Kuatekesa Mukuenu mu Ukunji
1. Kiebhi ki tu tena ku kaiela o phangu ia poxolo Phaulu, kioso ki tu boka ni akuetu?
1 O poxolo Phaulu ua monene o kithangana kia kexile ni jiphange jê kala ‘kithangana kia ku di suínisa.’ (Lom. 1:12) Kioso ki u boka ni muboki ni mukuá, o kuila u mu suínisa ni ku mu kuatekesa? Mu veji dia ku dixibha ngó, ki kima kiambote ku tangela ku muboki ni mukuá, se ihi i ku kuatekesa ku kala ni uhete ua ku boka?
2. Ihi i tua tokala o ku bhanga, phala ku suínisa mukuetu, ni mukonda diahi kima kiambote ku bhanga kiki?
2 Suínisa Mukuenu: Saí aboki a kala ni hele, tu tena kua mona ku pholo, ni kioso kia zuela. Tu tena kua kuatekesa mu ku a ximana ni muxima uoso. Ihi dingi i tua tokala o ku bhanga phala ku a suínisa? Saí kafunga ka ilunga ua zuela sé hele, ni muboki ua kexile mu boka n’ê, ia lungu ni uôma ua kexile nau, ni kiebhi o musambu ua mu kuatekesa ku ditunda kiambote. O phange ia mukuá, ua zuela se ihi ia mu kuatekesa: “O ku longa ni ngalasa. Kima kiambote ku samba phala ku kala ni ndunge ia ku zuela mu ku boka mu ukexilu ua bhebhuluka.” O kuila saí kima, ki ku bhangesa ku boka sé hele? Sé saí, tangela mukuenu, ua mu boka n’ê.
3. Kiebhi ki tu tena ku longa o ndunge ietu, ku muboki u tua mu boka n’ê?
3 Longa o Ndunge Iê: O kuila ua zuela ni muthu mu ukexilu ua bhebhuluka, ua bhange kibhuidisu, mba kima kioso-kioso, kia ku bhangesa ku bhana umbangi mu diembu? O kuila ua bhana umbangi mu ukexilu ua bhebhuluka, eie ua di tundu kiambote? Tangela ku muboki ni mukuenu. (Jisa. 27:17) Se ua mu vutuka phala ku kunda muthu, zuela kiebhi ki ua-nda bhanga, ni milongi i ua pelepalala phala ku kuatekesa o muthu. Se ua di longo kiá ni muthu, tangela ku mukuenu, o ndunge iê ia ku jimbulula kiambote o milongi, ku sola o kibatulu kia Bibidia, mba ku sola milongi ia lungu ni ibhindamu ia dixibulu.
4. Mukonda diahi tua tokala ku suínisa o jiphange jetu mu ukunji?
4 O aboki mu hama ia dianga, ka bhindamene ngó ku longa o athu kejidile Nzambi. Ene akexile ué mu di suua mudiâ, ni ku di suínisa. (Ika. 11:23; 15:32) O Poxolo Phaulu, ua longo Timote, iú ua mu suínisa ku longa ué akuâ. (2 Tim. 2:2) Kioso ki tu suínisa o jiphange jetu, mu ukunji, ki tu kala ngó ni kisangusangu, maji tu sangulukisa ué o muxima ua Tata ietu ia diulu.—Jihe. 13:15, 16.