Mukonda Diahi Nzambi Uehela Akua Undanda ku Talesa Hadi ku Akuâ?

Mu Bibidia tu sanga misoso iavulu ia athu exile indanda ni ku talesa hadi ku athu. Mu kifika, o musoso ua lungu ni Nabote.a Akabe, sobha ia Izalaiele ku hama ia dikuinhi A.K.K., uehela muhatu’ê, Jezabele, ku jibha Nabote ni an’ê oso phala muéne ku kala ni díbhia diê dia mividi. (1 Jisobha 21:1-16; 2 Jisobha 9:26) Mukonda diahi Nzambi uehela Akabe ku bhanga ima ia iibha ni kutena kuê?

Tu xinganeke mu kidi kiki: Nzambi ka tena ku tanga makutu. (Titu 1:2) Kiebhi kiki ki tu kuatekesa ku tendela se mukonda diahi Nzambi uehela o athu ku talesa hadi kua akuâ? Mu dimatekenu, Nzambi ua dimuna o athu kuila, o ku xibhaka o itumu iê, ieji bheka malamba—o kufuá. Mukonda dia kiki, tundé o kizuua kia bhukumukina o itumu ia Nzambi mu jaludim ia Edene, o athu ene mu fuá. O kufuá kua dianga, kuejila mukonda dia undanda—kioso Kaini kia jibha phang’ê, Abele.—Dimatekenu 2:16, 17; 4:8.

Ia lungu ni athu, o Mak’â Nzambi, a zuela kiki: ‘Muthu u kala mu ku tumina mukuá phala ngó ku mu sengulula.’ (Nd 8:9) O kuila o izuelu íii kidi muene? Jihova ua dimuna o kifuxi kia Izalaiele, o mundu uê, kuila o sobha jâ eji kua tumina ni undanda, ni ku a bhangesa ku dikola kua Nzambi. (1 Samuuele 8: 11-18) Katé muene Sobha Solomá, ua vudile o unjimu, ua tumina o mundu ni undanda ni ku a bhikisa. (1 Jisobha 11:43; 12: 3, 4) O sobha ja iibha, kala Akabe, a betele o kuiibha mu ku bhikisa o mundu. Xinganeka: Se Nzambi ua fidisile o jisobha ku tumina ni undanda, keji londekesa kuila o izuelu iê, makutu?

Ijiia ué kuila, Satanaji ua zuelele kuila o athu kene mu sidivila Nzambi ni muxima uâ uoso. (Jobe 1:9, 10; 2:4) Se Nzambi u kala mu bhulula o selevende jê joso ku hadi ioso ia a talesa ku athu, muéne keji londekesa kuila Satanaji ua lungu? Se Nzambi ua fidisile o undanda uoso uene mu bhanga o athu ku akuâ, muéne keji kala mukuá makutu? Se Nzambi u kala mu kuatekesa o athu, ene a-nda mona kuila a tena ku di tumina mudiâ sé Nzambi. Maji o Bibidia i longa kiéngi—kuila o muthu ka tena ku di tumina mudiê. (Jelemiia 10:23) Tua bhingi o Utuminu ua Nzambi; uene ngó ua-nda zubha o undanda mu ngongo.

O kuila kiki kilombolola kuila, Nzambi ka mu bhanga kima phala ku zubha o undanda mu ngongo? Kana. Xinganeka mu ima iiadi íii: Kia dianga, muéne ulondekesa kuila, ua zembe o ukexilu ua undanda. Mu kifika, o Maka mê, o Bibidia, ilondekesa o ndunge joso ja kexile mu funha Jezabele phala ku jibha Nabote. O Bibidia ilondekesa ué kuila o ukexilu iú a mu u suínisa kuala o mutumini ua mesena ku sueka o kifua kiê kia iibha. (Nzuá 14:30; 2 Kolindu 11:14) O Bibidia i mu ixana, Satanaji o Diabhu. Mu kulondekesa o kuiibha ni undanda ni kuebhi kuene mu tunda o maukexilu enhá, kilondekesa kuila, Nzambi u tu kuatekesa phala ki tu kale ué ni ukexilu iú. Kienhiki, muéne u tu langa phala tu tambule o muenhu ua kalelaku ku hádia.

Kia kaiiadi, Nzambi u tu bhana kidielelu kia kuila, o undanda ua-nda bhua. O ukexilu uê ua ku kuata ni ku fundisa ni ku kaxtikala Akabe ni Jezabele, mukonda dia ukexilu uâ ua iibha​—ni athu a mukuá dingi—u tu bhana kidielelu kia kuila, muéne ua-nda kaxtikala athu oso a iibha ku hádia. (Jisálamu 52:1-5) Nzambi u tu bhana kidielelu kia kuila, hádia ua-nda zubha ni kuiibha kuoso ni undanda phala ku bhulula oso a mu zolo.b Nabote, diiala dia fiiele ni an’ê oso, ua-nda kala mu palaízu mu ixi sé kuiibha.—Jisálamu 37:34.