Iebhi o Vondadi ia Nzambi ia Lungu N’etu?
KIOSO ki u tanga o Jurnale, mba uívua minangu mu mutelembe ua izuzumbia, uivua jingolokela javulu ja lungu ni ngela, usuéia ni ujibhangânga. Nange eie ua mu tala hadi iavulu mukonda dia uhaxi mba ua fundu ndandu.
Dibhuidise:
O kuila kiki kiene kia mesena Nzambi phal’eme ni muiji uami?
Kuebhi ku ngi tena kusanga o kikuatekesu phala ku dibhana ni maka?
O kuila ku hádia kua-nda kala kutululuka kua kidi?
O Bibidia i tambuijila kiambote o ibhuidisu íii.
O BIBIDIA I LONGA KUILA NZAMBI UA-NDA BHANGA O IMA ÍII MU IXI.
O athu ka-nda kuívua dingi ndolo, kukuka mba kúfua.—Dijingunuinu 21:4
“Inema ia kà tuka-tuka, kala jimbambi.”—Izaia 35:6
“O mesu a ifofo a kà jikuka.”—Izaia 35:5
O madifundu a-nda kua fukununa.—Nzuá 5:28, 29
Sé-ku muthu ua-nda kata dingi.—Izaia 33:24
Athu oso mu ixi a-nda kala ni kudia kuavulu.—Jisálamu 72:16
KATULA MBOTE KU ILONGESU IA BIBIDIA
Nange u fika kuila o ima i ua tange ku mbandu ja dianga ja divulu didi, nzoji ngó. Maji Nzambi ua kanena kuila ku hádia muéne ua-nda bhanga muene o ima íii mu ixi, o Bibidia i tu tangela kiebhi muéne kia-nda bhanga kiki.
Maji ki kiene ngó ki bhanga o Bibidia. I tu tangela ué ihi i tua tokala o kuijiia phala tu tene kusanguluka ni kuzediua ku muenhu. Xinganeka bhofele ku ima i ku thandanganhesa. Nange ima kála kitadi, maka ku muiji, kukata mba o kúfua kua muthu u ua zolo. O Bibidia i tena ku ku kuatekesa kudibhana ni maka enhá, i tena ué ku ku konda o malamba mu kutambuijila o ibhuidisu kála íii:
Mukonda diahi tuene mu tala hadi?
Kiebhi ki tu tena kudibhana ni maka a moneka ku muenhu uetu?
O kuila muiji uetu u tena kuzediua?
Ihi i bhita n’etu kioso ki tu fuá?
O kuila ku hádia tua-nda tena kumona dingi o jindandu jetu jáfu?
Mukonda diahi tu tena kudielela kuila Nzambi ua-nda kumbidila ioso ia kanena?
Mu kutanga o divulu didi, eie ua mu londekesa kuila ua mesena kuijiia o ilongesu ia Bibidia. O divulu didi dia-nda ku kuatekesa. Kala kaxi kala ni ibhuidisu ia-nda ku kuatekesa kutendela kiambote o Bibidia. Jimidi ni jimidi ja athu a uabhela kudilonga o Bibidia ni Jimbangi ja Jihova. Tua mesena kuila eie ué u ki uabhela. Nzambi a ku besoale kioso ki ua-ndaia ni kuijiia o ilongesu ia Bibidia!