Di Longe ni Aboki Ala ni Uhete

Tu bhana valolo ku aboki ala ni uhete mu kilunga. Saí aboki a mu sidivila Jihova tundé ukulu. Amukuá ala ni uhete, sumbala a mateka kindala. O aboki enhá, ene mu mona kiebhi Jezú kiene mu kuendesa o kilunga kia Jikidistá, mu izuua ia sukidila-ku, mu kusanzumuna o kikalakalu kia kuboka ni kubhanga maxibulu. (Mat. 28:19, 20) Mu kukalakala mu ukunji, ene mu tambula “o nguzu i lenda ioso” phala kudibhana ni ibhidi. (2 Kol. 4:7) Saí jindunge javulu, phala ku dilonga ni aboki enhá. Kioso kia kala ni kithangana, a uabhela kulonga akuâ, o ima ia dilongo. (Jisá. 71:18) Tua tokala kusota kithangana, phala kudilonga nau. Kiebhi ki tu tena kubhanga kiki?

Mu Ukunji. Phala ku ditunda kiambote mu ukunji, o muboki ua mateka kindala ni ió kala ni uhete, a bhingi ku a kuatekesa. A tena kudilonga, mu ku tonginina kiambote o aboki ala ni uhete mu ukunji. (Tanga o Mulangidi ua 15 ua Kauana ka 2015, diambe “Kolokota mu Ukunji Uê,” mu kaxi ka katatu mu mbandu iambe “Kuatekesa o Aboki a Ubhe.”) Mbote iahi i ua katula, mu kuboka ni aboki enhá?

O kuila u tena kusola muboki uala ni uhete, phala ku tunda-né mu ukunji?

Se saí muboki ua kate, ambata o dixibulu kubhata diê, phala kudilonga-né. Mu disukilu, mu ibhuidise se ua ditundu kiambote mba kana, mu bhinge kikuatekesu.

Sota Kithangana Phala Kukala Nau: Ijiia o aboki ala ni uhete, mu kusota kithangana phala kukala nau. Bhinga-u phala kukala mu ubhezelu ué ku muiji, mu bhange ibhuidisu. Se saí muboki ua kate, o kuila u tena ku disokejeka phala kubhanga o ubhezelu ku muiji, kubhata diê? Mu ibhuidise kiebhi kia mateka kudilonga o kidi. Mabesá ebhi ene mu tambula? Kiebhi kia mu dibandekesa o kikalakalu mu kilunga kiê? Kisangusangu kiebhi kiala na-kiu, kia ku sidivila Jihova?

Ijiia kate kuebhi o muboki iú, u tena ku ku kuatekesa. Etu enioso ki tu difu mu ukexilu ua kuboka, kiene kimoxi ué ni aboki ala ni uhete. (Loma 12:6-8) Saí aboki a kuka kiá, ka tena dingi kuboka kiavulu. Maji né kiki, tu tena kukatula phangu, mukonda dia ku sidivila Jihova ni ufiiele uoso tundé ukulu.