DIAMBU DIA KAPA: MUNDU SÉ KATHOMBO THEMBU KUXI?

O Kathombo Kala ku Mundu Uoso

JONATHAN, a mu vuala ku América, o jitata jê akua Koreia, akexile ku mu tala ni kathombo ku athu mu undenge uê. Kioso kia kulu, muéne ua mesenene ku sanga kididi mua tungile athu keji mu tala ni kathombo mukonda dia pholo iê mba ixi iê. Muéne ua kituka dotolo mu mbanza ia Alaska, ku Estados Unidos de América. Kuenhoko, o jihaxi a difuile ni muéne mu pholo. Muéne ua kexile ni kidielelu kia kuila, kuenhoko, o athu keji mu tala ni kathombo.

O kidielelu kiê kia boba mu menha, kioso kia kexile mu saka muhatu ua kumbamene, ua kexile ni 25 a mivu. Kioso o muhatu kia mateka ku divua kiambote, ua tale ku pholo ia Jonathan iu ua mateka o kuzuela ima ia iibha mukonda a mu longele ku zemba akua Koreia. Jonathan ua mono kuila o nguzu ia bhangele, ia kuia ku tunga mu kididi kieniókio, ia di botele ngó.

O ia bhiti ni Jonathan, ilondekesa o ima ia iibha iene mu bhita ku mundu uoso. O kathombo kala ku mundu uoso. Tu ka sanga mu ididi ioso mua tungu athu.

Sumbala o kathombo kala ku mundu uoso, athu avulu a ka zembe. Maka a dikota. Kiebhi o kima a ki zembe ku athu, ki kala dingi ku mundu uoso? Athu avulu a iibhila o kathombo, ka xikina kuila ene uá ala ni kathombo ku muxima. O kuila kiki kiene ué mu bhita n’eie? Kiebhi ki ueji tambuijila o kibhuidisu kiki?

MAKA A KALA KU MUXIMA UA ATHU

Né muene se tuejiia kuila tuala ni kifua kiki mba kana, ku bhonza kiavulu kuijiia se tuala ni kathombo ku muxima. O Bibidia ijimbulula se mukonda diahi kiki ki bhita, kioso kiambe: “O muxima ua muthu u bhomba kinene, ima ioso ndenge.” (Jelemiia 17:9) Kienhiki tu tena ku di nganala mudietu, mu kuzuela kuila tua zolo o athu a ídifua ioso. Mba tu tena ku banza kuila, tua lungu mu ku tala athu a mukuá ni kathombo.

Kiebhi ki ueji divua se ua di sangele ni maiala enhá?

Phala kuijiia se tuala ni kathombo ku muxima, tala o kifika kiki: Ua mu kuenda ubheka uê mu usuku, mu kikoka mua vundu. Maiala kiiadi, nuka ua a muene, a mu ku zukama. Ene athu onene, umoxi nange ua kuata kima bhu maku mê.

O kuila ueji banza kuila o maiala enhá, a mesena ku ku bhanga kia iibha? Sumbala eie uejiia kuila ua tokala ku aluka, o kuila kiki kilondekesa kuila o maiala kiiadi enhá a mesena muene ku ku bhanga kia iibha? Nange ueji dibhudisa: O maiala enhá akua diembu diebhi mba a tokala kuebhi? O kitambuijilu kiê ku kibhuidisu kiki, kieji londekesa se uala ni kathombo ku muxima mba kana. Kiki kieji londekesa kuila eie uala kiá ni kathombo ku muxima.

Se tu di tonginina kiambote ku muxima uetu, tua-nda mona kuila etu enioso tuala ni kathombo ku muxima. O Bibidia ué i zuela: “o muthu u tala o kidifua kia kanga” (1 Samuuele 16:7) Kuma a tu vuala ni ukexilu iú u bheka ndolo iavulu ku athu—o kuila tu tena ku u katula ku muxima uetu? O kuila saí kizuua o kathombo ka-nda bhua mu ngongo?

O KATHOMBO KALA KU MUNDU UOSO

Canadá: “Sumbala o nguvulu ia bhana itumu ia lungu ni ku xila, ku kuatekesa ni ku langa o athu a ídifua ioso, o kathombo katé kiki maka a dikota.”—Relatório da Anistia Internacional ia lungu ni Canadá, 2012.

Europa: “[Makuinhi a nake] a ji pursentu ja athu akua Europa, a xikina kuila, o athu ka mu bhanga kima phala ku zubha o kathombo ku ixi iâ.”—A Intolerância, o Preconceito e a Discriminação: Informe Europeu, 2011.

África: “Ku jixi javulu, o ahatu a a bhanga kia iibha ni ku a tala ni kathombo.”—Relatório da Anistia Internacional, 2012.

Nepal: “O akua Dalits (“a xidi”) a a tala ni kathombo ku athu mukonda dia uadiama ni ku kamba ku di longa kiavulu, ene a tala hadi iavulu”—O Relatório da organização Vigilante dos Direitos Humanos, 2012.

Europa oriental: “Mu ixi ia Loma, o jinguvulu ka mesena ku batula o maka alungu ni kathombo kene mu moneka ku mabhata”—Kala kiambe o divulu The Economist, mu kizuua kia 4 ia mbeji ia Kamusasadi, 2010.