Dimatekenu

O divulu Jivelusu ja Bibidya Jitukwatekesa ku Mwenyu Wetu dyanda kukwatekesa kusanga jivelusu ni misoso ya Bibidya, yanda kukwatekesa kudibhana ni maka mé. Dyanda kukwatekesa we kusanga misoso ya Bibidya i utena kuswinisa nayu akwenu, ni kwakwatekesa kusola o ima yanda sangulukisa Jihova. Sota o dyambu diwamesena. O madyambu oso ala ni ibhwidisu ni izwelu yalungi ni musoso wa Bibidya. (Tanga “Kyebhi Kyasokejeka o Divulu Didi?”) Wanda sanga itendelesu ni misoso ya Bibidya yanda kuswinisa kyavulu. Wanda sanga we itendelesu ya Bibidya yanda kukwatekesa kuswinisa akwenu.

Kyebhi Kyasokejeka o Divulu Didi?

Phala kusanga o dyambu diwamusota, utena kubweta mu kijimbwete kya kutokwesa mba utena kuya ku jimbandu. O divulu didi adiwana mu sambwadi dya jimbandu: Ibhidi, Ibhangelu Yetu, Kilunga, Mwenyu Wetu, Mwiji, Kukula mu Nzumbi, ni Idifwa. Nange eye wanda sanga o dyambu diwamusota mu jimbandu jiji. Ndé mu mbandu i wamesena anga sola-ku o dyambu. Maji se kwamutena kusanga o mbandu i wamesena, bweta ku Yoso, anga sota dyambu di umona kwila dyanda kukukwatekesa ku kibhidi kiwamudibhana nakyu. Mu madyambu ya, wanda sanga-mu izwelu yaxikatela, sayi izwelu yaxikatela, ibhwidisu. Kyoso ki utanga o jivelusu, xinganeka kyebhi o jivelusu jiji ja mutambwijila o kibhwidisu. Sayi madyambu mwala o izwelu “Tanga we.” O jivelusu jala mu mbandu yiyi, jalungu we ni dyambu. Wanda sanga we o mbandu yamba “Misoso ya Bibidya itena kutukwatekesa”. O izwelu yala mu mbandu yiyi ijimbulula se ihi izwela o jivelusu jiji. O izwelu yiyi yanda kukwatekesa kuxinganeka kyoso kiwanda ni kutanga o jivelusu jiji.

O divulu didi kiditumbula o jivelusu joso ja Bibidya mu dyambu dimoxi. O divulu didi dyanda kukwatekesa kusanga o jivelusu ji wabhindamena. Se wamesena kwijiya dingi utena kutokwesa o madivulu amukwa. (Jisa. 2:1-6) Phala kutokwesa dingi, utena kutanga o milongi imoneka mu jivelusu, mu Bibidya de estudo mu dimi dya phutu. Mba eye utena kutokwesa mu jivelusu jimoneka mu kaxi ka difwe dya Bibidya. Phala kwijiya dingi yalungu ni velusu imoxi, utena kutokwesa mu Kadivulu ka Kutokwesa Phala o Jimbangi ja Jihova mba mu Índice das Publicações da Torre de Vigia. O madivulu yá anda kukwatekesa kutendela o dilombolwelu dya velusu diwamutanga.

Twamesena kwila o divulu didi, dikukwatekesa kwijiya ni kutendela o unjimu wala mu Mak’â Nzambi. Kyoso kiwandaya ni kutokwesa mu divulu didid, wanda xikina kwila “o mak’â Nzambi ala ni mwenyu ni kutena.”—⁠Jih. 4:⁠12.