Kiebhi ki u Tena ku Katula Mbote ku Kibuka Kiê Kia Sidivisu ia ku Boka?
1. Kikuatekesu kiahi mu ku di Longa o Divulu mu Kibuka, ki tu tena hanji ku tambula mu kibuka kietu kia sidivisu ia ku boka?
1 O kuila eie ua fongele kiá mu ku di Longa o Divulu mu Kibuka kia kilunga? M’ukulu, o ibuka, mua kexile athu ofele. Mukonda dia kiki, ki ki bhonzele ku bhanga ukamba, ni ku kolesa o kixikanu kietu. (Jisa. 18:24) O muendexi ua divulu, uejidile kiambote o ibhindamu ietu, ni ku tu bhana kikuatekesu. (Jisa. 27:23; 1 Phe. 5:2, 3) Tu tena hanji ku tambula o kikuatekesu kiki, mu kibuka kietu kia sidivisu ia ku boka.
2. Ihi i tua tokala o ku bhanga phala tu kale ni ukamba mu kibuka kietu kia sidivisu ia ku boka mu tu tambula o kikuatekesu mu nzumbi?
2 Xinganeka ku Bhanga Kima: O kibuka kia sidivisu ia ku boka, kiofele kala o kibuka kia ku di longa o divulu m’ukulu. Ku kalakala mu ukunji ‘kumoxi,’ ni jiphange, ku suínisa o ukamba. (Fil. 1:27) O kuila uene mu kalakala ni jiphange javulu mu kibuka kiê? Se ki kiene, o kuila u tena ku ‘jikula o muxima uê?’ (2 Kol. 6:13) Tu tena kuixana phange mu kibuka kietu, n’eze ku Ubhezelu ku Muiji uetu, mba mu inzo ietu phala kudia. Saí ilunga, o ibuka ia sidivisu ia ku boka, a di sokeka phala ku bhana kudia ku kafunga ka ilunga. Mu sidivisu iê ia semana, o jiphange mu kibuka a diongeka, phala ku bhana kudia, ni ku di kuatekesa mu nzumbi, né muene se o kafunga kala-bhu phala kudia nau kumoxi.
3. Mu ukexilu uahi u tu tena ku tambula kikuatekesu mu kibuka kietu kia sidivisu ia ku boka?
3 Sumbala o kilunga kiene mu diongeka mu veji jiiadi ku semana, kiki ki kilombolola kuila o aboki ka tokala dingi ku a kunda ku tufunga. O a mu solo phala ku kala ku pholo ia kibuka, u bhana kikuatekesu ku muthu ni muthu, ni jindunge ja ku boka. Se o phange uala ku pholo ia kibuka, ka ku solo hanji phala ku boka nê kumoxi, o kuila u tena ku mu bhinga ni mu iê kumoxi mu boka? O kafunga ka sidivisu, u kalakala ni ibuka iavulu ku mbeji. Mu ilunga muala ibuka iofele ia sidivisu ia ku boka, o kafunga ka sidivisu ua tokala ku kunda o ibuka veji jiiadi ku muvu. O kuila eie uene mu bhanga ioso phala ku tunda mu sidivisu ia ku boka kioso muéne kia ia mu kibuka kiê?
4. (a) Kiebhi kia sokejeka o iônge ia sidivisu ia ku boka? (b) Mukonda diahi tua tokala ku banza ku zalela o jiphange jetu, phala ku bhanga o iônge ia sidivisu mu inzo ietu?
4 Kima kiambote se kala kibuka ki diongeka mu semana phala ku boka. O ku kala ni ibuka iavulu ia ku boka mu kithangana kimoxi, ki kuatekesa o aboki ku bhixila mu kiônge kia ku boka, ni kuia mu jimbambe jâ. O aboki a tena o ku disokejeka ni lusolo phala kuia mu mbambe iâ. Ki kuatekesa ué o mutuameni ua kibuka ku suua o ibhindamu ia muthu ni muthu mu kibuka. Kala kibuka kiala ni ibhindamu iê. O kilunga ki diongeka kumoxi mu Sábhalu ia dianga, maji kioso ki bhua o Milongi ia Mulangidi, kima kiambote se kala phange u xikama kumoxi ni kibuka kiê phala o mutuameni n’a tene ku bhana jindunge ande dia kusamba.—Tanga o kaxa iambe: “O Kuila u Tena ku Zalela o Jiphange jê?
5. Sumbala ki tuene dingi mu di Longa o Divulu mu Kibuka, kidielelu kiahi ki tuala na-kiu?
5 Sumbala ki tuene dingi mu di Longa o Divulu mu Kibuka, maji né kiki Jihova uene mu bhanga ioso phala ni tu tene ku bhanga o vondadi iê. (Jihe. 13:20, 21) Jihova u tu bhana ioso i tua mesena. (Jisá. 23:1) Tu tambula mabesá avulu mu kuia mu kibuka kia sidivisu ia ku boka. Se tu dianga mu ku ‘kuua kiavulu,’ tua-nda ‘bhongolola kiavulu.’ —2 Kol. 9:6.
[Foto ku mbandu 6]
O Kuila u Tena ku Zalela o Jiphange jê?
Kuene ibuka iavulu a diongeka kumoxi mu semana, mukonda se-ku dibhata phala ku bhanga o kiônge kia sidivisu ia ku boka. O iônge ia sidivisu i suínisa o jiphange, o ku kala ni kibuka mu inzo ietu ujitu ua dikota. O kuila u tena ku zalela o jiphange jê? Kana ku kala ni jisonhi mukonda dia ku kamba ima iavulu mu inzo iê. O tufunga a-nda banza ande dia ku ku bhana o ujitu iú, kala kia banze kioso kia solo o jiphange phala ku di longa o divulu mu mabhata mâ. Se ua mesena ku zalela o jiphange jê, zuela ni mutuameni ua kibuka kiê kia sidivisu ia ku boka.