O Mubhangi Wetu Wakazola Utusuwa

1. O MUBHANGI WETU UBHANGESA O DIKUMBIDI KUMWIKINA

O kwila eye waxinganeka kyá kutunga mu ixi sé o mukengeji wamwanya? O mwanya ubhana kutena kumixi phala kusabhukisa máfwe, itulu, ibundu, jinoze ni jimbutu. Utena we kubhangesa o mixi kusunga o menya mumavu bhu kaxi ka jindanji anga abanda katé kumáfwe, mukusuluka adibhanga muha mba vapolo.

2. O MUBHANGI WETU UBHANGESA KUNOKA

O mvula ujitu wadikota utubhana Nzambi, ibhangesa o ixi kubhana kudya ni tudye. Nzambi utubhana mvula, utubhana we ithangana ya kubhongolola o jimbutu; utubhana kudya kwambote, uzalesa o mixima yetu ni kusanguluka.

3. O MUBHANGI WETU UBHANA KUDYA NI IZWATU

Jitata javulu jithandanganya mukusota kudya kwasoko ni izwatu phala o miji yâ. Tala ihi izwela o Bibidya: “Talesenu jinjila ji bhita bhulu, kuma ki jene ku kuwa, ki jene kukuna, ki jene kubhongolola mu itula; Tat’enu ya dyulu-phe u ji disa! Ni enu-phe ni jinjila, kífwa enu ki mu kot’èlele?”—Matesu 6:25, 26.

“Xinganeka itulu ku mukáwu, kyoso ki i kula . . . ; Eme-phe ngi mi ambela kuma, né [Sobha] Solomá ni kijingu kyê kyoso, ka kembele kala kya kembe kakitulu kamoxi-ku. Ngana Nzambi phe kya zwika kiki o yangu ku mukáwu . . . , kífwa ki ki mu kala kot’èlele o ku mi zwika enu?”—Matesu 6:28-30.

Kuma Nzambi utena kutubhana kudya ni izwatu, ni kidi kyoso mwene utena kutukwatekesa we kudibhana ni ibhindamu yamukwa kumwenyu. Se tusota kubhanga o vondadi ya Nzambi, mwene utena kubesowala o nguzu itubhanga phala kusota kudya mba utena kutukwatekesa kusanga salu yanda tukwatekesa kusumba ima i twabhindamena.—Matesu 6:32, 33.

Mukidi, twala ni ima yavulu itubhangesa kuzola Nzambi kyoso kitutala o dikumbi, o mvula, o jinjila, ni itulu. O milongi yakayela yanda londekesa kyebhi o Mubhangi wetu kyene mudizwelesa ni athu.