ESTELE

1 Mu izuwa ya Asuwelu,* o sobha wakexile mutumina hama ni makwinyi ayadi ni sambwadi dya ibatu,* tunde ku Indya ndu ku Ityopya.* 2 Kyoso sobha Asuwelu kyakexile mutumina mu mbonge* ya Suzana,* 3 mu muvu wê wa katatu wa kukala ku ungana, mwene wabhange fesa yadikota phala o jinguvulu ni jiselevende jê joso. Mu fesa yenyoyo, mwakexile o jikabhitangu ja masoladi ja akwa Pélesa ni ja akwa Medya, o athu akwa fuma ni jinguvulu ja ibatu. 4 Mu hama ni makwinyi anake a izuwa, mwene wedikisa o umvwama wê wafumana ni kutena kwa ungana wê. 5 Kyoso kyabhu o izuwa yiyi, o sobha wabhange fesa yadikota mu kithádi kya inzo yê, mu sambwadi dya izuwa phala o athu oso mu mbonge* ya Suzana,* kikale adyakime, kikale ana ndenge. 6 O kithádi a kifwamesa ni jikulutina jazele ni ja azulu ni mikolo yalinyu yafina, anga ajikuta ku jiphiladi jobhange ni matadi afwama. Bhoxi a kithádi, afwamesa-bhu ni matadi afwama ala ni kolo yakusuka, yazele, yazeluluka ni yaxikatela. Kwexile we yalu yafwama yobhange ni ulu ni phalata.

7 O vinyu exile mu isidivila mu jikopho* ja ulu; o jikopho jiji kijadifwile. Asidivila vinyu yavulu mu fesa, o sobha mwene ngo watena kubhana o vinyu yoso yiyi. 8 Kexile mujijidika athu kwila anwa,* mukonda kyene o kitumu kyabhanene mu fesa. O sobha ni jikabhitangu azwelele kwila kala muthu abhange kala kyamesena.

9 O mvwale Váxiti wabhange we fesa yadikota phala o ahatu, mu inzo ya sobha Asuwelu.

10 Mu kizuwa kya kasambwadi o sobha wasangulukile mukonda dya vinyu, mukiki watumu Mehumanu, Bizita, Hadibona, Bingita, Abangata, Zetadi ni Kadikase o sambwadi dya jikabhitangu exile mutambula konda ya inzo ya sobha Asuwelu, 11 phala kubheka mvwale Váxiti ni kitundu kyê kya ungana ku pholo ya sobha, n’a londekese o kuwabha kwê ku mundu woso ni ku jinguvulu; kuma wafwamene kyavulu. 12 Maji o mvwale Váxiti waxibhaka o kitumu kyabhana o sobha bhukaxi ka jikabhitangu ja inzo yê. Kyenyiki, sobha wafutuluka o njinda anga i mubanda.

13 Sobha wadikundu ni jinjimu ejidile kyambote o itumu ya ixi,* mukonda o maka oso a sobha akexile mu ambata ku jinjimu jiji. 14 O athu abetele-kota mu kukala ni sobha mu ku mubhana o jindunge, enya: Kadisena, Setala, Adimata, Talxixi, Melese, Madisena ni Memukana. O sambwadi dya ilamba yiyi, akwa Pélesa ni Medya, ene exile ni ufolo wa kubhixila kate kwala o sobha, ene we abetele-kota kukala ni kutena mu utuminu. 15 O sobha wa ebhula, wixi: “Kala kyambe o kitumu, ihi yatokala kubhanga kwa mvwale Váxiti waxibhaka o kitumu kyabhana sobha Asuwelu bhukaxi ka jikabhitangu jê?”

16 Memukana watambwijila ku pholo ya sobha ni ya ilamba wixi: “Mu kubhukumukina o sobha, mvwale Váxiti kaxingi ngo o sobha, waxingi we o ilamba ni athu oso atokala mu utuminu wa sobha Asuwelu. 17 Mukonda o athu oso anda kwivwa yabhange o mvwale, anda dituna wa kuxila o anum’yâ, mukwamba: ‘O sobha Asuwelu watumina kubheka mvwale Váxiti ku pholo yê, maji mwene waditunu.’ 18 Mu kizuwa kyenyiki, o ahatu a ilamba ya akwa Pélesa ni Medya, anda kwiza mukwijiya yabhange mvwale, ene anda zwela we kiki ni anum’yâ o ilamba ya sobha; o kiki kyanda bheka jimvunda ni lusebhu. 19 Sobha, se kya kuwabhela, abhange kitumu mu dijina dyê, akisoneka mu itumu ya akwa Pélesa ni Medya, kyabhingi kwila katokala kukijima dingi. O kitumu atokala kukisoneka kiki: Váxiti nuka dingi watokala kuya ku pholo ya sobha Asuwelu. Sobha, bhana o kididi kyê ku muhatu wa mu thundu. 20 Kyoso o athu mu utuminu wê woso kyanda kwivwa o kitumu kya sobha, o ahatu oso anda xila o anum’yâ, kikale o ahatu afuma mba kana.”

21 O sobha ni ilamba awabhela o ndunge yiyi, o sobha wabhingi kubhanga kala kyambe Memukana. 22 Kyenyiki, o sobha watumikisa mikanda mu ibatu yoso ya mutokala, mikanda yoso a isoneka mu ukexilu wa kusoneka wa kibatu ni mu dimi dizwela kifuxi ni kifuxi, mu kwamba kwila, kala diyala ukala mutwameni* wa dibhata dyê ni kwila o athu ku bhata dyê atokala kuzwela o dimi dyê dya uvwalukilu.

2 Kyabhiti o ima yiyi, kyoso Sobha Asuwelu kyatululukile kya, mwene walembalala yabhangele Váxiti ni kaxtiku kasolele phala ku mubhana. 2 Kyenyiki, o jiselevende ja sobha a mwambela: “Tuma mayala n’a kusotele ilumba yawabha kyambote ala hanji mizeletete. 3 Sobha, tuma mayala akala ku pholo mu jimbanza joso ja utuminu wé phala abheke ku mbonge* ya Suzana* mu inzo ya ahatu, o ilumba yoso yawabha kyavulu, yala hanji mizeletete. O Henge selevende ya diyala ya sobha, mukwa kutambula konda ya ahatu, wanda kwabhana yoso yatokala ya kudiwaya ni ya kudiwabhesa nayu. 4 Kyenyiki, o kilumba kyanda kuwabhela, mwéne wanda kala mvwale mu kididi kya Váxiti.” O sobha wawabhela o ndunge yiyi anga ubhanga kyenyiki.

5 Mu mbonge* ya Suzana mwakexile diyala mukwa Judá dijina dyê Moledekayi. Mwene wexile mon’â Jayile, mon’â Ximeyi, mon’â Kiji watokala ku mwiji wa Bejamí. 6 Mwene ni kifuxi kyoso a akatwile mu Jeluzaleme kumoxi ni Jekoniya* o sobha ya Judá anga a abalakala mu Babilonya, kwala o sobha Nabukodonozolo. 7 Moledekayi mwene wasase Hadasa,* amwixana we Estele, mon’â sekulw’ê, mukonda tat’ê ni mam’ê afwile kya. Mwene wexile kilumba kyafwamene kyavulu, Moledekayi wa musase kala mon’ê kyoso tat’ê ni mam’ê kyafu. 8 Kyoso kyabhana o kitumu ni ngonge ya sobha, abheka ilumba yavulu mu mbonge* ya Suzana* anga a abhana kwa Henge phala ku alanga. Estele a mubheka we mu inzo ya sobha anga a mulanga we kwa Henge mukwa kutambula konda ya ahatu.

9 Henge anga uwabhela kyavulu Estele, u mulondekesa henda.* Mwene walenguluka mu ku mubhana o ima yê ya kudiwabhesa ni ku mubhana kudya kwambote. Henge wasolo we sambwadi dya ahatu mu inzo ya sobha phala kulanga Estele. Mwene watumikisa we Estele ni ilumba exile mu mulanga mu kididi kyamukwa kyafwama dingi mu inzo ya ahatu. 10 Estele kazwela kima kyalungu ni mundu wê, jindandu jê, mukonda Moledekayi wa mutendelesa phala kakitangele muthu. 11 Izuwa yoso Moledekayi wexile mu kwimajana bhukanga dya inzo ya ahatu phala kwijiya kyebhi kyexile Estele ni ihi yexile mubhita ni mwene.

12 Ande dya kubhixila o kithangana kya kuya kwa sobha Asuwelu, o ilumba yoso abhingile kudifwamesa mu dikwinyi ni kiyadi kya jimbeji kala kyexile kya o kifwa kya ahatu. Ene exile mu ayudika mu ukexilu yú: Mbeji jisamanu ni kudiwesa* ni máji a mila ni mbeji jisamanu ni kudiwesa ni madizumba engi awabha kyambote. 13 Kyene ngo kiki, o kilumba kyexile pholondo phala kumoneka ku pholo ya sobha. Mwéne wexile mutambula yoso yabhingile mu inzo ya ahatu phala kuyambata mu inzo ya sobha. 14 O kilumba kyexile mubokona mu inzo ya sobha mu ngoloxi. Mu kamene mwene wexile muya mu inzo ya kayadi ya ahatu. Saxigazi o selevende ya sobha, mwéne wexile mulanga o ahatu amukwa a sobha. Maji o kilumba watokalele ngo kuvutuka ku pholo ya sobha se o sobha wa mu wabhelele, anga utuma ku mwixana mu dijina dyê.

15 Kyoso kyabhixila o kithangana kya kuya kwa sobha, Estele mon’â Abiyale sekulu’â Moledekayi wa musase kala mon’ê, mwene kasolo kima kyengi. Wasolo ngo o kima kya mutendelesa Henge o selevende ya sobha, mutwameni wa inzo ya ahatu. (Mu izuwa yenyoyo, Estele exile ku muwabhela kyavulu ku athu oso exile mu mumona.) 16 Estele a mwambata mu inzo ya sobha Asuwelu mu mbeji ya kakwinyi, o mbeji ya Tebete,* ku muvu wa kasambwadi wa Asuwelu kukala ku ungana. 17 Mukiki o sobha weza mu kuzola dingi Estele, ahatu oso ndenge. Mwene wabeta-kota kulondekesa ngalasa ni henda* kwa Estele, ilumba yoso ndenge. Kyenyiki-phe, o sobha wa muzwika o kithundu kya ungana ku mútwe, yu wamute kala mvwale mu kididi kya Váxiti. 18 Mukusuluka, sobha wabhange fesa yadikota phala Estele anga wixana o ilamba yoso ni jiselevende jê. Mwene wabhana we ufôlo ku ibatu yoso ya ixi, wawanena maujitu ku athu avulu, kuma o sobha mwene ngo wexile ni kutena kwa kubhanga kiki.

19 Kyoso kyabheka o mizeletete* muveji ya kayadi, Moledekayi waxikamene* bhu mwelu wa inzo ya sobha. 20 Estele kexile muzwela kima kyalungu ni jindandu jê ni mundu wê, kala kya mutendelesele Moledekayi. Estele wasulukile mu kubelesela o itendelesu ya Moledekayi, kala kyakexile mubhanga kyoso kyatungile hanji ni mwene.

21 Mu izuwa yenyoyo, kyoso Moledekayi kyexile muxikama bhu mwelu wa sobha, Bingitana ni Telexi, o jifixiyadi jiyadi ja sobha* exile mulangidila o mwelu wa inzo ya sobha, akala ni njinda yavulu ya afunyu ndunge ya kujibha* sobha Asuwelu. 22 Maji Moledekayi weza mu kwijiya o kima kyamesenene kubhanga ene, yu wayi mutangela mvwale Estele. Estele anga utangela kwa sobha o maka a mutudila Moledekayi. 23 Atokwesa o maka, ya amono kwila kidi mwene. Kyenyiki, mayala ayadi enyá, a anyenge ku mixi. Maka oso yá a asoneka mu divulu dya misoso ku pholo ya sobha.

3 Mu kubhita thembu, sobha Asuwelu wazangeleka Hamane mon’â Hamedata mukwa Akaki, mu ku mutula ku pholo dya jifixiyadi jê joso. 2 O jiselevende joso jakexile mulangidila o mwelu wa inzo ya sobha, akexile mufukama ku pholo ya Hamane kala kyatendelesele o sobha. Maji, Moledekayi wexile mudituna ku mufukamena. 3 Kyenyiki, o jiselevende jexile mulangidila o mwelu wa inzo ya sobha ebhula Moledekayi, exi: “Mukonda dyahi kwene mubelesela o kitumu kya sobha?” 4 Izuwa yoso akexile mu mubhanga o kibhwidisu kiki, maji mwene kexile mwabhana mátwi. Mukiki atangela Hamane phala kumona se o ukexilu wa Moledekayi a uxikina mba kana, kuma mwene wa atangele kwila wexile Judé.

5 Kyoso Hamane kyamono kwila Moledekayi ngwayé ku mufukamena, njinda yamukwata. 6 Kyenyiki, mwene wabanze kwila o kujibha* ngo Moledekayi kikyeji soka, mukonda a mutangele yalungu ni mundu wa Moledekayi. Mukonda dyakiki, Hamane wafunyu ndunge ya kujibha o mundu woso wa Moledekayi, kifwa, o Jijudé joso mu utuminu wa sobha Asuwelu.

7 Mu mbeji ya dyanga, o mbeji ya nizá, mu dikwinyi ni kiyadi kya muvu wa utuminu wa sobha Asuwelu, ate jisolote ku pholo ya Hamane phala kwijiya o kizuwa ni mbeji.* Kyenyiki, o solote yabwila mu mbeji ya kwinyi ni kiyadi, o mbeji ya Adale. 8 Mukusuluka, Hamane wambela sobha Asuwelu wixi: “Sayi kifuxi kya dimwange mu ibatu* yoso ya utuminu wé, o ijila yâ ki idifu ni ijila ya ifuxi yengi, ene we kene mubelesela o itumu ya sobha. O kwila wanda kwatala ngo kiki? 9 Se kya kuwabhela eye u sobha, bhana kitumu kya kwa jibha. Eme nganda futa dikwinyi dya jimidi ja jitalendu* ja phalata ku jikabhitangu, phala kujita mu ngonga* ya sobha.”

10 Kyenyiki, sobha wakatula o nela yê ya sineta mu lukwaku, yu wa ibhana kwa Hamane mon’â Hamedata mukwa Akaki, o nguma ya Jijudé. 11 O sobha wambela Hamane, wixi: “O phalata ni mundu, wala bhu maku mé. Bhanga yoso i wamesena.” 12 Kyenyiki, mu kizuwa kya dikwinyi ni kitatu kya mbeji ya dyanga, exana o jiseketa ja sobha. Ene asoneka yoso ya atumu Hamane ku jikabhitangu ja sobha, ku jinguvulu ja ibatu ni ku jifixiyadi ja ifuxi yoso, mu ukexilu wa kusoneka wa kibatu ni mu dimi dizwela kifuxi ni kifuxi. O mikanda a isoneka mu dijina dya sobha Asuwelu, ya ate o kidimbu ni nela ya sineta ya sobha.

13 O mikanda a itumikisa ku ibatu yoso bhukaxi ka akunji a sobha. Mu mikanda mwexile o kitumu kya kujibha o Jijudé joso ni kujima o mbutu yâ. Atokalele kujibha kikale minzangala mba adyakime, ahatu ni ana jindenge, mu kizuwa kimoxi ngo, o kizuwa kya kwinyi ni kitatu mu mbeji ya kwinyi ni kiyadi, kifwa, o mbeji ya Adale, ni kuxala ni imbamba yâ. 14 O mukanda wejikala kala kitumu mu ibatu yoso. Atokalele we kubhana ngolokela ku ifuxi yoso n’a disokejeke phala o kizuwa kyenyokyo. 15 O akunji ayi ni lusolo kala kya atumu o sobha, o kitumu akikola mu mbanza ya Suzana. Mukusuluka, o sobha ni Hamane axikama phala kunwa, maji o athu mu mbanza ya Suzana* athandanganyele ni njimbu yatambula.

4 Kyoso Moledekayi kyevu yoso yabhiti, mwene watandujula o izwatu yê, wate izwatu ya jisaku* yu wadikungu utokwa.* Kyenyiki, ukala mukwenda mu mbanza ni kudikola ni kuta nzongo. 2 Mwene wabhixila ngo kate bhu mwelu wa inzo ya sobha, kuma séku muthu watokalele kubokona mu inzo ya sobha ni izwatu ya jisaku.* 3 Mu jimbanza joso mwabhixila o kitumu kya sobha, o Jijudé adikwata mukôndo, kakexile mudya, akexile mudila ni kuditenda. Avulu akexile muzeka ku jisaku* ni mu utokwa.* 4 Kyoso o ilumba ni jiselevende* ja mvwale Estele kyayi mu mutangela yoso yexile mubhita, mwene watandanganyele kyavulu. Kyenyiki, watumikisa izwatu phala Moledekayi, phala mwene kate izwatu ya jisaku,* maji Moledekayi waditunu. 5 Mukonda dyakiki, Estele watumu kwixana Hatake o selevende amusolo kwala o sobha phala kumulanga, yu wamutumu kwibhwidisa Moledekayi se mukonda dyahi mwene wakexile mubhanga o ima yiyi ni ihi yexile mubhita.

6 Hatake wayi muzwela ni Moledekayi mu kididi bhu bhongolokela athu avulu, kyazukamene bhu mwelu wa inzo ya sobha. 7 Moledekayi wa mutangela yoso yabhiti ni mwene ni kikuxi kyeji futa Hamane mu ngonga ya sobha phala kujibha o Jijudé joso. 8 Mwene we wa mubhana o mukanda mwexile o njimbu yokole mu Suzana,* mwexile o kitumu kya kujibha o Jijudé joso. Mwene watokalele kulondekesa ni kujimbulula o mukanda kwa Estele, ni ku mutangela phala kuya kwa sobha na mudyondela phala kajibhe o mundu wê.

9 Hatake wavutuka kwa Estele yu wa mutangela yoso yazwela Moledekayi. 10 Estele watendelesa Hatake phala kubhana o njimbu yiyi kwa Moledekayi: 11 “O jiselevende joso ja sobha ni mundu wa ibatu yoso ya utuminu wa sobha ejiya kwila, se-ku diyala mba muhatu uya ku pholo ya sobha seku mwixana. Se muthu ubhanga kiki bhwala ngo kitumu kimoxi: O muthu yú atokala ku mujibha. O muthu ukala ngo ku mwenyu se sobha uzangula o mbasá yê ya ulu. Maji eme ngala kya makwinyi atatu a izuwa sé kungixana kwa sobha.”

12 Kyoso Moledekayi kyevu yazwela Estele, 13 mwene watumu kutangela Estele wixi: “Kufike kwila mukukala mu inzo ya sobha eye wanda bhuluka, o Jijudé joso kukanga ene ngo anda kwabwika. 14 Maji se kindala udixibha, o ubhulukilu wa Jijudé wanda kwijila mu ukexilu wengi, maji eye ni mwiji woso wa tat’enu mwanda fwa. Nange kiki kyene kya kubhangesa kukuta ku ungana phala kubhulula o mundu wé mu ibhidi kala yiyi”

15 Mukusuluka, Estele watumu kutangela Moledekayi wixi: 16 “Ndé ubhongolole o Jijudé joso mu mbanza ya Suzana,* ni watangele phala a jejuwale mukonda dyami. Katokala kudya né kunwa mu izuwa itatu, suku ni mwanya, eme ni ilumba yami twanda jejuwala we. Sumbala o kitumu kifidisa o muthu kuya ku pholo ya sobha, maji ngandaya mwene kwa sobha. Se kubhinga kufwa, nganda fwa mwene.” 17 Kyenyiki-phe, Moledekayi utunda-bhu, anga uya, ubhanga yoso kala kya mutendelesa Estele.

5 Mu kizuwa kya katatu, Estele wate o izwatu yê ya mvwale, yu wabokona mu kithádi kya inzo ya sobha anga ukingila bhu mwelu wa inzo. O sobha wexile mu kididi kyê kya ungana, waxikamene ku kyandu kyê, yu walungu o pholo ku mwelu wa mbalanda. 2 Kyoso sobha kyamono Estele wemana mu kithádi kya inzo yê, henda i mukwata anga uzangula o mbasá ya ulu yexile bhu maku mê, u ilondekesa kwa Estele. Mukusuluka, Estele wa muzukama yu wakwata ku mbasá.

3 O sobha wa mwibhula: “Mvwale Estele, ihi ya mubhita? Ihi i wamesena kubhinga? Kate ni mbandu ya utuminu wami, ngikubhana-yu!” 4 Estele wa mutambwijila wixi: “Sobha, se kya kuwabhela, lelu zá ni Hamane ni mudye o kudya kunganda milambela.” 5 Kyenyiki, o sobha wambela o jiselevende jê, wixi: “Tangelenu Hamane n’eze ni lusolo, kala kyabhingi Estele.” Mukiki o sobha ni Hamane ayi mudya o kudya kwa alambela Estele.

6 Kyoso kyexile munwa o vinyu, o sobha webhwidisa Estele, wixi: “Ihi i wandala kubhinga? Ihi i wamesena? Kate ni mbandu ya utuminu wami ngikubhana-yu!” 7 Estele watambwijila: “O kima kingamesena ku kubhinga kyenyiki: 8 Sobha se kya kuwabhela, se kyala mu vondadi yê ku ngibhana o kima ki nganda kubhinga, nga kubhingi kwila, mungu wiza dingi ni Hamane mu kudya o kudya kunganda milambela. O mungu, nganda tambwijila o kibhwidisu kya sobha.”

9 Mu kizuwa kyenyokyo, Hamane watundu-ku ni kusanguluka kwavulu. Maji kyoso Hamane kyasange Moledekayi bhu mwelu wa inzo ya sobha, yu wamono kwila, mwene kabalumuka ni kwila kamukwatela wôma, Hamane ukala ni njinda yavulu. 10 Maji Hamane wadixibha, yu wayi kubhata dyê. Mukusuluka, watumu kwixana o makamba mê ni muhat’wê, Zelexi. 11 Hamane anga udizangeleka mukonda dya umvwama wê ni dya kukala ni twana twavulu ni kyebhi o sobha kya muzangeleka mu kumutula ku pholo dya ilamba yoso ni jiselevende ja sobha.

12 Hamane wazwela dingi wixi: “O Mvwale Estele wa ngixana ngo eme phala kuya kumoxi ni sobha ni tudye kubhata dyê. A ngixana dingi phala mungu kukala kumoxi ni sobha ni mvwale Estele. 13 Né mwene ni ima yiyi, se ngisuluka mu kumona o Judé yú, Moledekayi, kuxikama bhu mwelu wa inzo ya sobha, eme kinganda sanguluka, kana. 14 Kyenyiki, o muhat’wê Zelexi ni makamba mê moso a mwambela: “Tuma kuyudika muxi walebha, wala ni makwinyi atanu a jikovadu.* Mu kamene bhinga kwa sobha phala aphaphele-ku Moledekayi. Kyenyiki, wanda sanguluka kyoso ki wandaya mudya kumoxi ni sobha.” Hamane wa wabhela o ndunge yiyi, yu watumu kuyudika o kimuxi.

6 Mu usuku wenyó, o sobha kakexile mukwata kilu.* Mukyenyiki, watumina kubheka o divulu dya misoso dyosoneke mu thembu yenyonyo, anga aditanga ku pholo ya sobha. 2 Mu kutanga, amono kwila asoneka-mu kiki: Moledekayi watungununa o kikutu kya Bingitana ni Telexi, o jikabhitangu jiyadi jakexile mulangidila o dibhitu dya sobha, amesenene kujibha sobha Asuwelu. 3 O sobha webhwidisa: “Kijingu kyahi ni ujitu webhi watambula Moledekayi mukima kyabhangele?” O jiselevende ja sobha a mutambwijila: “Katambula kima.”

4 Mu kubhita kithangana sobha webhwidisa: “Nanyi wala mu kithádi?” Hamane mwéne wabokonene mu kithádi kya inzo ya sobha, phala kubhinga n’a nyenge Moledekayi ku kimuxi kya yudikile mwene. 5 O jiselevende ja sobha a mutambwijila: “Hamane mwene wala mu kithádi.” O sobha wa atambwijila: “Mutangelenu n’a bokone.”

6 Kyoso Hamane kyabokona, sobha wa mwibhwidisa, wixi: “Ihi yatokala kubhanga ku muthu amesena kumujingisa kwala sobha?” Hamane wambe kumuxima wê: “O muthu amesena ku mujingisa kwala sobha, ngafika eme mwene.” 7 Kyenyiki, Hamane watambwijila: “O muthu amesena ku mujingisa kwala sobha, 8 atokala ku mubhekela izwatu yene muzwata sobha ni kabalu kene musambela sobha, o kabalu akazwike kitundu kya ungana ku mútwe. 9 O izwatu ni kabalu akabhane ku kilamba kyabeta-kota ku ilamba yoso ya sobha, n’a zwike o diyala dyamesena sobha ku mubhana o kijingu ni kunyunga-nê mu mbanza. Atokala kudikola kiki: ‘Kiki kyene kibhita ni diyala amusolo kwa sobha phala ku mubhana kijingu!’” 10 Sobha watangela Hamane wixi: “Ndé ni lusolo mutakana o izwatu ni kabalu, ubhange kala ki wazwela kwa Moledekayi, o Judé, waxikama bhu mwelu wa inzo ya sobha. Kuxeku kima ku yoso iwazwela, yoso u ikumbidila mwene.”

11 Hamane wambata o izwatu ni kabalu wazwika Moledekayi, unyunga-nê o mbanza ni kudikola: “Kiki kyene kibhita ni diyala amusolo kwa sobha phala ku mubhana kijingu!” 12 Kyazubha ku munyungisa, Moledekayi wavutuka bhu mwelu wa sobha, maji Hamane wadivungu o mútwe, wayi ni lusolo kubhata dyê ni kudila. 13 Hamane watangela kwa muhat’wê Zelexi ni ku makamba mê, yoso ya mubhiti mu kizuwa kyenyokyo. O mayala akexile mu mubhana o jindunge ni muhat’wê Zelexi, amwambela: “Se Moledekayi mwenyú wakutundu kyá ku ungana, se mwéne Judé,* eye kwanda tena ku mutolola, wanda kubhekela windwa.”

14 Kyoso kyakexile hanji mudizwelesa o jikabhitangu ja sobha jabhixila. Anga ambata Hamane phala kuya mudya, o kudya kwalambe Estele.

7 Kyenyiki, o sobha ni Hamane, ayi mudya kwa Mvwale Estele. 2 Mu kizuwa kya kayadi kyoso kyakexile munwa o vinyu, sobha wambela dingi Estele, wixi: “Ihi i wandala kubhinga? Ihi i wamesena? Kate ni mbandu* ya utuminu wami ngikubhana-yu!” 3 Mvwale Estele wa mutambwijila: “Sobha, se wa ngikwatela henda, se kya kuwabhela, o kima ki ngamesena ku kubhinga kyenyiki: Bhulula o mwenyu wami ni wa mundu wami. 4 Kuma eme ni mundu wami atusumbisa phala kutujibha ni kujima o mbutu yetu. Se atusumbisile ngo phala kukala tu abhika, eme hinu ngadixibhami. Maji o divuwa didi kiditokala kubhita, mukonda dyanda bhekela ibhidi kwa sobha.”

5 Sobha Asuwelu webhwidisa Mvwale Estele: “Nanyi wabhange o kima kiki? Nanyi o diyala wafunyu o ndunge ya kubhanga kiki?” 6 Estele watambwijila: “O nguma yiyi Hamane, o diyala didi dyayibha kinene.”

Hamane wa thandanganyele kyavulu, mukonda dya sobha ni mvwale Estele. 7 O sobha anga weha o kudya, utunda ni njinda, uya mu njaludim ya inzo yê. Kyenyiki, Hamane ubalumuka, udyondela Estele n’a bhulule o mwenyu wê, mukonda wamono kuma sobha wa mubalakalele kyá. 8 O sobha anga utunda mu njaludim yê, ubokona dingi mu inzo mwakexile mudya, yu wamono Hamane wafukamena Estele. O sobha wadikola: “Eye wamesena hanji kuzeka* ni mvwale mu inzo yami mwene?” Kyenyiki, kyoso o sobha kyazubha o kuzwela, Hamane amuvungu o mútwe. 9 Hadibona kabhitangu ka sobha, wambe: “Hamane wayudika we kimuxi phala kunyenga Moledekayi, o diyala dyabhulula o mwenyu wa sobha. O kimuxi kiki kyala ku mbandu ya inzo ya Hamane, mukulebha kitenesa makwinyi atanu a jikovadu.”* Mu kyenyiki, o sobha wambe: “Mu nyengenu-ku mwene.” 10 Kyenyiki, Hamane a munyenga ku kimuxi kyayudikile phala kunyenga-ku Moledekayi. O sobha anga utululuka kya.

8 Mu kizuwa kyenyokyo, Sobha Asuwelu wabhana kwa mvwale Estele o inzo ya Hamane, o nguma ya Jijudé. Moledekayi wayi kwa sobha, mukonda Estele watangele kya kwa sobha kwila, ene exile jindandu. 2 Kyenyiki, sobha wakatula o nela yê ya sineta yatambula kwa Hamane yu wa ibhana kwa Moledekayi. Estele wabhana kwa Moledekayi o ujitu wakukala o kilamba kya inzo yatokalele kwa Hamane.

3 Mukusuluka, Estele wayi dingi muzwela ni sobha. Mwene wafukama bhu inama ya sobha, anga u mudyondela ni masoxi phala kabheke o windwa weji bheka Hamane mukwa Akaki, ni kujima o kitumu kyabhele mwene kya kujibha o Jijudé. 4 Sobha wazangula o mbasá yê ya ulu kwa Estele, kyenyiki, Estele ubalumuka wimana ku pholo ya sobha. 5 Estele wambe: “Se kya kuwabhela eye u sobha, se kyala mu vondadi yé, se kyafwama, se ngasange ngalasa ku mesu mé, bhana kitumu kya kujima o mukanda wasoneka Hamane mon’â Hamedata, mukwa Akaki, phala kujibha o Jijudé mu ibatu yoso. 6 Kyebhi ki ngitena kumona o divuwa dyanda bhita ni mundu wami? Kyebhi ki ngitena kumona o kibwikilu kya jindandu jami?”

7 Sobha Asuwelu wambela Mvwale Estele ni Moledekayi o Judé, wixi: “Ngabhana kya o inzo ya Hamane kwa Estele, ngatumu we kya ku munyenga ku kimuxi, mukonda dya ndunge yafunyu mwene ya kujibha* o Jijudé. 8 Sonekenu kitumu kindala mu dijina dya sobha phala o mbote ya Jijudé, bhangenu kala ki mwamesena, anga mu kita o kidimbu ni nela ya sineta ya sobha. Kuma se o mukanda a usoneka mu dijina dya sobha, anga a uta kidimbu ni nela ya sineta ya sobha, katokala ku ujima dingi.”

9 Kyenyiki, mu kizuwa kya makwinyi ayadi ni kitatu kya mbeji ya katatu, kifwa o mbeji ya Sivani,* exana o jiseketa ja sobha. Ene asoneka yoso ya atumu Moledekayi ku Jijudé, ku jikabhitangu ja sobha, ku jinguvulu ja ibatu, ni ku ilamba* ya ifuxi yoso, tunde ku Indya kate ku Ityopya, hama ni makwinyi ayadi ni sambwadi a ibatu, mu ukexilu wa kusoneka wa kibatu ni mudimi dizwela kifuxi ni kifuxi, a usoneka we mu ukexilu wa kusoneka mudimi dya Jijudé.

10 Moledekayi wasoneka o mikanda mu dijina dya sobha Asuwelu, yu wate-ku o kidimbu ni nela ya sineta ya sobha. O mikanda a itumikisa bhukaxi ka akunji exile mu kwendela mu jikabalu jilenga ni lusolo, jatokalele kwa sobha. 11 Mu mikanda yiyi, sobha wabhana ufolo ku Jijudé mu jimbanza joso phala kudyongeka ni kuzokela o myenyu yâ. Mwene wabhana we o ufolo wa kujibha ni kujima o mbutu ya kibuka kya ibatu yeji kwiza mu kubhânga nawu, kikale o ahatu’â, o twana twâ, ni kuxala ni jimbote jâ. 12 O kiki kyatokalele kubhita mu kizwua kimoxi mu ibatu yoso ya sobha Asuwelu, mu kizuwa kya dikwinyi ni kitatu kya mbeji ya dikwinyi ni kiyadi, kifwa, o mbeji ya Adale.* 13 O mukanda yú atokalele ku ukola kala kitumu mu ibatu yoso, atokalele we ku utanga ku ifuxi yoso, phala o Jijudé n’a disokejeke phala o kizuwa kyenyokyo n’a tene kubhânga ni jinguma jâ. 14 Kala kyatumu sobha, o akunji atundu ni lusolo lwoso, amondala ku jikabalu jatokala ku inzo ya sobha. O kitumu akikola we ku mbonge ya Suzana.*

15 Moledekayi anga utunda ku pholo ya sobha, wate izwatu ya ungana, yala ni kolo yazele ni ya azulu, ni kijinga kya ulu ku mútwe ni divunga dya linyu yakusuka dyafwama kyavulu. O athu mu mbonge ya Suzana* a sangulukile kyavulu. 16 O Jijudé anga akemba, asanguluka mukonda o ifuxi yamukwa akexile mwaxila dingi.* 17 Mu ibatu yoso ni mu jisanzala joso, bhwoso bhwexile mu kolela o kitumu kya sobha, o Jijudé exile musanguluka ni kutana, akexile mubhanga jifesa. Athu avulu a jixi jengi, akexile we muzwela kwila ene exile Jijudé, mukonda akexile ni wôma wavulu wa Jijudé.

9 Mu kizuwa kya dikwinyi ni kitatu, mu mbeji ya dikwinyi ni kiyadi, kifwa o mbeji ya Adale,* kyoso o kitumu kya sobha kyeji dikumbidila, o jinguma ja Jijudé abanzele kwila eji bwika o Jijudé joso, maji kikyene kyabhiti. O Jijudé ene atolola o jinguma jâ joso. 2 O Jijudé adibhongolola mu madyembu mâ, mu ibatu yoso yexile mutumina sobha Asuwelu phala kubhânga ni yó amesenene kwabhanga kyayibha. Séku kifuxi kyatena kwatolola, kuma o mundu woso wexile ni wôma wavulu wa Jijudé. 3 O ilamba yoso ya ibatu, ni jikabhitangu, ni jinguvulu, ni yó akexile mulanga o wenji wa sobha, akwatekesa o Jijudé mukonda exile ni wôma wavulu wa Moledekayi. 4 Moledekayi wakexile ni kutena kwavulu mu inzo ya sobha. Kyenyiki, o fuma yê yexile mudimwanga mu ibatu yoso, mukonda o kutena kwê kwexile mu dibandekesa dingi.

5 O Jijudé atolola o jinguma jâ joso mu kwajibha ni jixibhata. Ene abhange yoso yamesenene ni jinguma jâ. 6 Mu mbonge ya Suzana* o Jijudé ajibha-mu hama jitanu ja mayala. 7 Ene ajibha we Padisandata, Ndalafone, Axipata, 8 ni Polata, Adaliya, Adidata, 9 ni Padimaxita, Adisayi, Alidayi ni Vayisata. 10 Ene ajibha we o dikwinyi dya an’â Hamane, mon’â Hamedata nguma ya Jijudé, maji kakatula o ima ya athu a ajibha.

11 Mu kizuwa kyenyokyo atangela kwa sobha se athu akuxi a ajibha mu mbanza ya Suzana.*

12 O sobha wambela Mvwale Estele, wixi: “Se mu mbonge ya Suzana* o Jijudé ajibha-mu kya hama jitanu ja mayala ni dikwinyi dya an’â Hamane, kikuxi kyajibha ene mu ibatu yamukwa? O kwila sayi dingi kima ki wamesena kubhinga? Ngitangele, nganda ku kubhana-kyu. Wamesena dingi kima kyengi? Nganda kubhana o kima ki wamesena. 13 Estele watambwijila: “Se kya kuwabhela eye u sobha, bhana ufolo ku Jijudé mu mbanza ya Suzana phala mungu abhange dingi kala o kitumu kyokole mu kizuwa kyalelu, ni kwila o dikwinyi dya an’â Hamane, a anyenge ku muxi. 14 Kyenyiki, o sobha watumu kukibhanga. O kitumu akikola mu mbonge ya Suzana,* o dikwinyi dya an’â Hamane, a anyenge ku muxi.

15 Mu kizuwa kya dikwinyi ni kiwana kya mbeji ya Adale, o Jijudé mu mbonge ya Suzana* adyongeka dingi, ya ajibha hâma jitatu ja mala mu mbonge ya Suzana,* maji kakatula o jimbote jâ.

16 O Jijudé jamukwa atungile mu jimbanza jengi ja utuminu wa sobha, adyongeka we phala kuzokela o myenyu yâ. Ene atolola o jinguma jâ, ajibha makwinyi asambwadi ni kitanu kya jimidi ja jinguma, maji kakatula o jimbote jâ. 17 Kiki kyabhiti mu kizuwa kya kwinyi ni kitatu kya mbeji ya Adale. Mu kizuwa kya kwinyi ni kiwana ene anyoha, anga o kizuwa kyenyokyo kyakituka kizuwa kya kubhanga fesa ni kusanguluka.

18 O Jijudé mu mbanza ya Suzana* adibhongolola we mu kizuwa kya dikwinyi ni kitatu ni dikwinyi ni kiwana kya mbeji ya Adale. Mu kizuwa kya dikwinyi ni kitanu, anyoha anga abhanga o kizuwa kyenyokyo kala kizuwa kya fesa ni kusanguluka. 19 Kyenyiki, o Jijudé atungile mu jisanzala jengi abhange we o kizuwa kya dikwinyi ni kiwana kya mbeji ya Adale, kala kizuwa kya fesa ni kusanguluka. Kifwa kizuwa kya kuditumikisa kudya mudyâ kala maujitu.

20 Moledekayi wasoneka o ima yoso yiyi yabhiti, yu watumikisa mikanda ku Jijudé joso akexile mu jimbanza joso ja utuminu wa sobha Asuwelu. Kikale ku ibatu yazukama ni yoyo yexile dikanga. 21 Mwene wa atendelesa phala mivu yoso mu kizuwa kya dikwinyi ni kiwana ni dikwinyi ni kitanu kya mbeji ya Adale, ikale izuwa ya kubhanga fesa, 22 mukonda mu izuwa yiyi, o Jijudé keji kwa zukutisa dingi ku jinguma jâ. Mu mbeji yiyi o kuluwala kwa Jijudé kwakituka kusanguluka, o malamba mâ akituka ngalasa. Mu izuwa yiyi, ene atokalele kubhanga jifesa ni kusanguluka, ni kuditumikisa makudya ni kuwanena maujitu ku jingadyama.

23 O Jijudé axikina kukwata o kijila kiki kya kubhanga o fesa ya yiyi. Ene axikina we kubhanga yoso ya asonekena Moledekayi. 24 Kuma Hamane mon’â Hamedata mukwa Akaki, o nguma ya Jijudé joso wafunyile ndunge ya kujibha o Jijudé, yu wate Pudimi, kifwa jisolote phala kwa kwatesa wôma ni kwabwika. 25 Maji kyoso Estele kyayi kwa sobha, o sobha watumu kusoneka kiki: “O ndunge ya funyu Hamane ya kujibha o Jijudé, a mubhange-kyu mwéne.” Kyenyiki, Hamane ni twana twê a anyenga ku muxi. 26 Kiki kyene kyabhangesa kwixana o izuwa yiyi ya Pudimi. O kizwelu kiki kyatundu mu kizwelu Pudi.* Mukonda dya ima yoso yosoneke mu mikanda ni yoso yamonene ni yabhitile ni ene. 27 O Jijudé ate kikutu mudyâ ni miji yâ ni oso eji dibunda nawu kumoxi, kya kwila mivu yoso atokalele kubhanga o fesa ya izuwa iyadi yiyi ni kukumbidila o ima yoso yosoneke yalungu ni ene mu izuwa yoxinde. 28 Izuwa yiyi atokalele ku ilembalala ni kubhanga fesa ku miji yoso ku pholo, ku mabhata moso, mu jisengu joso ni mu jimbanza joso. O Jijudé katokalele kujimba o izuwa yiyi ya Pudimi. O miji ku pholo atokalele kusuluka ni kubhanga o fesa yiyi.

29 Mu kubhita thembu Mvwale Estele mon’a Abiyale ni Moledekayi o Judé, ni kutena kwexile naku, asoneka dingi mukanda wakayadi walungu ni izuwa ya Pudimi. 30 Mwene watumikisa mikanda ku Jijudé joso, mu hama ni makwinyi ayadi ni sambwadi a ibatu ya utuminu wa sobha Asuwelu ni izwelu yakidi ni ya kutululuka, 31 phala ku kumbidila o izuwa ya Pudimi mu kithangana kyoxinde kala kyatumine Moledekayi, o Judé, ni Mvwale Estele. Kuma ene ni miji yâ yoso adikwatenene we mu kijila kiki. Abhingile kujejuwala ni kudyonda kwa Nzambi. 32 Estele waxikina o maka oso yâ, alungu ni izuwa ya Pudimi anga a asoneka mu divulu.

10 Kyabhiti o ima yiyi, o sobha Asuwelu wajijidika o athu kubhanga ikalakalu yanguzu, mu ixi yoso ni mu ikolo ya kalunga.

2 O ima yoso yakatunda yabhangele Asuwelu ni kutena kwê ni musoso, ulondekesa kyebhi sobha kyajingisa Moledekayi, ka usoneka mu divulu dya misoso ya jisobha ja Medya ni Pélesa? 3 Moledekayi mwéne wabetele-kota mu utuminu, wa mutundile ngo o Sobha Asuwelu. Mwene wakexile ni kijingu kyadikota bhukaxi ka Jijudé, anga amuxila kyavulu ku jiphange jê joso, o Jijudé. Mwene wakexile mu kalakala phala o mbote ya Jijudé, ni kwila o miji yeji kwiza ku pholo ikale ni kutululuka.*