Mukonda Diahi ua Tokala Kuijiia o Musoso ua Bibidia?

Se-ku divulu dia mukuá dia jingeleja, dia soko ni Bibidia. Tundé ukulu se-ku dingi divulu diene mu tena kulungulula ibanzelu ia athu. Maji se-ku ué divulu diene mu tokuesa kiavulu o athu, ni ku di zuela kiaiibha kala ki bhita ni Bibidia.

Mu kifika, saí jingijiie ka xikina kuila o Jibibidia ja lelu ja tundu muene mu mikanda ia dianga. Saí mesene, mukuâ kulonga ilongesu ia jingeleja, uambe: “Etu ki tuejii’etu se mu kidi tua lungulula muene kiambote o mikanda ia dianga. Tuala ngó ni Jibibidia j’ezala ni makutu. Jibibidia javulu a ji lungulula kioso kia bhiti hama javulu ja mivu, o mikanda ia dianga a i sonekene kiá ukulu. Mukonda dia kiki mu maukexilu avulu o Jibibidia jiji ki ja mu zuela kidi kála o mikanda ia dianga.”

A mukuá ka xikina kuila o Bibidia divulu dia kidi, mukonda dia ima ia dilongo mu ngeleja iâ. Mu kifika Faizal, a mu longo ku muiji uê ki Kidistá kuila o Bibidia divulu dikola maji a i lungulula. Muéne uambe: “Mukonda dia kiki, nga kexile mu kala ni phata kioso athu kia mesenene kuzuela n’eme ia lungu ni Bibidia, mukonda ene ka kexile dingi ni Bibidia ia dianga. O ia kexile na-iu, a i lunguluile kiá!”

O kuila tua bhingi kuijiia se o Bibidia io lungulule mba kana? Tala o ibhuidisu íii: O kuila u tena kudielela mu ikanenu i tanga o Bibidia ia lungu ni hádia se kuijiie se o ikanenu íii ia kexile muene mu mikanda ia dianga? (Loma 15:4) O kuila ueji kaiela o itumu ia Bibidia phala kubatula maka a makota ku muenhu ué, kala maka alungu ni salu, muiji ni ubhezelu sé uejidile kuila o Jibibidia ja lelu j’ezala ni makutu a athu?

Sumbala lelu se-ku dingi madivulu a dianga a Bibidia, maji tu tena kutanga mu jikopia j’okulu, kala mu jimidi ni jimidi ja mikanda ia Bibidia. Kiebhi o mikanda iií ia nangenena né muene ni ibhidi ia mivu-ni-mixinda, ni jinguma a mesenene ku i buika mba kulungulula o njimbu iê? Kiebhi o kuijiia kuila o Bibidia ia bhixila katé mu izuua ietu, kutena ku ku suínisa kudielela kuila o Jibibidia ja lelu, ja kidi muene? Tala o itambuijilu ia ibhuidisu íii mu kutanga o mbandu ia kaiela.