Jihova U tu Longa Phala o Kikalakalu Kiki
1. Kioso Jihova kia bhana kikalakalu ku athu, ihi i bhanga ué muéne?
1 Kioso Jihova kia bhana kikalakalu ku athu, muéne u a bhana ué kikuatekesu kia tokala n’a tene ku bhanga o kikalakalu kiki. Mu kifika, kioso Jihova kiambe kua Noué phala ku tunga o álaka, o kima nuka ka ki bhangele, Muéne ua mu tangele ué kiebhi kia tokalele ku ki bhanga. (Dim. 6:14-16) Kioso o mubhidi Mozé, kia mu solo phala kuia mu zuela ni adiakimi a Izalaiele ni kua Falaó, Jihova ua mu ambela: ‘Eme muéne ngi kala ni dikanu diê, ngi ku longesa o ima ioso i ua-nda zuela.’ (Mak. 4:12) Kioso ki tu bhanga o kikalakalu kietu kia ku boka o njimbu iambote, Jihova u tu bhana ué kitendelesu se kiebhi ki tu tokala ku ki bhanga. Muéne u tu longa, phala o kikalakalu kiki, bhu kaxi ka Xikola ia Ukunji ua Nzambi, ni Kiônge kia Sidivisu. Kiebhi ki tu tena ku katula mbote, mu ilongesu íii?
2. Kiebhi ki tu tena ku katula mbote mu Xikola ia Ukunji ua Nzambi?
2 Xikola ia Ukunji ua Nzambi: Tanga ni ku di longa o milongi, ande dia kuia mu kiônge. Tonginina kiebhi o alongexi, a mu jimbulula o milongi mu madiskursu mâ, ni u di longe kiebhi ki u tokala o ku longa. (Jisa. 27:17) Ambata o divulu diê, Escola do Ministério Teocrático mu kiônge, ni ku kaiela o milongi. Kioso o muendexi ua xikola u bhana milongi kua ió a bhange o mbandu, sola o ji pondo ji ua mesena, ni ku soneka ku jimbambe ja divulu. O ukexilu uambote phala ku katula mbote mu xikola, o ku bhanga mbandu. O kuila ua mu diongeka kiá ni Jimbangi ja Jihova? Kioso ki ua-nda tambula o mbandu, di iudike kiambote, ni ku belesela o itendelesu i ua-nda tambula. Kioso ki uia mu ukunji, londekesa i ua di longo.
3. Ihi ia-nda tu kuatekesa ku katula mbote mu Kiônge kia Sidivisu?
3 Kiônge kia Sidivisu: Tua-nda di lembalala kiambote o ji pondo ji tua di longo mu kiônge, mu ku tanga o milongi ni kithangana kia soko, ni ku di iudika phala ku bhana itambuijilu. Se u bhana itambuijilu iofele, ua-nda kuehela ué o jiphange ja mukuá ku tambuijila. Tala kiambote o ifika, ni ku kaiela o itendelesu mu ukunji uê. Bhaka o jimbandu ja Kikalakalu Kietu kia Utuminu, phala ku u kuatekesa ku hádia.
4. Mukonda diahi tua tokala ku katula mbote mu ulongelu u tu tambula mu nzumbi?
4 Kála o ikalakalu ia bhanene kua Noué ni Mozé, o kikalakalu kietu kia ku boka o njimbu iambote mu ixi ioso, ki bhinga nguzu. (Mat. 24:14) Tu tena ku di tunda kiambote se tu dielela kua Jihova, o Mulongexi uetu ua Dikota, ni ku katula mbote mu ulongelu u tu bhana.—Iza. 30:20.