O Iônge ia Sidivisu ia ku Boka i Suínisa

1. O iônge ia sidivisu ia ku boka ene mu i bhanga phala’hi?

¹ Saí kithangana, Jezu ua diongekele ni 70 a maxibulu, ande dia kuia mu boka. (Luka 10:1-11) Muéne ua a suínisine mu ku a lembalala kuila, ene keji kala ubheka uâ, eji kala ni Jihova o “Mukua dibhia.” Jezú ua a bhanene ué itendelesu phala ku a kuatekesa ku boka, ua a tumikisa ‘kiiadi kiiadi.’ Lelu, o iônge ia sidivisu ia ku boka ene ué mu i bhanga, phala ku tu suínisa ni ku tu pelepalala.

2. Ithangana ikuxi, ia tokala ku bhanga o iônge ia sidivisu ia ku boka?

² O iônge ia sidivisu ia ku boka, i bhanga 10 mba 15 dia ithangana, phala ku uana o ibuka, ku bhana ji mbambe ni ku samba. Maji ia-nda lunguluka. Tundé ku mbeji ia Kasamanu, o iônge ia sidivisu ia ku boka, ia-nda bhanga ngó 5 mba 7 dia ithangana. Maji se a dianga ku bhanga o kiônge, kia ku di longa o mulangidi, a tena ku sosolola dingi o ithangana, mukonda o jiphange a tambula kiá milongi. Se tu bhanga iônge ia sidivisu ia ku boka ia butu, tua-nda kala ni kithangana kia soko phala ku boka. Mu ku suluka, se aboki a thembu ioso mba aboki a mateka ku kalakala ande dia kiônge, a-nda kuimana ngó bhofele.

3. Kiebhi kia tena ku bhanga o iônge ia sidivisu ia ku boka, phala ku kuatekesa kiambote o aboki?

³ O iônge ia sidivisu ia ku boka, a tokala ku i bhanga kiambote, mukonda i kuatekesa dingi o aboki. Mu ilunga iavulu, o aboki a katula dingi mbote, se o iônge a i bhanga mu ibuka, mu veji dia ku diongeka ngó bhu kididi kimoxi. Ku bhanga kiki, ku kuatekesa o aboki ku bhixila selu mu kiônge ni mu mbambe. O aboki a tena ku tunda ni lusolo, nange ki ku bhonzo ué o tufunga ku langa o kibuka. O tufunga a tena ku sola o ndunge ia beta o kota phala o mbambe iâ. Ande dia ku samba, o jiphange joso a tokala kujiia kuebhi ni nanhi ua-nda kalakala né.

4. Mukonda diahi ki tu tokala ku mona, o iônge ia mukuá ia kilunga, kala iala dingi ni valolo, o ia sidivisu ia ku boka ndenge?

⁴ Iala ni Valolo Kala o Iônge ia Mukuá ia Kilunga: O iônge ia sidivisu ia ku boka ene mu i bhanga ngó phala o jiphange a-ndaia mu boka, ki phala athu oso mu kilunga. Maji kiki ki kilombolola kuila, a tokala ku mona o iônge ia mukuá ia kilunga kala iala dingi ni valolo, o íii ndenge. Kála o iônge ietu ia mukuá, o iônge ia sidivisu ia ku boka, a i bhange kua Jihova, phala ku tu kuatekesa ku di suínisa, ku di zola ni ku bhanga ima iambote. (Jihe. 10:24, 25) Kienhiki, o muendexi ua tokala ku di pelepalala kiambote, phala o kiônge ki bhane kijingu kua Jihova ni ku kuatekesa o aboki. Se ki bhana o aboki a-ndaia mu ukunji, a tokala ku bhanga nguzu phala kuia mu kiônge.

Iala ni Valolo Kala o Iônge ia Mukuá ia Kilunga

5. (a) Kiebhi o kikalakalu kia tufunga tua sidivisu, kioso kia sokeka o iônge ia sidivisu ia ku boka? (b) Kiebhi phange ia muhatu, kia tokala kuendesa o kiônge kia sidivisu ia ku boka?

⁵ O Muendexi ua Tokala ku di Pelepalala: Phala phange ku bhanga kiambote o mbandu iê mu kiônge, ua tokala ku i tambula ni kithangana kia soko. Kiene ué kimoxi ni iônge ia sidivisu ia ku boka. Se o iônge a i bhanga mu ibuka, o tufunga mba akuatekexi, ene a tokala kuendesa o kiônge. Maji se o kilunga ki sola ku diongeka kumoxi, o kafunga ka sidivisu muéne ua tokala ku sola phange phala ku kiendesa. Saí tufunga tua sidivisu, a bhana itendelesu ku endexi oso a sidivisu ia ku boka, o itendelesu íii a i ta ué bhu kididi kia jingolokela. O kafunga ka sidivisu ua tokala ku di langa, kioso kia sola jiphange phala kuendesa o iônge íii, ua tokala ku lembalala kuila, phala o iônge íii ku tunda kiambote, ku bhinga milongi ia tokala ni ku sola jiphange jala ni uhete. Se ki kuala kafunga mukuatekexi mba phange ia diiala a mu batizala kiá, phala kuedesa o iônge, o kafunga ka sidivisu ua tokala ku sola phange ia muhatu a mu batizala uala ni uhete ni ukexilu uambote phala ku kiendesa.—Tanga o mbandu “Se Phange ia Muhatu Ua-nda Kuendesa o Kiônge kia Sidivisu ia ku Boka.”

6. Mukonda diahi kima kiambote o jiphange endesa o iônge ia sidivisu ia ku boka, ku di pelepalala kiambote?

⁶ Kioso ki tu tambula mbandu mu Xikola ia Ukunji ua Nzambi mba mu Kiônge kia Sidivisu, tuene mu i mona kala ujitu ni ku i pelepalala kiambote. Se-ku muthu mu dietu, u kingila ku sokeka o milongi mu njila ande dia ku mateka o kiônge. Kiene ué kia tokala ku mona o ujitu ua kuendesa o kiônge. Lelu, o iônge ia sidivisu ia ku boka ia-nda buta, o kima kia beta kota, o ku di pelepalala kiambote phala i kuatekese o aboki ni ku bhua mu kithangana kia tokala. Ku di pelepalala kiambote, kua lungu ué ni ku tambula o mbambe mu kithangana kia tokala.

7. Ihi ia tokala ku zuela o muendexi mu iônge?

⁷ Ihi ia Tokala ku Zuela o Muendexi: O ima ki i difu mu jimbambe joso, o kimbadi kia fiiele, ka bhana mukanda ua itendelesu phala kala kiônge kia sidivisu ia ku boka. O itendelesu iala mu mbandu iambe “Mu Iônge ia Sidivisu ia ku Boka, a Tokala ku Longa-mu.” O iônge íii ene mu i bhanga mu ukexilu u kuatekesa o jiphange ku zuela. Saí ithangana a bhanga kifika mba a londekesa vidiu ió katule mu jw.org. Mu ku pelepalala o kiônge kia sidivisu ia ku boka, o muendexi ua tokala ku banza mu milongi i suínisa o aboki a-ndaia mu kiônge mu kizuua kiokio.

Mu ku pelepalala o kiônge kia sidivisu kia ku boka, o muendexi ua tokala ku banza mu milongi i suínisa o aboki a-ndaia mu kiônge mu kizuua kiokio

8. Ihi ia beta kota ku zuela mu iônge ia ku boka mu ji Sábhalu ni mu ma Lumingu?

⁸ Mu kifika, mu jisabhalu aboki avulu, a uabhela ku bhana o Mulangidi ni Despertai! Aboki avulu akalakala mu Jisabhalu, kala ni kithangana kia ku tunda mu kaxi ka semana, nange a jimba o ifika ia pelepalala mu kizuua kia Ubhezelu uâ ku Muiji. Mu kiki, nange kima kiambote o muendexi ku bhitulula o ifika ia bhebhuluka, i tu sanga mu Kikalakalu Kietu kia Utuminu. O ndunge ia mukuá ia lungu ni ku zuela maka a bhiti mu diembu, izulukutu mba kizuua kia ku nhoha i fuama ni mulangidi mba ku zuela kima ki bhangesa o mukua dibhata ku xikina ku mu kunda dingi, se ua tambula o madivulu. Se saí iônge ia bhange ni kikuatekesu kia madivulu a ku bhana mu mbeji, o muendexi ua tokala ku bhinga o jingivuidi ku bhana jindunge mba ku tanga misoso i suínisa. Mu ma Lumingu, o muendexi muéne u sola milongi phala o kiônge, ia difu ni milongi ia madivulu a ku bhana mu mbeji. O madivulu a ku longa, kála o tudivulu Njimbu Iambote, Ívua Nzambi ni divulu Bibidia i Longa, a tena ku a bhana mu kizuua kioso-kioso, o muendexi ua tokala ku bhana itendelesu se kiebhi kia tena ku bhana o madivulu iâ.

9. Ihi ia tokala o ku bhanga mu masukilu a semana, se o kilunga kia mu bhanga kikalakaulu kiéngi kia katunda?

⁹ Se o kilunga kiala ni kikalakalu kiéngi kia katunda mu masukilu a semana, o muendexi ua tokala ku bhana itendelesu se kiebhi kia tokala ku bhana o madivulu mba tumikanda mu kithangana kiki mba u zuela se ihi ia tokala o ku bhanga o aboki se muthu u londekesa kuila ua mesena kuívua. O ndunge ia mukuá o ku tanga misoso iambote ku jiphange i londekesa o valolo ia ku bhana o tumikanda.

10, 11. Mukonda diahi o aboki a tokala ku di pelepalala, phala o iônge ia ku boka ku tunda kiambote?

¹⁰ O Aboki a Tokala ku di Pelepalala: O aboki aia mu iônge ia sidivisu ia ku boka, a tena ué ku kuatekesa phala ni ibhite kiambote. Mu ku di sokeka kiambote phala o ukunji, nange mu ubhezelu ku muiji, a-nda kala ni ima phala ku zuela ni aboki ni akuá. O ku di pelepalala kiambote kua lungu ué ni ku katula o madivulu ande dia kuia mu sidivisu ia ku boka phala o jiphange kuia mu mbambe se ku laleka.

¹¹ Kima kiambote ku bhixila selu mu iônge ia ku boka. Tua tokala ku bhanga nguzu, phala ku bhixila selu mu iônge ioso. Maji ki thandanganhesa dingi kioso ki tu bhixila tádidi mu iônge ia sidivisu ia ku boka. Kiebhi? O muendexi u xinganeka ima iavulu ande dia ku bhanga o ibuka ia kiaidi kiaidi. Se ku moneka ngó kibuka kiofele kia aboki, nange muéne u sola ku a tumikisa mu mbambe ene mu ikalakala kiavulu. Se saí jiphange enda luavulu phala kuia mu kiônge kia ku boka ni kuila, o mbambe mua-nda boka dikanga, o muendexi u tena ku a bunda ni jiphange ala ni dikalu. Se mu mbambe muala ubandi uavulu, o muendexi u sola jiphange phala ku kalakala kumoxi ni jiphange ja ahatu. O aboki a kate mba ala ni unema, a boka mu ididi mba mu jinzu ki ku bhonzo ku bhixila-ku. O a mateka ku boka kindala, a tena ku a sola phala ku boka ni aboki a mateka kia ukulu. Maji se aboki a bhixila tádidi, kua-nda bhinga ku muanga dingi o ima ia sokejeka kia. Maji saí ithangana nange o ibhidi i tu bhangesa ku bhixila tádidi. Se tuala ni kifua kia ku bhixila tádidi, tua tokala ku dibhuidisa se ki tua mu bhana valolo mu iônge ia ku boka mba tua mu sokeka o ima mu kithangana kia tokala.

12. Se u sola o muthu u ua-nda boka nê, ima iahi i tua tokala o ku banza?

¹² O aboki ene ejiia se a sola o phange, a-nda boka-né ande dia ku mateka o kiônge mba a a bhana o jiphange a-nda boka nau. Se uene mu sola kia o phange ua-nda kalakala nê, o kuila u tena ku ‘jikula o muxima’ uê mu ku kalakala ni phange javulu, mu veji dia ku boka ngó ni kamba diê ithangana ioso? (2 Kol. 6:11-13) O kuila, u tena ku boka ni muboki ua ubhe phala ku mu kuatekesa, ku bandekesa o uhete uê ua ku longa? (1 Kol. 10:24; 1 Tim. 4:13, 15) Ivua kiambote o itendelesu ia bhana, benge-benge ia lungu ni kididi kia ku boka. Kioso ki bhua o kiônge, kana ku lungulula o ima io sokejeke kia ni kuia mu mbambe se ku u tumina.

13. Se o jiphange a kumbidila o itendelesu, kiebhi o iônge ia ku boka ia-nda tu kuatekesa?

¹³ Kioso kia zubha o ku boka, o 70 a maxibulu a sokejeka Jezú ‘a vutuka ni ku sanguluka.’ (Luka 10:17) Mukonda dia Jezú ku diongeka nau, ande dia ku mateka o ku boka, ua a kuatekesa ku di tunda kiambote. O iônge ia ku boka ia lelu, i kuatekesa ué. Se o jiphange joso, a kumbidila o itendelesu ioso, o iônge ia ku boka, ia-nda tu suínisa ni ku tu pelepalala phala ku bhanga o kikalakalu kietu kia ‘ku bhana umbangi ku akua jixi joso.’—Mat. 24:14.

Se Phange ia Muhatu Ua-nda Kuendesa o Kiônge kia Sidivisu ia ku Boka

Se phange ia muhatu ua-nda kuendesa o kiônge, ua tokala u xikama ni ku ta dilesu ku mutué. O milongi ia sola o ku zuela ia difué ngó ni i sola o jiphange ja mala. Muéne ka tokala ku zuela kala ua mu tendelesa o jiphange, nange muéne u suínisa o jiphange ku zuela. Se muéne u sola phange ia mukuá ia muhatu a mu batizala, phala ku samba, o phange ua tokala ué ku ta dilesu. Se phange ia diiala a mu batizala u bhixila ande dia ku bhua o kiônge, o phange ia muhatu ua tokala ku muehela ku zubha ku bhanga o kiônge. O kafunga ka sidivisu ua tokala ku xinganeka o iluezu i tena o ku moneka ni ku bhana itendelesu ia tokala phala ka kambe ku bhanga o kiônge. Mu kifika, se munzangala ua diiala nange uala hanji ni 11 mba 12 a mivu, a mu batizala kiá u kala-bhu, kioso kia bhana mbandu ku phange ia muhatu phala kuendesa o kiônge kia ku boka, maji o tufunga a banza kuila, muéne ka-nda tena lua ku kiendesa. Mu maka enhá, o kafunga ka sidivisu ua tokala ku zuela ku jiphange ala mu kiônge kuila, a solo phange ia muhatu phala ku bhanga o kiônge maji o phange ia diiala ua tokala ku samba, se o tufunga a banza kuila muéne u tena. Mba bhu kala muadiakimi a mu bazela ku tufunga, ka tena kuendesa o kiônge mu kilunga mba ku samba. O tufunga a tokala ku zuela ni phange kuila, jiphange ja ahatu a-nda kuendesa o kiônge kia ku boka ni izuua ia-nda kuendesa.

Mu Iônge ia Sidivisu ia ku Boka, a Tokala ku Longa-mu:

Kifika kiala mu Kikalakalu Kietu kia Utuminu.
Vidiu ia lungu ni ukunji uetu iala mu jw.org.
Milongi ia lungu ni kifika kála o diba dia ku zuela, ku xisa kibhuidisu phala ku vutuka dingi mba ku sangela kitadi, kioso kia xikina o madivulu.
Ku tanga kibatulu kia lungu ni ukunji mba ku suínisa.
Musoso ua diembu ua lungu ni ku boka mba musoso ua madivulu.
Itendelesu ia ubhe iene mu kuíza mu Kikalakalu Kietu kia Utuminu.
Itendelesu ia ubhe ia Kiônge kia Sidivisu.
Milongi ia lungu ni ku boka iala mu Mulangidi.
Milongi ia lungu ni ku boka iala mu madivulu Escola do Ministério ni “Venha Ser Meu Seguidor”.
Milongi iala mu jw.org, ia lungu ni ukunji.
Milongi iala mu kadivulu Kilomboluelu kia Mak’a Nzambi.
Kiebhi o jiphange kia tena ku zuela ni muthu a mu sange mu mbambe kála muthu ka xikina kuila ki kuene Nzambi, a xikina kuila o ima ia moneka ngó, ji Hindu mba ji Budista.
Kiebhi kia tena ku tambuijila o athu a tu batula.
Kiebhi kia tena ku kuatekesa o phange ua mu boka né ku di tunda kiambote mu ku beta o mabhitu.
Kiebhi kia tambuijila kioso kia sanga muthu u zuela dimi diéngi.
Ku boka mu maukexilu avulu ku kuatekesa dingi, kála sota milongi, ku bhana umbangi mu mutelembe, mu ididi mu bhita athu avulu, ku vutuka ku kunda dingi mba ku longa Bibidia.
Itendelesu ia lungu ni ku di langa, ku lenduka, ku kala ni ukexilu uambote, ni ibanzelu iambote mba milongi iéngi.