Kaiela o Kixikanu Kiâ
1. Ihi i tua-nda dilonga mu Milongi ia Bibidia mu Kilunga, mu semana ia 19, ia Kamusasadi?
1 Mu semana ia 19, ia Kamusasadi ka 2015, tua-nda mateka kudilonga o divulu Kaiela o Kixikanu Kiâ, mu Milongi ia Bibidia mu Kilunga. O divulu didi, dijimbulula 14, a misoso ia Bibidia ia mala ni ahatu a fiiele. O divulu didi, a disoneka mu ukexilu u tu kuatekesa kuxinganeka o athu a misoso, kála athu a kidi, a dibhanene ni ibhidi mu kusidivila Jihova. O divulu didi, di tu longa ué madisá a tu kuatekesa ku muenhu uetu lelu.—Jihe. 6:12.
2. Jimbulula ihi i tu sanga mu divulu Kaiela o Kixikanu Kiâ.
2 Ihi i tu Sanga mu Divulu Didi: O divulu didi dizuela ué ia lungu ni kithangana ni ji mapa ji tu kuatekesa kuijiia se thembu kuxi ni kuebhi kua tungile o athu a misoso. Mu kusuluka, kala kibatulu kiala ni mbandu iambe “Phala Kuxinganeka . . . ,” ia-nda tu kuatekesa kuxinganeka mu misoso ni kukumbidila o milongi i tua dilongo. Mu divulu didi, muala ifikula iala ni jikolo ja iuka, o ji fikula mu milongi íii, a ji tokuesa kiambote, ia-nda tu kuatekesa kuxinganeka o misoso.
3. Ihi i tu tena kubhanga phala kukatula mbote mu kudilonga o divulu didi?
3 Kiebhi ki u Tena Kukatula Mbote: O mukanda ua Kibuka kia Utuminu u tu kuatekesa ni izuelu: Xinganeka mu misoso, tanga phala i tule ku muxima uê. Xinganeka kiebhi kia divu o athu a bhange mbandu mu misoso ni kutala ioso ia mono. Tala kiebhi ene kia dibhana ni maka mu izuua iâ ni kiebhi ki ueji dibhana ué se u bhita ni maka lelu.” Kuxinganeka ki kulombolola, kuzuela ima ki tu ijiia maji o kuxinganeka i zuela o musoso ni athu a bhanga mbandu ku musoso. Kubhanga kiki, kubhinga kithangana ki kuxinganeka. (Neh. 8:8) Se o disá di mateka bhu kaxi ka kibatulu, o muendexi ua tokala kubhitulula o milongi ia tundu-mu, 30 a tu ithangana mba kithangana 1. Se o disá ki diala ni mbandu iambe “Phala Kuxinganeka. . . ” o muendexi ua tokala kubhanga kibhuidisu kimoxi mba iiadi, phala kubhitulula.
4. Mukonda diahi tua tokala kudilonga o divulu, Kaiela o Kixikanu Kiâ?
4 Tuala ku mundu ua iibha u bhangesa kuzozesa o kixikanu kietu ni kima kioso-kioso. O divulu didi—ni jimbandu ji moneka mu Mulangidi ua kubhana ku athu, ujitu ua tu bhana Jihova, phala kukolesa o kixikanu kietu. (Tiia. 1:17) Tua-nda katula mbote iavulu mu kuia ithangana ioso mu kiônge ni kubhana itambuijilu kioso ki tua-nda dilonga o divulu didi!