Maukexilu Atanu Phala ku Sanga Dixibulu dia Bibidia

1. Se ki bhonza kiavulu ku sanga muthu phala ku mu longa o Bibidia mu mbambe ietu, ihi i tua tokala o ku bhanga ni mukonda diahi?

¹ O kuila kiene mu ku bhonza ku sanga muthu ni u di longo nê o Bibidia? Kolokota ni ku kenga. Jihova u besoala o athu a kolokota mu ku bhanga o vondadi iê. (Nga. 6:⁠9) Tua-nda di longa maukexilu atanu a tena ku u kuatekesa.

2. Kiebhi ki tu tena ku bhanga kibhuidisu phala ku longa o Bibidia ku muthu?

² Ebhuidisa o Athu se a Mesena ku a Longa o Bibidia: Athu oso ejiia kuila tuene mu bhana O Mulangidi ni Despertai!, maji kejiia se tuene mu longa o Bibidia ku athu. Mukonda diahi ku ebhuidisa kioso ki uia mu boka mu inzo ni nzo? Ebhuidisa ué o athu u ua mu kunda se a mesena ku a longa o Bibidia. Se ka xikina, suluka mu ku a bhana o madivulu, phala ku a suínisa. Saí phange ua kexile mu xisa madivulu ku dikaza mu mivu iavulu. Kioso kia xisa o madivulu a ubhe, ua vutuka iú ua ebhuidisa: “Mua mesena ku mi longa o Bibidia?” Ene a xikina. Lelu a a batizala kiá.

3. O kuila tua tokala ku banza kuila athu oso aia mu iônge ene kiá ni muthu uene mu a longa o Bibidia? Jimbulula.

³ Kuia mu Iônge: Kana ku banza kuila o muthu ua mu di longa nê o Bibidia ua-ndaia kiá mu iônge. Saí phange ia diiala uambe: “O maxibulu’ami ene múia mu iônge mukonda dia kuzuela ni ió a kexile ué múia mu iônge.” Saí phange ia muhatu uai mu zuela ni muhatu mukua jisonhi uene ni tuana tua ahatu a a batizala kiá. O muhatu iú ua kexile kiá múia mu iônge mu 15 a mivu, ua kexile mu kuíza selu mu Kididi kia Ubhezelu, maji kioso ki zubha o kiônge muéne u tunda ni lusolo. O muhatu ua xikina ku mu longa o Bibidia, ua kituka mbangi ia Jihova. Muéne ua soneka: “Nga divu kia iibha mu kuijiia kuila nga kingila 15 dia mivu, phala ku ngi ebhuidisa se nga mesena ku di longa o Bibidia!”

4. Kiebhi ki tu tena ku sota maxibulu phala ku a longa o Bibidia?

⁴ Ku Sota Dingi Maxibulu: Saí phange ia muhatu u bhanga ioso phala kuia ni jiphange ku maxibulu mâ. Ua bhingi ku muboki ni mukuá, mu disukilu dia milongi, iu uebhula ku dixibulu, se uejiia muthu ua mesena ku mu longa o Bibidia. Kioso ki u bhana o divulu Bibidia I Longa ku muthu, ua mu kundile kiá, ua tokala u mu ibhuidisa: “Uejiia dingi muthu ua mesena ku tanga o divulu didi?” Saí ithangana o aboki ni aboki a thembu ioso kia a bhonza ku longa o Bibidia ku athu a a sanga mu mbambe iâ. Tangela ku jiphange jê kuila eie uala polondo phala ku longa o Bibidia ku athu.

5. Mukonda diahi tua tokala kuibhuidisa o diiala mba muhatu kala mu ubhezelu umoxi ni kaza diê, se ua mesena ku mu longa o Bibidia?

⁵ Makaza Kala Kumoxi mu Ubhezelu: O kuila mu kilunga kiê muene makaza kala kumoxi mu ubhezelu? Saí makaza a dituna ku di longa o Bibidia ni kaza diê, maji u tena ku xikina se muthu uéngi u mesena ku di longa nê o Bibidia. Kima kiambote kuzuela ni diiala mba muhatu phang’etu, ande dia kuzuela ni kaza diê.

6. O musambu uala ni valolo iahi phala ku sanga dixibulu?

⁶ Musambu: Kana ku bhuila mu kusamba. (Tiia. 5:​16) Jihova u tambuijila misambu ietu, se iene ia lungu ni vondadi iê. (1 Nzu. 5:​14) Saí phang’etu ia diiala, ua kexile ni ikalakalu iavulu, ka kexile ni kithangana kia ku longa o Bibidia ku dixibulu, mu kiki ua bhingi mu musambu kikuatekesu. Muhatu ué ua mu ibhuidisa se ua-nda kala ni kithangana kia ku kuatekesa dixibulu, bhenge-bhenge se muene u kala ni maka. Kiki kia bhangesa muhatu uê ku samba kua Ngana Jihova phala muadi uê n’a kale ni dixibulu. Misambu iê ió tambuijile kioso kia mu bhana dixibulu ku muboki ua thembu ioso ua kilunga kiê, ua mesenene ku di longa o Bibidia. O muhatu uambe: “Uoso u banza kuila o ku longa o Bibidia ku dixibulu ki bhonza mukonda ku bhinga ithangana iavulu, ua tokala u samba kua Jihova phala ku mu kuatekesa, ká bhuile mu ku bhinga. Etu tua sanguluka kiavulu.” Ni muanhu uoso eie ué u tena ku sanga dixibulu, ni ku sanga kisangusangu kia ku kuatekesa muthu ku sanga ‘o njila ia muenhu.’​—⁠Mat. 7:​13, 14.