NEHEMIYA

1 Izwelu ya Nehemiya,* mon’a Hakaliya: Ku mbeji ya kislewu,* ku muvu wa makwinyi ayadi, eme ngexile mu mbonge* ya Suzana.* 2 Phang’yami Hanani ni mayala engi akwa Judá, eza mu ngikunda. Kyenyiki, nga ebhwidisa kyebhi kyexile o Jijudé jamukwa atena kuvutuka mu ixi, ni kyebhi kyexile o mbanza ya Jeluzaleme. 3 Ene a ngitambwijila: “O yó a akwikile ya atena kuvutuka, ala mu kibatu kya Judá. Maji a mutala hadi yavulu, a mu axongwena ni ku asebhulula. O kilumbu kya Jeluzaleme a kibulu, o mabhitu mê a oha.*”

4 Kyoso ki ngevu o maka yá, ngaxikama, ngamateka kudila, ngabhiti izuwa yavulu ni malamba. Ngajídi,* éme ngasambe kwa Nzambi ya dyulu, 5 ngixi: “Jihova tata, u Nzambi ya dyulu, u Nzambi yonene, éye u Nzambi Muteni wa Yoso, a kuxila, ubhaka o kikutu, o henda yé kwa yó akuzolo ni kwa yó abelesela o itumu yé ki ibhu. 6 Ngakudyondo, o mesu mé ajikuke, o mátwi mé evwidile kyambote o musambu wa selevende yé, u nga mubhanga lelu. Ngidyondela kokwé suku ni mwanya, mukonda dya jiselevende jé akwa Izalayele. Ngifisala o ituxi yate o mundu wa Izalayele kokwé. Twate kituxi, kikale eme, kikale o mundu wami.* 7 Twate mwene kituxi kokwé, twabhukumukina o itumu yé, o jingonge ni jindunge jalungu ni kufundisa jiwabhana kwa selevende yé Mozé.

8 “Ngakudyondo, lembalala o izwelu i watendelesa kwa selevende yé Mozé, kyoso ki wambe, wixi: ‘Se mukamba ku ngikala fiyele, nganda mimwanga mu ifuxi yoso. 9 Maji se muvutuka kokwami anga mubelesela o itumu yami, né mwene se a mimwanga kate ku maxokololo a ixi, nganda mibhongolola kabasa kididi ki mukala ni ngi mibheka mu kididi ki ngasolo phala kufumanesa-mu o dijina dyami.’ 10 Éne o jiselevende jé, o mundu wé u wabhulula ni kutena kwé kwadikota ni lukwaku lwé lwanguzu. 11 Jihova tata, ngakudyondo, ivwa o musambu wami ni misambu ya jiselevende jé asanguluka mu kuxila o dijina dyé. Ngakudyondo, bhangesa o sobha ku ngikwatela henda, a ngehele kubhanga o kima ki nganda mubhinga lelu.”

Mu kithangana kiki, éme ngexile musidivila o vinyu kwa sobha.

2 Mu mbeji ya nizá,* mu muvu wa makwinyi ayadi wa utuminu wa sobha Artaxerxe, o sobha wamesenene kunwa vinyu. Kyenyiki, ngakatula o vinyu éme nga isidivila o sobha kala ki ngexile kya mubhanga. Mu kithangana kyenyokyo, eme ngaluwalele kyavulu bhu pholo ya sobha. Yene o veji ya dyanga ya ngimono kiki. 2 Mu kiki, o sobha wa ngibhwidisa: “Waluwalela-hi kiki? Eye kiwamukata! Ngimona kwila didi dilamba dya muxima dya mu kuluwalesa.” Bhenyobho, wôma wa ngikwata.

3 Eme ngambela-phe o sobha, ngixi: “Sobha yami, mwenyu wé ukole kate ku hádya ni hádya! Ngaluwala mukonda o mbanza mwafundila o jikuku jami a ibwika, o mabhitu mê a oha.”* 4 O sobha wa ngibhula, wixi: “Ihi i wamesena o kubhinga?” Mu kithangana kyenyokyo, ngasambe kwa Nzambi ya dyulu. 5 Bhenyobho ngambela o sobha, ngixi: “Ngana yami u Sobha, se mubhik’é wasange ngalasa ku mesu mé, se kya kuwabhela, ngitumikise ku Judá, o mbanza mwafundila o jikuku jami ni ngi itungulule.” 6 Mu kithangana kyenyokyo, o sobha waxikamene ni mvwale, wa ngibhula: “Ku wamuya wanda kala-ku izuwa ikuxi? Wanda vutuka kizuwa kyebhi?” Sobha waxikina ku ngitumikisa, éme nga mutangela o izuwa i ngeji kala-ku.

7 Eme ngambela o sobha, ngixi: “Sobha yami, se kya kuwabhela, a ngibhane mikanda phala ku ibhana ku jinguvulu jala ku mbandu kufwila o dikumbi dya ngiji ya Ewufalate, n’a ngehele kubhita kate ki ngibhixila kyambote ku Judá. 8 A ngibhane we mukanda phala Azafe, yó wene mulanga o Muxitu wa sobha, a ngibhane mabaya phala kubhanga o maleka a mabhitu a myelu ya Mbanza, ni a kilumbu ni ya Inzo mu nganda kala. Mu kyenyiki, sobha wa ngibhana o mikanda, mukonda Nzambi yami wexile mu ngikwatekesa.

9 Mu kusuka-ku, ngabhixila ku mbandu kufwila o dikumbi ya ngiji ya Ewufalate, éme ngabhana o mikanda ya sobha ku jinguvulu. O sobha watumikisine we atwameni a masoladi ni yó endela mu jikabalu, phala ku ngixinjikila. 10 Kyoso Sambalate mukwa Betolone, ni Tobiya o mukwa Amone, selevende ya sobha, kyevu kwila kweza diyala mukwatekesa akwa Izalayele, njinda ya akwata.

11 Ngabhixila-phe ku Jeluzaleme. Mu kubhita izuwa itatu, 12 ngabalumuka-phe mu usuku kumoxi ni mayala u ngexile-nawu. Maji yoso yamesenene Nzambi yami kwila ngi ibhanga mu Jeluzaleme ki ngi itangela muthu. Éme ngo ngexile mukwendela mu bulu, kitwexile dingi ni kibhaku kyengi. 13 Mu usuku, ngatundila bhu Mwelu wa Dikolo, ngabhitila bhu Fixi ya Nyoka Yadikota, eme ngayi bhu Mwelu wa Dixita. Ngatonginina-phe o kilumbu kyobule kya Jeluzaleme ni mabhitu a oha. 14 Anga ngibhita bhu Mwelu wa Fixi, ni bhu Kixima kya Sobha, maji o kididi kyatolele, o bulu yalembwa o kubhita. 15 Mu usuku wenyo, ngasuluka ni kwenda mu honga ni kutonginina o kilumbu. Mu kusuluka, ngabokona dingi bhu mwelu wa Dikolo, eme ngavutuka kubhata.

16 O akwatekexi a jinguvulu kejidile kwebhi ku ngendele, kejidile we i ngexile mubhanga, mukonda kingazwelele luwa kima ku Jijudé, mba ku akunji, ku atwameni, ku akwatekexi a jinguvulu, mba ku akalakadi a mukwâ. 17 Kudisukilu nga ambela, ngixi: “Enu mwa mumona o hadi i twamutala, mukonda Jeluzaleme yaxala kiphulungunzu kyahatu, o mabhitu mê a oha. Zenu tutungulule o kilumbu kya Jeluzaleme phala kuzubha o lusebhu lulu.” 18 Mukusuluka, nga atangela kyebhi Nzambi yami kyexile mu ngikwatekesa, nga atangela we ya ngitangele o sobha. Mu kwivwa o ima yiyi, ene ambe: “Kitulaleke dingi, tumateke kya mwene o kikalakalu kya kutungulula!” Kyenyiki, a diswinisa mudyâ phala kumateka o kikalakalu.

19 Kyoso Sambalate mukwa Betolone ni Tobiya mukwa Amone, o selevende ya sobha ni Jeseme, o mukwa Alábya, kyevu o maka yá, amateka kutuxongwena ni kutusebhulula, exi: “Ihi i mwa mubhanga? O kwila mwamesena kubhukumukina o sobha?” 20 Eme-phe nga atambwijila: “O Nzambi ya dyulu mwéne wanda tukwatekesa kubhanga kyambote o kikalakalu. Étu twanda mateka o kikalakalu kya kutungulula mukonda tu jiselevende jê. Maji séku kima mu Jeluzaleme kyamitokala enu, kimwala we ni ujitu u mibhangesa kudikalanganza.”

3 O mukunji wadikota Eliyazibe, kumoxi ni akunji amukwa, amateka kutunga o Mwelu wa Jimbudi. Ate o mabhitu, ya abhange fesa mukonda dya kuzubha kutunga o Mwelu wa Jimbudi. Asuluka ni kutungulula o kilumbu tunde ku Ditala dya Meyá ndu ku Ditala dya Hananele. 2 O mayala a Jedikó atungulula o mbandu yakayela-ku ya kilumbu. Zakule mon’a Inidi, watungulula o mbandu yakayela ya kilumbu.

3 O an’a Senaha atungulula o Mwelu wa Mbiji, mukusuluka ate o maleka a mwelu ni mabhitu ala ni jiphapha. 4 Melemote mon’a Udiya, mon’a Haku, watungulula o mbandu yamukwa ya kilumbu. Melulane mon’a Belekiya, mon’a Mesezabele, watungulula o mbandu yamukwa ya kilumbu. Zadoke mon’a Bahana, watungulula o mbandu yakayela ya kilumbu. 5 O akwa Tekowa atungulula o mbandu yakayela-ku ya kilumbu. Maji o mayala afumanene mwaxaxi kâ, kamesenene kubhanga o kikalakalu kya atumine kubhanga kwa yó exile mukwendesa o kikalakalu kya kutunga.

6 Joyada mon’a Pezeya, ni Melulane mon’a Besudiya, atungulula o Mwelu wa Mbanza Yokulu, ate o maleka a mwelu ni mabhitu ala ni jiphapha. 7 Melatiya o mukwa Ngibiyone, ni Jadone o mukwa Melenote yazukama ku mbanza ya Mixipa, exile mu atumina ku nguvulu ya mbandu kufwila o dikumbi ya ngiji ya Ewufalate. Ene atungulula o mbandu yakayela ya kilumbu. 8 Uziyele mon’a Halaya, wexile mukalakala ni ulu, watungulula o mbandu yakayela-ku ya kilumbu. Hananiya wexile mubhanga máji anuha kyambote, watungulula o mbandu yakayela-ku. Sayi jimbandu ja Jeluzaleme, ene ajisokejeka ni matadi kate bhu Kilumbu Kyazanze. 9 Lefaya mon’a Hule, wexile mutumina mbandu ya Jeluzaleme, watungulula o mbandu yakayela-ku ya kilumbu. 10 Jadaya mon’a Halumafe, watungulula o mbandu yakayela ya kilumbu, bhwazukamene o inzo yê. Hatu, mon’a Hasabeneya, watungulula o mbandu yakayela ya kilumbu.

11 Malekiya mon’a Hadimi ni Hasube mon’a Pahate-Mowabe, atungulula o mbandu yamukwa ya kilumbu, atungulula we o Ditala dya Majiku. 12 Salume mon’a Loweje, wexile mutumina o mbandu ya mukwa ya Jeluzaleme, watungulula o mbandu yamukwa ya kilumbu, kumoxi ni twana twê twa ahatu.

13 Hanune ni akwa Zanowa, atungulula o Mwelu wa Dikolo, a uyudika, ya ate mabhitu ala ni jiphapha. Ku kilumbu atungulula we midi ya jikovadu,* ya abhixila kate bhu Mwelu wa Dixita. 14 Malekiya mon’a Lekabe, wexile mutumina mbandu ya Bete-Xeleme, watungulula o Mwelu wa Dixita, wa uyudika, yu wate o mabhitu ala ni jiphapha.

15 Salume mon’a Kodiyose mutwameni wa mbandu ya Mixipa, watungulula o Mwelu wa Fixi, yu wa uzambela, wate we o mabhitu ala ni jiphapha. Mwene watungulula we o kilumbu tunde ku Mulombo wa Fixi wazukama ku njaludi ya Sobha, kate ku maxikata akulumuka ku mbanza ya Davidi.

16 Nehemiya mon’a Azebuke, wexile mutumina mbandu ya Betezule, watungulula o mbandu yakayela-ku ya kilumbu, wamateka ku mbalale ya sobha Davidi, wasuluka kate ku Fixi, yu wabhixila mu Inzo ya Mazonda.

17 O Jilevita atungulula o mbandu yakayela-ku ya kilumbu. O wexile ku pholo dya kikalakalu kiki, Lehu mon’a Bani. Hasabiya wexile mutumina o mbandu ya Keyila, watungulula o mbandu yakayela ya kilumbu ya atokalele. 18 O Jilevita jamukwa atungulula o mbandu yamukwa ya kilumbu. O wexile ku pholo dya kikalakalu kiki Bavayi mon’a Henadade, wexile mutumina o mbandu yamukwa ya Keyila.

19 Ezele mon’a Jesuwa, o mutwameni wa Mixipa, watungulula o mbandu yakayela-ku ya kilumbu, bhu mbandu a Inzo ya kubhakela o Jifalamenda ja Ita, bhwa zukama ni Kifikidilu.

20 Mbaluke mon’a Zabayi, wakalakala ni nguzu yoso, yu watungulula o mbandu yakayela-ku ya kilumbu tunde ku Kifikidilu kyê kate bhu Mwelu wa Inzo wa mukunji wadikota Eliyazibe.

21 Melemote mon’a Udiya, mon’a Haku, watungulula o mbandu yakayela-ku ya kilumbu tunde bhu Mwelu wa Inzo ya Eliyazibe, kate bhwa suku o Inzo ya Eliyazibe.

22 O akunji atokalele ku mbandu ya Njolodá,* atungulula o mbandu yakayela-ku ya kilumbu. 23 Bejamí ni Hasube, atungulula o mbandu yakayela-ku ya kilumbu, bhu mbandu ya inzo yâ. Azadiya mon’a Mahaseya, mon’a Ananiya, watungulula o mbandu yakayela ya kilumbu, bhwa zukama o inzo yê. 24 Binuwi mon’a Henadade, watungulula o mbandu yakayela-ku ya kilumbu, tunde ku inzo ya Azadiya kate ku Kifikidilu kya kilumbu, yu wasuluka kate bhwa takanena o kilumbu.

25 Phalale mon’a Uzayi, watungulula o mbandu yakayela-ku ya kilumbu, bhwa zukama ni Kifikidilu kya kilumbu kyala bhu mbandu a ditala dya Inzo ya Sobha, yala mu Kithádi kya Alangidi. Pedaya mon’a Paloji, watungulula o mbandu yakayela-ku ya kilumbu.

26 O jiselevende ja tembulu atungile ku Ofele, atungulula o mbandu ya kilumbu kate bhwa zukama o Mwelu wa Menya, ku mbandu kutundila o dikumbi, ni ku ditala dyadileka.

27 Akwa Tekowa atungulula o mbandu yakayela ya kilumbu, tunde bhu mbandu a ditala dyadikota dyadileka kate ku kilumbu kya Ofele.

28 O akunji atungulula o mbandu yakayela ya kilumbu, yala ku thandu a Mwelu wa Jikabalu. Muthu ni muthu watungulula bhwa zukama ni inzo yê.

29 Zadoke mon’a Imele, watungulula o mbandu yakayela ya kilumbu, bhwa zukama o inzo yê.

Semaya mon’a Sekaniya, mukwa kulanga o Mwelu wala ku mbandu Kutundila o Dikumbi, watungulula o mbandu yakayela ya kilumbu.

30 Hananiya mon’a Selemiya ni Hanune o mona wa kasamanu wa Zalafe, atungulula o mbandu yakayela ya kilumbu.

Melulane mon’a Belekiya, watungulula o mbandu yakayela ya kilumbu, bhwa zukama o inzo yê.

31 Malekiya wexile mukalakala ni ulu, watungulula o mbandu yakayela ya kilumbu, kate mu inzo ya akalakadi a tembulu, ni inzo ya asumbixi yazukama bhu Mwelu wa Misekade, kate mu inzo yala bhu kididi kyadileka, bhwa takanena o kilumbu.

32 O akwa kukalakala ni ulu ni asumbixi, atungulula o mbandu ya kayela ya kilumbu kyala mu inzo yadileka bhwa takanena o kilumbu, atungu we o Mwelu wa Jimbudi.

4 Kyoso Sambalate kyevu kwila twexile mutungulula o kilumbu, njinda ya mukwata, anga u thathamana kyavulu. Wamateka kusebhulula o Jijudé, 2 anga uzwela bhu pholo ya makamba mê ni ya kifuxi kya akwa Samadiya, wixi: “Ihi ya mubanza kubhanga o Jijudé jiji se ene atolo? A mufika kwila anda bhanga o kikalakalu kiki ubheka wâ? A muxinganeka kwila anda tena kuzubha o kikalakalu kiki mu kizuwa kimoxi ngo? A mufika kwila anda bhakula jisata ja ibhaku ni ima yamukwa phala Nzambi? O kwila ene anda tena hanji kukalakala ni matadi ajokota, asekumuka, akituka kya maxita?”

3 Tobiya o mukwa Amone, wexile bhu mbandu yê wambe, wixi: “Kate mwene ni mukenge utena kulundumuna o kilumbu kiki kya matadi kya mutunga.”

4 Bhenyobho ngasambe, ngixi: “Ívwa Nzambi yetu, mukonda a mu tusebhulula. Bhangesa kwila o kulebhula kwâ, ku avutukile.* Bhakula-wu bhu maku a jinguma jâ, n’a ambate mu ixi yengi. 5 Kana kujimba o ikuma yâ, kana we ku aloloka mukonda axongwena o atungi.”

6 Twasuluka ni kutunga o kilumbu. Kilumbu kyoso twakitungu mwene kate mukaxi. O mundu wasuluka ni kukalakala ni nguzu yoso.

7 Kyoso Sambalate ni Tobiya ni akwa Alábya ni akwa Amone ni akwa Ajidode, kyevu kwila, o kikalakalu kya kutungulula o kilumbu kya Jeluzaleme kyexile mwene musuluka, o misula yoso exile mu ixita, njinda ya akwata. 8 Enyoso adibundu phala kwiza mubhânga ni akwa Jeluzaleme ni kubhanga kavwanza. 9 Maji twasambe kwa Nzambi yetu phala kutukwatekesa. Twate alangidi phala kutulanga suku ni mwanya mukonda dya jinguma jetu.

10 Maji, amoxi ku mundu wa Judá exile muzwela: “O akalakadi atohoka, o mavu we adifungu ni matadi avulu. Kitwanda tena kutungulula o kilumbu kiki.”

11 O jinguma jetu jexile muzwela kiki: “Twanda bokona mwaxaxi kâ, ene kanda kijiya, kanda tumona we. Twanda kwajibha phala kufidisa o kikalakalu kyâ.”

12 Kyoso o Jijudé atungile bhwa zukama o jinguma jetu, kyexile mubokona mu mbanza, exile mututangela, exi: “O jinguma janda kwijila mu jimbandu joso phala kubhânga n’etu.”

13 Kyenyiki-phe, ngate alangidi ku dima dya kilumbu mu ididi yazendalala mwakambele ifikidilu. Nga awane mu ibuka ya miji ni miji. Ene akwatele jixibhata ni jisosa. 14 Kyoso ki ngatonginina kwila, ene exile ni wôma, mu kithangana kyenyokyo, ngayi muzwela ni atwameni ni akwatekexi a jinguvulu ni mundu woso, ngixi: “Ki mu akwatele wôma! Lembalalenu kwila Jihova muthu wonene, ukwatesa wôma. Bhângelenu we o Jijudé jamukwa, o twana twenu, o ahatu’enu ni mabhata menu.”

15 Kyoso jinguma jetu kyevu kwila, twatungununa o ndunge yâ ni kwila o Nzambi yakidi wafidisa o kima kyamesenene kubhanga, etwenoso-phe twavutuka mu kikalakalu kya kutungulula o kilumbu. 16 Tunde mu kizuwa kyenyokyo, o akalakadi nga awane mu ibuka iyadi. Kibuka kimoxi kyexile mukalakala ku kilumbu, o kibuka kyamukwa kyexile mulangidila. Ene akwatele jingumba, jingubu ni mifula. Azwatele ibhakatu ya ita.* O atwameni exile mu kwatekesa oso atokalele mu dibhata dya Judá, 17 akexile mutungulula o kilumbu. O akwa kututa o ima, exile mukalakala ni lukwaku lumoxi, o lwamukwa exile mukwata-nalu xibhata mba sosa mba ngubu mba mufula. 18 O atungi oso exile mukalakala ni jixibhata jâ mu mbunda. O diyala wexile muxika o jikoloneta, wemanene bhu mbandu yami.

19 Mukyenyiki, ngambela o atwameni, o akwatekexi a jinguvulu ni mundu woso, ngixi: “O kikalakalu kyavulu hanji. Twadisandula kyavulu mu kutunga o kilumbu. 20 Kyoso ki mwanda kwivwa o jibuya ja koloneta, mwiza mutusanga bhwoso bhutwanda kala. O Nzambi yetu mwéne wanda bhânga bhu kididi kyetu.”

21 Mukyenyiki, twasuluka ni kukalakala. Maji o kibuka kyamukwa kyakwatele jingumba tunde mu kamene kate mu usuku kyoso ki mateka kutunda o jithéthembwa. 22 Mu kithangana kyenyokyo, eme ngambela o mundu, ngixi: “Mayala oso ni akwatekexi’â atokala kubhita o usuku mu Jeluzaleme. Mu mwanya anda kalakala mu kutungulula o kilumbu, mu usuku, andaya ni kudibhinganesa mu kutulangidila.” 23 Kyene kyatufidisa kuzula o izwatu yetu, kikale eme ni Jijudé jamukwa, o akwatekexi ami ni alangidi exile mu ngikayela. Kala muthu mudyetu wakwatele o xibhata yê ni lukwaku lwa kadilu.

5 Maji athu avulu, mayala ni ahatwâ exile mudikalanganza mukonda dya Jijudé jamukwa. 2 Amoxi exile muzwela, exi: “Etu twala ni twana twavulu twa mala ni twa ahatu. Twabhindamena kudya phala kitufwe.” 3 Amukwa exile muzwela: “Mukonda dya nzala, twamubhana o mabhya metu, o mividi ni jinzo jetu phala kutubhana kudya.*” 4 Amukwa hanji exile muzwela, exi: “Twabhana o mabhya metu ni mividi yetu, phala kutusobhesa kitadi ni tutene kufuta o lubhaku kwa sobha. 5 Etu ni Jijudé ni akwetu, tu mwiji umoxi.* O twana twetu edi we kala twana twâ. Maji né kiki, twamubhikisa o twana twetu twa mala ni twa ahatu, amoxi ku twana twetu twa ahatu abhika kya. Kitwala dingi ni kima phala ku akula, mukonda o mabhya ni mividi yetu a itambula, yatokala kya ku athu engi.”

6 Ngaluwala kyavulu mu kwivwa o kudikalangaza kwâ. 7 Mu kuxinganeka kyambote mu maka yá, ngamateka kubazela o atwameni ni akwatekexi a jinguvulu, ngixi: “Mu kukobhalala o kitadi ki mwasobhesa ku Jijudé ni akwenu, mwene mu kikobhalala ni avasu.”*

Ki kyene ngo, mukonda dya ima yabhange ene, o mundu woso nga wongeka. 8 Eme nga atangela, ngixi: “Twakulu kya o jiphange jetu o Jijudé a asumbisile ku ifuxi yengi, kate bhwoso bhu twatena. O kwila o jiphange jenu mwanda kwasumbisa dingi lwakayadi ni tu akule dingi lwamukwa?” Bhenyobho-phe, ene adixibha, kejidile kya kuzwela. 9 Mukusuluka nga ambela, ngixi: “O ima i mwa mubhanga, kiyafwama. Mwatokala kukala ni wôma wa Nzambi mu ima yoso i mubhanga. Se mubhanga kiki, o jinguma jetu kanda tusebhulula dingi. 10 Eme ni jiphange jami ni akwatekexi ami, twa asobhesa we kitadi ni kudya. Twa midyondo, mu ku asobhesa o kitadi, ki tu abhinge dingi avasu. 11 Ngamidyondo, lelu mwene mu avutula o mabhya mâ, o mividi ni midiva ni jinzo jâ. Mu avutula we o kitadi, o kudya, o vinyu ya ubhe ni máji u mwa asobhesa ni avasu.”

12 Kyenyiki, ene atambwijila: “Twanda bhanga kala ki wazwela. Twanda kwavutwila o ima yiyi, ki twanda kwa kobhalala dingi kima.” Bhenyobho, ngexana-phe o akunji, eme ngabhangesa o mayala yó kuloka kwila, eji kumbidila yoso yakanena. 13 Mukusuluka nga kukumuna o kizwatu kyami eme ngambe, ngixi: “Kyene we Nzambi yakidi kyanda kukumuna kala muthu mu dyenu ukamba kukumbidila o kikanenu kyê. Nzambi wanda mutambula o inzo yê ni ima yoso yala-nayu, kanda xala ni kima.” O mundu* woso wexile bhenyobho watambwijila, wixi: “Kyene!” Anga aximana Jihova. Kyenyiki, o mundu wakumbidila o ima yakanena o kubhanga.

14 Kikyene ngo, tunde o kizuwa kya ngisolo o sobha phala kukala nguvulu ya ixi ya Judá, kikale eme, kikale o jiphange jami, kitwadi ku mbolo yatokalele ku nguvulu tunde ku muvu wa makwinyi ayadi ndu ku muvu wa makwinyi atatu ni kiyadi wa utuminu wa sobha Artaxerxe, kifwa mu dikwinyi ni kiyadi kya mivu. 15 Maji o jinguvulu ja ngidyangele, atatesa o mundu. Exile mu ajijidika kufuta makwinyi awana a jixikulu* ja phalata izuwa yoso, phala kusumba mbolo ni vinyu. Kate mwene o akwatekexi’â exile we mutatesa o mundu. Maji-phe, eme kikyene ki ngabhange, mukonda dya wôma wa Nzambi.

16 Ngakalakala we mu kutunga o kilumbu kiki, kitwasumbu mabhya. Akwatekexi ami oso, akexile we kwenyoko phala kukalakala. 17 Kwexile hama ni makwinyi atanu a Jijudé ni akwatekexi a jinguvulu exile mudya kumoxi n’eme. O akwa jixi jengi exile mukwiza mutukunda, exile we mudya kumoxi n’eme. 18 Kwexile mayala exile mutulambela izuwa yoso ndumbe ya ngombe, mbudi jisamanu jadisanze ni jisanji. Mu dikwinyi ni dikwinyi dya izuwa, ngexile mutuma kubheka vinyu yavulu. Né mwene ni ima yoso yiyi, kingexile mu jijila ku ngibhana o kudya kwatokala kutambula o nguvulu, mukonda o mundu watatele kya ni ikalakalu. 19 Bhenyobho ngasambe: “Nzambi yami tata, kana ku ngijimba. Ngibesowale mu yoso i ngabhange phala o mbote ya mundu yú.”

6 Kyoso Sambalate ni Tobiya ni Jeseme o mukwa Alábya ni jinguma jetu jamukwa, kyevu kwila twazubha kutungulula o kilumbu, ni kwila kikwexile dingi misula, (sumbala o myelu ki tu itele luwa o mabhitu), 2 Sambalate ni Jeseme a ngitumikisa njimbu. O njimbu yambele kiki: “Za tudisange mu sanzala yala mu Honga ya Hono.” Mukidi, ene exile mufunya ndunge ya ku ngibhanga kima kyayibha. 3 Kyenyiki, nga atumikisa akunji phala ku atangela, ngixi: “Eme nga mubhanga kikalakalu kyadikota, kinganda tena kudisanga n’enu. Mukonda se ngiya mudisanga n’enu, o kikalakalu kyanda kwimana.” 4 O njimbu yiyi, ene a ngitumikisa-yu luwana. Eme we nga atambwijila luwana mu ukexilu umoxi.

5 Lwa katanu, Sambalate watumu mukwatekexi wê kutula o njimbu yiyi. Mwene weza ni mukanda bhu maku, maji o mukanda yú ka ujikile. 6 Mu mukanda asoneka-mu kiki: “Kyafumana ku akwa jixi jengi ni Jeseme we wa kitange kwila, eye ni akwa Judá, mwa mubanza kubalukila o sobha. Kyene kya mu mibhangesa kutungulula o kilumbu. Ambe we kwila, éye wanda kala o sobha yâ. 7 Kikyene ngo, eye we wasolo jipolofeta phala kutula njimbu yalungu n’eye mu Jeluzaleme, yambe: ‘Mu Judá mwala sobha!’ Kyenyiki, o maka yá twanda kwa atangela o sobha. Eye-phe za tudikunde o maka yá.”

8 Eme ngatumu ku mutangela, ngixi: “O ima yoso yiyi i wa muzwela, ki yakidi, éye mwene wa mu ifunya ku muxima wé.” 9 Mukonda enyoso exile musota kutukwatesa wôma, mu kwamba: “Ene anda luwala,* kanda tena kuzubha o kikalakalu.” Bhenyobho ngasambe, ngixi: “Nzambi yami tata, ngiswinise.”*

10 Mu thembu yenyoyo, Semaya mon’a Delaya, mulawula a Mehetabele a mufidisile kutunda kubhata. Mu kiki, ngayi kubhata dyê, mwene yu wambe, wixi: “Kiyadi kyetu twatokala kudisanga mu inzo ya Nzambi yakidi, mu tembulu. Tujika o mabhitu a tembulu mukonda anda kwiza mu kujibha. Ene anda kwiza mwene mu usuku yú phala ku kujibha.” 11 Maji eme ngebhwidisa: “Diyala dyala ni ungana kala eme dilenga? Dibokona mu tembulu anga ukala ni mwenyu?” Kana! Kinganda bokona. 12 Bhenyobho kya ngitetulukila kwila, ki Nzambi watumikisa o polofeta yiyi. Maji Tobiya ni Sambalate, éne a mufutu phala ku ngi nganala. 13 A mufutile kitadi phala ku ngikwatesa wôma ni ku ngibhangesa kuta kituxi. Mukubhanga o ima yiyi, ene eji xidisa o dijina dyami ni ku ngisebhulula.

14 Bhenyobho ngasambe: “Nzambi yami tata, kana kujimba o ibhangelu ya Tobiya ni ya Sambalate. Lembalala we o ibhangelu ya Nowadiya, o polofeta ya muhatu ni jipolofeta jamukwa, exile mu ngikwatesa wôma.”

15 Phala kuzubha kutungulula o kilumbu, kwabhiti makwinyi atanu ni kiyadi kya izuwa. Kifwa, a kizubha mu kizuwa kya makwinyi ayadi ni kitanu kya mbeji ya Elulu.*

16 Kyoso jinguma jetu kyevu o ima yiyi ni kwila o ifuxi ya tukondolokele a kimono, jisonyi ja akwata. Ene axikina kwila, twatena ngo kuzubha o kikalakalu kiki ni kikwatekesu kya Nzambi yetu. 17 Mu izuwa yenyoyo, o atwameni a Judá exile mutumikisa mikanda yavulu kwa Tobiya. Tobiya-phe wexile mu atambwijila mu ku atumikisa we mikanda. 18 Kwexile athu avulu mu mbanza ya Judá exile ku mbandu ya Tobiya, mukonda mwene wexile holome ya Sekaniya mon’a Ala. Jowanane mon’a Tobiya wasakanene ni mon’a Melulane, mon’a Belekiya. 19 Athu avulu mu mbanza ya Judá exile we mu ngitangela o ima yambote yexile mubhanga Tobiya. Ene anga a mutangela we o ima i ngexile muzwela. Mukonda dya kiki, Tobiya wexile mu ngitumikisa mikanda phala ku ngikwatesa wôma.

7 Kyoso kyabhu o kikalakalu kya kutungulula o kilumbu, twate-ku o mabhitu. Mu kusuluka, o alangidi a mabhitu ni jingimbidi ni Jilevita, atambula ikalakalu yâ. 2 Kyenyiki, ngasolo phangyami Hanani phala kutumina mu mbanza ya Jeluzaleme, kumoxi ni Hananiya o kabhitangu ka sabhalalu ya masoladi. Mukonda Hananiya wexile ni kilunji, muthu wa ku mudyelela. Wexile we muxila o Nzambi yakidi, athu amukwa ndenge. 3 Kyenyiki, eme nga atangela, ngixi: “Se o mwanya ki utemuka luwa, o mabhitu a mbanza ya Jeluzaleme ka ajikule. O alangidi a mabhitu atokala kujika o mabhitu ande dya kuzumbuka o kukalakala. Nga atumu we kusola alangidi mwaxaxi ka mundu watungile mu Jeluzaleme. Amoxi eji langidila o kilumbu tunde mu ididi yosole, amukwâ eji kilangidila tunde bhu mwelu wa jinzo jâ.” 4 Jeluzaleme yexile mbanza yadikota, maji atolo atungile-mu. O jinzo kajitungulwile luwa.

5 Nzambi yami wa ngibhana o kayula ka kudyongeka ni atwameni ni akwatekexi a jinguvulu ni mundu woso, phala kwa asonekesa kala kyatokala mu miji yâ. Ngasange-phe o divulu mwasonekene o majina a yó adyangele kuvutuka mu Jeluzaleme. Mu divulu didi asoneka-mu kiki:

6 Ku akwa Izalayele a ambatele ku ixi yengi kwa Nabukodonozolo sobha ya Babilonya, avulu atokalele ku kibatu kya Judá. Ene avutuka ku kibatu kya Judá, mu mbanza ya Jeluzaleme. Kala muthu mu mbanza yê. 7 O mayala endesa o mundu mu kuvutuka, enyá: Nzolobabele, Jesuwa, Nehemiya, Azadiya, Lahamiya, Nahamane, Moledekayi, Bilisane, Mixipelete, Bikivayi, Nehume ni Bahana.

O mayala akwa Izalayele, enyá: 8 Ku an’a Paloji, midi jiyadi ni hama ni makwinyi asambwadi ni kiyadi; 9 ku an’a Sefatiya, hama jitatu ni makwinyi asambwadi ni kiyadi; 10 ku an’a Ala, hama jisamanu ni makwinyi atanu ni kiyadi; 11 ku an’a Pahate-Mowabe ku mwiji wa Jesuwa ni Jowabe, midi jiyadi hama nake ni kwinyi ni dinake; 12 ku an’a Elame, midi ni hama jiyadi ni makwinyi atanu ni kiwana; 13 ku an’a Zatu, hama nake ni makwinyi awana ni kitanu; 14 ku an’a Zakayi, hama sambwadi ni makwinyi asamanu; 15 ku an’a Binuwi, hama jisamanu ni makwinyi awana ni dinake; 16 ku an’a Bebayi, hama jisamanu ni makwinyi ayadi ni dinake; 17 ku an’a Azengadi, midi jiyadi ni hama jitatu ni makwinyi ayadi ni kiyadi; 18 ku an’a Adonikane, hama jisamanu ni makwinyi asamanu ni sambwadi; 19 ku an’a Bikivayi, midi jiyadi ni makwinyi asamanu ni sambwadi; 20 ku an’a Adimi, hama jisamanu ni makwinyi atanu ni kitanu; 21 ku an’a Atele ku mbutu ya Ezekiya, makwinyi avwa ni dinake; 22 ku an’a Hasune, hama jitatu ni makwinyi ayadi ni dinake; 23 ku an’a Bazayi, hama jitatu ni makwinyi ayadi ni kiwana; 24 ku an’a Hadife, hama ni dikwinyi ni kiyadi; 25 ku an’a Ngibiyone, makwinyi avwa ni kitanu; 26 o mayala akwa Beleme ni akwa Notofa, hama ni makwinyi anake ni dinake; 27 o mayala akwa Anatote, hama makwinyi ayadi ni dinake; 28 o mayala akwa Bete-Azemavete, makwinyi awana ni kiyadi; 29 o mayala akwa Kidyate-Jadimi, akwa Kefila ni akwa Behelote, hama sambwadi ni makwinyi awana ni kitatu; 30 o mayala akwa Lamá ni akwa Jeba, hama jisamanu makwinyi ayadi ni kamoxi; 31 o mayala akwa Mikima, hama ni makwinyi ayadi ni kiyadi; 32 o mayala akwa Betele ni akwa Hayi, hama ni makwinyi ayadi ni kitatu; 33 o mayala a mbanza yamukwa ya Nebu, makwinyi atanu ni kiyadi; 34 ku an’a a diyala dyengi amwixana Elame, midi ni hama jiyadi ni makwinyi atanu ni kiwana; 35 ku an’a Hadimi, hama jitatu ni makwinyi ayadi; 36 o mayala akwa Jedikó, hama jitatu ni makwinyi awana ni kitanu; 37 o mayala akwa Lode, akwa Hadide ni akwa Hono, hama sambwadi ni makwinyi ayadi ni kamoxi; 38 o akwa Sená midi jitatu hama avwa ni makwinyi atatu.

39 Ku akunji: O an’a Jadaya ku mwiji wa Jesuwa, hama avwa ni makwinyi asambwadi ni kitatu; 40 o an’a Imele, midi ni makwinyi atanu ni kiyadi; 41 o an’a Pasule, midi ni hama jiyadi ni makwinyi awana ni sambwadi; 42 o an’a Hadimi, midi ni dikwinyi ni sambwadi.

43 Ku Jilevita: O an’a Jesuwa watokala ku mwiji wa Kadimiyele ku an’a Hodeva, makwinyi asambwadi ni kiwana. 44 O jingimbidi: O an’a Azafe, hama ni makwinyi awana ni dinake. 45 O alangidi a mabhitu: O an’a Salume, o an’a Atele, o an’a Talumone, o an’a Akube, o an’a Hatita ni an’a Sobayi, hama makwinyi atatu ni dinake.

46 O akalakadi* a tembulu: O an’a Ziya, o an’a Hasufa, o an’a Tabawote; 47 o an’a Kelo, o an’a Siyá, o an’a Padone; 48 o an’a Lebana, o an’a Hangaba, o an’a Salamayi; 49 o an’a Hanane, o an’a Jidele, o an’a Ngahali; 50 o an’a Lehaya, o an’a Lezime, o an’a Nekoda; 51 o an’a Ngazame, o an’a Uza, o an’a Pezeya; 52 o an’a Bezayi, o an’a Mewunime, o an’a Nefuzime; 53 o an’a Bakibuke, o an’a Hakufa, o an’a Halulu; 54 o an’a Bazelite, o an’a Meyída, o an’a Halasa; 55 o an’a Báluku, o an’a Xixela, o an’a Temá; 56 o an’a Neziyá ni an’a Hatifa.

57 O an’a jiselevende ja Solomá: O an’a Sotayi, o an’a Sofetele, o an’a Pelida, 58 o an’a Jahala, o an’a Dakone, o an’a Jidele, 59 o an’a Sefatiya, o an’a Hatili, o an’a Phoketele-Hazebayime ni an’a Amone. 60 O akalakadi oso a tembulu ni ana a jiselevende ja Solomá, atenesa hama jitatu ni makwinyi avwa ni kiyadi.

61 Oso atundu ku Tele-Mela, ku Tele-Hasa, ku Kelube, ku Adane ni ku Imele alembwa kujimbulula kyebhi kya avwala ku mwiji wa jitata jâ, phala kwijiya se exile akwa Izalayele mba kana, enyá: 62 O an’a Delaya, o an’a Tobiya ni an’a Nekoda hama jisamanu ni makwinyi awana ni kiyadi. 63 Ku akunji: O an’a Habaya, o an’a Haku, o an’a Badizilayi wasakanene ni mon’a muhatu ku an’a Badizilayi mukwa Ngiliyade, ya a mulukile o dijina dya mwiji wenyú. 64 Enyoso yá asoto o majina mu madivulu phala kwijiya kwatundu o miji yâ, maji ka asange. Mu kiki, ka ehela kubhanga o kikalakalu kya ukunji.* 65 O nguvulu* wa afidisa kudya o ima ikôla kate kyeji sola o mukunji ukala ni Udimi ni Tumini.

66 Athu oso atenesa makwinyi awana ni kiyadi kya midi ni hama jitatu ni makwinyi asamanu. 67 O abhika a mala ni a ahatu atenesa sambwadi dya midi ni hama jitatu ni makwinyi atatu ni sambwadi, ka atange. Kwexile we hama jiyadi ni makwinyi awana ni kitanu kya jingimbidi ja mala ni ja ahatu. 68 O jikabalu jâ, jatenesa hama sambwadi ni makwinyi atatu ni samanu; o jimula jâ, hama jiyadi ni makwinyi awana ni kitanu; 69 o jikamelu jâ, hama jiwana ni makwinyi atatu ni kitanu; o jijumendu jâ, midi jisamanu ni hama sambwadi ni makwinyi ayadi.

70 Amoxi ku atwameni a miji ya jitata, abhana maujitu phala kukwatekesa o kikalakalu kya kutungulula. O nguvulu wabhana we midi ya jidalákama* ja ulu, makwinyi atanu a matijela ni hama jitanu ni makwinyi atatu a izwatu yalebha phala o akunji. 71 Ku atwameni a miji ya jitata, amukwa asangela we makwinyi ayadi a midi a jidalákama ja ulu ni midi jiyadi ni hama jiyadi a jimina* ja phalata. 72 Akamukwa ku mundu asangela makwinyi ayadi a jimidi a jidalákama ja ulu ni midi jiyadi a jimina ja phalata ni makwinyi asamanu ni sambwadi a izwatu yalebha phala o akunji.

73 Mu kyenyiki, o akunji ni Jilevita, ni alangidi a mabhitu, jingimbidi ni amoxi ku mundu, kumoxi ni akalakadi a tembulu ni akwa Izalayele amukwâ, ayi kya mutunga mu jimbanza jâ. Mu mbeji ya kasambwadi,* mundu woso wa Izalayele* wexile kya mu jimbanza jâ.

8 O mundu woso wadyongeka-phe bhu kididi bhu bhita athu avulu, bhwa zukama ni Mwelu wa Menya.* Kyenyiki, abhingi ku musoneki Ejidala phala kubheka o divulu dya Kijila kya Mozé, kyabhanene Jihova ku akwa Izalayele. 2 Mu kizuwa kya dyanga mu mbeji ya kasambwadi, o mukunji Ejidala wabheka o divulu dya Kijila bhwa dibhongolokele o mundu. Mwaxaxi kâ bhwexile mayala, ahatu ni athu oso atenene kwivwa ni kutendela o ima yexile mutanga. 3 Mwene waditangela o athu oso adyongekele bhu kididi bhu bhita athu avulu, bhwa zukama ni Mwelu wa Menya. Mundu woso wedile mátwi tekenge mukwivwa o kitangelu kya divulu dya Kijila, tunde mu kamene ndu ku mediya. 4 O musoneki Ejidala, wemanene ku ditala dyobhange ni mabaya phala o kyônge kyenyokyo. O athu emanene ku mbandu yê ya kadilu, enya: Matitiya, Sema, Anaya, Udiya, Hilikiya ni Mahaseya. O athu emanene ku mbandu yê ya kyasu, enya: Pedaya, Mizayele, Malekiya, Hasune, Haxibanada, Zakadiya ni Melulane.

5 Mundu woso wamono kyoso Ejidala kyajikula o divulu, mukonda mwene wemanene ku ditala. Kyoso Ejidala kyajikula o divulu, mundu woso wabalumuka. 6 Ejidala waximana-phe Jihova o Nzambi yakidi, Muteni wa Yoso. Mundu woso watambwijila ni maku bhulu, exi: “Kyene! Kyene!” Afukama ni pholo bhoxi, abheza Jihova. 7 O Jilevita Jesuwa, Bani, Selabiya, Jamine, Akube, Sabetayi, Hodiya, Mahaseya, Kelita, Azadiya, Jozabade, Hanane ni Pelaya exile mujimbulula o Kijila ku mundu wemanene. 8 Exile we mutanga o divulu dya Kijila kya Nzambi ni dízwi dyaswina. Kiki kyakwatekesa o maka kulombolokela kyambote o mundu wexile mu kwivwa.

9 O nguvulu Nehemiya ni mukunji Ejidala o musoneki ni Jilevita exile mulonga o mundu, ambela oso, exi: “Lelu kizuwa kikôla phala Jihova Nzambi yenu. Kimuditende, kimudile.” Mukonda o mundu woso wexile mudila kyoso kyevu o izwelu ya Kijila. 10 Nehemiya wa ambela, wixi: “Ndenu mudyé kudya kwambote, munwe ima yatowala. Tumikisenu we kudya kwa yó kala ni kya kudya, mukonda lelu kizuwa kikôla phala Ngana yetu. Kimuluwale, mukonda o kusanguluka kutunda kwa Jihova kwene o nguzu yenu.” 11 O Jilevita exile mutululukisa o mundu woso, exi: “Kimudile, kimuluwale, mukonda lelu kizuwa kikôla.” 12 Kyenyiki, o mundu woso watundu bhenyobho ya ayi mudya ni kunwa. Atumikisa we kudya kwa yó kexile ni kima. Asangulukile kyavulu, mukonda o izwelu ya Kijila ya atetulukila.

13 Mu kizuwa kya kayadi, o atwameni a miji, kumoxi ni akunji ni Jilevita, adibhongolola bhwexile o musoneki Ejidala phala o izwelu ya Kijila ya atetulukile mwene kyambote. 14 Bhenyobho, mu Kijila kyabhana Jihova ku akwa Izalayele bhukaxi ka Mozé, asange mwosoneke kwila akwa Izalayele atokalele kutunga mu jibalaka mu kithangana kyeji bhanga o fesa ya mbeji ya kasambwadi. 15 Atokalele we kuya mu jimbanza joso ni mu Jeluzaleme phala kwambela o mundu, exi: “Ndenu ku milundu mutakane-ku jithangu ja muxi wa midiva, ja muxi wa pinyu, ja muxi wa muluta ni isalale ya maye ni jithangu ja mixi yengi yazande phala kubhanga-naju jibalaka kala kyosoneke.”

16 Kyenyiki, o mundu utunda anga abheka jithangu phala kutunga o jibalaka jâ. Kala muthu watungu o balaka ku thala dya inzo yê ni mu kithádi kyê ni mu kithádi kya inzo ya Nzambi yakidi ni bhu kididi bhu bhita athu avulu bhu Mwelu wa Menya ni bhu kididi bhu bhita athu avulu bhu Mwelu wa Efalayíme. 17 Athu oso a akwikile, avutuka, atungu jibalaka anga akala mwenyomo. Akwa Izalayele kexile mubhanga dingi o fesa yiyi tunde mu izuwa ya Jozuwé, mona Nune. Kiki kyene kya abhangesa kusanguluka kyavulu mu kizuwa kyenyokyo. 18 O Kijila kya Nzambi yakidi, exile mukitanga izuwa yoso tunde mu kizuwa kya dyanga ndu mu kizuwa kyasukina. Ene abhange o fesa mu sambwadi dya izuwa. Mu kizuwa kya dinake, abhange kyônge kyadikota, kala kyatendelesele o Kijila.

9 Mu kizuwa kya makwinyi ayadi ni kiwana kya mbeji ya kasambwadi akwa Izalayele adibhongolola phala kujila.* Azwata izwatu ya jisaku ya adikungu uthôkwa. 2 Kyenyiki, o mbutu ya akwa Izalayele yadisandula mwaxaxi ka akwa jixi jengi anga emana phala kufisala o ituxi yâ ni ikuma ya jitata jâ. 3 Ene emana bhenyobho, atange o divulu dya Kijila kya Jihova Nzambi yâ ni dízwi dyaswina, mu ola jitatu. Abhange we ola jitatu ni kufisala o ituxi yâ ni kufukamena bhu pholo ya Jihova Nzambi yâ.

4 Jesuwa, Bani, Kadimiyele, Sebaniya, Buni, Selabiya, Bani ni Kenani, emana ku ditala dyatokalele ku Jilevita dyobhange ni mabaya, ya adyondela kwa Jihova Nzambi yâ ni dízwi dyaswina. 5 O Jilevita Jesuwa, Kadimiyele, Bani, Hasabeneya, Selabiya, Hodiya, Sebaniya ni Petaya ambe, exi: “Balumukenu, muximane Jihova Nzambi yenu kate ku hádya. Nzambi tata, ehela-u kuximana o dijina dyé dyonene dyatundu o diximanu dya muthu woso-woso.

6 “Éye ngo u Jihova. Éye wabhange o dyulu, kyene mwene, o dyulu dya dileka ni yoso yala-mu,* o ngongo ni yoso yala-mu, o musanza wa kalunga ni yoso yala-mu. Enyoso wa abhana mwenyu, o kifuxi kya dyulu ki kala mu ku kubheza. 7 Éye u Jihova, o Nzambi yakidi wasolo Mbalamu, wa mukatula ku Ule o mbanza ya Kaladeya, éye wa muluku o dijina dya Mbalahamu. 8 Eye wamono kwila, mwene wexile mu kubelesela ni muxima woso. Mukonda dya kiki, wate-nê kikutu kya ku mubhana o ixi ya akwa Kanana, ya akwa Hiti, ya akwa Mamodi, ya akwa Mapelezi, ya akwa Jebuze ni ya akwa Jidingaze. O kikutu wakite ni mwene ni mbutu yê. Eye-phe wakumbidila yoso i wakanena mukonda u muthu wayuka.

9 “Eye wamono o kutata kwa jikuku jetu ku Ijitu, wevu o kudikola kwâ kyoso kyabhingi o kikwatekesu bhu mbandu a musanza wa Kalunga Kakusuka. 10 Kyenyiki, wabhange ijimbwete ni madiwanu phala kukastikala Falawó ni jiselevende jê ni mundu wê woso ku ixi yê. Mukonda wejidile kwila, o mundu wé exile mu atalesa hadi. Eye wafumanesa o dijina dyé, adijiya kyambote kate lelu. 11 Wa wanuna o musanza bhu pholo yâ, ene azawuka o musanza wa Kalunga mu mavu akukuta. Wabobesa o jinguma jâ mu menya azongo, kala ditadi dyotakule mu menya. 12 Mu mwanya wa endesa bhukaxi ka dituta, mu usuku wa endesa bhukaxi ka philadi ya túbhya phala ku amwikina o njila yatokalele kwendela. 13 Watula ku mulundu wa Sinayi, éye wazwela-nawu tunde ku dyulu. Wa abhana ijila phala kufundisa ni kuyuka, ijila yakidi, jingonge ni itumu yambote. 14 Wa alongo kubhaka o kizuwa kya sábhalu mukonda kizuwa kikôla. Wa abhana itumu, jingonge ni ijila bhukaxi ka selevende yé Mozé. 15 Kyoso kyexile ni nzala, eye wa abhana kudya. Kyoso kyexile ni dinyota, wabhangesa kutunda menya ku ndanji,* éye wa abhangesa kubokona mu ixi i wakanena* ku abhana.

16 Maji-phe o jikuku jetu abhukumuka. Ene ahukile, kabelesela o itumu yé. 17 Ene kamesenene kwivwa, kalembalala we o ima ya madiwanu i wabhange mwaxaxi kâ. Abhukumuka ya asolo muthu phala ku atwamenena n’a vutuka ku ubhika, ku Ijitu. Maji-phe, eye Nzambi u mukwa kuloloka, u mukwa kukwatela henda, u mukwa kubhanga mbote, u mukwa mwanyu, o henda yé yakalela-ku. Eye ki wa ehelela, kana. 18 Né mwene kyoso kyabhange o kiteka kya kangombe ya ambe, exi: ‘Yiyi yene o Nzambi yetu yatukatula mu ixi ya Ijitu’, anga akamba ku kuxila, 19 maji mu henda i wa akwatela, ki wa abwazeka mu kikangalakata, o dituta dyexile mwa endesa mu mwanya, ki dyasondoloka, o philadi ya túbhya yexile mwa mwikina o njila yatokalele kwendela, kiyasondoloka we. 20 Eye wa abhana o nzumbi yé ikôla phala akale ni kwijiya, wa abhana maná ni menya kyoso kyexile ni dinyota. 21 Wa abhana kudya mu kikangalakata, mu makwinyi awana a mivu. Ki ku akambele kima. O izwatu yâ kiyakukile, inama yâ kiyajimbile ni kwenda.

22 “Eye wa abhana mautuminu ni athu, mu kwa awanena o jixi. Kyenyiki, atambula o ixi ya Sihone, kifwa, o ixi ya sobha Hexebone. Atambula we o ixi ya Hoke sobha ya Basane. 23 Eye wasokolola o twana twâ kala o jithéthembwa ku dyulu. Kyenyiki, wa ambata mu ixi i wakanena kubhana ku jikuku jâ phala ku ilundula. 24 Ene abokona ya alundula o ixi, wa akwatekesa kutolola akwa Kanana, kifwa, o athu atungile mwenyomo. O jisobha ni mundu watungile mwenyomo, wa abhakula bhu maku mâ, phala akwa Izalayele a abhange yoso yamesena. 25 Ene atambula jimbanza jexile ni ilumbu ni mavu abhana idima yambote. Atambula we jinzo jezala ni jimbote ni ixima yokande kya, mixi ya midiva ni mixi ya mivide, ni mixi ibhana ibundu yavulu. Adi, ekuta, anete ni ima yoso i wa abhana.

26 “Maji ene kabelesela, a kubhukumukina, ya a bhukumukina we o kijila kyé. O jipolofeta jé jiwatumikisa phala ku adimuna n’a vutuka kwokwé, ene a jijibha. A kusebhulula bhukaxi ka ibhangelu yâ. 27 Mukonda dya kiki, wa ehelela bhu maku a jinguma jâ jexile mu atatesa. Maji mu kutata kwâ, ene exile mudikola kokwé mu kubhinga kikwatekesu. Eye wexile mwa evwa tunde ku dyulu. Wa abhana atwameni phala ku abhulula bhu maku a jinguma jâ, mukonda dya henda yé yadikota.

28 “Maji kyoso ki kwexile mutululuka, ene exile mubhanga dingi o ima ya kuyibhila. Eye wexile mwa ehelela dingi bhu maku a jinguma jâ jexile mu atatesa. Maji kyoso kyexile dingi mudikola kokwé ni ku kubhinga kikwatekesu, eye wexile mwa evwa tunde ku dyulu ni ku akwatekesa lwavulu mukonda dya henda yé yadikota. 29 Eye wa adimuna phala kabhukumukine o Kijila kyé, maji ene aditunu kubelesela o itumu yé, mukonda dya ukumbu wâ. Ene kabelesela o jingonge jé jibhana o mwenyu kwa yó u jibelesela. Ene ajiji ni ku kubhukumukina, kakubelesela. 30 Wa akwatela mwanyu mu mivu yavulu, wasuluka ni ku adimuna bhukaxi ka jipolofeta jiwabhana o nzumbi ikôla, maji ene kaxikina kwivwa. Ku disukilu, wa ehela bhu maku a ifuxi ya akondolokele. 31 Kuma wa akwatela henda, ki wa ajimi o mbutu mba u a ehelela, mukonda eye u Nzambi ya henda, u mukwa kuloloka.

32 “Nzambi yetu tata, eye u Nzambi yonene, wala ni kutena, wafwama ku kukwatela o wôma, u kumbidila o kikutu kyé, u mukwa kubhanga o mbote.* Kana kujimba o hadi i twatale, yatale o jisobha jetu, o ilamba yetu, o akunji etu, o jipolofeta jetu, o jikuku jetu ni mundu wé woso, tunde mu izuwa ya jisobha ja Asídya kate mu kizuwa kya lelu. 33 Ima yoso i twabhiti-nayu, ki kikuma kyé, mukonda wa kumbidila o kikanenu kyé. Étu twabhange ima yayibha. 34 O jisobha jetu, o ilamba, o akunji ni jikuku jetu, kabelesela o Kijila kyé, kabhana we mátwi ku itumu ni itendelesu yé. 35 Né mwene kyoso jisobha kyexile mutumina ni kusanguluka ni ima yoso yambote i wa abhana mu ixi yadikota, mwala mavu abhana idima yambote, ene kakusidivila, keha we o ibhangelu yâ yayibha. 36 Kyenyiki, lelu twala tu abhika. Kyene mwene! Tu abhika mu ixi i wabhana ku jikuku jetu phala adye-mu o idima yê. 37 Mukonda dya ituxi yetu, idima yoso i tubhongolola mu ixi yiyi, twene mu ibhana ku jisobha ja mu tutumina. Ene a tutumina* kala kyamesena, abhanga we yoso yamesena ni ibhaku yetu. Twabhondalala kyavulu.

38 “Mukonda dya ima yoso yiyi, twate kikutu, étu twa kisoneka. O ilamba ni Jilevita ni akunji etu, a mu kijika kala muthu ni kidimbu kyê.”

10 Oso ajikile o mukanda wa kikutu ni kidimbu, enya:

9 O Jilevita ajikile o mukanda wa kikutu ni kidimbu, enya: Jesuwa mon’a Azaniya, Binuwi ku an’a Henadade, Kadimiyele, 10 Sebaniya, Hodiya, Kelita, Pelaya, Hanane, 11 Mika, Lehobo, Hasabiya, 12 Zakule, Selabiya, Sebaniya, 13 Hodiya, Bani ni Beninu.

14 O atwameni a mundu ajikile o mukanda wa kikutu ni kidimbu, enya: Paloji, Pahate-Mowabe, Elame, Zatu, Bani, 15 Buni, Azengadi, Bebayi, 16 Adoniya, Bikivayi, Adimi, 17 Atele, Ezekiya, Azule, 18 Hodiya, Hasune, Bazayi, 19 Hadife, Anatote, Nebayi, 20 Mangepiya, Melulane, Hezide, 21 Mesezabele, Zadoke, Jaduwa, 22 Pelatiya, Hanane, Anaya, 23 Ozeya, Hananiya, Hasube, 24 Loweje, Pilya, Sobeke, 25 Lehu, Hasabena, Mahaseya, 26 Ahiya, Hanane, Anane, 27 Maluke, Hadimi ni Bahana.

28 Ku athu amukwa kwexile we o akunji, o jilevita ni alangidi a myelu ni jingimbidi, o akalakadi a tembulu* ni oso adisandwile ku ifuxi ya akondolokele phala kutumaka o Kijila kya Nzambi yakidi kumoxi ni ahatwâ ni twana twâ. Oso exile ni kitala kya kutendela o kikutu. 29 Twamubhanga o kikanenu kiki kumoxi ni atwameni etu bhukaxi ka kikutu kiki. Twanda belesela yoso yala mu Kijila kya Nzambi kyatubhana bhukaxi ka Mozé. Twanda bhanga yoso itutuma kubhanga Jihova Nzambi yetu, twanda tumaka o ijila ni itumu yê. Se tukamba ku kumbidila o kijila kiki, atubhubhidile. 30 Ene akanena, exi: An’etu a ahatu kitwanda kwa asakanesa ni an’â mala a ifuxi ya tukondoloka. O an’â a ahatu kitwanda kwa asakanesa ni an’etu a mala.

31 Se o ifuxi ya tukondoloka ibheka wenji mba kudya kwoso-kwoso phala kutusumbisa-ku kya sábhalu mba mu izuwa yengi ikôla, kitwanda ku asumba kima. Mu muvu wa kasambwadi, kitwanda dima o mavu metu, twanda loloka we yó a tudi makongo.

32 Kikyene ngo, etwenyoso twabakana kwila, kala muthu weji sangela mbandu ya katatu ya xikulu* ku muvu phala o kikalakalu kya inzo* ya Nzambi yetu, 33 phala kubhanga o jimbolo jikôla, o jisata ja kudya jimwatokala kubhakula izuwa yoso, o jisata ja kwoha mu jisábhalu ni ja mbeji ya thethama,* ni jifesa ni ima ikôla ni jisata ja kituxi, phala kuloloka o ituxi ya akwa Izalayele ni kubhanga o ikalakalu yoso mu inzo ya Nzambi yetu.

34 Kikale etu, o akunji ni jilevita twate jisolote phala kwijiya o miji yanda bheka o jihwinyi mu tembulu muvu ni muvu, phala kwoha o jisata jobhakule kwa Jihova Nzambi yetu kala kyosoneke mu Kijila. 35 Twanda bheka o idima ya dyanga ya mabhya metu ni ibundu ya dyanga ya mixi yoso mu inzo ya Jihova. 36 O akunji a mukalakala mu inzo ya Nzambi yetu, twanda ku abhekela we an’etu a phande kumbi ni a ibhaku yetu, kifwa o ana adyanga a jihombo, a jingombe ni a jimbudi jetu, kala kyosoneke mu Kijila. 37 Kikyene ngo, twanda bheka we o idima yetu itudyanga o kubhongolola ku akunji a mukalakala mu maxilu a inzo ya Nzambi yetu, ni maujitu metu, kifwa o ibundu ya mixi yetu yoso, vinyu ya ubhe ni máji, kumoxi ni mbandu ya kakwinyi ya idima ya mavu a ixi yetu, phala o jilevita. Mukonda mu jimbanza jetu, o jilevita éne atambula o mbandu ya kakwinyi ya idima yetu.

38 O mon’a mukunji Alá, watokala kukala kumoxi ni jilevita, kyoso o jilevita kyanda tambula o mbandu ya kakwinyi. Ku mbandu ya kakwinyi yiyi, o jilevita anda bhakula-ku we mbandu ya kakwinyi mu ididi ya kubhakela, phala o inzo ya Nzambi yetu. 39 Mukonda akwa Izalayele ni jilevita, atokala kwambata o maujitu a kudya, a vinyu ya ubhe ni máji mu ididi ya kubhakela. Mwene mwabhake o ima ya kididi kikôla. Kwene we kwala o akunji a mubhanga o kikalakalu kya ukunji, o alangidi a mabhitu ni jingimbidi. O inzo ya Nzambi yetu kitwanda yehelela.

11 O ilamba ya mundu, yexile mu Jeluzaleme. O athu amukwa-phe exile mu jimbanza jengi, ate jisolote phala kusola mwiji umoxi ku dikwinyi dya miji, nayi mutunga mu Jeluzaleme o mbanza ikôla. O dikwinyi dya miji yamukwa, yeji xala mu jimbanza jenyojo. 2 Kikyene ngo, o mundu waximana o atwameni oso a miji, adibhakula mu vondadi yâ phala kuya mutunga mu Jeluzaleme.

3 Yá ene o majina a atwameni a kibatu,* a ile mutunga mu Jeluzaleme. (O athu amukwa mu Izalayele, o akunji, o Jilevita, o akalakadi a tembulu ni ana a jiselevende ja Solomá, axala mu jimbanza jamukwa ja Judá, kala muthu mu dibhata dyê ni mu mbanza yê.

4 Amoxi ku mwiji wa Judá ni wa Bejamí akexile we mu Jeluzaleme.) O atwameni a mwiji wa Judá, Ataya mon’a Uziya, mon’a Zakadiya, mon’a Amadiya, mon’a Sefatiya, mon’a Mahalalele, ku an’a Peleji, 5 ni Mahaseya mon’a Mbaluke, mon’a Kodiyose, mon’a Hazaya, mon’a Adaya, mon’a Nzwadibe, mon’a Zakadiya ku an’a Selá. 6 O ana oso a Peleji akexile mu Jeluzaleme, atenesa hama jiwana ni makwinyi asamanu ni dinake. Oso exile mayala aswina.

7 O atwameni ku mwiji wa Bejamí, Salu mon’a Melulane, mon’a Jowede, mon’a Pedaya, mon’a Kolaya, mon’a Mahaseya, mon’a Itiyele ku an’a Jesaya, 8 kwadite dingi Ngabayi ni Salayi. Enyoso atenesa hama avwa ni makwinyi ayadi ni dinake. 9 Jowele mon’a Zikidi mwéne wexile o mutwameni wâ. Judá mon’a Senuwa, mwéne wexile mu mukwatekesa.

10 Ku akunji, Jadaya mon’a Nzwadibe, Jakini, 11 Selayiya mon’a Hilikiya, mon’a Melulane, mon’a Zadoke, mon’a Melayote, mon’a Ahitube, o mutwameni wa inzo ya Nzambi yakidi, 12 kumoxi ni akalakadi amukwa exile mu sidivila mu tembulu, atenesa hama anake ni makwinyi ayadi ni kiyadi; ni Adaya mon’a Jelohamu, mon’a Pelaliya, mon’a Anzi, mon’a Zakadiya, mon’a Pasule, mon’a Malekiya wexile o mutwameni mu inzo ya Nzambi yakidi, 13 kumoxi ni akalakadi amukwa exile we atwameni a miji, atenesa hama jiyadi makwinyi awana ni kiyadi; ni Amasayi mon’a Azaliyele, mon’a Ahazayi, mon’a Mesilemote, mon’a Imele, o mutwameni wa mwiji, 14 kumoxi ni akalakadi amukwa exile mayala aswina, mazonda, atenesa hama ni makwinyi ayadi ni dinake; ni Zabidiyele wexile o mutwameni wâ, watokalele ku mwiji wafumana.

15 Ku Jilevita, Semaya mon’a Hasube, mon’a Azedikame, mon’a Hasabiya, mon’a Buni, 16 ni Sabetayi, Jozabade o atwameni a miji ya Jilevita, exile ku pholo dya ikalakalu yexile mubhanga bhu kanga dya inzo ya Nzambi yakidi. 17 O mutwameni wa jingimbidi jexile mu kwimba mimbu ya kuximana mu ithangana ya kusamba, Mataniya mon’a Mika, mon’a Zabedi, mon’a Azafe ni Bakebukiya wexile mu mukwatekesa, ni Abada mon’a Xamuwa, mon’a Ngalale, mon’a Jedutune. 18 O Jilevita joso jexile mu mbanza ikôla atenesa hama jiyadi ni makwinyi anake ni kiwana.

19 Akube ni Talumone kumoxi ni jiphange jâ, éne exile o alangidi a mabhitu. Enyoso atenesa hama ni makwinyi asambwadi ni kiyadi.

20 Akwa Izalayele asubhuka-ku, kumoxi ni akunji ni Jilevita jamukwa, axala mu jimbanza jengi ja Judá, kala muthu mu ixi yê ya lundula. 21 O jiselevende ja tembulu* axala ku Ofele. Ziya ni Jispa éne exile o atwameni’â.

22 O mutwameni wa Jilevita mu Jeluzaleme, Uzi mon’a Bani, mon’a Hasabiya, mon’a Mataniya, mon’a Mika, ku an’a Azafe, o jingimbidi. Mwéne wexile ku pholo mu ikalakalu mu inzo ya Nzambi yakidi, 23 mukonda o sobha wabhanene kitumu kya kwila, o jingimbidi atokalele ku abhana o ima yeji bhindamena izuwa yoso. 24 Petaya mon’a Mesezabele, ku an’a Nzelá mon’a Judá, mwéne wexile mubhana o jindunge kwa sobha mu maka oso alungu ni mundu.

25 Yalungu ni jisanzala kumoxi ni mikáwu yê, amoxi ku mundu wa Judá ayi mutunga ku Kidiyate-halaba ni mu jisanzala jê jazukamene, ku Dibone ni mu jisanzala jê jazukamene ni ku Jekabesiyele ni mu jisengu jê, 26 ku Jesuwa, ku Molada, ku Bete-palete, 27 ku Hazale-suwale, ku Beleseba ni mu jisanzala jê jazukamene, 28 ku Zikilake, ku Mekonahe ni jisanzala jê jazukamene, 29 ku Ene-dimone, ku Zola, ku Jalemute, 30 ku Zanowa, ku Adulamu ni jisanzala jê, ku Lakiji ni mikáwu yê, ku Azeka ni mu jisanzala jê jazukamene. Ene amateka kutunga tunde ku Beleseba ndu mu honga ya Hinome.

31 O mwiji wa Bejamí waxala ku Jeba, ku Mikimaji, ku Hayi, ku Betele ni mu jisanzala jê jazukamene, 32 ku Anatote, ku Nobe, ku Ananiya, 33 ku Hazole, ku Lamá, ku Ngitayimu, 34 ku Hadide, ku Nzeboyime, ku Nebalate, 35 ku Lode, ku Hono, o honga ya asongi a mabaya. 36 Amoxi ku Jilevita exile mu mbambe ya Judá, a atumikisa mu mbambe ya mwiji wa Bejamí.

12 O akunji ni jilevita avutuka ku Judá kumoxi ni Nzolobabele mon’a Salatiyele ni Jesuwa, enya: “Selayiya, Jelemiya, Ejidala, 2 Amadiya, Maluke, Hatu, 3 Sekaniya, Lehu, Melemote, 4 Idu, Jinetoyi, Abiya, 5 Mihamine, Mahadiya, Bilika, 6 Semaya, Nzwadibe, Jadaya, 7 Salu, Amoke, Hilikiya ni Jadaya. Yá ene exile o atwameni a akunji ni akwa, mu izuwa ya Jesuwa.

8 O jilevita enya: Jesuwa, Binuwi, Kadimiyele, Selabiya, Judá ni Mataniya wexile ku pholo dya kibuka kya jingimbidi exile mu kwimba mimbu ya kuximana Nzambi. 9 O jilevita Bakebukiya ni Uni, emanene bhu pholo yâ mu kulangidila o tembulu. 10 Jesuwa wexile tata ya Joyakime, Joyakime wexile tata ya Eliyazibe, Eliyazibe wexile tata ya Joyada. 11 Joyada wexile tata ya Jonatá, Jonatá wexile tata ya Jaduwa.

12 O exile o akunji ni atwameni mu izuwa ya Joyakime, enya: Ku mwiji wa Selayiya, Melaya mwéne wexile o mutwameni; ku mwiji wa Jelemiya, Hananiya; 13 ku mwiji wa Ejidala, Melulane; ku mwiji wa Amadiya, Jowanane; 14 ku mwiji wa Maluki, Jonatá; ku mwiji wa Sebaniya, Zuze; 15 ku mwiji wa Hadimi, Adena; ku mwiji wa Melayote, Hele-kayi; 16 ku mwiji wa Idu, Zakadiya; ku mwiji wa Jinetone, Melulane; 17 ku mwiji wa Abiya, Zikidi; ku mwiji wa Miyamine . . .;* ku mwiji wa Mowadiya, Pelitayi; 18 ku mwiji wa Bilika, Xamuwa; ku mwiji wa Semaya, Jehonata; 19 ku mwiji wa Nzwadibe, Mathanayi; ku mwiji wa Jadaya, Uzi; 20 ku mwiji wa Salayi, Kalayi; ku mwiji wa Amoke, Hebele; 21 ku mwiji wa Hilikiya, Hasabiya; ku mwiji wa Jadaya, Netanayele.

22 O majina a atwameni a miji ya jilevita ni ya akunji a asonekesa mu izuwa ya Eliyazibe, Joyada, Johanane ni Jaduwa, kate ku utuminu wa Dályu, mukwa Pélesa.

23 O jilevita exile atwameni a miji, o majina mâ a asoneka mu divulu dya misoso, ndu mu izuwa ya Johanane mona Eliyazibe. 24 Hasabiya ni Selabiya kumoxi ni Jesuwa mona Kadimiyele, éne exile o atwameni a jilevita. O akalakadi ni akwa, exile ku pholo yâ phala kwimba mimbu ya kusakidila ni kuximana Nzambi kala kya atendelesele Davidi, o selevende ya Nzambi yakidi. 25 Mataniya, Bakebukiya, Obadiya, Melulane, Talumone ni Akube, éne exile mulangidila o ididi ya kubhakela-mu o ima, yexile bhu mbandu a mwelu wa tembulu. 26 Ene akalakala mu izuwa ya Joyakime mon’a Jesuwa, mon’a Jozadake ni mu izuwa ya nguvulu Nehemiya ni mu izuwa ya mukunji Ejidala, o musoneki.

27 Kyoso kyazubha kutunga o kilumbu kya Jeluzaleme, asokejeka fesa, ya exana o jilevita mu ididi yoso mwakexile, a abheka mu Jeluzaleme mu fesa ya kusanguluka ni kuxika mimbu ya kusakidila, tungoma, tungoji ni misaxi. 28 O jingimbidi joso, adibhongolola, kixi yó exile mu mbambe ya Njolodá, kixi yó exile mu tusanzala twazukamene ku Jeluzaleme ni yó exile mu tusanzala twa Notofa. 29 Abhongolola we akwa Bete-Jidingale ni akwa mikáwu ya Jeba ni akwa Azemavete, mukonda o jingimbidi jatungile mu jisanzala jazukamene ku Jeluzaleme. 30 O akunji ni jilevita adizelesa, azelesa we o mundu, o mabhitu ni kilumbu.

31 Kyenyiki, ngatumu o atwameni a Judá kusambela ku thandu a kilumbu. O jingimbidi jexile mukwimba mimbu ya kuximana Nzambi, nga awane mu ibuka iyadi. O athu eji kwakayela nga awane we mu ibuka iyadi. Kibuka kimoxi kyaditela ku kadilu, ku thandu a kilumbu kwalungila o Mwelu wa Dixita. 32 Mu kibuka kyexile mukayela o jingimbidi, mwexile Hosaya ni kaxaxi ka atwameni a Judá, 33 kumoxi ni Azadiya, Ejidala, Melulane, 34 Judá, Bejamí, Semaya ni Jelemiya. 35 O akunji exile mukwambata o jikoloneta, enya: Zakadiya mon’a Jonatá, mon’a Semaya, mon’a Mataniya, mon’a Mikaya, mon’a Zakule, mon’a Azafe, 36 ni jindandu jê, Semaya, Azaliyele, Milalayi, Jilalayi, Mahayi, Netanayele, Judá ni Hanani. Ene exile mukwambata o iselekete ya kuxika mimbu, kala yexile-nayu Davidi o diyala dya Nzambi yakidi. O musoneki Ejidala, mwéne wexile mu atwamenena. 37 Kyoso kyabhixila bhu Mwelu wa Fixi, asuluka ni kwenda, abande o mulundu, ya abhitila ku maxikata alungila mu Mbanza ya Davidi. Ene abhitila ku thandu a inzo ya Davidi, ya aditela ku Mwelu wa Menya wala ku mbandu kutundila o dikumbi.

38 O kibuka kyamukwa kya jingimbidi kyexile mukwimba mimbu ya kuximana, kyaditela ku kyasu. Eme ni kibuka kyamukwa kya athu exile mu akayela, twaditela ku thandu a kilumbu, twabhitila ku Matala a Majiku kate ku Kilumbu kya Zanze. 39 Twabhitila we bhu Mwelu wa Efalayíme, bhu Mwelu wa Mbanza Yokulu, bhu Mwelu wa Mbiji, bhu Ditala dya Hananele, bhu ditala dya Meya, bhu Mwelu wa Jimbudi, étu twemana bhu Mwelu wa Alangidi.

40 Bhenyobho, o ibuka iyadi ya jingimbidi yemana mu inzo ya Nzambi yakidi, kumoxi n’eme ni atwameni amukwa, 41 ni akunji Eliyakimi, Mahaseya, Miyamine, Mikaya, Elonayi, Zakadiya ni Hananiya, emanene we bhenyobho ni jikoloneta jâ, 42 kumoxi ni Mahaseya, Semaya, Eliyazale, Uzi, Jowanane, Malekiya, Elame ni Ezele. Izalayiya mwéne wexile ku pholo ya jingimbidi, exile mu kwimba ni dízwi dyaswina.

43 Mu kizuwa kyenyokyo, ene abhakula jisata javulu, asangulukile mukonda o Nzambi yakidi wa asangulukisa kyavulu. Kikale o ahatu ni ana ndenge asangulukile, kyabhangesa kwila o mázwi a kusanguluka mu Jeluzaleme a kwivwa dikanga.

44 Mu kizuwa kyenyokyo, asolo mayala phala kukala ku pholo ya ididi mweji bhaka o lubhaku, o idima ya dyanga, ni mbandu ya kakwinyi. Bhwene bhweji tambula o ima yeji tunda ku mabhya azukama ku jimbanza, phala ku ibhana ku akunji ni ku jilevita kala kyosoneke mu Kijila, kuma mu Judá mwexile kusanguluka mukonda dya ikalakalu yexile mubhanga o akunji ni jilevita. 45 O akunji ni jilevita ni jingimbidi ni alangidi a mabhitu, amateka kubhanga o kikalakalu kya Nzambi ni kikalakalu kya kudizelesa, kala kyatendelesele Davidi ni mon’ê Solomá, 46 mukonda m’ukulu, kifwa, mu izuwa ya Davidi ni Azafe, mwexile atwameni a jingimbidi phala kwendesa o mimbu ya kuximana ni kusakidila Nzambi. 47 Mu izuwa ya Nzolobabele ni mu izuwa ya Nehemiya, akwa Izalayele exile mubhana kudya ku jingimbidi ni ku alangidi a mabhitu phala kudikila o ibhindamu yâ ya kizuwa ni kizuwa. Exile mubhana we o mbandu ya kakwinyi ku jilevita, o jilevita akexile mubhana we o mbandu ya kakwinyi ku mbutu ya Alá.

13 Mu kizuwa kyenyokyo, atange o divulu dya Mozé bhu nangu dya mundu. Mu divulu didi asoneka-mu kwila, o akwa Amone ni akwa Mowabe katokalele kukala mwaxaxi ka mundu wa Nzambi yakidi. 2 Mukonda, ene kakwatekesa akwa Izalayele mu ku ambatela kudya ni menya. Maji afutu Balamu phala ku abhubhidila. Maji-phe Nzambi wabhangesa kwila, o kubhubhidila kukituka dibesá. 3 Kyoso kyevu o izwelu ya Kijila, amateka kutungula o mbutu ya akwa jixi jengi* mwaxaxi ka akwa Izalayele.

4 Ande dya kubhita o ima yiyi, o mukunji Eliyazibe, phange ya Tobiya, mwéne wexile mukwendesa o kikalakalu kyakulanga o kididi kya kubhaka o ima mu inzo* ya Nzambi. 5 Mwene wabhele dixilu dyadikota kwa Tobiya. O kididi kiki m’ukulu exile mubhaka-mu o jisata ja makudya, olibanu,* o ima ya kukalakala-nayu mu tembulu, o mbandu ya kakwinyi ya jimbutu, o vinyu ya ubhe ni máji atokalele ku Jilevita, ku jingimbidi ni ku alangidi a mabhitu ni lubhaku lwexile mubhana ku akunji.

6 Kyabhiti o ima yoso yiyi, eme kingexile mu Jeluzaleme, mukonda ngavutukile kwa sobha ku muvu wa makwinyi atatu ni kiyadi wa utuminu wa Artaxerxe sobha ya Babilonya. Mu kubhita kithangana, ngabhingi kwa sobha phala kuvutuka ku Jeluzaleme. 7 Kyoso ki ngabhixila mu Jeluzaleme, ngamono o kuyibha kwa bhange Eliyazibe. Mwene wabhangele mbote kwa Tobiya ya ku mubhana o dixilu dyadikota dyexile mu kithádi kya inzo ya Nzambi yakidi. 8 Mu kumona o ima yiyi, ngaluwala kyavulu. Mukonda dya kiki, ngakatula o imbamba yoso ya Tobiya yexile mu dixilu dyadikota, nga itexi bhu kanga. 9 Mu kusuluka, ngatumu kuzelesa o ididi ya kubhakela o ima, ngatula-mu o ima yatokala mu inzo ya Nzambi yakidi, o jisata ja makudya ni olibanu.

10 A ngitangela we kwila, o jilevita kexile mu abhana dingi kudya. Mukonda dya kiki, o jilevita ni jingimbidi exile mukalakala mu tembulu, kala muthu wayi mu dima mu dibhya dyê. 11 Kyenyiki, ngamateka kubazela o atwameni, ngixi: “Mukonda dyahi mwehela kwila, o inzo ya Nzambi yakidi a ibwazeka?” Bhenyobho, ngabhongolola dingi o Jilevita, éme nga ate mu ididi yá. 12 O mundu woso wa Judá wabheka o mbandu yoso ya kakwinyi ya makudya, ya vinyu ya ubhe ni ya máji, mu ididi ya kubhakela o ima yiyi. 13 Kyenyiki, ngasolo o mukunji Selemiya ni musoneki Zadoke ni Pedaya o mukwa levi, phala kukala ku pholo mu kwendesa o ikalakalu mu ididi ya kubhakela o ima yiyi. Ngasolo we Hanane mon’a Zakule, mon’a Mataniya phala kukala mukwatekexi wâ, mukonda ene exile athu akwadyelela. Éne exile ni kikalakalu kya kuwanena o kudya ku jindandu jâ.

14 Bhenyobho ngasambe, ngixi: “Nzambi yami tata, ku ngijimbe. Kujimbe we o mbote yoso i ngabhange monzo ya tata yami ni kikalakalu kyoso ki ngabhange mu inzo yiyi.”

15 Mu izuwa yenyoyo, ngamono athu mu Judá exile mukama vinyu kya sábhalu, exile mubhongolola kudya kwavulu. O kudya exile mu kwambatela ku thandu a jijumendu. Exile mubheka we vinyu, jiuva, jifiku ni ima ya idifwa yoso mu Jeluzaleme kya sábhalu. Eme-phe nga abazela, ngixi: Kiki ki kizuwa kya kusumbisa kudya. 16 Akwa Tilu atungile mu mbanza, exile mubheka mbiji ni ima yamukwa phala ku isumbisa ku mundu wa Judá ni mu Jeluzaleme kya sábhalu. 17 Bhenyobho, ngabazela o atwameni akwa Judá, ngixi: “Mwa mubhangela-hi o kuyibha kwoso kuku? Enu mwa mubhukumukina o kijila kya sábhalu! 18 Kiki kikyene o kima kyabhange o jikuku jenu, kyabhangesa kwila Nzambi utubhekela windwa mu mbanza yiyi? Kindala enu mwa mubhukumukina we o kijila kya sábhalu? Mwamesena kwila o njinda ya Nzambi ku akwa Izalayele idibandekesa dingi?”

19 Kyenyiki, ande dya kuma kuvunda, kifwa, ande dya kumateka o sábhalu ngatumu kujika o mabhitu a Jeluzaleme. Nga afidisa we kujikula o mabhitu kate kyeji bhita o sábhalu, éme ngatula o akwatekexi ami bhu myelu, phala k’ehele kubokona kima kyoso-kyoso mu mbanza kya sábhalu. 20 Mukonda dya kiki, akwa kuta o wenji ni asumbixi a ima yoso, azekela bhu kanga dya Jeluzaleme, lumoxi mba luyadi. 21 Bhenyobho nga abazela, ngixi: “Mukonda dyahi mwa muzekela bhu kanga bhu mbandu a kilumbu? Se mukibhanga dingi lwamukwa, nganda tuma ku mikuta.” Tunde o thembu yenyoyo, ene kexile mukwiza dingi kya sábhalu.

22 Eme ngatendelesa o Jilevita kudizelesa jinga, n’eze muta alangidi ku mabhitu, phala o kizuwa kya sábhalu akibhake mukonda kizuwa kikôla. Bhenyobho, ngasambe, ngixi: “Nzambi yami tata, kana ku ngijimba.” Ngikwatele henda, kuma o henda yé yakalelaku.

23 Mu izuwa yenyoyo, ngamono we kwila sayi Jijudé asakanene ahatu akwa Ajidode, akwa Amone ni akwa Mowabe. 24 Amoxi ku twana twâ exile muzwela ngo o dimi dya akwa Ajidode ni dya ifuxi yengi, maji kejidile kuzwela o dimi dya Jijudé. 25 Kyenyiki nga abazela, éme nga abhubhidila. Amoxi mudyâ ngatumina ku abeta ni ku avuza o ndemba,* nga abhangesa we kulôka mu dijina dya Nzambi, ngixi: “An’enu a ahatu, ki mu abhane mu kusakana ni an’â mala, kana kusola we o an’â ahatu phala kusakana ni an’enu a mala.” 26 Kyenyiki, nga ambela: “Solomá sobha ya Izalayele, katele kituxi mukonda dya kusakana ni ahatu enya? Kikwexile sobha wasokela-nê mwaxaxi ka ifuxi yoso. Nzambi yê wa muzolele, wa musolo phala kukala sobha ya Izalayele yoso. Maji kate mwene Solomá, wate kituxi mukonda dya kusakana ni ahatu a jixi jengi. 27 Mwabhangela-hi o kuyibha kwoso kuku? Mu kusakana ni ahatu a jixi jengi, kimwexile fiyele kwa Nzambi yetu.”

28 Mona umoxi wa Joyada, mon’a mukunji Eliyazibe, wexile holome ya Sambalate mukwa Betolone. Mukonda dya kiki nga mukaye.

29 Bhenyobho, ngasambe, ngixi: “Nzambi yami tata, kana ku ajimba, mukonda axidisa o kikalakalu kya akunji, kakumbidila o kikutu kya akunji ni kya jilevita.”

30 Kyenyiki, nga azelesa phala o ibhangelu yayibha ya akwa jixi jengi kiyafunyise. Ngasolo akunji ni Jilevita, kala muthu nga mubhana o kikalakalu kyê. 31 Ngasokejeka we o ima phala mu kithangana kyatokala kimukambe jihwínyi ni idima ya dyanga o kubhya.

Bhenyobho ngasambe, ngixi: “Nzambi yami tata, ku ngijimbe.”