Kubandekesa o Uhete Uetu mu Ukunji—Kuatekesa o Aboki a Mateka Kindala

Mukonda Diahi Kima Kiambote Kubhanga Kiki: O maxibulu a Jezú a tokala kubelesela “o ima ioso” ia tumu muéne, kala o kulonga o kidi ku athu. (Mat. 28:19, 20) Athu avulu, ene mu a sola phala kubhanga mbandu mu Xikola ia Ukunji ua Nzambi, nange a bhana umbangi ku jindandu jâ mba makamba. Mu kiki, kioso kiaia ni kudilonga, ene a uabhela dingi o kidi, a tendela kuila, Jihova ua mesena kuila, athu oso evua o njimbu iambote, kiki kia a bhangesa kumateka ué kuboka. (Lom. 10:13, 14) Kioso kia a xikina kala aboki ka a batizala luua, kubhinga ku a kuatekesa, phala ku a bhana nguzu ia kukula mu nzumbi.—Luka 6:40.

Kiebhi ki tu Tena Kubhanga Kiki:

Kuatekesa o muboki ua mateka kindala, kusanga o madivulu a-nda kalakala nau mu ukunji. Mu londekese kiebhi ki ua sokejeka o mbuenga iê ia kuboka ni kiebhi kia tena kukalakala ni madivulu.
Ni kikuatekesu kia Kikalakalu Kietu kia Utuminu, pelepalale-nu kifika. Mu kuatekese kujimbulula o kifika mu izuelu iê. Solenu ifika ia tokala ku mbambe ienu, mu divulu Escola do Ministério mu mbandu 82. Mu lembalale o valolo ia kuzuata kiambote.—2 Kol. 6:3, 4.
Suluka ni ku mu longa. Mu londekese o mbambe ia-nda kalakala jinga, mu longe kiebhi kia tena kusoneka o kamukanda ka kuboka nzo ni inzo. Mu longe kiebhi kia soneka o athu a xikina kudilonga. Mu longe kukalakala ni jw.org mu ukunji ni kadivulu Boas Novas Para Pessoas de Todas a Nações. Mu kuatekese kukala ni vondadi ia kutokuesa.—1 Kol. 3:6.
Kala ni muanhu, mu ximane. (Jisa. 25:11) Bhana phangu iambote. O kusuína ni henda iê kua muéne, kua-nda mu bhekela mabesá ku hádia.

Fikisa o Ndunge Íii mu Mbeji Íii:

Boka nzo ni inzo ni dixibulu diê, mu kuatekese kukunda dingi o athu ni kulonga o Bibidia. Se ki uala ni dixibulu, sola muboki kala ni uhete phala kuboka-né.