Ku Bandekesa o Uhete Uetu mu Ukunji—Kuatekesa Phang’iê

Mukonda Diahi Kima Kiambote ku Bhanga Kiki: Jezú uejidile o valolo ia ku boka ni mukuá. Kioso kia solo o 70 a maxibulu, phala kuia mu boka, ua a tumikisa mu kiiadi. (Luk. 10:1) O muboki u tena ku kuatekesa phang’iê, kioso kia dibhana ni ibhidi mu sidivisu ia ku boka, mba kejiia kiebhi kia tena ku tambuijila o mukua dibhata. (Ndo. 4:9, 10) Muéne u tena ku longa o uhete ué ku muboki ni mukua, ku bhana ndunge iambote i tena ku kuatekesa mukuá ku kala muboki uambote ni ku kala dingi ni uhete ua ku longa. (Jisa. 27:17) U tena ué ku suínisa mukuá, mu ku zuela ima iambote kioso kia mu boka nzo ni inzo.—Fil. 4:8.

Kiebhi ki tu Tena ku Bhanga Kiki:

Kaiela phang’iê, kioso kia mu bhana umbangi. (Tiia. 1:19) Kioso kia tanga o Bibidia, mu kaiele ué mu Bibidia iê. O ku bhanga kiki, kia-nda ku kuatekesa ku mu bhana kikuatekesu se ku bhinga.
Kala ni kilunji phala kuijiia o kithangana ki ua tokala o ku zuela. (Jisa. 25:11) Se uia ni phang’iê, ku inzo ia dixibulu diê, kima kiambote ku zuela kima. Mu ku boka nzo ni inzo, nange o muboki u ua mu boka nê, u ku bhinga phala ku mu ehela ku mateka ku zuela ni muthu, kioso ki mu vutuka dingi mu inzo ia mukua dibhata. Maji, se muéne ua mateka ku boka kindala mba kejiia kiebhi kia tokala o ku tambuijila kibhuidisu kia mu bhange, ua-nda sanguluka kiavulu se u mu kuatekesa. Ki kale se ua mu boka ni phang’iê, nzo ni inzo, ku vutuka phala ku kunda dingi muthu, mba ku longa o Bibidia ku dixibulu, kana ku batula mukuenu, kioso kia mu zuela, mba ku zuela maka engi.
Longa o ndunge iê. Suínisa phang’iê ua mu kalakala nê, phala ku mu kuatekesa ku kala dingi ni uhete ua ku longa, ni ku mu kolesa phala ka bhuile. (Jisa. 3:27) Se kithangana ki bhana, ebhuidisa kua phang’iê: “Kiebhi ki ua mono? mba “O kuila ngi tena ku ku bhana ndunge?” mba “Nga fikisa ku bhanga kiki.” O kuijiia kuila saí jiphange a uabhela ku tambula milongi, kia-nda kua suínisa kioso kia tambula milongi se a lueza.

Fikisa o Ndunge Íii mu Mbeji Íii:

Kioso ki u zubha o ku boka ni phang’iê, mu tangele se ihi ia zuela mba ia bhange ia ku uabhela dingi.