Kulenu mu Nzumbi Kala mu Akunji
1. Phangu iebhi ia hama ia dianga, ilondekesa kuila, tua tokala ku kula mu nzumbi kala tu akunji?
1 O jikidistá a tokala ku kula mu nzumbi kala akunji. Mukonda dia kiki, Jezú ua bhanene jindunge ku akaiedi’ê phala ku boka. (Luka 9:1-5; 10:1-11) Kiene ué kia bhangesa Akuila ni Pidisila ku zalela Apolo ni ‘ku mu lomboluela kiambote o Njila ia Nzambi.’ (Ika. 18:24-26) Phaulu ua suínisa ué o mukunji Timote, phala ku di kuatenena mu ima ia di longo, phala o ku kula kuê mu nzumbi, ‘ku moneke ku athu oso.’ (1 Tim. 4:13-15) Né muene se tua mu sidivila kia Ngana kala tu aboki a njimbu iambote tundé ukulu, tua tokala ku suluka ni ku bandekesa o uhete uetu ua ku boka.
2. Kiebhi ki tu tena ku di longa ni akuetu?
2 Di Longe ni Akuenu: Tu tena ku bandekesa o uhete uetu, mu ku di longa ni akuetu. (Jisa. 27:17) Se phangi’ê ua mu bhana umbangi, mu tonginine kiambote. Bhinga jindunge ja tokala ku aboki ala ni uhete, ívua kiambote ioso ia-nda ku tangela. (Jisa. 1:5) O kuila ku ku bhonza ku kunda dingi o athu, ku longa o Bibidia mu veji ia dianga mba kikalakalu kiéngi kia ukunji? Bhinga ku muendexi uê ua kibuka mba ku muboki uéngi uala ni uhete, phala ku u kuatekesa. Lembalala ué kuila, o nzumbi ikôla ia Jihova i tena ku bandekesa o uhete uetu, mu kiki, samba izuua ioso.—Luka 11:13.
3. Kiebhi ki tua tokala ku divua se a tu bhana ndunge sé ku i bhinga?
3 Se a ku bhana ndunge phala ku u kuatekesa, kana ku divua kia iibha, né muene se ku i bhingi. (Ndo. 7:9) Kála kia bhangele Apolo ni ku lenduka xikina o kikuatekesu ni kisakidilu. Ku bhanga kiki, kulondekesa unjimu.—Jisa. 12:15.
4. Kála kiambe Jezú, mukonda diahi tua tokala ku kula mu nzumbi?
4 Ku Kula mu Nzumbi ku Jingisa Nzambi: Bhu kaxi ka ifika, Jezú ua suínisa o akaiedi’ê ku kula kala akunji. Muéne ua di sokesa ni muxi ua muvidi, o akaiedi’ê a a undu kála o jithangu. Muéne uambe kuila Tat’ê, u batula jithangu ji bhana ibundu ‘ni i bete o ku bhana.’ (Nzuá 15:2) Kála o mukua muvidi u mesena kuila, o jithangu ja muvidi uê ji bhana ibundu iavulu, Jihova ua mesena kuila, tu suluka ni ku bandekesa o uhete uetu ni ‘tu mu ximane.’ (Jihe. 13:15) Mbote iahi i tu tambula, mu ku kula mu nzumbi kala tu akunji? Jezú u tu tangela kuila: ‘Kiene ki bhangesa athu ku ximana Tata iami, se mu bhana ibundu iavulu.’—Nzuá 15:8.