O Kuila Tua Tokala ku Samba ku Jisandu?

NANHI nuka ua sotele muthu phala ku mu kuatekesa? Mu ku bhita ni ibhidi, nange tu sota kamba dietu u tena ku tu kuatekesa, uejiia kiambote o ibhidi i tua mu dibhana na-iu. O henda ni kuijiia kua kamba dietu, ku mu bhangesa ku kala o muthu ua tokala ku tu kuatekesa.

Saí athu nange a divua uá kiki mu maka alungu ni ku samba. Mu veji dia ku lengela kua Nzambi—o muthu ua beta o kota mu ngongo, u tena ku tu kuatekesa—ene a divua dingi kiambote ku samba ku jisandu. Ene amba kuma o jisandu a dibhana kiá ni ibhidi iavulu iene mu dibhana na-iu o athu lelu, mukonda dia kiki ene a tena ku a kuatekesa. Mu kifika, o athu a texika kima kiala ni valolo ia dikota, nange a sota o kikuatekesu kia “Sandu” António de Pádua—o mulangidi u langa o ima ia texika mba io nhane. Se o kiama kia mu kata, ene a sota o “Sandu” Francisco de Assis, se a toloka o muxima, ene a sota kikuatekesu kua “Sandu” Judas Thaddeus.

Kiebhi-phe ki tu tena o kuijiia se o Mikanda Ikola i zuela mba kana ia lungu ni ku zukama ku jisandu mu musambu? Kuma o ku samba kulombolola, kuzuela ni Nzambi, tua tokala kuijiia: O kuila Nzambi uene mu kuívua o misambu ietu? Tua tokala ué ku dibhudisa: Kiebhi ki divua Nzambi kioso ki tu samba ku jisandu?

IHI I ZUELA O BIBIDIA IA LUNGU NI KU SAMBA KU JISANDU

O kifua kia ku samba ku jisandu, kia tundu mu ilongesu ia lungu ni ki kuatekesu ki bhana o jisandu, kala kiene mu longa o Ngeleja ia Katolika. Ene a longa kuila o muthu u tena, “ku diondela o muloloki ua Nzambi bhu kaxi ka jisandu” kala ki zuela o, Nova Enciclopédia Católica. Kienhiki, o muthu u samba ku jisandu, u bhanga kiki mu ku dielela ku tambula kikuatekesu ku jisandu, mukonda a a xikina kua Nzambi.

O kuila o Bibidia i xikina o ilongesu íii? Saí athu amba kuila, o poxolo Phaulu ua soneka mu mikanda iê kuila tua tokala ku samba ku jisandu. Mu kifika, mu ku sonekena akua Kolindo mu Loma, muéne ua soneka: “Kiki-phe, nga mi diondo, enu jiphange mua Ngana Jezú Kristu, ni mu henda ia mi bhana o Nzumbi, mu bangâma ni eme kumoxi, mu ngi kuatekese mu kusamba kua Nzambi, mukonda diami eme.” (Loma 15:30) O kuila Phaulu ua kexile mu bhinga ku Jikidistá mu Kolindo phala ku mu bhingila kua Nzambi? Kana. Se kiki kiene, ene eji bhinga kua Phaulu, o poxolo ia Kristu, phala kua a bhingila kua Nzambi. Phaulu ua kexile mu londekesa kuila, kima kiambote ku bhinga ku Kidistá ni mukuetu phala ku samba kua Nzambi phala ku tu kuatekesa. Maji ki kiene kimoxi ni ku samba ku muthu a banza o athu kuila uala ku diulu, phala ku bhixidisa o musambu uetu kua Nzambi. Mukonda diahi?

Mu divulu dia soneka poxolo Nzuá, Jezú uixi: Eme ngi njila, ngi kidi, ngi muenhu. Kana muthu u bhixila kua Tata, ua kambe kuijila ko kuami.” (Nzuá 14:6) Muéne uambe ué: “Ni ioso ue i mu bhinga Tata mu dijina diami, muène ni a mi bhane-iu.” (Nzuá 15:16) Jezú ka zuela kuila tua tokala ku samba kua muéne, ni kuila muéne u tu bhingila kua Nzambi phala ku tu kuatekesa. Mu veji dia kiki, phala Nzambi kuívua o misambu ietu, tua tokala ku samba mu dijina dia Jezú kana mu dijina dia muthu uéngi.

Kioso o maxibulu a Jezú kia mu ibhula se kiebhi kia tokalele o ku samba, Jezú ua a tambuijila: “Ki mu samba, muila kiki: ‘Tata ietu, dijina diê a di kôlese.’” (Luka 11:2) Mu kidi, “ki mu samba,” mba ithangana ioso ki tu samba, ki tu tokala ku samba kua Jezú mba ku muthu uoso-uoso, ki kale kua Nzambi ngó. Mukonda dia milongi íii ia Jezú, ki kima kiambote kuzuela kuila tua tokala ku samba ngó kua Nzambi mu dijina dia Jezú Kristu, kana ku “jisandu?”

O musambu kima kia tokala ku ubhezelu uetu, o Bibidia ki i longa kuila tua tokala ku samba muthu uéngi. (Nzuá 4:23, 24; Dijingunuinu 19:9, 10) Kiki kiene ki tu bhangesa ku samba ngó kua Nzambi.

O KUILA UA TOKALA KU KALA NI UÔMA UA KU ZUKAMA KUA NZAMBI?

Mu Diskursu dia bhangele ku Mulundu, Jezú ua bhana phangu ia mona u bhinga kima kia kudia kua tata iê. O kuila saí tata se mon’ê ua mu bhingi mbolo, u mu bhana ditadi? Mba u mu bhinga mbiji, u mu bhana nhoka? (Matesu 7:9, 10) Kikola, o tata ia henda ka tena ku bhanga kiki!

Xinganeka o kifika kiki kia tata. Mon’ê, ua mesena ku ku bhinga kima kia bhindamena. Eie uala ni ukamba uambote ni muéne, eie u muthu uambote. Maji mukonda dia uôma dia ku banza se kiebhi ki ua-nda divua, mon’ê u bhinga muthu uéngi phala ku ku bhinga kia bhindamena muéne. Kiebhi ki ueji divua? Ihi i tuamba se muéne u di zuelesa ngó n’eie bhu kaxi ka muthu iú, ni kuila muéne ua-nda suluka ni ku bhanga kiki? O kuila ueji sanguluka ni ukexilu iú? Kana! O jitata, a mesena kuila o tuana tuâ a zukama kua ene, ni kuila a divua kiambote mu ku bhinga ioso ia mesena.

Mu ku jimbulula o kifika kia mona u bhinga kudia kua tata, Jezú uambela o mundu: ‘Sumbala enu mua iibha, muejiia ku bhana an’enu maujitu ambote, kuambe dingi Tata ienu uene mu Diulu, u fula kiebhi ku kala kota mu kubhanga ima iambote oso a mu bhinga?’ (Matesu 7:11) Sé phata, o vondadi ia tata ia ku bhanga ima iambote ku mon’ê, kima kia mu kala ku muxima. O vondadi ia Tata ietu ia diulu ia kuívua ni ku tambuijila o misambu i tu bhanga, kima kia mu kala ué ku muxima.

Nzambi ua mesena kuila tu zukama kua muéne mu musambu, né muene se tuene mu lueza kiavulu. Muéne ka sola athu engi phala kuívua o misambu ietu. O Bibidia i tu tangela: “Se uevu kimbamba kia ku xina, iza na-kiu kua Jihova, muene u ku sokesa na-kiu.” (Jisálamu 55:22) Mu veji dia ku dielela ku jisandu mba ku muthu uéngi, kima kiambote kuijiia o kidi kia lungu ni Jihova Nzambi.

O Tata ietu ia diulu u tu suua. Muéne ua mesena ku tu kuatekesa mu ibhidi ietu, u tu bhinga ué phala tu zukame kua muéne. (Tiiaku 4:8) Tua zediua kiavulu mu ku kala ni kithangana kia ku zukama kua Nzambi ietu, Tata ietu, o ‘Mukua kuívua o misambu!’—Jisálamu 65:2.