O Kwila o Mak’â Nzambi a a Lungulula?

Athu avulu ene mudibhwidisa se o Mak’â Nzambi a a lungulula. Polofeta Izaya wambe kwila o mak’â Nzambi a “xalela-ku, katé ku hádya ni hádya.” (Izaya 40:8) Kyebhi kitutena kwijiya ni kidi kyoso kwila o mak’â Nzambi ka a lungulula?

Nzambi wala ni kutena kwa kulanga o Maka mê, ni kufidisa kwalungulula. Mu ukulukulu, kyoso kyakexile mubhanga jikopya ni maku, o athu akexile mubhanga o jikopya akexile mutanga o jiletala joso ja Mikanda Ikôla phala kwijiya se kabandekesa kima, kalungulula, né kukatula kima. Né kiki, o athu akwa ituxi, sayi yá alweza bhofele mukubhanga jikopya.

KYEBHI KI TUTENA KWIJIYA NI KIDI KYOSO KWILA MU MIKANDA IKÔLA YALELU MWALA O NJIMBU YAKIDI YA NZAMBI?

Kwene jimidi ja jikopya jokulu ja Mikanda Ikôla. Se mukopya imoxi mwala ilwezu, atena ku isokesa ni jikopya jamukwa phala kusanga o kidi.—Phala kwijiya dingi yalungu ni maka enyá, tanga o milongi: “A Bíblia foi alterada?” mu jw.org.

Mukifika, xinganeka o madukumendu okulu a exana Rolos do Mar Morto, a a sange kwala o jibeduínos, bhumabanda bhwalungila o Mar Morto kumuvu wa 1947. Mumadukumendu oso yá okulu, mwala jimbandu ja Mikanda Ikôla jamidi jiyadi jamivu kudima ndenge. O akwa kutokwesa asokesa o mikanda yiyi yokulu ni Mikanda Ikôla itwala nayu lelu. Ihi yasange ene?

O akwa kutokwesa amono kwila o ima yosoneke mu Mikanda Ikôla itwala nayu lelu, yene imoxi ni yokulu.a Kyoso kyatonginina kyambote o mikanda yokulu, amono kwila o ima itwene mutanga mu Mikanda Ikôla, yene mwene o njimbu ya Nzambi. Tutena kuxikina ni kidi kyoso kwila Nzambi walange o kidi mu Mikanda yê Ikôla phala etu lelu.

Tutena kutanga o Mak’â Nzambi mukuxikina ni kudyelela mu ima yosonekemu. Kuma twejiya kya o kidi kiki, kindala tumone ihi itutena kudilonga yalungu ni Nzambi bhu kaxi ka jipolofeta jê.