Zuze a mu Zembe ku Jiphange jê

TALA o muzangala ua luuala ni ua bhele. Muéne Zuze. O jiphange jê a zubha ku mu sumbisa ku maiala a múia ku Ijitu. Kuenhoko, Zuze ua-nda kala mubhika. Mukonda diahi o jiphange jê a bhange o kima kiki kiaiibha? Mukonda ene akexile ni difuba dia Zuze.

Tat’â Jakobo, ua zolele kiavulu Zuze. Mukonda dia kiki, ua tumina ku mu tungila kazáku kauabha. O 10 dia makota kia mono kuila Jakobo ua zolele kiavulu Zuze, a mu kuatela difuba, ni a mu zembe. Maji saí kima kia mukuá kia a bhangesa ku zemba dingi Zuze.

Zuze ua lotele nzoji jiiadi. Mu nzoji jiiadi, Zuze u mona jiphange jê ku mu fukamena. Kioso Zuze kia tangela jiphange jê o nzoji jiji, ene a mu zembele dingi kiavulu.

Saí kizuua o jiphange ja makota ja Zuze kia kexile mu kuinga o ibhaku ia tat’â, Jakobo ua tumu Zuze kuia mu tala se kiebhi kia mu kuenda o jiphange jê. Kioso o jiphange ja Zuze kia mu mono, a di ambela mu diâ: ‘Ndokuenu tu mu jibhe!’ Maji Lubene o dikota diâ, uixi: ‘Kana, ki mu bhange kiki!’ Kienhiki, ene a kuata Zuze a mu takula mu dikungu dia kukuta. Ene akexile mu xinganeka hanji se ihi ieji mu bhanga.

Mu kithangana kieniókio, akua Ijimaiele a bhixila. Kienhiki, Juda ua zuelela jiphange jê: ‘Ndokuenu tu mu sumbise ku akua Ijimaiele.’ Kiki kiene kia bhangele. Ene a sumbisa Zuze mu 20 a kitadi kia phalata. Kiki kiexile kiaiibha!

Ihi ieji zuela o jiphange kua tat’â? Ene a jibha o hombo ni a bhilujula o kazáku ka Zuze mu manhinga a hombo. Kienhiki, ambata o kazáku kua tat’â Jakobo, ni exi: ‘Tua sange o kazáku kaka. Tala se ki kene o kazáku ka Zuze.’

Jakobo ua mono kuma kene muene. Muéne ua dikola ni ku dila, ‘Saí kiama kia jibha Zuze.’ O jiphange ja Zuze a mesenene kuila kiene ki banza tat’â. Jakobo ua luualele luavulu. Muéne ua didi mu izuua iavulu. Maji Zuze ka fuile kana. Ndoko tu tale se ihi ia bhiti nê kuenhoko kua mu ambatele.