O Kukondama Kuhádya—Kwene Kwamesena o Athu Oso
Ukexilu webhi uwamesena kukala nawu kuhádya? Kala o athu oso, sé phata, eye wamesena kukala ni kukondama kuhádya, phala eye ni mwiji wé woso—o kusanguluka, o sawidi yambote, paze, ni ima phala kudikila o ibhindamu yé.
Athu avulu ala ni phata, kejiya ni kidi kyoso, se andakala ni ukexilu wamesena kuhádya. Ene amona kwila, o ima ilunguluka ni lusolo, ki ibhiti kala kexile mukingila, kala o dibhebhu dya COVID-19—dyalungulula o myenyu ya athu, dyabhekela wadyama, katé mwene dya jibha athu avulu. Mukonda dya kiki, atandanganya kwila ene kandakala dingi ni kukondama kuhádya.
Ni ukexilu yú wa kuxinganeka, o athu atangadanganya phala kusanga kima kya abhekela o kukondama. Akamukwa abanza kwila o kudyelela kujimbote kwene kwanda kwa abhekela o kukondama kuhádya. Avulu asota kudilonga kyavulu ni kusota jimbote mukuxinganeka kwila, o ima yiyi yandakwabhekela o ima yamesena. Akamukwa axinganeka kwila o kukala muthu wambote kyene o kima kyoso kyabhingi phala kukala ni mwenyu wabeta dingi kota.
O kwila mu ima yoso yiyi sayi kima kikwambata kumbote iwamesena kuhádya? Phala kusanga o kukondama kuhádya eye wabhingi kudilonga o ibhwidisu yala kulwiji:
Ihi itena kulondesa kyebhi kyandakala o mwenyu wé kuhádya?
O kwila o kudilonga kyavulu ni kukala ni jimbote kutena kukubhana o mwenyu wabetakota?
O kwila o kukala muthu wambote kukubhekela o kukonda kuhádya?
Kwebhi ku utena kusanga o kima kyabetakota kyandakubhekela o kukondama kuhádya?
O Mulangidi yú wandakukwatekesa kusanga o itambwijilu ya ibhwisidisu yiyi.