Kiebhi o Tufunga Tua Ilunga Kia tu Kuatekesa?

O Mikanda ia Ngeleku, i zuela kiavulu ia lungu ni Barnabe ni poxolo Phaulu. O maiala iá a sidivila kala tufunga tua ilunga, mu ku kunda o ilunga ia dianga. Mukonda diahi? Ene a lalamane kiavulu ni mbote mu nzumbi ia jiphange jâ. Phaulu ua mesenene ‘kuia dingi mu kunda o jiphange,’ phala ku mona kiebhi kia kexile mu bhita. Muéne ua kexile polondo phala kuenda njila ia lebha phala kua kuatekesa. (Ikalakalu 15:36) íii iene o vondadi ia tufunga tua ilunga mu izuua ietu.

Ene a tu kunda phala ku tu suínisa. O kafunga ka ilunga u kunda 20 a ilunga ndenge, veji jiiadi ku muvu. Tu tena ku katula mbote iavulu ku jiphange jiji ni ahatu’â, se makaza. Ene a bhanga ioso phala kuijiia o minzangala ni adiakimi, ene a uabhela kuboka kumoxi n’etu ni ku tu bhana jindunge ja kulonga kiambote o maxibulu metu. O tufunga tutu, a kunda o jiphange kumoxi ni tufunga tua kilunga, a bhanga ué madiskursu mu kilunga ni mu iônge ia makota, phala ku tu kolokotesa.​—⁠Ikalakalu 15:35.

Ene alondekesa kuila a mesena o mbote ia athu oso. O tufunga tua ilunga, alondekesa kuila a mesena o mbote ia ilunga ioso mu nzumbi. Ene a diongeka ni tufunga tua kilunga ni akuatekexi a tufunga phala ku mona o ikalakalu iene mu bhanga o kilunga, ni kua bhana itendelesu ia tokala ia lungu ni kubhanga kiambote o ikalakalu iâ. Ene a kuatekesa o aboki a thembu ioso ku di tunda kiambote mu ukunji uâ, a sanguluka mu kuijiia o athu a mateka ku diongeka kindala kumoxi n’etu ni kuívua kiebhi kia mu di tunda. O tufunga tutu tua ilunga, a di bhakula mu vondadi iâ, mu kusidivila kala ‘akunji phala o mbote’ ietu. (2 Kolindo 8:23) Tua tokala kukaiela o phangu iâ, ia kubheza Nzambi.​—⁠Jihebeleu 13:7.

• Mukonda diahi o tufunga tua ilunga a kunda o ilunga?

• Kiebhi ki u katula mbote kioso kia kunda o kilunga?