Mukonda Diahi o Bibidia ia Nangenena Katé mu Izuua Ietu?

O Bibidia ia nangenena katé mu izuua ietu. Mukonda dia kiki, u tena kukala ni Bibidia ié ni ku i tanga. Se u sola Bibidia io lungulule kiambote, u tena kumona kuila ua mu tanga Bibidia iala ni njimbu ia kidi, kala kia kexile mu mikanda ia dianga.a Maji mukonda diahi o Bibidia ia nangenena sumbala ni iluezu ia mivu-ni-mixinda, jinguma a mesenene ku i buika ni kulungulula o njimbu iê? Mukonda diahi o divulu didi dia nangenena mu iluezu ioso íii?

Atangi avulu, a xikina kuila o Bibidia ia Nzambi, kala kia soneka poxolo Phaulu: “Kuma Mikanda ioso ia bhusu Nzambi.” (2 Timote 3:16) Ene a xikina kuila, o Bibidia ia nangenena mukonda iene Mak’â Nzambi, muéne ua bhangesa kuila, i nangenena katé mu izuua ietu. Faizal a mu tumbula kiá ku dimatekenu dia Mulangidi iú, ua solo kutokuesa kiambote o Bibidia mu kudilonga na-iu. O milongi ia sange-mu ia mu bhangesa kudiuana. Ua dilongo kuila milongi iavulu ia jingeleja já Kidistandade, ki iala mu Bibidia. Ua divu ué kiambote mu kudilonga mu Mak’â Nzambi, o vondadi ia Nzambi phala o ixi.

Muéne uambe: “Lelu ngi xikina ni kidi kioso kuila, o Bibidia i ngala na-iu ujitu ua Nzambi. Se Nzambi uala ni kutena kua kubhanga o ngongo, o kuila keji tena ku tu bhana divulu ni ku di langa katé mu izuua ietu? Se ki kiene, o kutena kua Nzambi o Muteni-a-Ioso ki kueji dimonekena! Eme nanhi phala kufika kuila, Nzambi kalé ni kutena?”​—Izaia 40:8.