a izuwa.

21 Kyoso sobha ya Kanana mukwa Alade watungile ku Nengebe kyevu kwila akwa Izalayele abhitile mu njila ya Atadime, wayi mubhânga ni akwa Izalayele, wambata-ku amoxi yu wa akwika. 2 Kyenyiki, akwa Izalayele abhange o kikanenu kiki kwa Jihova: “Se ubhakula o mundu yú bhu maku m’etu, sé phata, twanda bwika o jimbanza jâ.” 3 Kyenyiki, Jihova wevu o kikanenu kya akwa Izalayele, akwa Kanana anga a abwika ku akwa Izalayele, kikale ene ni jimbanza jâ. Mukonda dya kiki, o kididi kyokyo a kiluku Holoma.*

4 Kyoso kyexile hanji mu njila, mukutunda ku mulundu wa Hole, mu njila ya Kalunga Kakusuka, phala kukondoloka o ixi ya Idomo, o mundu wabhwila mukonda dya njila yabhange. 5 O mundu wexile mulongolola Nzambi ni Mozé, exi: “Mukonda dyahi mwatukatula ku Ijitu ni tufwila mu kikangalakata? Mumu kimwala kudya, kimwala menya. Kitwawabhela o maná* yiyi, yatukumu kya.” 6 Kyenyiki, Jihova watumikisa jinyoka jexile mu numata o athu. Mukiki, avulu ku akwa Izalayele afu.

7 O mundu anga uya muzwela ni Mozé, wixi: “Twate kituxi mu kulongolola Jihova ni mu ku kulongolola eye. Dyondela kwa Jihova phala akatule o jinyoka bhukaxi k’etu.” Mozé anga udyondela o mbote ya mundu. 8 Jihova anga wambela Mozé, wixi: “Yudika nyoka, tudika-yu ku muxi. Muthu woso amunumata, wanda tala-ku phala kafwe.” 9 Mu kithangana kyenyokyo, Mozé wayudika nyoka ya ngondo, yu wa itudika ku muxi. Kyoso kyexile munumata muthu ku nyoka, o muthu yú wexile mutala ku nyoka ya ngondo, phala kafwe.

10 Akwa Izalayele anga akatuka ya emika o jibalaka jâ ku Obote. 11 Atundu-phe ku Obote ya emika o jibalaka ku Ije-abadimi, mu kikangalakata kyazukama ni ixi ya Mowabe, ku tundila o dikumbi. 12 Kyoso kya tundu-ku, emika o jibalaka bhu mbandu a honga ya Zelede. 13 Mukutunda kwenyokyo, emika o jibalaka bhu mbandu a Anone, yala mu kikangalakata kitunda mu mbambe ya akwa Mamodi. Ku Anone kwene kwasukina o mbambe ya Mowabe. Kifwa, bhukaxi ka Mowabe ni akwa Mamodi. 14 Mukonda dya kiki, o divulu dya Ita ya Jihova dyamba: “Vehebe ku Safale o jihonga ja Anone 15 ni dikenye dya jihonga diya kwalungu o mbanza ya Hale yala bhu mbambe bhwasuku o ixi ya Mowabe.”

16 Anga aya ku Behele. Kiki kyene o kixima kyambe Jihova kwa Mozé, wixi: “Ongeka o mundu ni nga abhane menya.”

17 Mu thembu yenyoyo, akwa Izalayele embi o mwimbu yú:

“Fwafwa menya eye ukixima! Imbenu-kyu!

Kyenyiki atundu mu kikangalakata, ya ayi ku Mataná. 19 Kyatundu ku Mataná ayi ku Nahaliyele, kyatundu ku Nahaliyele ayi ku Bamote. 20 Kyatundu ku Bamote, ayi mu honga yala mu mbambe* ya Mowabe, ku thala dya mulundu wa Pixika, walungila ni Jezimone.*

21 Akwa Izalayele atumikisa akunji phala kutangela Sihone sobha ya akwa Mamodi exi: 22 “Twehele kubhitila mu ixi yé, kitwanda bhitila mu mábhya mba mu mividi. Kitwanda nwa we menya a ixima yenu, twanda bhitila mu kikoka kate kitwanda zubha kubhita mu ixi yé.” 23 Maji Sihone kehela akwa Izalayele kubhita mu ixi yê. Muveji dya kiki, Sihone wongeka o kifuxi kyê kyoso, yu wayi mudisanga ni akwa Izalayele mu kikangalakata. Kyoso kyabhixila ku Jahaze wamateka kubhânga ni akwa Izalayele. 24 Maji akwa Izalayele a mutolola ni xibhata ya atambula o ixi yê, tunde ku Anone kate ku Jaboke kwazukama ni akwa Amone, mukonda Jazele yazukama bhu mbambe bhwasuku o ixi ya akwa Amone.

25 Akwa Izalayele atambula-phe o jimbanza joso jiji, ya atungu mu jimbanza joso ja akwa Mamodi ku Hexebone ni mu madyembu oso a akondolokele. 26 Kuma Hexebone yexile mbanza ya Sihone, sobha ya akwa Mamodi, wabhângele ni sobha ya Mowabe yu wamutambula o ixi yê yoso kate ku Anone. 27 Kwene kwejila o sabhu yambe:

“Zenu ku Hexebone.

O mbanza ya Sihone a itunge, a ikolese mwene kyambote.

28 Kuma ku Hexebone kwatundu túbhya, mu mbanza ya Sihone mwatundu mulengu.

Wene woha o mbanza ya Hale ya Mowabe ni jingana ja ididi yadileka ya Anone.

29 Kokolo dyé eye u Mowabe! Anda mibwika enu mu mundu wa Kemoji!

Kemoji ubhangesa an’ê a mala kulenga ni kwehela kwila o an’ê a ahatu a akwika kwa Sihone, sobha ya akwa Mamodi.”

31 Mukyenyiki, akwa Izalayele atunga mu ixi ya akwa Mamodi. 32 Mozé watumikisa-phe mayala phala kulonda o mbanza ya Jazele. Ene atambula o madyembu akondolokele o mbanza yiyi, ya akaye akwa Mamodi akexile-mu. 33 Mukubhita o ima yiyi, abande ni njila iya ku Basane. Hoke sobha ya Basane, watundu ni kifuxi kyê kyoso, wayi mudisanga-nawu phala kulwa ita ku Edileyi. 34 Jihova wambela Mozé: “Kana ku mukwatela wôma, mukonda nganda mubhakula bhu maku mé ni mundu wê woso ni ixi yê. Wanda mubhanga kala ki wabhange kwa Sihone sobha ya akwa Mamodi, watungile ku Hexebone.” 35 Kudisukilu, mwene ni an’ê ni mundu wê woso a ajibha, kikwasubhuka né ngo muthu umoxi ku mundu wê. Kyenyiki, ixi yê a itambula.

22 Akwa Izalayele akatuka-phe, emika o jibalaka jâ mu kikangalakata kya Mowabe bhwa zukama ni Jedikó ku sambwa dya Njolodá. 2 Balake mon’a Zipolo, wevu yoso yabhangele akwa Izalayele ku akwa Mamodi. 3 Akwa Mowabe exile ni wôma wavulu wa Izalayele mukonda avudile. Mukidi, akwa Mowabe abhondalala mukonda dya akwa Izalayele. 4 Akwa Mowabe ambela-phe o tufunga twa akwa Midiyana: “Kindala, o mundu yú wanda bwika yoso yatukondoloka kala o ngombe ki idya o yangu mu mukáwu.”

Mu thembu yenyoyo, Balake mon’a Zipolo mwéne wexile o sobha ya Mowabe. 5 Mwene watumikisa akunji phala kwixana Balamu mon’â Bewole ku Petolo, yazukama ni ngiji ya Ufalate,* mu ixi mwa mu vwalela, wixi: “Bhabha bhwamoneka mundu watundu ku Ijitu. Ene ezalesa o ixi, atungu mwene bhwa zukama o mbambe yami. 6 Za kindala ngakudyondo, u ngibhubhidile o mundu yú, mukonda a ngitundu mu nguzu. Nange ngitena ku atolola ni ku akaya mu ixi yiyi. Kuma ngejiya kyambote kwila, kyoso ki u besowala muthu, muthu yú a mubesowala, kyoso ki u bhubhidila muthu, muthu yú a mubhubhidila we.”

7 Kyenyiki, o adyakime akwa Mowabe ni adyakime akwa Midiyana ende njila, ambata o futu ya kuzambula bhu maku mâ, ayi muzwela ni Balamu ya a mutudila o njimbu ya Balake. 8 Mukiki mwene wa ambela: “Zekelenu hanji bhabha. Eme nganda mitangela o kitambwijilu kyanda ngibhana Jihova.” Kyenyiki, o ilamba ya Mowabe akala ni Balamu.

9 Nzambi watukulukila-phe Balamu yu wa mwibhwidisa: “O mayala yá ala n’eye ananyi?” 10 Balamu watambwijila o Nzambi yakidi, wixi: “Balake mon’â Zipolo, sobha ya Mowabe, wa ngitumikisa njimbu yambe kiki: 11 ‘Bhabha bhwamoneka mundu watundu ku Ijitu. Ene a mukwizalesa o ixi. Za kindala, u ngibhubhidile-wu. Nange ngitena kubhânga-nawu ni ku akaya.’” 12 Maji Nzambi wambela Balamu, wixi: “Kana kuya-nawu. Kana kubhubhidila o mundu, mukonda éme nga mu alanga.”

13 Balamu wabalumuka mu kamene yu wambela o ilamba ya Balake, wixi: “Vutukenu ku ixi yenu, mukonda Jihova kangehela kuya n’enu.” 14 Kyenyiki, o ilamba ya akwa Mowabe avutuka kwa Balake ya amwambela, exi: “Balamu waditunu kwiza n’etu.”

15 Maji Balake watumikisa ilamba yamukwa, abeta o kuvula, ala dingi ni fuma o ya dyangele ndenge. 16 Ene ayi kwa Balamu ya a mwambela: “Balake mon’a Zipolo wambe kiki: ‘Ngakudyondo, kana kwehela kima kukufidisa kwiza kokwami, 17 mukonda nganda kujingisa kyavulu, nganda bhanga yoso i u ngibhinga. Za ngakudyondo, ngibhubhidile o mundu yú.’” 18 Maji Balamu watambwijila o jiselevende ja Balake, wixi: “Né mwene se Balake u ngibhana inzo yê yezala ni phalata ni ulu, eme kingitena kubhanga kima, kikale kyadikota mba kyofele, ki bhukumukina o kitumu kya Jihova Nzambi yami. 19 Maji ngamidyondo, usuku yú zekenu we hanji bhabha, ni ngijiye ihi dingi yanda ngitangela Jihova.”

20 Nzambi watukulukila Balamu mu usuku yu wa mutangela: “Se mayala yá eza mukwixana, nde-nawu. Maji watokala kuzwela ngo yoso i nganda kutangela.” 21 Kyenyiki, Balamu wabalumuka mu kamene, wasokejeka o jumendu yê ya mukaji yu wayi ni ilamba ya akwa Mowabe.

22 Maji o njinda ya Nzambi yawama mukonda mwene wexile muya. O anju ya Jihova yemana mu kikoka phala ku mufidisa. Balamu wexile ku thandu a jumendu yê, wexile ni akwatekex’ê ayadi. 23 Kyoso jumendu ki yamono o anju ya Jihova yemana mu kikoka yafomona o xibhata, yamateka kutunda mu kikoka phala kuya mu yangu. Maji Balamu wamateka kubeta o jumendu phala ku ivutukisa mu kikoka. 24 Kyenyiki, o anju ya Jihova yemanenye mwene mu njila yatolo, bhukaxi ka mabhya ayadi a mividi, kwexile jiphalelu ja matadi mbandu ni mbandu. 25 Mu kumona o anju ya Jihova, o jumendu yamateka kudixinina ku phalelu, i yaxina o kinama kya Balamu ku phalelu. Balamu anga u ibeta dingi.

26 O anju ya Jihova yayi dingi ku pholo, bhu kididi kyatolo. Bhenyobho, kibhwexile kididi phala kuditela ku kadilu mba ku kyasu. 27 Kyoso jumendu ki yamono o anju ya Jihova, yabase ni Balamu ku thandu dyê. Balamu anga njinda i mukwata, wa ibeta dingi ni mbangala yê. 28 Jihova wabhangesa-phe o jumendu kuzwela.* Yene yambela Balamu: “Ihi i ngakubhange phala ku ngibeta lutatu lwos’ulu?” 29 Balamu watambwijila o jumendu: “Wa ngibhange ngi kyowa. Se ngakwatele xibhata, hinu nga kujibha!” 30 O jumendu yebhwidisa Balamu: “K’eme ngi jumendu iwene musambela ku mwenyu wé woso kate lelu? O kwila ngakubhangele kya kiki?” Mwene watambwijila: “Kana!” 31 Mukiki, Jihova wajikula o mesu a Balamu, mwene anga umona o anju ya Jihova yemana mu kikoka, yafomona o xibhata. Mu kithangana kyenyokyo, mwene udyonda anga ufukama ni pholo bhoxi.

32 O anju ya Jihova-phe ya mwambela: “Mukonda dyahi wabeta o jumendu yê mu lutatu lwos’ulu? Éme ngeza kukufidisa, mukonda o njila i wamukwenda kiyalungu ni vondadi yami. 33 O jumendu ya ngimono i yasoto ku ngilenga* lutatu. Xinganeka hanji se yene kiyangilengele! Mu kithangana kiki, eme hinu ngakujibha kya, maji o jumendu yeji xale ni mwenyu.” 34 Balamu wambela o anju ya Jihova: “Ngate kituxi, mukonda kingejidile kwila eye ngana wemanene mu kikoka phala kudisanga n’eme. Kindala, se kiki kyayibha ku mesu mê, nganda vutukami ku ngatundu.” 35 Kyenyiki, o anju ya Jihova yambela Balamu: “Nde kumoxi ni mayala enyo. Maji watokala kuzwela ngo yoso i nganda kutangela.” Balamu wasuluka ni kwenda o njila kumoxi ni ilamba ya Balake.

36 Kyoso Balake kyevu kwila Balamu wabhixila, mu kithangana kyenyokyo wayi mudisanga-nê mu mbanza ya Mowabe, yazukama ni Anone, bhwasuku o mbambe ya Mowabe. 37 Balake wambela Balamu: “Ki ngatumu ku kwixana? Wakambela-hi kwiza? Wafika kwila kingeji tena kukujingisa kyavulu? 38 Balamu-phe watambwijila Balake, wixi: “Kyambote. Kindala ngala bhu pholo yé. Maji kinganda tena kuzwela kima mu vondadi yami. Nganda zwela ngo yoso i ngitangela Nzambi phala kuzwela.”

39 Kyenyiki, Balamu wayi kumoxi ni Balake, ene anga abhixila ku Kidyate-Hazote. 40 Balake wabhakula jingombe ni jimbudi kala sata, yu watumikisa jithumba kwa Balamu ni ku ilamba yexile-nê. 41 Mu kamene Balake wambata Balamu yu wabande-nê ku Bamote-bahale. Kwenyoko, mwene wejitena kumona kyambote o mundu.

23 Mukyenyiki, Balamu wambela Balake: “Tunga bhabha sambwadi dya jikalatódyu u ngijibhile sambwadi dya ngombe ni sambwadi dya jimbudi ja ndumbe.” 2 Balake anga ubhanga kala kya mwambela Balamu mu kithangana kyenyokyo. Mu jikalatódyu joso, Balake ni Balamu abhakula-mu kangombe kamoxi ni kambudi kamoxi. 3 Balamu wambela-phe Balake: “Imana bhabha bhu mbandu ya sata yé ya kwoha. Eme ngamuya koko. Nange Jihova wanda zwela n’eme. Nganda kwambela yoso yanda ngitangela mwene.” Mukyenyiki, mwene wayi ku mulundu wofele.

4 Nzambi wazwela-phe ni Balamu, Balamu anga wambela Nzambi, wixi: “Ngatungu o sambwadi dya jikalatódyu, mu jikalatódyu joso nga bhakula-mu kangombe kamoxi ni kambudi kamoxi.” 5 Jihova anga wambela Balamu, wixi: “Vutuka kwa Balake, u mwambela kiki.” 6 Mukyenyiki Balamu wavutuka, yu wamono Balake ni ilamba yoso ya akwa Mowabe emana bhu mbandu a sata yê ya kwoha. 7 Mwene watumbula-phe o izwelu yiyi:

‘Za u ngibhubhidile Jakobo.

Kyene, za ufundise Izalayele.’

 8 Kyebhi kingeji bhubhidila yó ka abhubhidila kwa Nzambi?

Kyebhi kingeji fundisa yó ka afundisa kwa Jihova?

11 Kyenyiki, Balake wambela Balamu: “Ihi i wa ngibhange? Eme nga kubheka phala kubhubhidila o jinguma jami, maji eye wa abesowala.” 12 Mwene watambwijila: “O kwila kingatokala kuzwela yoso ya ngitangela Jihova phala kuzwela?”

13 Balake wa mwambela: “Ngakudyondo, zá tuye kumoxi bhu kididi kyengi bhu wanda tena ku amona. Wanda mona ngo mbandu yâ, kiwanda mona o mundu woso. Ngibhubhidile-nawu bhenyobho.” 14 Kyenyiki, Balake wa mwambata ku mukáwu wa Zofimi, ku thala dya mulundu wa Pixika, watungu-ku sambwadi dya jikalatódyu. Ku jikalatódyu joso wabhakula-ku kangombe kamoxi ni kambudi kamoxi. 15 Balamu wambela-phe Balake: “Imana bhabha bhu mbandu ya sata yé ya kwoha, eme ngamuya muzwela ni Nzambi.” 16 Kyenyiki, Jihova wazwela ni Balamu yu wamwambela, wixi: “Vutuka kwa Balake, u mwambela kiki.” 17 Bhenyobho, Balamu wayi kate bhwexile Balake, wa mumono yu ukingila bhu mbandu ya sata yé ya kwoha, o ilamba ya akwa Mowabe exile-nê kumoxi. Balake wa mwibhwidisa: “Ihi yambe Jihova?” 18 Mu ku mutambwijila mwene watumbula-phe o izwelu yiyi:

“Disokejeke Balake, u ngivwe.

Ngivwe, éye u mon’a Zipolo.

Yoso yazwela ukamba ku ibhanga?

Yoso yakanena ukamba ku ikumbidila?

22 Nzambi wa mu akatula ku Ijitu.

Mwene ukwatekesa Izalayele ni kutena kwê kala o jingela ja phakasa.

Kindala kiki, atena kuzwela yalungu ni Jakobo ni Izalayele kwila:

‘Talenu yabhange Nzambi!’

25 Kyenyiki Balake wambela Balamu: “Se kiwatena ku abhubhidila, kiwatokala we ku abesowala.” 26 Balamu watambwijila Balake, wixi: “Kingakutangela kwila nganda bhanga ngo yoso yanda ngitangela Jihova?”

27 Balake wambela Balamu: “Ngakudyondo, zá twende hanji bhu kididi kyengi. Nange o Nzambi yakidi uxikina kwila, u ngibhubhidila-nawu bhenyobho.“ 28 Kyenyiki, Balake wambata Balamu ku thala dya mulundu wa Peole, kwazukama ni Jezimone.* 29 Mukyenyiki, Balamu wambela Balake: “Tunga bhabha sambwadi dya jikalatódyu, u ngijibhile sambwadi dya ngombe ni sambwadi dya jindumbe ja mbudi.” 30 Balake anga ubhanga kala kyamwambela Balamu. Mu jikalatódyu joso, Balake wabhakula-mu kangombe kamoxi ni kambudi kamoxi.

24 Kyoso Balamu kyamono kwila Jihova wamesenene mwene* kubesowala akwa Izalayele, kayi dingi musota mizambu,* maji walungila o pholo mu kikangalakata. 2 Kyoso Balamu kyabhetula o mesu yu wamono akwa Izalayele emikine o jibalaka jâ kala kya asokejekele mu miji yâ, o nzumbi ikôla ya Nzambi ya mutula. 3 Mwene anga utumbula o izwelu yiyi:

10 Balake anga ukala ni njinda ya Balamu. Balake waxongwena mu kubeta jindamba, yu wambela Balamu: “Ngakwixana phala kubhubhidila o jinguma jami, maji mu lutatu lwos’ulu, eye wa abesowalé ngo. 11 Vutuke kya kubhata. Eme ngamesenene ku kujingisa kyavulu, maji Jihova wa kufidisa kutambula o kijingu.”

12 Balamu wambela Balake, wixi: “Eme ngambela kya o akunj’ê: 13 ‘Né mwene se Balake u ngibhana o inzo yê yezala ni phalata ni ulu, eme kingitena kubhanga kima mu vondadi yami*, kikale kyawabha mba kyayibha, ki bhukumukina o kitumu kya Jihova. Nganda zwela ngo yoso i ngitangela Jihova phala kuzwela.’ 14 Kindala, ngamuyami ku mundu wami. Maji nganda kutangela hanji o ima yanda bhanga o mundu yú, ku mundu wé ku hádya.”* 15 Mwene anga utumbula o izwelu yiyi:

20 Kyoso mwene kyatale kwa Amaleke, wasuluka ni izwelu yê, wixi:

21 Kyoso kyatale ku akwa Kena, mwene wasuluka ni izwelu yê, wixi:

“Watungu wasomo, o dibhata dyé dyala bhu ndanji.

22 Maji sayi muthu wanda bwika akwa Kena* ni túbhya.

Phala ku akwika ku akwa Asídya, kwanda kamba hanji thembu kuxi?”

23 Mwene wasuluka ni izwelu yê, wixi:

“Wawe! Nanyi wanda subhuka, kyoso Nzambi kyanda bhanga kiki?

Maji mwene anda mubwikisa we.”

25 Kyenyiki, Balamu wayi ni njila yê. Balake anga uya we ni njila yê.

25 Kyoso akwa Izalayele kyatungile ku Xitimi, o mayala amateka kubhanga undumbu ni an’a ahatu akwa Mowabe. 2 O ahatu exana o mayala phala kuya-nawu kyoso kyexile mubhakula jisata ku jinzambi jâ. O mundu wamateka kudya, wamateka we kufukamena o jinzambi jâ. 3 Kyenyiki akwa Izalayele amateka kubheza Bahale dya Peole, Jihova anga ukala ni njinda ya akwa Izalayele. 4 Jihova wambela Mozé: “Kwata o atwameni oso a mundu, wa ajibha anga wa anyenga ku mixi bhu pholo ya Jihova, mu mwanya watu, phala o njinda yavulu yakwatela Jihova ku akwa Izalayele, isosoloke.” 5 Mozé wambela-phe o afundixi a akwa Izalayele: “Kala muthu mudyenu watokala kujibha o mayala mê amateka kubheza Bahale dya Peole.”

6 Maji mu kithangana kyenyokyo, sayi mukwa Izalayele wabheka muhatu mukwa Midiyana bhukaxi ka jiphange jê, bhu pholo ya Mozé ni ya mundu woso wa Izalayele, kyoso kyexile mudidila bhu mwelu wa balaka ya kudyongekela. 7 Mukumona o ima yiyi, Fineya mon’a Eliyazale, mon’a Alá o mukunji, mu kithangana kyenyokyo wabalumuka bhukaxi ka mundu, yu wakwata o ngumba. 8 Wakayela o diyala mukwa Izalayele kate mu balaka yê, yu wa kubu o ngumba mu mala* dyê ni dya muhatu. Kyenyiki, o dibhebhu dyexile ku thandu a akwa Izalayele, dyabhiti. 9 O athu afu mukonda dya dibhebhu, atenesa makwinyi ayadi ni kiwana kya midi.

10 Jihova wambela-phe Mozé: 11 “Fineya mon’a Eliyazale, mon’a Alá o mukunji, wasondolola o njinda yami ku mundu wa Izalayele, mukonda k’ehela kwila, bhukaxi kâ akamba ku ngikala fiyele. Kyene ki ngakambe kubwika akwa Izalayele, mukonda ngimesena kwila, a ngibheza ni muxima watenena. 12 Kyenyiki, u mwambela kwila, ngibhanga-nê o kikutu kyami kya kutululuka. 13 Kiki kyanda kala kikutu kinangenena kya ukunji phala mwene ni mbutu yê, mukonda k’ehela kwila Nzambi yê akamba kumukala fiyele, yu wabhangesa kwila o ituxi ya akwa Izalayele a iloloka.’”

14 O dijina dya mukwa Izalayele wafu kumoxi ni muhatu mukwa Midiyana, Nzidi mon’a Salu, mutwameni wa dibhata dya jitata ku mwiji wa Ximinyá. 15 O dijina dya muhatu mukwa Midiyana a mujibha, Kosbi, mon’a Zule. Zule wexile mutwameni wa kibuka kya miji kya dibhata dya jitata ku Midiyana.

16 Mukusuluka, Jihova wambela Mozé: 17 “Akwa Midiyana mu abhikisa, mu ajibha, 18 mukonda ene a mibhikisa ni ibhangelu yâ yayibha mu maka alungu ni Peole ni mu maka alungu ni Kosbi, mon’a mutwameni mukwa Midiyana ni phang’yâ ya muhatu, a mujibha mu kizuwa kyabhiti o dibhebhu mu maka alungu ni Peole.”

26 Kyoso kyabhiti o dibhebhu, Jihova wambela Mozé ni Eliyazale mon’a Alá o mukunji: 2 “Sonekesenu o mundu wa Izalayele, oso atenesa makwinyi ayadi a mivu mba abhiti kya mu kitala kiki, mu mabhata a jitata jâ, mu kukondala oso mu Izalayele atena kuya mu ita.” 3 Kyenyiki, Mozé ni mukunji Eliyazale, azwela ni mundu mu kikangalakata kya Mowabe, bhu mbandu a Njolodá, bhwa zukama ni Jedikó, exi: 4 “Sonekesenu oso atenesa makwinyi ayadi a mivu mba abhiti kya mu kitala kiki, kala kyatendelesa Jihova kwa Mozé.”

O an’a akwa Izalayele atundu ku ixi ya Ijitu enyá: 5 Lubene o phande-kumbi ya Izalayele. O an’a Lubene enyá: Kwa Henoko o mwiji wa akwa Henoko, kwa Palu o mwiji wa akwa Palu, 6 kwa Hezelone o mwiji wa akwa Hezelone, kwa Kalumi o mwiji wa akwa Kalumi. 7 Yiyi yene yexile o miji ya akwa Lubene. O yó a asonekesa atenesa makwinyi awana ni kitatu kya midi ni hama sambwadi ni makwinyi atatu.

8 Mon’a Palu wexile Eliyaba. 9 O an’a Eliyaba exile Nemuwele, Datane ni Abilamu. Datane ni Abilamu yá, mayala a asolele mwaxaxi ka mundu. Ene abhânge ni Mozé ni Alá kumoxi ni kibuka kya Kolá kyoso kyabhânge ni Jihova.

10 Kyenyiki, o mavu ajikuka ya a aminya. Kolá-phe wafu kumoxi ni yó exile mu mukwatekesa kyoso túbhya ki twajibha hama jiyadi ni makwinyi atanu a mayala. Ene akituka phangu ya kudimuna. 11 Maji o an’a Kolá, kafu.

12 O an’a Ximinyá kala kyadisokejeka mu miji yâ, enyá: Kwa Nemuwele o mwiji wa akwa Nemuwele, kwa Jamine o mwiji wa akwa Jamine, kwa Jakini o mwiji wa akwa Jakini, 13 kwa Nzelá o mwiji wa akwa Nzelá, kwa Sawulu o mwiji wa akwa Sawulu. 14 Yiyi yene yexile o miji ya akwa Ximinyá: Makwinyi ayadi ni kiyadi kya midi ni hama jiyadi.

15 O an’a Ngade kala kyadisokejeka mu miji yâ, enyá: Kwa Zefoni o mwiji wa akwa Zefoni, kwa Hangi o mwiji wa akwa Hangi, kwa Xuni o mwiji wa akwa Xuni, 16 kwa Ozini o mwiji wa akwa Ozini, kwa Edi o mwiji wa akwa Edi, 17 kwa Alodi o mwiji wa akwa Alodi, kwa Aledi o mwiji wa akwa Aledi. 18 Yiyi yene yexile o miji ya an’a Ngade. O yó a asonekesa atenesa makwinyi awana a midi ni hama jitanu.

19 O an’a Judá exile Hele ni Onano. Maji-phe Hele ni Onano afwila mu ixi ya Kanana. 20 O an’a Judá kala kyadisokejeka mu miji yâ, enyá: Kwa Selá o mwiji wa akwa Selá, kwa Peleji o mwiji wa akwa Peleji, kwa Nzelá o mwiji wa akwa Nzelá. 21 O an’a Peleji enyá: Kwa Hezelone o mwiji wa akwa Hezelone, kwa Hamule o mwiji wa akwa Hamule. 22 Yiyi yene yexile o miji ya Judá. O yó a asonekesa atenesa makwinyi asambwadi ni samanu a midi ni hama jitanu.

23 O an’a Isakale kala kyadisokejeka mu miji yâ, enyá: Kwa Tola o mwiji wa akwa Tola, kwa Puva o mwiji wa akwa Puva, 24 kwa Jasube o mwiji wa akwa Jasube, kwa Ximilone o mwiji wa akwa Ximilone. 25 Yiyi yene yexile o miji ya Isakale. O yó a asonekesa atenesa makwinyi asamanu ni kiwana kya midi ni hama jitatu.

26 O an’a Nzebulone kala kyadisokejeka mu miji yâ, enyá: Kwa Selede o mwiji wa akwa Selede, kwa Elone o mwiji wa akwa Elone, kwa Jahelele o mwiji wa akwa Jahelele. 27 Yiyi yene yexile o miji ya akwa Nzebulone. O yó a asonekesa atenesa makwinyi asamanu a midi ni hama jitanu.

28 O an’a Zuze kala kyadisokejeka mu miji yâ, enyá: Manasa ni Efalayíme. 29 O an’a Manasa enyá: Kwa Makidi o mwiji wa akwa Makidi. Makidi wavwala Ngiliyade. Kwa Ngiliyade o mwiji wa akwa Ngiliyade. 30 Yá ene exile o an’a Ngiliyade: Kwa Lezele o mwiji wa akwa Lezele, kwa Heleke o mwiji wa akwa Heleke, 31 kwa Axidiyele o mwiji wa akwa Axidiyele, kwa Xikeme o mwiji wa akwa Xikeme, 32 kwa Semida o mwiji wa akwa Semida, kwa Hefele o mwiji wa akwa Hefele. 33 Zelofeyadi mon’a Hefele kexile ni an’a mala, wexile ngo ni an’a ahatu. O majina a an’a Zelofeyadi exile Mahala, Nowa, Hokala, Milika ni Tidiza. 34 Yiyi yene yexile o miji ya Manasa. O yó a asonekesa atenesa makwinyi atanu ni kiyadi kya midi ni hama sambwadi.

35 Yá ene exile o an’a Efalayíme kala kyadisokejeka mu miji yâ: Kwa Sutela o mwiji wa akwa Sutela, kwa Bekele o mwiji wa akwa Bekele, kwa Tahane o mwiji wa akwa Tahane. 36 Yá ene exile o an’a Sutela: Kwa Elane o mwiji wa akwa Elane. 37 Yiyi yene yexile o miji ya Efalayíme. O yó a asonekesa atenesa makwinyi atatu ni kiyadi kya midi ni hama jitanu. Yá ene exile o an’a Zuze kala kya asokejeka mu miji yâ.

38 O an’a Bejamí kala kyadisokejeka mu miji yâ, enyá: Kwa Bela o mwiji wa akwa Bela, kwa Axibele o mwiji wa akwa Axibele, kwa Ahilamu o mwiji wa akwa Ahilamu, 39 kwa Sufami o mwiji wa akwa Sufami, kwa Hufami o mwiji wa akwa Hufami. 40 O an’a Bela exile Alade ni Nahamane. Kwa Alade o mwiji wa akwa Alade, kwa Nahamane o mwiji wa akwa Nahamane. 41 Yá ene exile o an’a Bejamí kala kyadisokejeka mu miji yâ. O yó a asonekesa atenesa makwinyi awana ni kitanu kya midi ni hama jisamanu.

42 Yá ene exile o an’a Dane kala kyadisokejeka mu miji yâ: Kwa Xuhamu o mwiji wa akwa Xuhamu. Yiyi yene yexile o miji ya Dane kala kyadisokejeka mu miji yâ. 43 O miji yoso ya akwa Xuhamu mu ku asonekesa atenesa makwinyi asamanu ni kiwana kya midi ni hama jiwana.

44 O an’a Azele kala kyadisokejeka mu miji yâ, enyá: Kwa Iminahe o mwiji wa akwa Iminahe, kwa Ixivi o mwiji wa akwa Ixivi, kwa Bediya o mwiji wa akwa Bediya, 45 ku an’a Bediya: Ku an’a Ebele, o mwiji wa akwa Ebele, ku an’a Malakiyele o mwiji wa akwa Malakiyele. 46 O mon’a Azele wa muhatu dijina dyê dyexile Sala. 47 Yá ene exile o miji ya an’a Azele. O yó a asonekesa atenesa makwinyi atanu ni kitatu kya midi ni hama jiwana.

48 O an’a Nafitali kala kyadisokejeka mu miji yâ, enyá: Kwa Jahezele o mwiji wa akwa Jahezele, kwa Nguni o mwiji wa akwa Nguni, 49 kwa Jezéle o mwiji wa akwa Jezéle, kwa Xileme o mwiji wa akwa Xileme. 50 Yiyi yene yexile o miji ya Nafitali kala kyadisokejeka mu miji yâ. O yó a asonekesa atenesa makwinyi awana ni kitanu kya midi ni hama jiwana.

51 Ku akwa Izalayele, athu oso a asonekesa atenesa hama jisamanu ni umoxi a midi ni hama sambwadi ni makwinyi atatu.

52 Jihova anga wambela dingi Mozé: 53 “Yá ene atokala ku awanena o ixi kala undundu, kala kya asoneka o majina mâ. 54 O ibuka yamakota watokala ku ibandekesa o undundu, o ibuka yofele watokala ku isosolola o undundu. Kala kibuka, o undundu wanda tambula watokala usokela ni athu a asonekesa. 55 Maji, o ixi atokala ku iwanena bhukaxi ka jisolote. Ene atokala kutambula o undundu wâ kala kyasokejeka o majina a miji ya jitata jâ. 56 O undundu wa mwiji ni mwiji anda usola bhukaxi ka jisolote ni ku uwanena mu ibuka yamakota ni yofele.”

57 Ku Jilevita, yá ene asonekesa kala kyadisokejeka mu miji yâ: Kwa Ngelexone o mwiji wa akwa Ngelexone, kwa Kohate o mwiji wa akwa Kohate, kwa Meladi o mwiji wa akwa Meladi. 58 Yiyi yene yexile o miji ya Jilevita: O mwiji wa akwa Libini, o mwiji wa akwa Hebolone, o mwiji wa akwa Mahali, o mwiji wa akwa Muxi ni mwiji wa akwa Kolá.

Kohate wavwala Amelame. 59 O dijina dya muhatu wa Amelame dyexile Jokebede mon’a Levi wamuvwala ni muhatw’ê ku Ijitu. O ana avwala mwene ni Amelame a exanene Alá, Mozé ni Midiyana phangy’â ya muhatu. 60 Alá wavwala Nadabe, Abihú, Eliyazale ni Itamale. 61 Maji Nadabe ni Abihú afu mukonda dya kubhakula túbhya bhu pholo ya Jihova, katuxikina mu kijila.

62 Ku Jilevita, oso a asonekesa atenesa makwinyi ayadi ni kitatu kya midi. Ene oso ana a mala exile ni mbeji imoxi mba abhitile kya mu kitala kiki. Ene ka asonekesa ni an’a Izalayele ni akwâ mukonda katokalele kutambula undundu bhukaxi ka akwa Izalayele.

63 Yá ene o athu a asonekesa kwa Mozé ni Eliyazale o mukunji, kyoso kyasonekesa akwa Izalayele mu kikangalakata kya Mowabe bhu mbandu ya Njolodá, bhwa zukama ni Jedikó. 64 Maji bhukaxi kâ kibhwexile muthu a musonekesa kwa Mozé ni Alá o mukunji, kyoso kyasonekesa akwa Izalayele mu kikangalakata kya Sinayi. 65 Mukonda yalungu ni ene Jihova wambele kiki: “Sé phata anda fwila mu kikangalakata.” Kyenyiki, kikusubhuka muthu ku mayala yó, kikale ngo Kalebe mon’a Jefune ni Jozuwé mon’a Nune.

27 Bhenyobho, an’a Zelofeyadi a ahatu eza. Zelofeyadi wexile mon’a Hefele mon’a Ngiliyade mon’a Makidi mon’a Manasa ku miji ya Manasa mon’a Zuze. O majina a an’a Zelofeyadi a ahatu exile Mahala, Nowa, Hokala, Milika ni Tidiza. 2 Ene emana bhu mwelu wa balaka ya kudyongekela, bhu pholo ya Mozé, ya Eliyazale o mukunji ni ya adyakime a mundu woso, ya ambe exi: 3 “Tat’etu wafwila mu kikangalakata, maji mwene kexile mu kibuka kyadibhongolola mu kuzoka ni Jihova, yó akwatekesa Kolá. Mwene wafu mukonda dya kituxi kyê, kaxisa an’a mala. 4 Dijina dya tat’etu dijimukina-hi mwaxaxi ka mwiji wê mukonda dya kukamba mon’a diyala? Tubhanyenu undundu bhukaxi ka jiphange ja tat’etu.” 5 Kyenyiki, Mozé wambata o maka mâ bhu pholo ya Jihova.

6 Jihova anga wambela Mozé, wixi: 7 “O an’a Zelofeyadi alungwá. Watokala ku abhana kibhela kala undundu bhukaxi ka jiphange ja tata yâ, wa abhitise o undundu wa tata yâ. 8 Ambela we akwa Izalayele: ‘Se kufwa diyala maji kaxisa mon’a diyala, mwatokala kubhana o undundu wê kwa mon’ê wa muhatu. 9 Se mwene kalé ni mon’a muhatu, mwatokala kubhana o undundu wê ku jiphange jê ja mala. 10 Se mwene kalé ni jiphange ja mala, mwatokala kubhana o undundu wê ku jiphange ja tat’ê. 11 Se tat’ê kala ni jiphange ja mala, mwatokala kubhana o undundu wê kwa yó wa muzukama mu undandu, mwéne wanda xala-nawu. Yiyi yanda kala ngonge phala akwa Izalayele kala kyatendelesa Jihova kwa Mozé.’”

12 Jihova anga wambela Mozé, wixi: “Banda ku mulundu yú wa Abadimi, umone o ixi i nganda bhana ku akwa Izalayele. 13 Kyoso ki wanda zubha ku imona, wanda fwa we kala kyafu phang’yé Alá, 14 mukonda kyoso o mundu ki wazoko n’eme mu kikangalakata kya Zini, enu mwabhukumukina o kitendelesu kyami. Kimungijingisa bhu pholo yâ, mu maka alungu ni menya. Kifwa, o menya a Mediba, ku Kadexi, mu kikangalakata kya Zini.”

15 Mozé wambela-phe Jihova, wixi: 16 “Jihova, éye u Nzambi ubhana o mwenyu ku athu oso, sola diyala wendesa o mundu yú, 17 wa atwamenena mu kutunda ni mu kubokona, wa atubhula anga u abokwesa,* phala o mundu wa Jihova ki ukale kala jimbudi jakambe mubhidi.” 18 Kyenyiki, Jihova wambela Mozé: “Exana Jozuwé mon’a Nune, diyala dyala ni kilunji. Uta o lukwaku lwé ku thandu dyê. 19 Umubheka-phe bhu pholo dya Eliyazale o mukunji ni bhu pholo dya mundu woso. Umusola kala mutwameni bhu pholo yâ. 20 Ku ungana wé u wala-nawu, ukatula-ku mbandu phala ku mubhana-wu. Kyenyiki, o mundu woso wa Izalayele wanda mwivwa. 21 Mwene wandaya kwa Eliyazale o mukunji, wanda zwela ni Jihova phala o mbote yê bhukaxi ka Udimi, phala kwijiya ihi yasolo. Ene anda tunda ni kitendelesu kya Jozuwé,* anda bokona we ni kitendelesu kyê. Kikale mwéne ni akwa Izalayele oso ala-nê kumoxi ni mundu woso.”

22 Kyenyiki, Mozé wabhange mwene kala kya mutendelesele Jihova. Wexana Jozuwé yu wa mubheka bhu pholo dya Eliyazale o mukunji ni bhu pholo dya mundu woso, 23 anga utula maku ku thandu dyê, u musola kala mutwameni kala kyambele Jihova bhukaxi ka Mozé.

28 Jihova anga wambela dingi Mozé, wixi: 2 “Tendelesa akwa Izalayele: ‘Mwatokala ku ngibhakwila o sata yami, o kudya. O jisata jobhitise mu túbhya kala dizumba dyambote. O jisata jiji atokala kujibhakula mu ithangana yatokala.’

3 “Wa ambela kiki: ‘Yiyi yene o sata yobhitise mu túbhya i mwanda bhakula kwa Jihova: Izuwa yoso tumbudi tuyadi twa ndumbe twadisanze twa muvu umoxi, kala sata ya kwoha ithangana yoso. 4 Kambudi kamoxi wanda kabhakula mu kamene, o kambudi kamukwa wanda kabhakula mu kithangana kifwa o dikumbi ni ku dimatekenu dya usuku,* 5 kumoxi ni sata ya makudya ya mbandu ya kakwinyi ka efa* imoxi ya fadinya yafina yofunge ni mbandu ya kawana ya hine* ya máji ambote. 6 Yanda kala sata ya kwoha i mwatokala kubhana ithangana yoso, yotendelese ku mulundu wa Sinayi kala dizumba dyambote. Sata yobhitise mu túbhya phala Jihova. 7 Kala kambudi, o sata yê ya uholwa yanda kala mbandu ya kawana ya hine imoxi. Lundulula o uholwa mu kididi kikôla kala sata ya uholwa phala Jihova. 8 Wanda bhakula o kambudi kamukwa mu kithangana kifwa o dikumbi ni ku dimatekenu dya usuku. Watokala ku ibhakula kumoxi ni sata ya makudya ni sata ya uholwa, kala o jisata jabhakula mu kamene, sata yobhitise mu túbhya, ya dizumba dyambote phala Jihova.

9 “‘Maji kya sábhalu, o sata yatokala ikala ya tumbudi tuyadi twa ndumbe twadisanze twa muvu umoxi ni mbandu jiyadi ja kakwinyi ka efa imoxi ya fadinya yafina yofunge ni máji kala sata ya makudya, kumoxi ni sata ya uholwa. 10 Yiyi yene o sata ya kwoha ya kizuwa kya sábhalu, o sata ya kwoha ithangana yoso ni sata ya uholwa, yengi.

11 “‘Ku dimatekenu dya jimbeji, mwanda bhakula kwa Jihova tungombe tuyadi twa ndumbe, ndumbe imoxi ya mbudi ni sambwadi dya tumbudi twa ndumbe twadisanze twa muvu umoxi, kala sata ya kwoha. 12 Kala kangombe, o sata yê ya makudya yanda kala mbandu jitatu ja kakwinyi ja fadinya yafina yofunge ni máji. O ndumbe ya mbudi, o sata yê ya makudya yanda kala ya mbandu jiyadi ja kakwinyi ja fadinya yafina yofunge ni máji. 13 Kala kambudi o sata yê ya makudya yanda kala mbandu imoxi ya kakwinyi ya fadinya yafina yofunge ni máji. Sata ya kwoha, dizumba dyambote, sata yobhitise mu túbhya phala Jihova. 14 Kala kangombe, o jisata jê ja mauholwa jatokala jikala kaxaxi ka hine ya vinyu. O ndumbe ya mbudi, o jisata jê ja mauholwa jikala mbandu ya katatu ya hine. O kambudi ka ndumbe, o jisata jê ja mauholwa mbandu ya kawana ya hine. Yiyi yene o sata ya kwoha yatokala kubhakula mbeji ni mbeji ku muvu. 15 Mwatokala kubhakula we kwa Jihova kisutu kya hombo kala sata ya kituxi, o sata ya kwoha ithangana yoso ni sata ya uholwa, yengi.

16 “‘O phasu ya Jihova yanda bhita mu mbeji ya dyanga mu kizuwa kya dikwinyi ni kiwana kya mbeji. 17 Mu kizuwa kya dikwinyi ni kitanu kya mbeji yiyi, kwanda kala fesa. Mwanda dya jimbolo jakambe felemendu mu sambwadi dya izuwa. 18 Mu kizuwa kya dyanga kwanda kala kyônge kikôla. Kimutokala kubhanga kikalakalu kyoso-kyoso kyanguzu. 19 Mwanda bhakula kwa Jihova tungombe tuyadi, ndumbe imoxi ya mbudi ni sambwadi dya tumbudi twa ndumbe twa muvu umoxi kala sata ya kwoha yobhitise mu túbhya. Mwatokala kubhakula ibhaku yadisanze. 20 Mwatokala ku ibhakula kumoxi ni jisata ja makudya ja fadinya yafina yofunge ni máji. Kala kangombe, mbandu jitatu ja kakwinyi ja fadinya yafina yofunge ni máji. O ndumbe ya mbudi, mbandu jiyadi ja kakwinyi ja fadinya yafina yofunge ni máji. 21 O sambwadi dya tumbudi, kala kambudi, mbandu ya kakwinyi ya fadinya yafina yofunge ni máji. 22 Mwatokala kubhakula we kisutu kya hombo kala sata ya kituxi phala kubhangesa kwila o ituxi yenu a iloloka. 23 Ku sata ya kwoha ya kamene ibhanga mbandu ku sata ya kwoha ithangana yoso i mwanda bhakula, mwanda bandekesa-ku o jisata jiji. 24 Mwatokala ku ibhakula mu ukexilu umoxi izuwa yoso mu sambwadi dya izuwa kala kudya,* sata yobhitise mu túbhya ya dizumba dyambote phala Jihova. Mwatokala ku ibhakula kumoxi ni sata ya kwoha ithangana yoso ni sata ya uholwa. 25 Mu kizuwa kya kasambwadi kwanda kala kyônge kikôla. Kimutokala kubhanga kikalakalu kyoso-kyoso kyanguzu.

26 “‘Mu kizuwa kya ibundu idyanga o kukusuka, kyoso ki mwanda bhakula kwa Jihova sata ya jimbutu ja ubhe, mwatokala kubhanga kyônge kikôla mu fesa yenu ya dimatekenu dya kubhongolola.* Kimutokala kubhanga kikalakalu kyoso-kyoso kyanguzu. 27 Mwanda bhakula tungombe tuyadi, ndumbe imoxi ya mbudi ni sambwadi dya tumbudi twa ndumbe twa muvu umoxi kala sata ya kwoha ya dizumba dyambote phala Jihova. 28 Kala kangombe, o sata yê ya makudya mbandu jitatu ja kakwinyi ja fadinya yafina yofunge ni máji. O ndumbe ya mbudi, o sata yê ya makudya mbandu jiyadi ja kakwinyi ja fadinya yafina yofunge ni máji. 29 O sambwadi dya tumbudi, kala kambudi o sata yê ya makudya mbandu ya kakwinyi ya fadinya yafina yofunge ni máji. 30 Mwatokala kubhakula we kisutu kya hombo phala kubhangesa kwila o ituxi yenu a iloloka. 31 Mwanda bhakula o jisata jiji. Mwanda bhakula we o sata ya kwoha ithangana yoso ni sata ya makudya. O ibhaku yatokala idisanza, atokala ku ibhakula kumoxi ni jisata ja uholwa.

29 “‘Mu mbeji ya kasambwadi, mu kizuwa kya dyanga kya mbeji yiyi, mwatokala kubhanga kyônge kikôla. Kimwatokala kubhanga kikalakalu kyoso-kyoso kyanguzu. Kyene o kizuwa ki mwatokala kuxika o koloneta. 2 Mwanda bhakula kangombe, ndumbe ya mbudi ni sambwadi dya tumbudi twa ndumbe twa muvu umoxi, twoso twadisanze, kala sata ya kwoha ya dizumba dyambote phala Jihova. 3 O kangombe, o sata yê ya makudya ya fadinya yafina yofunge ni máji, yanda kala mbandu jitatu ja kakwinyi ja efa imoxi. O ndumbe ya mbudi, o sata yê ya makudya* ya fadinya yafina yofunge ni máji yanda kala mbandu jiyadi ja kakwinyi ja efa imoxi. 4 O sambwadi dya tumbudi, kala kambudi o sata yê ya makudya ya fadinya yafina yofunge ni máji, yanda kala mbandu ya kakwinyi ka efa imoxi. 5 Mwanda bhakula kisutu kya hombo kala sata ya kituxi, phala kubhangesa kwila o ituxi yenu a miloloka-yu. 6 Mwanda bhakula o jisata jiji, mwanda bhakula we o jisata ja kwoha ja mbeji, kumoxi ni jisata ja makudya. O ku jisata ja kwoha ja ithangana yoso, mwanda bhana-ku o jisata ja makudya kumoxi ni jisata ja uholwa, kala kyene mubhanga kya, kala dizumba dyambote, sata yobhitise mu túbhya phala Jihova.

7 “‘Mu kizuwa kya dikwinyi kya mbeji yiyi ya kasambwadi, mwatokala kubhanga kyônge kikôla ni kujejuwala.* Kimwatokala kubhanga kikalakalu kyoso-kyoso. 8 Mwanda bhakula kwa Jihova kangombe kamoxi, ndumbe imoxi ya mbudi, sambwadi dya tumbudi twa ndumbe twa muvu umoxi twoso twadisanze, kala sata ya kwoha ya dizumba dyambote, 9 o kangombe, o sata yê ya makudya ya fadinya yafina yofunge ni máji yanda kala mbandu jitatu ja kakwinyi. O ndumbe ya mbudi, o sata yê ya makudya ya fadinya yafina yofunge ni máji, yanda kala mbandu jiyadi ja kakwinyi. 10 O sambwadi dya tumbudi, kala kambudi o sata yê ya makudya ya fadinya yafina yofunge ni máji, yanda kala mbandu ya kakwinyi. 11 Mwanda bhakula we kisutu kya hombo kala sata ya kituxi. Ku sata ya kituxi i mwanda bhakula, mwanda bandekesa-ku o jisata jiji jobhane phala kubhangesa kwila o ituxi yenu a iloloka ni sata ya kwoha ithangana yoso ni sata ya makudya, kumoxi ni jisata ja uholwa.

12 “‘Mu kizuwa kya dikwinyi ni kitanu kya mbeji ya kasambwadi, mwatokala kubhanga kyônge kikôla. Kimwatokala kubhanga kikalakalu kyoso-kyoso kyanguzu. Mwatokala kubhanga fesa phala Jihova mu sambwadi dya izuwa. 13 Mwanda bhakula dikwinyi ni kitatu kya tungombe, ndumbe jiyadi ja mbudi ni dikwinyi ni kiwana kya tumbudi twa ndumbe twa muvu umoxi, twoso twadisanze, kala sata ya kwoha ni sata yobhitise mu túbhya, ya dizumba dyambote phala Jihova. 14 O dikwinyi ni kitatu kya tungombe, kala kangombe o sata yê ya makudya ya fadinya yafina yofunge ni máji, yanda kala mbandu jitatu ja kakwinyi. O ndumbe jiyadi ja mbudi, kala kambudi o sata yê ya makudya ya fadinya yafina yofunge ni máji, yanda kala mbandu jiyadi ja kakwinyi. 15 O dikwinyi ni kiwana kya tumbudi, kala kambudi, o sata yê ya makudya ya fadinya yafina yofunge ni máji, yanda kala mbandu imoxi ya kakwinyi. 16 Mwanda bhakula we kisutu kya hombo kala sata ya kituxi. Ku sata ya kwoha ithangana yoso, mwanda bandekesa-ku o jisata jiji, kumoxi ni sata ya makudya ni sata ya uholwa.

17 “‘Mu kizuwa kya kayadi, mwanda bhakula dikwinyi ni kiyadi kya tungombe, ndumbe jiyadi ja jimbudi ni dikwinyi ni kiwana kya tumbudi twa muvu umoxi, twoso twadisanze. 18 O jisata ja makudya ni ja uholwa mwanda jibhakula kumoxi ni tungombe ni jindumbe ja mbudi ni tumbudi kala kyasoko o ibhaku yoso, kala kyene mubhanga kya, 19 kumoxi ni kisutu kya hombo kala sata ya kituxi. Ku sata ya kwoha ithangana yoso, mwanda bandekesa-ku o jisata jiji, kumoxi ni jisata ja makudya ni jisata ja uholwa.

20 “‘Mu kizuwa kya katatu, mwanda bhakula dikwinyi ni umoxi dya tungombe, ndumbe jiyadi ja jimbudi ni dikwinyi ni kiwana kya tumbudi twa ndumbe twa muvu umoxi, twoso twadisanze. 21 O jisata ja makudya ni ja uholwa mwanda jibhakula kumoxi ni tungombe ni jindumbe ja mbudi ni tumbudi, kala kyasoko o ibhaku yoso, kala kyene mubhanga kya, 22 kumoxi ni kisutu kya hombo kala sata ya kituxi. Ku sata ya kwoha ithangana yoso, mwanda bandekesa-ku o jisata jiji, kumoxi ni jisata ja makudya ni jisata ja uholwa.

23 “‘Mu kizuwa kya kawana, mwanda bhakula dikwinyi dya tungombe, ndumbe jiyadi ja jimbudi ni dikwinyi ni kiwana kya tumbudi twa ndumbe twa muvu umoxi, twoso twadisanze. 24 O jisata ja makudya ni ja uholwa mwanda jibhakula kumoxi ni tungombe ni jindumbe ja mbudi ni tumbudi, kala kyasoko o ibhaku yoso, kala kyene mubhanga kya, 25 kumoxi ni kisutu kya hombo kala sata ya kituxi. Ku sata ya kwoha ithangana yoso, mwanda bandekesa-ku o jisata jiji, kumoxi ni sata ya makudya ni sata ya uholwa.

26 “‘Mu kizuwa kya katanu, mwanda bhakula divwa dya tungombe, ndumbe jiyadi ja jimbudi ni dikwinyi ni kiwana kya tumbudi twa ndumbe twa muvu umoxi, twoso twadisanze. 27 O jisata ja makudya ni ja uholwa mwanda jibhakula kumoxi ni tungombe ni jindumbe ja mbudi ni tumbudi, kala kyasoko o ibhaku yoso, kala kyene mubhanga kya, 28 kumoxi ni kisutu kya hombo kala sata ya kituxi. Ku sata ya kwoha ithangana yoso, mwanda bandekesa-ku o jisata jiji, kumoxi ni jisata ja makudya ni jisata ja uholwa.

29 “‘Mu kizuwa kya kasamanu, mwanda bhakula dinake dya tungombe, ndumbe jiyadi ja jimbudi ni dikwinyi ni kiwana kya tumbudi twa ndumbe twa muvu umoxi, twoso twadisanze. 30 O jisata ja makudya ni ja uholwa mwanda jibhakula kumoxi ni tungombe ni jindumbe ja mbudi ni tumbudi, kala kyasoko o ibhaku yoso, kala kyene mubhanga kya, 31 kumoxi ni kisutu kya hombo kala sata ya kituxi. Ku sata ya kwoha ithangana yoso, mwanda bandekesa-ku o jisata jiji, kumoxi ni sata ya makudya ni sata ya uholwa.

32 “‘Mu kizuwa kya kasambwadi, mwanda bhakula sambwadi dya tungombe, ndumbe jiyadi ja jimbudi ni dikwinyi ni kiwana kya tumbudi twa ndumbe twa muvu umoxi, twoso twadisanze. 33 O jisata ja makudya ni ja uholwa mwanda jibhakula kumoxi ni tungombe ni jindumbe ja mbudi ni tumbudi, kala kyasoko o ibhaku yoso, kala kyene mubhanga kya, 34 kumoxi ni kisutu kya hombo kala sata ya kituxi. Ku sata ya kwoha ithangana yoso, mwanda bandekesa-ku o jisata jiji, kumoxi ni sata ya makudya ni sata ya uholwa.

35 “‘Mu kizuwa kya kanake, mwatokala kubhanga kyônge kyakatunda. Kimwatokala kubhanga kikalakalu kyoso-kyoso kyanguzu. 36 Mwanda bhakula sata ya kwoha ni sata yobhitise mu túbhya ya dizumba dyambote phala Jihova. Mwanda bhakula kangombe, ndumbe ya mbudi ni sambwadi dya tumbudi twa ndumbe, twa muvu umoxi, twoso twadisanze. 37 O jisata ja makudya ni ja uholwa mwanda jibhakula kumoxi ni tungombe ni jindumbe ja mbudi ni tumbudi, kala kyasoko o ibhaku yoso, kala kyene mubhanga kya, 38 kumoxi ni kisutu kya hombo kala sata ya kituxi. Ku sata ya kwoha ithangana yoso, mwanda bandekesa-ku o jisata jiji, kumoxi ni sata ya makudya ni sata ya uholwa.

39 “‘Jiji jene o jisata jimwanda bhakula kwa Jihova mu jifesa jenu jamitangela phala kubhanga, kumoxi ni jisata jimubhakula phala ku kumbidila kikanenu ni jisata jenu jimubhakula mu vondadi yenu, kala o jisata ja kwoha, jisata ja makudya, jisata ja uholwa ni jisata ja paze.’” 40 Maka oso a mutendelesele Jihova, Mozé wa atudila akwa Izalayele.

30 Mozé anga wambela o atwameni a miji ya Izalayele, wixi: “Kiki kyene kyatendelesa Jihova: 2 Se diyala dikanena kima kwa Jihova mba uloka kwila wanda difidisa kubhanga kima, mwene katokala kufula kukumbidila o kima* kya kanena. Watokala kubhanga yoso ya kanena.

3 “Se kukala muhatu ukanena kima kwa Jihova mba uloka kwila wanda difidisa kubhanga kima mu unzangala wê, o mwene wala hanji ku dibhata dya tat’ê, 4 se tat’ê wijiya o kikanenu mba o muloko wate wa kudifidisa kubhanga kima, tat’ê anga ukamba kudituna-kyu, ima yoso ya kanena watokala ku ikumbidila. O miloko yoso yate yalungu ni kudifidisa kubhanga kima, watokala ku ikumbidila we. 5 Maji se tat’ê u mufidisa kubhanga kiki, kyoso kyanda kwijiya o kikanenu kyê mba muloko wa kudifidisa kubhanga kima, kanda bhinga dingi ku ikumbidila. Jihova wanda muloloka mukonda tat’ê mwéne wa mufidisa ku ibhanga.

6 “Maji se o muhatu ukazala mu kithangana kya mukumbidila o kikanenu mba muloko wakudifidisa kubhanga kima kyabhange sé kuxinganeka, 7 o mwadi wê wijiya o kikanenu anga ukamba kudituna-kyu kyoso kya kivwa, o ima ya kanena mba muloko woso wate walungu ni kudifidisa kubhanga kima, watokala ku ukumbidila. 8 Maji se mwadi wê u mufidisa kubhanga kiki kyoso kyanda kwijiya o kikanenu, mwene wanda tena kujimuna o kikanenu mba o muloko walungu ni kudifidisa kubhanga kima, kyabhange sé kuxinganeka. Jihova wanda muloloka.

9 “Maji se mutudi mba muhatu a musenge ubhanga kikanenu, yoso ya kanena watokala mwene ku ikumbidila.

10 “Maji-phe, se o muhatu wabhange o kikanenu mba muloko wa kudifidisa kubhanga kima monzo ya mwadi wê, 11 o mwadi wê wijiya o kikanenu anga ukamba kudituna-kyu, o ima yoso ya kanena mba o miloko yoso yate yalungu ni kudifidisa, watokala ku ikumbidila. 12 Maji, se mu kizuwa kya ivu, o mwadi wê wa ijimuna, kabasa kikanenu mba muloko wa kudifidisa kubhanga kima, mwene kanda ikumbidila dingi, mwadi wê wa ijimuna kya. Jihova wanda muloloka. 13 O diyala watokala kuxikina mba kujimuna kikanenu kyoso-kyoso mba muloko walungu ni kudifidisa kubhanga kima. 14 Maji kyoso izuwa kiya ni kubhita, se o diyala kaditunu, kyanda lombolola kwila waxikina o ikanenu yoso ya muhatu ni miloko yate yalungu ni kudifidisa kubhanga kima. Mwene u ixikina mu kukamba kudituna kyoso kyeza mu kwijiya kwila, o muhatu wa ibhange. 15 Maji, se o diyala u ijimuna mu kubhita izuwa tunde kyeza mu ijiya, mwéne wanda dibhana ni ibhidi mukonda dya kitondalu kya muhatu.

16 “Yiyi yene o ngonge ya Jihova yatendelesa kwa Mozé, yalungu ni munumi ni muhat’wê ni tata ni mon’ê wa muhatu munzangala, wala hanji ku dibhata dyê.”

31 Jihova wambela-phe Mozé: 2 “Akwa Midiyana vutwila-wu phonzo, mukonda dya ima yabhange ku akwa Izalayele. Kyoso ki wanda zubha kubhanga kiki, wanda fwa.”

3 Kyenyiki, Mozé wambela o mundu, wixi: “Sokejekenu mayala bhukaxi kenu phala kulwa ita ni akwa Midiyana, phala kubelesela o kitendelesu kya Jihova kya kuvula phonzo ku akwa Midiyana. 4 Mu miji yoso ya Izalayele, kala mwiji mukatula-ku midi ya mayala phala ku atumikisa mu ita.” 5 Kyenyiki, bhukaxi ka mazunda akwa Izalayele, kala mwiji asolo-ku midi, o mayala a asokejeka phala kuya mu ita, atenesa dikwinyi ni kiyadi kya midi.

6 Kala mwiji, Mozé wasolo-ku midi yu wa atumikisa mu ita. Fineya mon’a Eliyazale o mukunji, wayi kumoxi ni kifuxi kya masoladi. Mwéne wambatele o ima ikôla ni jikoloneta ja kuta nzongo ya kulwa ita. 7 Ene anga alwa ita ni akwa Midiyana kala kyatendelesele Jihova kwa Mozé, ya ajibha o mayala oso. 8 Bhukaxi ka athu a ajibha, bhwexile Evi, Lekeme, Zule, Hule ni Leba o jisobha jitanu ja akwa Midiyana. Balamu mon’a Bewole amujibha we ni jibhata. 9 Maji akwa Izalayele ambata o ana ndenge ni ahatu a akwa Midiyana ya akwika. Ambata we o ibhaku yâ yoso, o jingombe jâ joso ni jimbote jâ joso. 10 O jimbanza jâ joso mwatungile ni jibalaka jâ joso, ajite túbhya. 11 Ene ambata o athu, o ima yoso yexile-nayu ni ibhaku yâ yoso. 12 O athu a akwikile a abheka-phe kwa Mozé ni kwa mukunji Eliyazale ni ku mundu wa Izalayele bhwa zukama ni kididi bhwemikine o jibalaka kumoxi ni ima yâ ya atambula, mu kikangalakata kya Mowabe bhu mbandu a Njolodá bhwa zukama ni Jedikó.

13 Mukusuluka, Mozé ni mukunji Eliyazale ni atwameni oso a mundu, ayi mudisanga-nawu bhwa zukama o kididi bhwemikine o jibalaka. 14 Maji Mozé wexile ni njinda ya mayala a asolo mwaxaxi ka masoladi, o atwameni a midi ni atwameni a hama, exile mutunda mu ita. 15 Mozé wa ebhwidisa: “Mukonda dyahi mwaxisa o ahatu oso ni mwenyu? 16 O ahatu yá, mu kukayela o kayula ka Balamu, éne abhangesa akwa Izalayele kukamba ufiyele kwa Jihova mu maka alungu ni Peole. Kiki kyabhangesa kwila o dibhebhu diza ku thandu a mundu wa Jihova. 17 Kindala mwatokala kujibha o twana twoso twa mala ni ahatu oso azekele kya ni diyala. 18 Maji minzangala yoso ya ahatu kazeka luwa ni diyala, kanenu ku ajibha. 19 Mwatokala kukala dikanga dya kididi bhu mwemika o jibalaka mu sambwadi dya izuwa. Oso ajibha muthu mba akwata ku kimbi, atokala kudizelesa mu kizuwa kya katatu ni mu kizuwa kya kasambwadi, kumoxi ni yó u mwakwika. 20 Mwatokala kuzelesa o izwatu yoso, o ima yoso yobhange ni kibha, o ima yoso yobhange ni ndemba ya hombo ni ima yoso yobhange ni mabaya.”

21 Eliyazale o mukunji, wambela o mayala ayile mu ita, wixi: “Kiki kyene o kijila kyatumu Jihova kwa Mozé: 22 ‘O ulu ngo, o phalata, o ngondo, o felu, o xitanyu ni xumbu, 23 ima yoso ki ijokota mu túbhya yéne i mwatokala kubhitisa mu túbhya, phala ku izelesa. Maji mwatokala we ku izelesa ni menya a kuzelesa. Ima yoso ijokota mu túbhya yéne i mwatokala kusukula ni menya. 24 Mwatokala kusukula o izwatu yenu mu kizuwa kya kasambwadi ni muzele, kyene kiwa ki mwanda bokona mu kididi mu mwemika o jibalaka.’”

25 Jihova wambela dingi Mozé, wixi: 26 “Soneka mu mukanda yoso i mwabheka, mu kukondala yoso i mwatambula, kikale athu kikale ibhaku. Ubhanga o kikalakalu kiki kumoxi ni mukunji Eliyazale ni atwameni a miji ya jitata atokala ku mundu. 27 O ima i mwatambula mu iwana mu mbandu jiyadi. Mbandu imoxi phala o masoladi ayile mu ita, o mbandu yamukwa phala o mundu. 28 Ku mbandu yatambula o masoladi ayile mu ita, ukatula-ku mbandu phala ku ibhakula kwa Jihova. Ku kibuka kya hama jitanu kya athu ukatula-ku muthu umoxi. Ku kibuka kya hama jitanu ja jingombe ukatula-ku we ngombe imoxi, kyene we ki ubhanga ku jijumendu ni ku jimbudi. 29 O ujitu watokala kwa Jihova u wanda katula ku mbandu ya ene, u ubhana kwa Eliyazale o mukunji. 30 Ku mbandu yatambula akwa Izalayele, ku kibuka kya makwinyi atanu, ukatula-ku muthu umoxi. Ku kibuka kya makwinyi atanu a jingombe ukatula-ku we ngombe imoxi. Kyene we kimoxi ni jijumendu, jimbudi mba kibhaku kyoso-kyoso. Watokala ku ibhana ku Jilevita ene mulanga o ikalakalu yalungu ni balaka ya Jihova.”

31 Mukyenyiki, Mozé ni Eliyazale o mukunji abhange kala kyatendelesele Jihova kwa Mozé. 32 O yasubhuka ku ima yatambula o masoladi ayile mu ita yatenesa hama jisamanu ni makwinyi asambwadi ni kitanu kya midi kya jimbudi, 33 makwinyi asambwadi ni kiyadi kya midi kya jingombe, 34 ni makwinyi asamanu ni umoxi ya midi a jijumendu. 35 O ahatu kazekele luwa ni diyala atenesa makwinyi atatu ni kiyadi kya midi. 36 O mbandu yatambula o masoladi ayile mu ita yatenesa hama jitatu ni makwinyi atatu ni sambwadi dya midi ni hama jitanu a jimbudi, 37 Ku jimbudi, o lubhaku phala Jihova lwatenesa hama jisamanu ni makwinyi asambwadi ni kitanu. 38 Kwexile makwinyi atatu ni samanu a midi a jingombe, o lubhaku phala Jihova ku jingombe jiji, lwatenesa makwinyi asambwadi ni kiyadi. 39 Kwexile makwinyi atatu a midi ni hama jitanu a jijumendu, o lubhaku phala Jihova ku jijumendu jiji, lwexile makwinyi asamanu ni umoxi. 40 Kwexile dikwinyi ni samanu dya midi ya athu, o athu a bhakula kwa Jihova, atenesa makwinyi atatu ni kiyadi. 41 Kyenyiki, Mozé wabhana o lubhaku kwa mukunji Eliyazale kala ujitu watokala kwa Jihova, kala kyatendelesele Jihova kwa Mozé.

42 O mbandu yatokala ku akwa Izalayele, yabhake Mozé ku mbandu yatokala ku masoladi ayile mu ita, yenyiyi: 43 O mbandu ya jimbudi yatenesa hama jitatu ni makwinyi atatu ni sambwadi dya midi ni hama jitanu, 44 o ya jingombe yatenesa makwinyi atatu ni samanu a midi, 45 o ya jijumendu yatenesa makwinyi atatu a midi ni hama jitanu, 46 o ya athu yatenesa dikwinyi ni kisamanu kya midi. 47 Ku mbandu yatokala ku akwa Izalayele, ku kibuka kya makwinyi atanu, Mozé wakatula-ku muthu umoxi, kyene we kimoxi ni ku ibhaku, yu wa ibhana ku Jilevita exile mulanga o ikalakalu ya balaka ya Jihova, kala kyatendelesele Jihova kwa Mozé.

48 O mayala-phe a asolo mu ibuka ya midi ya kifuxi, o atwameni a midi ni atwameni a hama, azukama kwa Mozé, 49 ya a mwambela, exi: “O jiselevende jé akondala o mayala u twamutumina atena kuya mu ita, ya atutangela kwila kikwakambe né ngo diyala dimoxi. 50 Mukyenyiki, kala muthu mudyetu abhakule sata kwa Jihova ku ima yasange: Ima ya ulu, tumalubhambu phala o inama, misanga ya kuta mu maku, jinela ja sinete, jibixa* ni makembu amukwa, phala kubhangesa kwila o ituxi yetu a iloloka bhu pholo ya Jihova.”

51 Kyenyiki, Mozé ni mukunji Eliyazale, atambula o ulu ni makembu moso abheka ene. 52 O ulu yoso yasangela o atwameni a midi ni atwameni a hama, yabhakula kwa Jihova yatenesa dikwinyi ni samanu dya midi ni hama sambwadi ni makwinyi atanu a xikulu.* 53 Mayala oso atokala ku kifuxi kya masoladi a abhele mbandu ku ima yatambwile mu ita. 54 Mozé ni mukunji Eliyazale atambula o ulu yabhana o atwameni a midi ni atwameni a hama. O ulu yiyi a yambata mu balaka ya kudyongekela kala dilembalelu bhu pholo ya Jihova, phala o mbote ya akwa Izalayele.

32 O an’a Lubene ni an’a Ngade exile ni ibhaku yavulu. Ene amono kwila, o ixi ya Jazele ni ixi ya Ngiliyade yexile ididi yambote phala kwinga o ibhaku. 2 Kyenyiki, o an’a Ngade ni an’a Lubene ayi kwa Mozé ni kwa mukunji Eliyazale ni ku atwameni a mundu ya ambe, exi: 3 “Atalote, Dibone, Jazele, Bete-halane, Hexebone, Eleyale, Sebama, Nebu ni Behone, 4 o ixi yabwikisa Jihova bhu pholo ya mundu wa Izalayele, ixi yambote phala kwinga o ibhaku. O jiselevende jé ala ni ibhaku yavulu.” 5 Ene ambe dingi: “Se twasange ngalasa ku mesu mé, ehela o jiselevende jé kutambula o ixi yiyi kala undundu. Kutuzaukise dingi Njolodá.”

6 Mukyenyiki, Mozé wambela o an’a Ngade ni an’a Lubene: “Kifwa o jiphange jenu aya mu ita, enu muxalenu bhabha? 7 Mukonda dyahi mweji luwalesa o mundu wa Izalayele ni ku afidisa kubokona mu ixi yanda ku abhana Jihova? 8 Kiki kyene kyabhangele o jitata jenu kyoso ki nga atumikisa tunde ku Kadexi-Balaneya phala kutala o ixi. 9 Kyoso kyabhixila mu honga ya Exikole ya amono o ixi, aluwalesa o mundu wa Izalayele phala kabokone mu ixi yeji ku abhana Jihova. 10 Mu kizuwa kyenyokyo, Jihova ukala ni njinda yu waloko, wixi: 11 ‘O mayala atundu ku Ijitu atenesa makwinyi ayadi a mivu mba abhiti kya mu kitala kiki, kanda mona o ixi i ngakanena kubhana kwa Mbalahamu, kwa Izake ni kwa Jakobo mukonda kangibelesela ni muxima wâ woso, 12 kikale ngo Kalebe mon’a Jefune o Kenizewu ni Jozuwé mon’a Nune, mukonda abelesela Jihova ni muxima woso.’ 13 Kyenyiki, Jihova ukala ni njinda ya akwa Izalayele yu wa abhangesa kunyunga mu kikangalakata mu makwinyi awana a mivu kate kyeji jimuka o mundu woso wexile mubhanga o ima yayibha ku mesu a Jihova. 14 Kindala, enu mu mbutu ya mayala akwa ituxi, mwamubhanga kala kyabhangele o jitata jenu phala kubandekesa o njinda ya Jihova ku thandu dya akwa Izalayele. 15 Se mukamba kumubelesela, sé phata, mwene wanda bwazeka dingi o mundu yú mu kikangalakata, énu mwanda kala ni kikuma kya kibwika kya mundu woso.”

16 Mukusuluka, azukama kwa mwene ya ambe, exi: “Twehele kutunga bhabha ibhanga ya matadi phala o ibhaku yetu ni jimbanza phala an’etu. 17 Maji, etu twanda kala polondo phala o ita, twanda twamenena akwetu akwa Izalayele kate ki twa ambata bhu kididi kyâ. Maji-phe an’etu twanda kwa ambata mu jimbanza jala ni ilumbu phala ku alanga, mukonda dya akwa ixi yiyi. 18 Kitwanda vutuka ku mabhata metu kate akwa Izalayele oso kyatambula o ixi yâ kala undundu. 19 Kitwanda tambula undundu woso-woso kumoxi ni ene ku sambwa dya Njolodá né ku Njolodá, mukonda twatambula kya o undundu wetu ku Njolodá, ku mbandu kutundila o dikumbi.”

20 Mozé wa ambela, wixi: “Se kyene kimubhanga, anga mudisokejeka phala o ita kala kyatendelesa Jihova, 21 se kala muthu mudyenu udisokejeka phala o ita anga uzawuka o Njolodá, phala kuya mubhânga mu dijina dya Jihova kyoso mwene kyaya ni kukaya o jinguma jê bhu pholo yê, 22 kate o ixi kya itolola ni kikwatekesu kya Jihova, mu kiki mwanda tena kuvutuka. Kimwanda kala ni kikuma bhu pholo ya Jihova ni bhu pholo ya akwa Izalayele. O ixi yiyi yanda kituka undundu wenu bhu pholo ya Jihova. 23 Maji se mukamba kukibhanga, mwanda ta kituxi kwa Jihova. Kyenyiki, ijiyenu-kyu kwila, anda mifundisa mukonda dya ituxi yenu. 24 Kyenyiki-phe, tungenu jimbanza phala o twana twenu ni ibhanga phala o ibhaku yenu. Maji bhangenu yoso i mwakanena.”

25 O an’a Ngade ni an’a Lubene ambela Mozé, exi: “Ngana yami, o jiselevende jé anda bhanga mwene yoso i watumu. 26 An’etu ni ahatw’etu ni ibhaku yetu yoso, yanda kala mu jimbanza ja Ngiliyade, 27 maji o jiselevende jé ngana yami, anda zawuka o ngiji ya Njolodá, o mala oso anda disokejeka phala o ita, phala kuya mubhânga mu dijina dya Jihova kala ki wambe.”

28 Kyenyiki, Mozé wabhana itendelesu yalungu ni ene kwa mukunji Eliyazale, kwa Jozuwé mon’a Nune ni ku atwameni a miji ya Izalayele, 29 wixi: “Se o an’a Ngade ni an’a Lubene azawuka Njolodá kumoxi n’enu, oso adisokejeka phala kuya mubhânga mu ita mu dijina dya Jihova anga atolola o ixi, mwatokala ku abhana-phe o mbandu ya Ngiliyade kala undundu. 30 Maji, se ene kazawuka n’enu, kadisokejeka we phala o ita, atokala kutunga bhukaxi k’enu mu ixi ya Kanana.”

31 O an’a Ngade ni an’a Lubene atambwijila: “O jiselevende jé anda bhanga yatumu Jihova. 32 Twanda disokejeka phala o ita ni kuzawuka Njolodá ni tuye ku ixi ya Kanana, bhu pholo ya Jihova, maji o mbandu i twanda tambula kala undundu, yanda kala mwene ku mbandu yiyi ya Njolodá.” 33 Kyenyiki, Mozé wabhana o jimbanza ja ixi ya Sihone sobha ya akwa Mamodi ni jimbanza ja ixi ya Hoke sobha ya Basane, ku an’a Ngade ni ku an’a Lubene ni ku kaxaxi ka mwiji wa Manasa mon’a Zuze, kifwa o jixi jatokala ku jimbanza ja jimbandu jiji. Wa abhana we o jimbanza jatokala mu jixi ja akondoloka.

34 O An’a Ngade atungu* Dibone, Atalote, Alowele, 35 Atalote-xopane, Jazele, Jokebeha, 36 Bete-halane ni Bete-alama, jimbanza jala ni ilumbu. Atungu we ibhanga ya matadi phala o ibhaku. 37 O an’a Lubene atungu Hexebone, Eleyale, Kidyatayimi, 38 Nebu ni Bahale-mehone (o majina mâ a alungulula) ni Sibima. O jimbanza jatungulula ajiluku majina engi.

39 O an’a Makidi mon’a Manasa ayi ku Ngiliyade a itolola ya akaye akwa Mamodi atungile-ku. 40 Mukyenyiki, Mozé wabhana o mbanza ya Ngiliyade kwa Makidi mon’a Manasa, mwene anga utunga mwenyomo. 41 Jayile mon’a Manasa, wayi mu madyembu a jibalaka a ixi yenyoyo, wa atolola yu wa aluku o dijina dya Havote-Jayile.* 42 Noba wayi yu watambula Kenate ni jisanzala jê, yu wa jiluku Noba, o dijina dyê mwene.

33 Jiji jene o jinjila jende o mundu wa Izalayele, kyoso kyatundu mu ixi ya Ijitu mu ibuka-ibuka,* o Mozé ni Alá, éne exile mu a endesa. 2 Mozé wexile musoneka o ididi ya kukatuka ni ya kutula, mu jinjila joso jende kala kyatumine Jihova. Mu jinjila joso jende, o ididi mwabhitila yenyiyi: 3 Ene atundu ku Lamaseji mu mbeji ya dyanga, mu kizuwa kya dikwinyi ni kitanu kya mbeji. Mu kizuwa kya kayela o Phasu, akwa Izalayele atundu sé hele, o akwa Ijitu oso a amono. 4 Akwa Ijitu anga enda ni kufunda o ana oso a phande-kumbi a abwikisile kwa Jihova, mukonda Jihova wafundisile yu wakastikalele o jinzambi jâ.

5 Kyenyiki, akwa Izalayele atundu ku Lamaseji ya emika o jibalaka jâ ku Sukote. 6 Atundu-phe ku Sukote emika o jibalaka jâ bhu Etamu, bhwa zukama ni kikangalakata. 7 Kyatundu ku Etamu, avutuka ku dima, aditela ku Pihahilote, yala ku mbandu ya Bahale-Zefone anga emika o jibalaka jâ ku Mingidole. 8 Atundu-phe ku Pihahilote, abhitila bhukaxi ka musanza wa kalunga ya abhixila mu kikangalakata. Ende njila ya izuwa itatu mu kikangalakata kya Etamu ya emika o jibalaka jâ ku Mahala.

9 Mukusuluka, atundu ku Mahala ya abhixila ku Elimi. Ku Elimi kwexile dikwinyi ni kiyadi kya jifixi ja menya ni makwinyi asambwadi a maye. Kyenyiki, emika o jibalaka jâ kwenyoko. 10 Atundu-phe ku Elimi, emika o jibalaka jâ bhu mbandu a Musanza wa Kalunga Kakusuka. 11 Mukusuluka atundu ku Kalunga Kakusuka, emika o jibalaka jâ mu kikangalakata kya Sine. 12 Atundu mu kikangalakata kya Sine, emika o jibalaka jâ ku Dofoka. 13 Anga atunda ku Dofoka, emika o jibalaka jâ ku Aluzu. 14 Mukusuluka atundu ku Aluzu, emika o jibalaka jâ bhu Lefidimi, maji kibhwexile menya phala o mundu kunwa. 15 Atundu-phe ku Lefidimi, emika o jibalaka jâ mu kikangalakata kya Sinayi.

16 Ene atundu mu kikangalakata kya Sinayi, emika o jibalaka jâ ku Kibolote-batava. 17 Atundu-phe ku Kibolote-batava, emika o jibalaka jâ ku Hazelote. 18 Anga atunda ku Hazelote, emika o jibalaka jâ ku Kitima. 19 Mukusuluka, atundu ku Kitima ya emika o jibalaka jâ ku Kimone-peleze. 20 Atundu ku Kimone-peleze, emika o jibalaka jâ ku Libina. 21 Atundu ku Libina emika o jibalaka jâ ku Diza. 22 Mukusuluka atundu ku Diza, ya emika o jibalaka jâ ku Kahelata. 23 Anga atunda ku Kahelata, emika o jibalaka jâ ku mulundu wa Safele.

24 Mukusuluka, atundu ku Safele emika o jibalaka jâ ku Halada. 25 Atundu-phe ku Halada, emika o jibalaka jâ ku Makelote. 26 Mukusuluka, atundu ku Makelote emika o jibalaka jâ ku Tahate. 27 Anga atunda ku Tahate, emika o jibalaka jâ ku Tela. 28 Atundu-phe ku Tela, emika o jibalaka jâ ku Mitika. 29 Mukusuluka, atundu ku Mitika, emika o jibalaka jâ ku Haximona. 30 Mukusuluka atundu ku Haximona, emika o jibalaka jâ ku Muselá. 31 Anga atunda ku Muselá, emika o jibalaka jâ ku Bene-jakane. 32 Atundu ku Bene-jakane, emika o jibalaka jâ ku Hole-hakidade. 33 Atundu ku Hole-hakidade, emika o jibalaka jâ ku Jotobata. 34 Mukusuluka atundu ku Jotobata, emika o jibalaka jâ ku Abolona. 35 Atundu-phe ku Abolona, emika o jibalaka jâ ku Ezone-Ngabele. 36 Mukusuluka atundu ku Ezone-Ngabele, emika o jibalaka jâ mu kikangalakata kya Zini, kifwa, ku Kadexi.

37 Anga atunda ku Kadexi, emika o jibalaka jâ ku mulundu wa Hole, bhu mbambe ya ixi ya Idomo. 38 Alá o mukunji, wabande ku mulundu wa Hole kala kyamutumine Jihova, anga ufwila kwenyoko mu muvu wa makwinyi awana tunde akwa Izalayele kya tundu ku ixi ya Ijitu, mu mbeji ya katanu mu kizuwa kya dyanga kya mbeji. 39 Alá wexile ni hama ni makwinyi ayadi ni kitatu kya mivu kyoso kyafu ku mulundu wa Hole.

40 Sobha ya Alade, o mukwa Kanana watungile ku Nengebe, mu ixi ya Kanana, wevu-phe kwila akwa Izalayele ya eza.

41 Ku pholo dya kwenda, atundu ku Mulundu wa Hole, ya emika o jibalaka jâ ku Zalamona. 42 Anga atunda ku Zalamona, emika o jibalaka jâ ku Punone. 43 Mukusuluka, atundu ku Punone emika o jibalaka jâ ku Obote. 44 Kyoso kyatundu ku Obote emika o jibalaka jâ ku Ije-abadimi, ku mbambe ya ixi ya Mowabe. 45 Mukusuluka atundu ku Ijimi emika o jibalaka jâ ku Dibone-ngadi. 46 Anga atunda ku Dibone-ngadi emika o jibalaka jâ ku Alumone-Dibalatayimi. 47 Atundu-phe ku Alumone-Dibalatayimi ya emika o jibalaka jâ ku milundu yala ku jimbandu ja Abadimi, ku mbandu ya Nebu. 48 Ku disukilu, atundu ku milundu ya Abadimi emika o jibalaka jâ mu kikangalakata kya Mowabe, ku mbandu a Ngiji ya Njolodá, bhwa zukama ni Jedikó. 49 Emika o jibalaka jâ ku mbandu ya Njolodá, tunde ku Bete-jeximote kate ku Abele-xitimi mu kikangalakata kya Mowabe.

50 Jihova wambela Mozé mu kikangalakata kya Mowabe, ku mbandu ya Njolodá, bhwa zukama ni Jedikó, wixi: 51 “Akwa Izalayele wa ambela kiki: ‘Mwanda zawuka o Ngiji ya Njolodá phala kuya mu ixi ya Kanana. 52 Kayenu o athu oso a ixi yóyo, bulenu o iteka yâ yoso ya matadi ni iteka yâ yoso yosule ni ididi yâ yoso ya kubheza. 53 Enu mwanda lundula o ixi, mwanda tunga-mu, mukonda, sé phata nganda mibhana o ixi kala undundu. 54 Mwatokala kuwanuna o ixi bhukaxi ka jisolote, kala undundu mu miji yenu. Mwatokala kubandekesa o undundu ku ibuka yamakota, o ibuka yofele mwatokala ku isosolola o undundu. Kala muthu wanda tambula o undundu wê bhwoso bhwanda bwila o solote. Mwanda tambula o undundu wenu kala kyasokejeka o miji ya jitata jenu.

55 “‘Maji se kimukaye o athu oso a tungu mu ixi yiyi, o yó anda xala, anda dibhanga kaditetele mu mesu menu ni minya mu mukutu wenu. Anda mitatesa mu ixi i mwanda tunga. 56 O ima i ngamesenene ku abhanga, nganda mibhanga-yu enu.’”

34 Jihova wambela dingi Mozé, wixi: 2 “Bhana o itendelesu yiyi ku akwa Izalayele: ‘Kyoso ki mwanda bhixila mu ixi ya Kanana, mwanda tambula o ixi yiyi kala undundu. O jimbambe ja ixi ya Kanana jenyiji.

3 “‘Ku lwiji o mbambe yenu yanda matekena mu kikangalakata kya Zini, bhwa zukama ni Idomo. Ku mbandu kutundila o dikumbi, o mbambe yenu ku lwiji, yanda matekena ku musanza wa Kalunga ka Môngwa. 4 O mbambe yenu yanda bhitila kya ku lwiji dya mulundu wa Akalabimi anga iya kate ku Zini. O disukilu dyê ku lwiji dya Kadexi-balaneya, anga iya kate ku Hazale-adula ni isuluka kate ku Azemone. 5 Ku Azemone, o mbambe iya ku honga ya Ijitu, o disukilu dyê ku ndundu ya musanza wa Kalunga.*

6 “O mbambe yenu ku mbandu kufwila o dikumbi, yanda kala o Kalunga Kadikota* ni ndundu yê. Yiyi yene yanda kala o mbambe ku mbandu kufwila o dikumbi.

7 “‘Didi dyene o disukilu dya mbambe yenu: Itunda ku Musanza wa Kalunga Kadikota ndu ku mulundu wa Hole. 8 Tunde ku mulundu wa Hole o mbambe yenu yanda bhitila ku Lebo-Hamati,* ni isukina ku Zedade. 9 O mbambe yanda bhitila ku Zefelone yanda sukina ku Hazale-enane. Yiyi yene yanda kala o mbambe yenu ku mbandu ya thunda.

10 “‘Kyenyiki, mwatokala kuxinda o mbambe yenu ku mbandu kutundila o dikumbi, tunde ku Hazale-enane kate ku Xefome. 11 O mbambe yanda matekena ku Xefome, yandaya kate ku Libala, ku mbandu kutundila o dikumbi ya Ayime anga ikulumuka ku ndundu ku mbandu kutundila o dikumbi ya Musanza wa Kalunga wa Kinelete.* 12 Kyenyiki, o disukilu dya mbambe dyanda bhita ku Njolodá ni disukina ku Musanza wa Kalunga ka Môngwa. Yiyi yene yanda kala o ixi yenu ni jimbambe jê.’”

13 Kyenyiki, Mozé watendelesa akwa Izalayele, wixi: “Yiyi yene o ixi i mwanda wana bhukaxi ka jisolote kala undundu, kala kyatumu Jihova kubhana ku divwa dya miji ni kaxaxi. 14 Mukonda o mwiji wa akwa Lubene kala kyala o dibhata dya tata yâ, o mwiji wa akwa Ngade kala kyala o dibhata dya tata yâ ni kaxaxi ka mwiji wa Manasa atambula kya o undundu wâ. 15 O miji iyadi ni kaxaxi yatambula kya o undundu wâ ku mbandu kutundila o dikumbi, ku sambwa dya Njolodá bhwa zukama ni Jedikó.”

16 Jihova wambela dingi Mozé, wixi: 17 “Yá ene o majina a mayala anda miwanena o ixi kala undundu: O mukunji Eliyazale ni Jozuwé mon’a Nune. 18 Kala mwiji mwanda kwixana-ku we mwadyakime phala kuwana o ixi ya undundu wenu. 19 Yá ene o majina a mayala: Ku mwiji wa Judá, Kalebe mon’a Jefune, 20 ku mwiji wa an’a Ximinyá, Semuwele mon’a Amihudi, 21 ku mwiji wa Bejamí Elidade mon’a Kixilone, 22 ku mwiji wa an’a Dane, mwadyakime umoxi, Buki mon’a Jokodi, 23 ku an’a Zuze ku mwiji wa an’a Manasa mwadyakime umoxi, Haniyele mon’a Efodi, 24 ku mwiji wa an’a Efalayíme, mwadyakime umoxi, Kemwele mon’a Sifitane, 25 ku mwiji wa an’a Nzebulone, mwadyakime umoxi, Elizafane mon’a Palanake, 26 ku mwiji wa an’a Isakale, mwadyakime umoxi, Palatiyele mon’a Azana, 27 ku mwiji wa an’a Azele, mwadyakime umoxi, Ahiwude mon’a Sefomi, 28 ku mwiji wa an’a Nafitali, mwadyakime umoxi, Pedahele mon’a Amihudi.” 29 Jihova watumu o mayala yá kuwanena o ixi ku akwa Izalayele mu ixi ya Kanana.

35 Jihova wambela Mozé mu kikangalakata kya Mowabe bhu mbandu a Njolodá bhwa zukama ni Jedikó, wixi: 2 “Ambela akwa Izalayele kwila, ku undundu wanda tambula abhane-ku jimbanza ku Jilevita phala kutunga-mu. Atokala we kubhana ku Jilevita mikáwu phala kwinga o ibhaku mu jimbandu ja jimbanza jâ. 3 O Jilevita anda tunga mu jimbanza jiji, anda kwinga o jingombe jâ mu mikáwu yiyi, o ibhaku yamukwa yanda kala we mu mikáwu yiyi. 4 O mikáwu ya kwinga o ibhaku ya jimbanza jimwanda bhana ku Jilevita, yatokala ikala ni midi ya jikovadu* tunde ku ilumbu i kondoloka o mbanza. 5 Ku kanga dya mbanza mwatokala kuzonga midi jiyadi ja kovadu ku mbandu kutundila o dikumbi, midi jiyadi ja kovadu ku mbandu ya lwiji, midi jiyadi ja kovadu ku mbandu kufwila o dikumbi ni midi jiyadi ja kovadu ku thunda. O mbanza yanda kala bhukaxi. Yiyi yene yanda kala o mikáwu ya kwinga o ibhaku mu jimbanza jâ.

6 “Mwanda bhana mbanza jisamanu ja kulengela-mu ku Jilevita, phala muthu woso ujibha mukwâ alengele-mu, ni mute-ku dingi makwinyi awana ni kiyadi kya jimbanza jamukwa. 7 Mwatokala kubhana makwinyi awana ni dinake dya jimbanza ku Jilevita, kumoxi ni ididi yâ ya kwingila-mu o ibhaku. 8 O jimbanza jimwanda bhana, janda tunda ku undundu wa akwa Izalayele. Ku miji yamakota mwanda tambula-ku jimbanza javulu, o ku miji yofele mwanda tambula-ku jimbanza jatolo. Kala mwiji wanda bhana jimbanza ku Jilevita kala kyasoko o undundu wanda tambula.”

9 Jihova wambela dingi Mozé, wixi: 10 “Ambela akwa Izalayele: ‘Mwanda zawuka o ngiji ya Njolodá phala kuya mu ixi ya Kanana. 11 Solenu jimbanza jazukama kijibhonzo kubhixila-ku, janda kala jimbanza ja kulengela-mu, kwanda lengela yó ujibha mukwa sé kukimesena. 12 O jimbanza jiji janda kala ididi ya kulengela-mu mukonda dya muzokedi wa manyinga, phala o yó ujibha mukwa kafwe ande dya kumoneka bhu pholo ya mundu phala ku mufundisa. 13 O jimbanza jisamanu ja kulengela-mu jimwanda bhana, janda kala jimbanza ja kukondamena. 14 Mwanda sola jimbanza jitatu ku mbandu yiyi ya Ngiji ya Njolodá ni jimbanza jitatu mu ixi ya Kanana ni jikale jimbanza ja kulengela-mu. 15 O jimbanza jisamanu jiji, janda kala dilengelu phala akwa Izalayele, phala akwa jixi jengi ni jinzwangiza bhukaxi kâ, phala o yó ujibha muthu sé kukimesena atene kulengela-mu.

16 “‘Maji se mwene ukwama muthu ni felu, o muthu anga ufwa, mwene kijibhangânga. O kijibhangânga atokala mwene ku mujibha. 17 Se mwene wakwama muthu ni ditadi ditena kujibha, o muthu anga ufwa, mwene kijibhangânga. O kijibhangânga atokala mwene ku mujibha. 18 Se mwene wakwama muthu ni dibaya ditena kujibha, o muthu anga ufwa, mwene kijibhangânga. O kijibhangânga atokala mwene ku mujibha.

19 “‘O muzokedi wa manyinga mwéne wanda jibha o kijibhangânga. Mwéne mwene wanda mujibha, kyoso kyanda musanga. 20 Se o muthu wafu mukonda mwene wa mulundula ni njinda, mba wa mubatamena yu wa mutakula kima, 21 mba ukwama o muthu ni maku mukonda dya njinda, o muthu anga ufwa, anda mujibha mwene. Mwene kijibhangânga. O muzokedi wa manyinga wanda jibha o kijibhangânga kyoso kyanda musanga.

22 “‘Maji se kakibhange mu lwelu kexile we ni njinda kyoso kyalundula o muthu mba kamubatamena kyoso kya mutakula o kima, 23 mba mwene kamumono yu wa mulundumwina ditadi sumbala kexile nguma yê, kamesenene we ku mubhanga phulu, o muthu anga ufwa, 24 kyenyiki, o mundu watokala kufundisa o muthu wa lundumwina o ditadi ni muzokedi wa manyinga mu kukayela o itendelesu yiyi. 25 O mundu watokala kubhulula o kijibhangânga bhu maku a muzokedi wa manyinga ni ku mukwatekesa kuvutuka mu mbanza ya kulengela-mu mwadiswekela. Mwene wanda kala mwenyomo kate ku ufwilu wa mukunji wadikota a mu undu ni máji akôla.

26 “‘Se o kijibhangânga usomboka o jimbambe ja mbanza ya kulengela-mu mwadiswekela, 27 o muzokedi wa manyinga anga u musanga bhu kanga dya mbanza ya kulengela-mu hé u mujibha, o muzokedi wa manyinga kanda kala ni kikuma kya manyinga. 28 Mukonda o kijibhangânga watokala kutunga mu mbanza ya kulengela-mu kate ku ufwilu wa mukunji wadikota. Maji kyoso kyanda fwa o mukunji wadikota, mwene utena kuvutuka mu mbanza yê. 29 O itendelesu yiyi yanda kala ngonge ya kufundisa mu miji yenu yoso mu kididi kyoso ki mukala.

30 “‘Muthu woso ujibha mukwa atokala ku mujibha kala kijibhangânga bhukaxi ka umbangi wa* athu, maji séku muthu atokala ku mujibha bhukaxi ka umbangi wa muthu umoxi ngo. 31 O kijibhangânga a mubalakala o kufwa, katokala ku mukula, mukonda atokala mwene ku mujibha. 32 Kimuxikine kukula muthu walengela mu mbanza ya kulengela-mu, mu kumwehela kuvutuka mu mbanza yê, ande dya ufwilu wa mukunji wadikota.

33 “‘Kimukasanese o ixi mu mwatungu, mukonda o manyinga akasanesa o ixi. O ixi atena ku izelesa ngo mu kuzunzumuna-mu o manyinga a yó wajibha mukwa. 34 Kimukasanese o ixi mu mwatungu, mu ngatungu we eme, mukonda eme ngi Jihova ngala bhukaxi ka mundu wa Izalayele.’”

36 O atwameni a miji ya mbutu ya Ngiliyade mon’a Makidi, mon’a Manasa, watokala ku miji ya an’a Zuze, ayi kwa Mozé ni ku adyakime, o atwameni akwa Izalayele, 2 ya ambe, exi: “Jihova watumina ngana yami kuwanena o ixi bhukaxi ka jisolote kala undundu ku akwa Izalayele, Jihova yu watumu we ngana yami kubhana o undundu wa phang’yetu Zelofeyadi, ku twana twê twa ahatu. 3 Se ene akazala ni mayala atokala ku mwiji wengi mu Izalayele, o undundu wa ahatu anda ukatula ku undundu wa jitata jetu, anda ubandekesa ku undundu wa mwiji kwanda tokala ene. Mukiki, anda ukatula ku mbandu yatutokala kala undundu. 4 Kyoso kyanda bhixila o Jubilewu phala o mundu wa Izalayele, o undundu wa ahatu anda ubandekesa ku undundu wa mwiji kwanda tokala ene. Mukiki, o undundu wâ anda ukatula ku undundu wa mwiji wa jitata jetu.”

5 Kyenyiki, kala kyatumu Jihova, Mozé wambela akwa Izalayele, wixi: “O yazwela o mwiji wa an’a Zuze, yakidi mwene. 6 Kiki kyene kyatendelesa Jihova, yalungu ni an’a Zelofeyadi, a ahatu: ‘Ene atena kusola muthu woso-woso phala kukazala-nawu, maji kikale utokala ku mwiji wa tata yâ. 7 O undundu wa akwa Izalayele, katokala ku ubhitisa ku mwiji wengi, mukonda akwa Izalayele atokala kukala* ni undundu wa mwiji wa jikuku jâ. 8 Mona woso-woso wa muhatu ukala ni undundu bhukaxi ka miji ya akwa Izalayele, watokala kukazala ni diyala dyatokala ku mbutu ya mwiji wa tat’ê, phala o undundu wa jitata jâ unangenene bhukaxi ka akwa Izalayele. 9 O undundu katokala ku ubhitisa ku mwiji ni mwiji, mukonda o miji ya akwa Izalayele yatokala kukala* ni undundu wâ.’”

10 O an’a Zelofeyadi, a ahatu, abhange mwene kala kyatendelesele Jihova kwa Mozé. 11 Kyenyiki, Mahala, Tidiza, Hokala, Milika ni Nowa o an’a Zelofeyadi, a ahatu, akazala mwene ni an’a jiphange ja tata yâ. 12 Ene akazala ni mayala atokala ku miji ya Manasa mon’a Zuze, phala o undundu wâ unangenene ku mwiji wa dibhata dya tata yâ.

13 Yiyi yene o itumu ni jingonge jabhana Jihova ku akwa Izalayele, bhukaxi ka Mozé, mu kikangalakata kya Mowabe, bhu mbandu a Ngiji ya Njolodá, bhwa zukama ni Jedikó.