Kolesa Dingi o Ukamba wé ni Jihova

MU MIVU yoso jimbudi javulu ja Jihova, ene muvutuka mu kilunga kya Jikidistá. Ejiya kwila o “ku dyulu, o ku sanguluka kwâ kuvula dingi” kyoso o kambudi ki kavutuka mu kilunga! (Luka 15:7, 10) Se wavutuka mu kilunga xikina kwila Jezú, o ji anju ni Jihova, asanguluka kyavulu mukumona kwila, eye wavutuka mu ubhezelu wakidi. Maji kyoso ki uya ni kukolesa dingi o ukamba we ni Jihova, eye utena kudibhana ni ibhidi. Yebhi o ibhidi? Ihi itena o kukukwatekesa?

YEBHI O IBHIDI?

Jiphange javulu jamala ni ja ahatu, adivwa hanji kyayibha ne mwene kyoso kyavutuka kya mukilunga. Nange utendela kyebhi kya divwile Sobha Davidi, ne mwene kyoso kyamuloloka o ituxi ye, mwene wambele: “Eme ki ngal’iki, milonga ya ngi tundu.” (Jisá. 40:12; 65:3) Kyoso o muthu kyavutuka kwa Jihova, mwene utena hanji kuditatela mba kukala ni jisonyi mu mivu yavulu. Phange Nzebele, amutele mukamukonde mu 20 amivu ndenge,a wambe: “Kyangibhonzele kuxikina kwila, Jihova utena kungiloloka.” Se uluwala, o ukamba we ni Jihova utena kuzoza dingi. (Jisa. 24:10) Sota kubhanga yoso i utena phala kiki kikibhite neye.

Amukwa akala ni woma kyoso kya xinganeka mu ima yoso yabhingi o kubhanga phala kukala dingi ni ukamba wambote ni Jihova. Kyoso kyavutuka mu kilunga, phange Thonyi wambe: “Eme ngajimbile kya ima yavulu ingadilongele ande dya kuxisa o kilunga.” Mukonda dya kudivwa kiki, amoxi kene mudibakula ni muxima woso mu ikalakalu mu kilunga.

Mu kifika, se muthu inzo ye a ibula ku kithembwe, mwene utena kuthandanganya mu kuxinganeka mu salu yadikota yandakala nayu phala kutunga dingi o inzo yé. Kyene we kimoxi. Se eye uzanga o ukamba we ni Jihova mukuta kituxi kyadikota, utena we kuthandanganya mukuxinganeka mu nguzu iwandabhanga phala kukala dingi ni ukamba wambote ni Jihova. Maji sayi kikwatekesu.

Jihova utubhanga o kixanu kiki: “Izenuphe kyá, mu ngi sambulule mba tubatule o maka mudyetu, eme Jihova.” (Iza. 1:18) Eye wakalakala kya kyavulu phala ‘kudisambulula’ ni Jihova. Jihova wakuzolo mukonda dya nguzu iwamubhanga. Xinganeka ngó: Kuma wavutuka kwa Jihova, eye utena kukala phangu phala Jihova kulondekesa kwa Dyabhu kwila, mwene mukwa makutu!—Jisa. 27:11.

Mukubhanga kiki, eye wandazukama dingi kwa Jihova, mwene wakanena we kwila, wandazukama dingi kokwé. (Tiya. 4:8) Kima kyambote akwenu kumona kwila eye wavutuka mukilunga, maji kwabhingi kubhanga dingi kima kyengi. Eye wabhingi kusuluka ni kubandekesa o henda yé kwa Tata ni Kamba dyé, Jihova. Kyebhi ki utena kubhanga kiki?

SUWA JIMBAMBE JI UTENA KUKUMBIDILA KYOSO KI UYA NI KUBANDEKESA O UKAMBA WÉ NI JIHOVA

Sota kusuwa jimbambe ji utena kukumbidila. Eye nange wamulembalala hanji yoso iwadilongo yalungu ni Jihova ni ikanenu yê yalungu ni Palayizu. Maji kindala eye wabhingi kubhanga o ikalakalu mu nzumbi kala: Kuboka semana joso, kuya muyônge ni kubhita ithangana ni jiphange. Xinganeka mu jimbambe jiji jakayela.

Zwela ni Jihova mu ithangana yavulu. Tata yé utendela kwila, o kuditatela kutena kubhonzesa kusamba kwa mwene. (Loma 8:26) Né kiki, ‘kolokota mu kusamba,’ tangela kwa Jihova kwila, wamesena kyavulu kukala ukamba dyê. (Loma 12:12) Phange Mandele walembalala yabhitile ne, wixi: “Eme ngexile muditatela, ngexile we ni jisonyi. Maji o kusamba kyavulu, kwasosolola o kuditatela ni jisonyi jami. O muxima wangitululukile dingi.” Se kiwejiya o ima iwatokala kutumbula mumisambu, tanga o misambu ya Sobha Davidi, kyoso kya dyela, yosoneke mu divulu dya Jisálamu kibatulu 51 ni kibatulu 65.

Dilonge o Bibidya ithangana yoso. Kubhanga kiki, kwanda kudikila mu nzumbi, kwandabandekesa o henda yé kwa Jihova. (Jisá. 19:7-11) Phange Filipe wambe: “Kukamba kudilonga o Bibidya ithangana yoso, kwene kwazozesa o ukamba wami ni Jihova. Kingimesenene kwila, kiki kikibhita dingi neme lwamukwa. Kyenyiki, ngasolo kudilonga o Bibidya ithangana yoso phala kudifikidila mu nzumbi.” Eye we kyene ki utena kubhanga. Se wabhindamena jindunge phala kusola o maka uwa tokala kudilonga, utena kubhinga kikwatekesu kudikamba dyakulu mu nzumbi.

Kolesa dingi o ukamba ni jiphange jé mukilunga. Sayi ya avutuka mukilunga, atandanganyele mukuxinganeka kwila, akwa anda kwa atala mu ukexilu wayibha. Phange Laura wambe ni kidi kyoso: “Eme ngexile ni jisonyi javulu. Ngadivwile kwila, ngaluwalesa o jiphange jami. Ngadivu kiki mu thembu yavulu.” Dyelela kwila, o tufunga ni jiphange jamukwa jakulu mu nzumbi, amesena kyavulu kukukwatekesa, phala ukale dingi ni ukamba wambote ni Jihova. (Tala o kaxa “Ihi Itena Kubhanga o Tufunga?”) Ene asanguluka kyavulu mukumona kwila eye wavutuka mukilunga, amesena kwila uditunda kyambote, usanguluka!—Jisa. 17:17.

Ihi itena kukuzukamesa dingi kukilunga? Dibhakule ni muxima woso mu ikalakalu ya kilunga, mukuya muyônge, ni mu kikalakalu kya kuboka. Kiki kyanda kukwatekesa kyebhi? Phange Fele wambe: “O jiphange exile mukingila ni hanji yoso o kizuwa kingeji vutuka mukilunga. Kiki kyangibhangesa kudivwa kwila, mbe ngala ni valolo. Enyoso angikwatekesa kudivwa kwila, ngatokala dingi ku kilunga, Jihova wangiloloka, angikwatekesa kusuluka ni kusidivila Jihova.”—Tala o kaxa “Ihi i Utena Kubhanga?”

KANA KUBHWILA!

Satanaji wandasuluka ni kukubhekela ibhidi kumwenyu, phala kukuzozesa, phala ki utene kukala dingi ni ukamba wambote ni Jihova. (Luka 4:13) Phala kukala polondo, eye watokala kukolesa kindala o ukamba wé ni Jihova.

Yalungu ni Jimbudi jê, Jihova wakanena: “Yoso ya jimbidila ngi ikenga, o ya ditexi ngiza nayu dingi, o ya bukula kinama ngi ita mu kitanda, o ya kate ngi itumba.” (Ize. 34:16) Jihova wakwatekesa kya athu avulu kuvutuka kwa mwene. Kyenyiki, dyelela kwila, mwene wamesena kukukwatekesa, kusuluka ni kukolesa o ukamba wé ni mwene.