DISÁ 14
O Mubhika ua Belesele Nzambi
Zuze uexile mon’â Jakobo. O makota mê ejiidile kuila o tata iâ ua zolele kiavulu Zuze, ene ndenge. Mudié, kiebhi ene kia divu? Difuba dia a kuata anga a mu zemba. Kioso Zuze kia loto jinzoji, ua ji tangela o makota mê. Ene a banzele kuila sai kizuua eji mu fukamena. Mu kiki a mu zembele dingi kiavulu!
Sai kizuua o makota mê akexile mu langa jimbudi bhua zukamene ku mbanza ia Xikeme. Jakobo ua tumikisa Zuze phala kuijiia se kiebhi kiexile mu bhita o makota mê. Ene a mono Zuze, ua kexile mu kuiza dikanga, a zuela mudiâ exi: ‘Ka jinzoji iú uiz’ó. Tu mu jibhe!’ Ene a mu kuata ia a mu takula mu dikungu dia zongo. Maji Judá, kota diê uixi: ‘Ki tu mu jibhe! Tu mu sumbisienu kala mubhika.’ Mu kiki, a mu sumbisa mu 20 a itadi ia phalata ku jingenji ja akua Midiiana akexile múia ku Ijitu.
Mu kienhiki, o makota mê a kuata o divunga diê, ia a dikunga mu manhinga a ka hombo, a tumikisa o divunga kua tat’â exi: ‘Didi ki diene o divunga dia mon’é?’ Mu kiki Jakobo ua banzele kuila, mon’ê a mu jibha ku kiama kia muxitu. Muene anga u kala mu dila mon’ê mu izuua iavulu. Sé-ku muthu ua tenene ku mu konda o malamba.
Ku Ijitu Zuze a mu sumbisile ku kabhitangu ka kilangidilu, dijina diê Potifale. Maji Jihova ua kexile mu kuatekesa Zuze. Potifale ua muene kuila Zuze uexile mukalakadi uambote, ueji tena ku mu dielela. Mu kubhita thembu, Zuze a mu bhana o ungana ua kulanga o dibhata ni imbamba ioso ia Potifale.
O muhatu ua Potifale ua kexile mu mona Zuze kuila diiala dia nguzu iu ua uabhele o pholo. Izuua ioso ua kexile mu tangela Zuze, phala kuzeka ni muene. Ihi ia bhangele Zuze? Muene ua kexile mu dituna ni kuzuela: ‘Kana! Kiki kima kiaiibha. Ngana iami ua ngi dielela kiavulu, eie u muhatu’ê. Se ngi ta phánda n’eie, kiki kituxi kia dikota kua Nzambi!’
Sai kizuua o muhatu ua Potifale ua kuata Zuze. Ua mu kuata mu divunga diê, maji Zuze ua lenge. Kioso Potifale kia bhixila kubhata, muene uambe kuila Zuze ua mesenene kuzeka-nê. Maji ka kexile mu zuela o kidi. Potifale njinda ia mu kuata, mu kiki ua te Zuze mu kaleia. Maji Jihova ka jimbi Zuze.
“Uila kiki, batâmenu bhoxi dia lukuaku lua Nzambi lua suina, muène a mi zangeleke bhu kitangana kiatokala.”—1 Phetele 5:6