Dinah ua di te mu Ibhidi

UA MU mona se Dinah ua múia mu kunda nanhi? Muéne ua múia mu kunda o ilumba ia akua Kanana. O kuila tat’ê Jakobo kiki kia mu uabhele? Phala ku tambuijila, lembalala se ihi Mbalahamu ni Izake ia banzele ia lungu ni ahatu ia akua Kanana.

Ua mesene Mbalahamu kuma mon’ê Izake u kazala ni kilumba kia Kanana? Kana, muéne ka mesenene. Izake ni Bebeka a mesenene kuma mon’ê, Jakobo u kazala ni kilumba kia Kanana? Kana, ene ka mesenene. Uejiia se mukonda diahi?

Mukonda athu akua Kanana akexile abhezi a nzambi ja makutu. Ene ka kexile athu ambote phala ku kazala nâ, né ka kexile athu ambote phala ku di bhana nâ, kála makamba. Mu kienhiki, tu tena ku kala ni kixikinu kuma Jakobo ki kia mu uabhele kioso mon’ê kia di bhange dikamba ni ilumba ia akua Kanana.

Mu kidi, Dinah ua di tele muene mu ibhidi. Ua mu mona o diiala diná mukuá Kanana mu fikula, ua mu tala Dinah? Dijina diê Xikeme. Saí kizuua, Dinah kiendele mu kunda ahatu a Kanana, Xikeme ua kuata Dinah iu ua mu jijidika ku zeka-nê. Kiki kiexile kituxi, mukonda o makaza ngó a tena ku zeka kumoxi. O ia bhange Xikeme kua Dinah, ia bhekele dingi ibhidi a mukuá.

Kioso o jiphange ja Dinah kiévu, akexile ni njinda iavulu. Kiiadi kiâ, Ximinhá ni Levi akexile ni njinda iavulu, a kuata ku jixibhata endele mu mbanza ia tukumuisa o maiala. Ene ni jiphange jê a jibha Xikeme, ni maiala oso a mukuá. Jakobo ua dizangalele, mukonda an’ê a bhangele kima kiaiibha.

Kiebhi kia mateka o ibhidi ioso íii? Ia mateka mukonda Dinah ua di bhangele dikamba dia athu ka beleselele o itumu ia Nzambi. Etu ki tua mesene ku bhanga makamba ni athu iâ, ki kiene?