2 | “Kiswinisu Kya Mikanda Ikôla”

O BIBIDYA YAMBA KIKI: “Mukonda ima yoso yosoneke mu Mikanda Ikôla, a isoneka phala ku tulonga, phala bhukaxi ka kukolokota kwetu ni kiswinisu kya Mikanda Ikôla, tukale ni kidyelelu.”—LOMA 15:4.

Ihi Ilombolola o Izwelu Yiyi?

Kyoso kitwamudibhana ni ibanzelu yayibha, o Bibidya itena kutuswinisa ni kutukolokotesa. O Bibidya itubhana we o kidyelelu kya kwila, ku hádya kikwandakala dingi ndolo mukonda dya kukala ni kikote ku muxima.

Kiki Kitena Kutukwatekesa Kyebhi?

Etu enyoso sayi bhabha tukala ni hele, maji o athu ala ni uhaxi wa kikote ku muxima, akala ni hele yavulu mu ithangana yoso. Kyebhi o Bibidya itena kwakwatekesa?

Mu Bibidya tusangamu ibanzelu yambote, itena kukatula o ibanzelu yayibha itwala nayu. (Filipe 4:8) O izwelu yiyi itena ku tutululukisa o mixima ni ilunji, ni kutukwatekesa o kulanga o ibanzelu yetu.—Jisálamu 94:18, 19.
O Bibidya itena kutukwatekesa kutolola o kibanzelu kya kwila kitwala ni valolo.—Luka 12:6, 7.
Jivelusu javulu mu Bibidya jitudyelelesa kuma kitwala ubheka, ni kwila Nzambi o Mubhangi wetu, utendela kyambote kyebhi kitwamudivwa.—Jisálamu 34:18; 1 Nzwá 3:19, 20.
O Bibidya ikanena kwila Nzambi wandazubha o ima yoso itubhangesa kukala ni kikote ku muxima. (Izaya 65:17; Dijingunwinu 21:4) Kyoso kitwamudibhana ni ibanzelu yamu tutandanganyesa, o kikanenu kiki kitubhana o nguzu itwabhindamena phala kukolokota.

Kyebhi o Bibidya Yamukwatekesa Jessica

O Uhaxi wa Kikote ku Muxima Ungibhangesa Kukala Kyebhi?

“Kyoso kingexile ni 25 kya mivu, ngakwata uhaxi wexile mu ngibhangesa kutandanganya kyavulu ni kukala ni kitongolwelu kya neme. Mukonda dya kiki ngakwata uhaxi wengi: o kukala ni kikote ku muxima. Ngexile mutala hadi yavulu mukonda dya ima yayibha ingabhitile nayu. O jidotolo ja ngikwatekesa kutendela kwila ngexile ni kikote ku muxima mukonda dya ima yayibha yabhitile ku mwenyu wami. O kikwatekesu kyâ ni milongo yatokala ya ngikwatekesa kwijiya o ixinganeku yayibha ni ku itolola.”

Kyebhi o Bibidya Yene mu Ngikwatekesa?

“Kyoso o uhaxi wangikwatele ni nguzu yoso, ngexile musasumuka mu ithangana yoso, ngexile ni hele yavulu ni kufula o kilu. Mu mausuku, kingexile mu zeka mukonda dya ibanzelu yayibha yexile mufunyisa o kilunji kyami. Kala kyamba o Sálamu 94:19, Nzambi utukonda o malamba, utubatamesa o muxima kyoso kituvula o hele. Mu kyenyiki ku mbandu ya hama yami, kwexile kyá Bibibya ni kadernu mwexile jivelusu jakexile mu ngiswinisa. Kyoso kingakambele o kuzeka, ngexile mutanga jivelusu mu Bibidya ni kwehela o ibanzelu ya Nzambi ku ngitululukisa o muxima.

“O Bibidya ituswinisa kutolola o ibanzelu itubhangesa kuxinganeka kwila Nzambi katusuwu. Mu ukulu, ngaxikinine ni kidi kyoso kwila kingexile ni valolo ni kwila athu katokalele kungizola. Maji bhukaxi ka Bibidya ngamono kwila o ima yiyi makutu. Mukonda yene ilonga kwila Nzambi henda, Tata watuzolo muthu ni muthu. Bhofelebhofele mu veji dya ibanzelu yami kungitambula konda, éme ngexile mu ilanga. Ngexile mudimona, kala kingimona Nzambi. Kubhanga kiki kyangikwatekesa kyavulu kudimona mu ukexilu watokala.

“Ngikingila ni hanji yavulu o kithangana kyoso ixinganeku yayibha ki yandakwiza dingi ku muxima wetu. Ngejiya kwila ku hádya kitwanda dibhana dingi ni uhaxi wa kuvula o hele, wa kikote ku muxima ni mauhaxi amukwá. Kiki kingibhana nguzu phala kukolokota kindala, ngala we ni kidyelelu kwila kwakambe ngó bhofele kingandakala dingi uhaxi yú wa kuvula o hele.”